—Ixic dꞌa vin̈ rey chiꞌ, tzalan dꞌa vin̈: Icha val tic yalan Jehová co Diosal a on̈ hebreo on̈ tic: Chabꞌat in chon̈abꞌ tic yic tzꞌoch ebꞌ ejmelal dꞌayin. 2 Tato man̈ ol a chabꞌat ebꞌ, tato ol a yamn̈ejoch vaan ebꞌ, 3 ol cot voval, ol vacꞌanelta yabꞌil dꞌa nocꞌ e molbꞌetzal nocꞌ, ol cham nocꞌ yuj yabꞌil chiꞌ, aton nocꞌ chej, nocꞌ vacax, nocꞌ camello, nocꞌ bꞌuru, nocꞌ calnel yedꞌ nocꞌ chiva. 4 Palta ol in chꞌoxoꞌ to chꞌoc yel ebꞌ israel dꞌa vichan̈, yuj chiꞌ malaj junoc nocꞌ snocꞌ ebꞌ ol chamoc, xchi Jehová, xa chi dꞌa vin̈.

5 Ix yalancan scꞌual Jehová chiꞌ, ix yalani:

—A qꞌuicꞌan svacꞌcot jun yaelal chiꞌ, xchi.

6 Axo dꞌa junxo cꞌu chiꞌ, ix yacꞌancot yabꞌil Jehová dꞌa nocꞌ nocꞌ chiꞌ. Tzijtum nocꞌ smolbꞌetzal nocꞌ ebꞌ aj Egipto chiꞌ ix chami, axo pax ebꞌ aj israel, malaj junoc nocꞌ yic ebꞌ ix chami. 7 Dꞌa elan̈chamel ix bꞌat schecan iljoc vin̈ rey tato malaj nocꞌ yic ebꞌ israel chiꞌ ix chami. Vachꞌchom malaj junoc nocꞌ ix chami, palta ix spitejxi spensar vin̈ rey chiꞌ, maj actajel ebꞌ israel chiꞌ yuj vin̈.

8 Ix lajvi chi, ix yalan Jehová dꞌa vin̈aj Moisés yedꞌ dꞌa vin̈aj Aarón:

—Ixiquec, iqꞌueccot junoc votz qꞌuen ticꞌaqꞌuil taan̈ dꞌa yol junoc horno. A ach tic ach Moisés tza tzipqꞌue qꞌueen dꞌa chaan̈ dꞌa yichan̈ vin̈ rey chiꞌ. 9 Icha chiꞌ, ol saclemcanbꞌat qꞌuen icha pococ dꞌa masanil yol smacbꞌen Egipto, yuj qꞌueen ol qꞌue yabꞌil yaxcꞌa dꞌa masanil anima chiꞌ yedꞌ dꞌa nocꞌ nocꞌ, xchi Jehová.

10 Ix lajvi chi, ix bꞌat vin̈aj Moisés yedꞌ vin̈aj Aarón yicꞌcot qꞌuen taan̈ dꞌa junoc horno, ix bꞌat ebꞌ vin̈ yil vin̈ rey chiꞌ. Ayic ix cꞌoch ebꞌ vin̈ dꞌa yichan̈ vin̈, ix stzipanqꞌue qꞌueen vin̈aj Moisés dꞌa chaan̈. Ix lajvi chiꞌ, ix pitzviqꞌue yabꞌil yaxcꞌa dꞌa masanil anima chiꞌ yedꞌ dꞌa masanil nocꞌ nocꞌ. 11 Axo ebꞌ ay tas tzuji yuj yalani, majxo yal-laj schꞌoxan sbꞌa ebꞌ dꞌa yichan̈ vin̈aj Moisés chiꞌ, yujto ya ay ebꞌ yuj yabꞌil yaxcꞌa icha yaj masanil ebꞌ anima dꞌa Egipto chiꞌ. 12 Ix pitbꞌixiel spensar vin̈ rey chiꞌ yuj Jehová, maj schalaj yabꞌ vin̈ tas ix yal ebꞌ vin̈ chavan̈ chiꞌ, icha ix yutej yalan Jehová dꞌa vin̈aj Moisés chiꞌ.

13 Ix lajvi chiꞌ, ix yalan Jehová dꞌa vin̈aj Moisés:

—Spet ex qꞌue vaan qꞌuicꞌan, bꞌat ex lolon dꞌa vin̈ rey chiꞌ, tzeyalan dꞌa vin̈: Icha val tic yalan Jehová co Diosal a on̈ hebreo on̈ tic: Actejel ebꞌ in chon̈abꞌ yic bꞌat och ebꞌ ejmelal dꞌayin. 14 A dꞌa jun tiempoal tic ol vacꞌcot juntzan̈ yaelal tic dꞌa ibꞌan̈ yedꞌ dꞌa yibꞌan̈ ebꞌ ay yopisio edꞌoc yedꞌ dꞌa yibꞌan̈ ebꞌ a chon̈abꞌ, yic vachꞌ tzojtaquejeli to man̈xa junoc mach lajan spoder icha in tic dꞌa yolyibꞌan̈qꞌuinal tic. 15 Tato syal in cꞌool, tzin chꞌox vipalil dꞌayach, svacꞌanoch yaelal dꞌa ibꞌan̈ yedꞌ dꞌa yibꞌan̈ masanil ebꞌ anima dꞌa a macbꞌen tic. Syal tzex in satel dꞌa yolyibꞌan̈qꞌuinal tic. 16 Ocxo, manto ol ach in satel-laj, yujto ix ach vacꞌoch dꞌa opisio yuj in chꞌoxanel in poder yuj tas ol ach vutoc, yic te nivan ol aj in bꞌinaj dꞌa scal masanil anima dꞌa yolyibꞌan̈qꞌuinal tic. 17 Vachꞌchom tzijtum yaelal tzin chꞌox ilaꞌ, palta tza pitejn̈ej a bꞌa, an̈ejaꞌ max actejel-laj in chon̈abꞌ tic. 18 Yuj chi, a qꞌuicꞌan yabꞌ val icha hora tic, svacꞌanem qꞌuen sacbꞌat dꞌa yibꞌan̈ chon̈abꞌ tic. Mantalaj bꞌaj tzꞌem qꞌuen sacbꞌat yelxo val nivac icha qꞌuen tzꞌem chiꞌ yictax ix el yich chon̈abꞌ Egipto tic. 19 Yuj chiꞌ, al dꞌa ebꞌ vin̈ a checabꞌ to a masanil nocꞌ molbꞌetzal nocꞌ yedꞌ masanil tas ay dꞌa scal a munlajel to tzꞌochcan dꞌa yoltac lechpat, yujto ayic ol ja qꞌuen nivac sacbꞌat chiꞌ, masanil nocꞌ nocꞌ yedꞌ masanil anima malaj yen̈ul, ol cham yuj qꞌueen, xchi Jehová, xa chi dꞌa vin̈.

20 Ay ebꞌ vin̈ ay yopisio yedꞌ vin̈ rey, ix xivcanqꞌuei ayic ix yabꞌan ebꞌ yuj tas ix yal Jehová. Yuj chi, ix yacꞌqꞌue yen̈ul nocꞌ smolbꞌetzal snocꞌ ebꞌ vin̈. Ix ochpaxcan masanil schecabꞌ ebꞌ vin̈ dꞌa yoltac lechpat chiꞌ. 21 Ay juntzan̈xo ebꞌ maj yacꞌoch dꞌa scꞌol tas ix yal Jehová chiꞌ, ix can nocꞌ smolbꞌetzal nocꞌ yedꞌ ebꞌ schecabꞌ ebꞌ dꞌa ichn̈ejtaꞌ. 22 Ix lajvi chiꞌ, ix yalan Jehová dꞌa vin̈aj Moisés:

—Icꞌchaan̈ a cꞌabꞌ yic tzꞌem qꞌuen nivac sacbꞌat dꞌa yibꞌan̈ masanil anima, dꞌa yibꞌan̈ masanil nocꞌ nocꞌ yedꞌ dꞌa yibꞌan̈ masanil tas avabꞌil ay dꞌa yol smacbꞌen Egipto tic, xchi.

23 Yuj chiꞌ ix yicꞌanchaan̈ scꞌococh vin̈aj Moisés chiꞌ, ix macꞌvaj cꞌu, ix ecꞌ copoljoc lebꞌlon, ix cot qꞌuen nivac sacbꞌat dꞌa masanil sat lum dꞌa yol yic Egipto chiꞌ yuj Jehová. 24 Maxtzac ochlaj vaan yem qꞌuen sacbꞌat yedꞌ smacꞌvaj cꞌu yedꞌ yecꞌ copoljoc lebꞌlon. Malaj ton bꞌaj ix bꞌinaj yacꞌan juneloc sacbꞌat dꞌa yol yic Egipto dꞌa yalan̈taxo icha jun oval sacbꞌat ix yacꞌ chiꞌ. 25 Masanil tastac ay dꞌa Egipto chiꞌ, ix ixtaxbꞌat yuj qꞌuen nivac sacbꞌat ix yacꞌ chiꞌ. Ix cham ebꞌ anima yedꞌ nocꞌ nocꞌ aycan dꞌa spatictac pat yedꞌ masanil tastac ay dꞌa scaltac munlajel ix lajvicanel yuj qꞌueen, yedꞌ masanil te teꞌ ix laj ixtaxcanbꞌat teꞌ. 26 Axon̈ej dꞌa yol yic Gosén bꞌaj ayecꞌ ebꞌ israel, malaj val junoc cꞌotan̈ qꞌuen sacbꞌat chiꞌ ix emi.

27 Yuj chiꞌ ix schecan vin̈ rey avtajxicot ebꞌ vin̈ chavan̈ chiꞌ, ix yalan vin̈:

—Toxo ix nachajel vuuj ticnaic to a in ay in mul yedꞌ in chon̈abꞌ tic. Palta a Jehová, te tojoln̈ej syutej. 28 Toxo ix ecꞌ yibꞌan̈ smacꞌvaj cꞌu yedꞌ yem qꞌuen nivac sacbꞌat. Yuj chiꞌ, man̈xo ol viqꞌuecꞌ e tiempo, syal e bꞌat bꞌaj syal e cꞌool, an̈ej jun, comonoc tzꞌel dꞌa e cꞌol tze cꞌan dꞌa Jehová yic syiqꞌuel jun yaelal tic, xchi vin̈ rey chiꞌ.

29 Ix tacꞌvi vin̈aj Moisés chiꞌ dꞌa vin̈:

—An̈ej val tzin elcan dꞌa yol chon̈abꞌ tic, tzin mojbꞌan in cꞌabꞌ in lesalvi dꞌa Jehová, tzin cꞌanan dꞌay yic syactan yacꞌancot qꞌuen sacbꞌat tic, yic man̈xo ol macꞌvaj cꞌu, yic vachꞌ snachajel uuj to yic Jehová yaj masanil yolyibꞌan̈qꞌuinal tic. 30 Palta vojtac sicꞌlabꞌil to a ach tic yedꞌ ebꞌ ay yopisio edꞌoc, manta yelcꞌoch Jehová Dios dꞌa yol e sat, xchi vin̈.

31 A jantac tas avabꞌil, icha an̈ lino yedꞌ ixim cebada, masanil ix ixtaxcanbꞌati, yujto a ixim cebada ayxo sat ixim, an̈ejaꞌ an̈ lino ayxo xumaquil an̈. 32 Axo pax ixim trigo yedꞌ ixim centeno, malaj tas ix icꞌan ixim, yujto tzacꞌanxo tzꞌelul ixim.

33 Ayic ix lajvi slolon vin̈aj Moisés yedꞌ vin̈ rey chiꞌ, ix el vin̈ dꞌa yol chon̈abꞌ chiꞌ, ix yicꞌanchaan̈ scꞌabꞌ vin̈, ix lesalvi vin̈ dꞌa Jehová. A val dꞌa jun rato chiꞌ, ix vanaj yem qꞌuen sacbꞌat yedꞌ n̈abꞌ yedꞌ smacꞌvaj cꞌu. 34 Axo ix yilan vin̈ rey to maxtzac emlaj n̈abꞌ, maxtzac emlaj qꞌuen sacbꞌat, man̈xalaj cꞌu scꞌan̈i, an̈ejaꞌ ix ochxi smul vin̈, ix pitbꞌixiel spensar vin̈ yedꞌ ebꞌ ay yopisio yedꞌoc. 35 Yuj chiꞌ, majxo actajel-laj chon̈abꞌ Israel chiꞌ yuj vin̈, icha ix aj yalan Jehová dꞌa vin̈aj Moisés chiꞌ.