—Ixic, bꞌat il vin̈ rey chiꞌ, tzalan dꞌa vin̈ icha tic: A Jehová tzꞌalan icha tic: Actejel ebꞌ in chon̈abꞌ yic bꞌat och ebꞌ ejmelal dꞌayin. 2 Tato man̈ ol actejel in chon̈abꞌ tic, ol vacꞌoch yaelal dꞌa ibꞌan̈, ol vacꞌ pitzvocqꞌue nocꞌ pajtzaꞌ dꞌa masanil a macbꞌen tic. 3 Ol vacꞌ pitzvoc nocꞌ dꞌa yol a aꞌ smasanil, ol laj och nocꞌ dꞌa yol a despacho yedꞌ bꞌaj tzach vayi. Ol laj qꞌue nocꞌ dꞌa sat a chꞌat. Ol laj och nocꞌ dꞌa yoltac spat ebꞌ ay yopisio edꞌoc, dꞌa yoltac spat masanil anima, dꞌa yoltac horno bꞌaj sbꞌo ixim pan tza vaꞌa yedꞌ dꞌa sattac acꞌanteꞌ bꞌaj syotzꞌchaj ixim pan chiꞌ. 4 Ol laj qꞌue nocꞌ dꞌa ibꞌan̈ yedꞌ dꞌa yibꞌan̈ ebꞌ ay yopisio edꞌoc yedꞌ dꞌa yibꞌan̈ masanil ebꞌ etchon̈abꞌ, xchi Jehová, xa chi dꞌa vin̈ rey chiꞌ.

5 Ix lajvi chiꞌ, ix yalanxi Jehová dꞌa vin̈aj Moisés chiꞌ:

—Al dꞌa vin̈aj Aarón to syacꞌbꞌat teꞌ scꞌococh vin̈ dꞌa yibꞌan̈ smasanil a aꞌ: A cotac aꞌ yedꞌ a nivac n̈ajabꞌ, yic sqꞌueta bꞌulnaj nocꞌ pajtzaꞌ. Ol majel yol yic Egipto tic yuj nocꞌ, xchi Jehová chiꞌ.

6 Ix yacꞌanbꞌat teꞌ scꞌococh vin̈aj Aarón chiꞌ dꞌa yibꞌan̈ a aꞌ chiꞌ. Ix qꞌueul bꞌulnaj nocꞌ pajtzaꞌ chiꞌ, ix majel masanil yoltac chon̈abꞌ chiꞌ yuj nocꞌ. 7 An̈ejaꞌ icha chiꞌ ix yutejpax ebꞌ vin̈ ay tas tzuji yuuj yedꞌ tas cꞌaybꞌabꞌil yuj ebꞌ, ix japax nocꞌ dꞌa yol chon̈abꞌ chiꞌ yuj ebꞌ. 8 Ix laj te pucax nocꞌ, yuj chiꞌ ix avtaj ebꞌ vin̈ chavan̈ chiꞌ yuj vin̈ rey chiꞌ, ix yalan vin̈ dꞌa ebꞌ vin̈:

—Cꞌanec dꞌa Jehová, yic ol yiqꞌuel nocꞌ pajtzaꞌ tic dꞌa co cal, ol vactanel e chon̈abꞌ tic, yic sbꞌat ebꞌ yacꞌ silabꞌ dꞌay, xchi vin̈ rey chiꞌ.

9 Ix tacꞌvi vin̈aj Moisés dꞌa vin̈:

—A ach ol alaꞌ bꞌaqꞌuin̈ tzin lesalvi dꞌa Jehová yic syicꞌanel nocꞌ pajtzaꞌ tic dꞌayach yedꞌ dꞌa ebꞌ ay yopisio edꞌoc yedꞌ dꞌa scal masanil anima yedꞌ dꞌa yoltac e pat. Axon̈ej dꞌa yol aꞌ Nilo ol can nocꞌ, xchi vin̈.

10 —Qꞌuicꞌan, xchi vin̈ rey chiꞌ.

Ix yalanxi vin̈aj Moisés chiꞌ:

—Icha chiꞌ ol ajoc, yic ol ojtaquejeli to malaj junocxo lajan spoder icha Jehová co Diosal a on̈ tic. 11 Icha chiꞌ ol aj yel nocꞌ dꞌa a despacho yedꞌ dꞌa yol spat ebꞌ ayoch yajalil edꞌoc yedꞌ dꞌa scal masanil anima. Ol cann̈ej nocꞌ dꞌa yol aꞌ Nilo, xchi vin̈.

12 Ix lajvi chi, ix elta ebꞌ vin̈ chavan̈ chiꞌ dꞌa yichan̈ vin̈ rey chiꞌ. Ix scꞌanan vin̈aj Moisés dꞌa Jehová to tzꞌel nocꞌ pajtzaꞌ chiꞌ. 13 Ix scꞌanabꞌajej Jehová tas ix scꞌan vin̈ chiꞌ. Ichato chiꞌ ix laj och ijan scham masanil nocꞌ pajtzaꞌ dꞌa yoltac pat, dꞌa amacꞌ yedꞌ dꞌa caltac teꞌ. 14 Axo ebꞌ anima ix laj molbꞌan nocꞌ chamnac pajtzaꞌ chiꞌ dꞌa junjun bꞌulan̈, chuclaj ix aj sjabꞌ yuj nocꞌ. 15 Ayic ix yilan vin̈ rey to man̈xalaj yaelal ayoch dꞌa yibꞌan̈ vin̈, ix yacꞌanxi pitbꞌoquel spensar vin̈, icha val ix yutej Jehová yalani, maj scꞌanabꞌajejlaj vin̈ tas ix yal dꞌa ebꞌ vin̈ chavan̈ chiꞌ.

16 Ix yalanxi Jehová dꞌa vin̈aj Moisés chiꞌ:

—Al dꞌa vin̈aj Aarón to syicꞌchaan̈ teꞌ scꞌococh vin̈, smacꞌan spococal lum luum vin̈ yedꞌ teꞌ yic smeltzajoch lum pococ chiꞌ cotac usal dꞌa masanil yol yic Egipto tic, xchi.

17 Ichaton chiꞌ ix yutej vin̈aj Aarón chiꞌ. Ix smacꞌqꞌue vaan lum pococ chiꞌ vin̈ yedꞌ teꞌ scꞌococh, yuj chiꞌ masanil lum pococ ay dꞌa yol yic Egipto chiꞌ, ix laj och lum cotac usal, ix och nocꞌ dꞌa anima yedꞌ dꞌa nocꞌ nocꞌ. 18 An̈ejaꞌ ebꞌ vin̈ ay tas tzuji yuj yalani, icha ix yutej vin̈aj Aarón chiꞌ icha chiꞌ ix yutejpax ebꞌ vin̈ snaani. Ix snibꞌej ebꞌ vin̈ ix och lum pococ chiꞌ cotac usal, palta maj yal-laj yuj ebꞌ vin̈. Ix chiji ebꞌ anima yedꞌ nocꞌ nocꞌ yuj nocꞌ us chiꞌ. 19 Yuj chiꞌ, ix yal ebꞌ vin̈ ay tas tzuji yuj yalani dꞌa vin̈ rey chiꞌ:

—A jun tic, a Dios tzꞌutani, xchi ebꞌ vin̈.

Palta ix pitbꞌiel spensar vin̈ rey chiꞌ, icha val ix yutej Jehová yalani. Maj schalaj yabꞌ vin̈ tas ix yal vin̈aj Moisés yedꞌ vin̈aj Aarón chiꞌ.

20 Ix yalanxi Jehová dꞌa vin̈aj Moisés chiꞌ icha tic:

—A qꞌuicꞌan dꞌa sacbꞌinaji, sbꞌat vin̈ rey chiꞌ dꞌa stiꞌ a aꞌ, yuj chiꞌ pet ex qꞌue vaan, bꞌat eyalan dꞌa vin̈: Icha tic yalan Jehová: Actejel ebꞌ in chon̈abꞌ yic tzꞌoch ebꞌ ejmelal dꞌayin. 21 Palta tato man̈ ol actejel ebꞌ, ol vacꞌcot junoc uman̈ nocꞌ cach icha tabꞌ dꞌa ibꞌan̈, dꞌa yibꞌan̈ masanil ebꞌ ay yopisio edꞌoc yedꞌ pax dꞌa yibꞌan̈ masanil a chon̈abꞌ. Ol bꞌudꞌjoquel masanil yol e pat yedꞌ masanil sat luum yuj nocꞌ. 22 Ayic ol ujoc juntzan̈ chiꞌ, man̈xalaj junoc nocꞌ cach chiꞌ ol ecꞌ dꞌa yol yic Gosén bꞌaj ayecꞌ ebꞌ in chon̈abꞌ. Icha val chiꞌ ol aj ojtacaneli to a in Jehová in, Dios in dꞌa masanil yolyibꞌan̈qꞌuinal tic. 23 Ataꞌ ol ojtaquejeli to chꞌoc yel in chon̈abꞌ tic dꞌa yichan̈ a chon̈abꞌ chiꞌ dꞌa yol in sat. A qꞌuicꞌan, max ecꞌbꞌatlaj saclembꞌat nocꞌ cach, xchi Jehová, xa chi dꞌa vin̈ rey chiꞌ.

24 Icha chiꞌ ix yutej Jehová. Ichaxo val tabꞌ yecꞌ nocꞌ cach chiꞌ, ix ochcꞌoch nocꞌ dꞌa yol sdespacho vin̈ rey yedꞌ dꞌa yoltac spat ebꞌ ay yopisio yedꞌ vin̈ yedꞌ masanil dꞌa yol smacbꞌen Egipto. Juneln̈ej ix yixtejbꞌat yol chon̈abꞌ chiꞌ nocꞌ.

25 Ix lajvi chiꞌ, ix avtajxicot ebꞌ vin̈ chavan̈ chiꞌ yuj vin̈ rey chiꞌ, ix yalan vin̈ dꞌa ebꞌ vin̈:

—Ixiquec, ix aqꞌuec e silabꞌ dꞌa e Diosal chiꞌ, palta man̈ ex el dꞌa yol yic Egipto tic, xchi vin̈.

26 Axo ix tacꞌvi vin̈aj Moisés chiꞌ:

—Max yal-laj icha chiꞌ, yujto a nocꞌ nocꞌ scacꞌ dꞌa silabꞌil dꞌa Jehová co Diosal chiꞌ, nivan yelcꞌoch nocꞌ dꞌa yol sat ebꞌ etchon̈abꞌ tic. Yuj chi, tato syil ebꞌ anima chiꞌ co milancham nocꞌ a on̈ tic, val yel tzam on̈ sjulqꞌuenej ebꞌ. 27 Yuj chiꞌ, yovalil tzon̈ bꞌat dꞌa tzꞌinan luum, oxeꞌ cꞌual stecꞌnabꞌil bꞌaj tzon̈ bꞌat chiꞌ. Ato taꞌ bꞌat cacꞌ co silabꞌ dꞌa Jehová co Diosal, icha ix yutej yalani, xchi vin̈.

28 Ix yalanpax vin̈ rey chiꞌ:

—Syal e bꞌat dꞌa tzꞌinan lum chiꞌ, yic bꞌat eyacꞌ e silabꞌ dꞌa Jehová e Diosal chiꞌ, an̈ej tato yel man̈ najatoc tzex bꞌati, tze cꞌanan dꞌa e Diosal chiꞌ vuj a in tic, xchi vin̈ rey chiꞌ.

29 Ix tacꞌvi vin̈aj Moisés chiꞌ dꞌa vin̈:

—An̈ej val tzin el dꞌa tic, tzin cꞌanan dꞌa Jehová to a qꞌuicꞌan tzꞌel nocꞌ cach tic dꞌayach, dꞌa ebꞌ ay yopisio edꞌoc yedꞌ dꞌa masanil a macbꞌen tic. Palta man̈xoocabꞌ on̈ ixtej, man̈xaocabꞌpax tas ol al dꞌayon̈ ayic ol bꞌat cacꞌan co silabꞌ dꞌa Jehová chiꞌ, xchi vin̈aj Moisés chiꞌ.

30 Ixn̈ej val elta vin̈aj Moisés dꞌa yol sdespacho vin̈ rey chiꞌ, ix scꞌanan vin̈ dꞌa Jehová. 31 Ix yabꞌan Jehová tas ix scꞌan vin̈ chiꞌ, ix yicꞌanel nocꞌ cach dꞌa vin̈ rey chiꞌ yedꞌ dꞌa ebꞌ ay yopisio yedꞌ vin̈ yedꞌ dꞌa masanil ebꞌ anima. Man̈xa junoc nocꞌ ix cani. 32 Palta an̈ejaꞌ ix spitejxi sbꞌa vin̈ rey chiꞌ, maj chajiel-laj ebꞌ israel chiꞌ yuj vin̈.