—Man̈ acꞌ pensar, a ach tzach och dꞌa yichan̈ jun vin̈ rey chiꞌ in qꞌuexuloc, axo vin̈ ucꞌtac aj Aarón ol lolon a qꞌuexuloc. 2 Masanil tas tzin chec alaꞌ, al dꞌa vin̈ ucꞌtac chiꞌ, axo vin̈ ol lolon dꞌa yichan̈ vin̈ rey chiꞌ yic tzex yactanel vin̈ dꞌa smacbꞌen tic. 3 A inxo ol vacꞌ pitbꞌoquel spensar vin̈ rey chiꞌ yic ol stecꞌbꞌej sbꞌa vin̈. Yuj chiꞌ tzijtum tas satubꞌtac ol in chꞌox dꞌa Egipto tic. 4 Yujto man̈ ol schalaj yabꞌ vin̈ rey chiꞌ tas ol eyalaꞌ, yuj chiꞌ, a in ol in chꞌox val vipalil vacꞌan yaelal dꞌa Egipto tic. Icha chiꞌ ol aj ex vicꞌanelta dꞌa stzolal a ex in chon̈abꞌ Israel ex tic. 5 Ayic toxo ix in chꞌox vipalil chiꞌ, ayic toxo pax ex viqꞌuelta, ichato chiꞌ ol nachajel yuj ebꞌ aj Egipto tic to a in ton Jehová in, xchi dꞌa vin̈.

6 Ix scꞌanabꞌajej vin̈aj Moisés yedꞌ vin̈aj Aarón tas ix yal Jehová. 7 A vin̈aj Moisés chiꞌ, 80 abꞌil sqꞌuinal vin̈, axo vin̈aj Aarón chiꞌ, 83 abꞌil sqꞌuinal vin̈ ayic ix lolon ebꞌ vin̈ dꞌa yichan̈ vin̈ sreyal Egipto chiꞌ.

8 Ix yalanxi Jehová dꞌa vin̈aj Moisés yedꞌ dꞌa vin̈aj Aarón chiꞌ icha tic:

9 —Tato scꞌan vin̈ rey chiꞌ yil junoc chꞌoxnabꞌil, tzalan dꞌa vin̈aj Aarón tic to syactejem teꞌ scꞌococh vin̈ dꞌa sat luum dꞌa yichan̈ vin̈ rey chiꞌ, ol och teꞌ chanil, xchi dꞌa vin̈.

10 Ix lajvi chiꞌ, ix bꞌatxi ebꞌ vin̈ schavan̈il dꞌa vin̈ rey chiꞌ, ix scꞌanabꞌajan ebꞌ vin̈ scꞌulan icha ix yal Jehová. Ix yactanem teꞌ scꞌococh vin̈aj Aarón dꞌa yichan̈ vin̈ rey yedꞌ dꞌa yichan̈ masanil ebꞌ ay yopisio yedꞌ vin̈, elan̈chamel ix och teꞌ chanil. 11 Ayic ix yilan vin̈ rey icha chiꞌ, ix schec vin̈ avtaj ebꞌ vin̈ aj Egipto, ebꞌ vin̈ jelan yedꞌ juntzan̈ yic yajbꞌalil, ix scꞌulan ebꞌ vin̈ icha ix scꞌulej vin̈aj Aarón chiꞌ. 12 Ix yactejpaxem scꞌococh ebꞌ vin̈ dꞌa sat luum, ix ochpax chanil, palta ix turjibꞌat scꞌococh ebꞌ vin̈ chiꞌ yuj yic vin̈aj Aarón chiꞌ. 13 Vachꞌchom icha chiꞌ ix aji, palta man̈ jabꞌoc ix scha yabꞌ vin̈ rey chiꞌ. Ix yacꞌn̈ej pitbꞌoquel spensar vin̈ icha ix aj yalan Jehová.

14 Ix lajvi chiꞌ, ix yalanxi Jehová dꞌa vin̈aj Moisés chiꞌ:

—Ix pitbꞌiel spensar vin̈ rey chiꞌ, maj actajel ebꞌ in chon̈abꞌ Israel yuj vin̈. 15 Ayic sacbꞌinaj qꞌuicꞌan, tzex bꞌat dꞌa stiꞌ aꞌ nivan Nilo, tze tan̈van scꞌoch vin̈ achanvel taꞌ. Tzeyicꞌanbꞌat teꞌ cꞌococh ix och chanil. 16 Ataꞌ tzeyal dꞌa vin̈ icha tic: A Jehová co Diosal a on̈ hebreo on̈ tic, a checannac on̈ cot ul cal dꞌayach to tzon̈ actejel a on̈ schon̈abꞌ on̈ tic, yic bꞌat on̈ och ejmelal dꞌay dꞌa tzꞌinan luum. Palta masanto ticnaic man̈ jabꞌoc tza cha abꞌi. 17 Yuj chiꞌ ix yalanxi to ay tas ol schꞌox ilaꞌ yic tzojtaquejeli to a Jehová chiꞌ an̈ejton Dios Aytaxoneqꞌui. Ayic ol in macꞌan sat a aꞌ tic yedꞌ teꞌ in cꞌococh yambꞌilqꞌue vuj tic, ol och aꞌ chicꞌal. 18 Masanil nocꞌ chay ol chamoc, ol qꞌue sjabꞌ aꞌ, man̈xo ol yal-laj eyucꞌan jabꞌoc aꞌ tic, xa chi dꞌa vin̈ rey chiꞌ.

19 —Tzalpax dꞌa vin̈aj Aarón to syacꞌbꞌat teꞌ scꞌococh vin̈ dꞌa yibꞌan̈tac sjaj a aꞌ dꞌa Egipto tic: Dꞌa yibꞌan̈ aꞌ cotac yedꞌ aꞌ nivac melem yedꞌ dꞌa yibꞌan̈ aꞌ n̈ajabꞌ ton̈ej molan. Masanil a aꞌ ay dꞌa yol yic Egipto tic ol laj och aꞌ chicꞌal yedꞌ masanil aꞌ ayem dꞌa yol yedꞌtal yedꞌ dꞌa yoltac jucubꞌ, xchi Jehová.

20 Icha val ix aj yalan Jehová chiꞌ, icha chiꞌ ix yutej vin̈aj Moisés yedꞌ vin̈aj Aarón chiꞌ. Ix yicꞌanqꞌue teꞌ scꞌococh vin̈aj Aarón chiꞌ, ix smacꞌan sat a aꞌ vin̈ dꞌa yichan̈ vin̈ rey yedꞌ dꞌa yichan̈ masanil ebꞌ vin̈ ayoch yajalil yedꞌ vin̈. Dꞌa val jun rato chiꞌ ix och aꞌ chicꞌal. 21 Masanil nocꞌ chay ay dꞌa yol aꞌ Nilo chiꞌ, ix laj cham nocꞌ. Ix qꞌue sjabꞌ aꞌ, majxo yal-laj yucꞌan aꞌ ebꞌ aj Egipto chiꞌ. Masanil a aꞌ ay taꞌ, chicꞌxon̈ej ix aj aꞌ.

22 Icha pax chiꞌ ix yutej ebꞌ vin̈ ay dꞌa yol yic Egipto chiꞌ, yujto ay tas tzuji yuj ebꞌ vin̈ yuj tas cꞌaybꞌabꞌil yuuj. Icha chiꞌ ix aj spitanxi sbꞌa vin̈ rey icha ix aj yalan Jehová. Maj schalaj yabꞌ vin̈ tas ix yal vin̈aj Moisés yedꞌ vin̈aj Aarón chiꞌ. 23 Malaj val jabꞌoc yelcꞌoch tas ix yal ebꞌ vin̈ chiꞌ dꞌa yol sat vin̈ rey chiꞌ, ix meltzaj vin̈ dꞌa sdespacho. 24 Masanil ebꞌ anima dꞌa Egipto chiꞌ, ix sjoy a aꞌ ebꞌ yic syuqꞌuej dꞌa stitac a aꞌ chiꞌ, yujto masanil a aꞌ chiꞌ maxtzac yal-laj yucꞌji.

25 Yucubꞌixial yoch aꞌ chicꞌal,