—Ixic il vin̈ rey chiꞌ, ix vacꞌ pitbꞌoquel spensar vin̈ yedꞌ ebꞌ ay yopisio yedꞌoc, yic vachꞌ tzin chꞌox juntzan̈ tas satubꞌtac tic dꞌa scal ebꞌ, 2 yic vachꞌ syal eyalan dꞌa ebꞌ eyuninal yedꞌ dꞌa ebꞌ eyi e chiquin masanil tastac ix aj vixtan ebꞌ aj Egipto tic yedꞌ juntzan̈ satubꞌtac ix in cꞌulej dꞌa scal ebꞌ. Icha val chiꞌ tzꞌaj eyojtaccaneli to a in ton Jehová in, xchi dꞌa vin̈.

3 Ix lajvi chiꞌ, ix bꞌatxi vin̈aj Moisés yedꞌ vin̈aj Aarón chiꞌ yilxi vin̈ rey chiꞌ, ix yalan ebꞌ vin̈ dꞌa vin̈:

—Icha val tic yalan Jehová co Diosal a on̈ hebreo on̈ tic: ¿Jantacto val tiempo ol a pitej a bꞌa, yic max iqꞌuem a bꞌa dꞌa vichan̈? Actejel in chon̈abꞌ yic bꞌat och ebꞌ ejmelal dꞌayin. 4 Tato manto ol a chabꞌat in chon̈abꞌ tic, a qꞌuicꞌan svicꞌancot nocꞌ cꞌulubꞌ dꞌa yibꞌan̈ a chon̈abꞌ tic. 5 Ol majel sat lum tic smasanil yuj nocꞌ. Man̈xa jabꞌoc luum ol checlajoc. Ol svachꞌ cꞌuxejbꞌat nocꞌ jantacto maj lajvoccanel yuj qꞌuen sacbꞌat chiꞌ yedꞌ masanil te teꞌ satani ol scꞌuxpaxbꞌat nocꞌ. 6 Ol bꞌudꞌjoccanel yol a despacho yuj nocꞌ yedꞌ yoltac spat ebꞌ ay yopisio edꞌoc yedꞌ masanil yoltac pat dꞌa yol yic Egipto tic. Malaj bꞌaj ix yil ebꞌ e mam eyicham junoc icha tic yictax ix ja cajan ebꞌ dꞌa jun lugar tic, xchi Jehová, xchi vin̈aj Moisés chiꞌ.

Ayic ix lajvi yalan juntzan̈ tic vin̈, ix elixta ebꞌ dꞌa yol sdespacho vin̈ rey chiꞌ. 7 Ix yalan ebꞌ vin̈ ay yopisio yedꞌ vin̈ rey chiꞌ:

—¿Bꞌaqꞌuin̈ ol yactej juntzan̈ vinac tic on̈ stzuntzani? ¿Tas yuj max actejel jun chon̈abꞌ chiꞌ yic sbꞌat och ebꞌ ejmelal dꞌa Jehová sDiosal chiꞌ? ¿Tom max nachajvalel jabꞌoc uuj, ina toxo ix juvicanbꞌat co chon̈abꞌ tic? xchi ebꞌ.

8 Yuj chiꞌ, ix avtajxicot ebꞌ chavan̈ chiꞌ yuj vin̈ rey chiꞌ:

—Ixiquec yic bꞌat ex och ejmelal dꞌa Jehová e Diosal chiꞌ, palta tzeyalcan dꞌayin machtac ex ol ex bꞌat chiꞌ, xchi vin̈.

9 Ix tacꞌvi vin̈aj Moisés chiꞌ:

—Co masanil ol on̈ bꞌatoc. Ol quicꞌbꞌat ebꞌ cotac unin yedꞌ ebꞌ icham anima, ebꞌ vin̈ cuninal yedꞌ ebꞌ ix quisil. Masanil nocꞌ co calnel, nocꞌ co vacax yedꞌ nocꞌ chiva, masanil nocꞌ co molbꞌetzal nocꞌ ol quicꞌbꞌati, yujto te nivan qꞌuin̈ ol cutej quicꞌanchaan̈ Jehová co Diosal, xchi vin̈.

10 Yuj chiꞌ ix yalanxi vin̈ rey chiꞌ:

—Vachꞌchom ayoch Jehová e Diosal chiꞌ eyedꞌoc, ¿tzam e nalaj to ol ex in chabꞌat yedꞌ eyetbꞌeyum yedꞌ eyuninal? Man̈ val jabꞌoc. Tobꞌan chuc tas tze naꞌa. 11 A exn̈ej vinac ex tic bꞌat ex och ejmelal dꞌa e Diosal chiꞌ, ina to a jun chiꞌ tze cꞌanaꞌ, xchi vin̈.

Ix lajvi chiꞌ, ix pechjielta vin̈aj Moisés yedꞌ vin̈aj Aarón chiꞌ dꞌa yichan̈ vin̈ rey chiꞌ. 12 Ix yalanxi Jehová dꞌa vin̈aj Moisés chiꞌ:

—Icꞌchaan̈ a cꞌabꞌ dꞌa yibꞌan̈ chon̈abꞌ Egipto tic, yic sjavi nocꞌ cꞌulubꞌ ul scꞌuxbꞌat masanil tastac ixto can yuj qꞌuen sacbꞌat chiꞌ, xchi.

13 Icha chiꞌ ix aj yicꞌanchaan̈ scꞌococh vin̈aj Moisés chiꞌ dꞌa yibꞌan̈ Egipto chiꞌ, ix yacꞌancot jun nivan oval icꞌ Jehová, ix cot dꞌa stojolal bꞌaj sjavi cꞌu. Jun val cꞌu yedꞌ jun acꞌval ix yacꞌ jun oval icꞌ chiꞌ, axo dꞌa junxo cꞌual, a jun icꞌ chiꞌ ix icꞌancot nocꞌ cꞌulubꞌ chiꞌ. 14 Masanil yol yic Egipto chiꞌ ix majel yuj nocꞌ. Malaj bꞌaj ix uji juneloc yictax yalan̈taxo, man̈xa bꞌaj olto ujoc icha junel tic. 15 Ix te majel sat lum yuj nocꞌ. Man̈xo chequeloc jabꞌoc luum. A jantacto tas ix can yuj qꞌuen sacbꞌat, ix lajviel yuj nocꞌ. Man̈xa jabꞌoc tas yaax yilji ix can yuj nocꞌ dꞌa yol yic Egipto chiꞌ, man̈xa pax sat te teꞌ yedꞌ schontac teꞌ. Pilan ix lajviel smasanil, axon̈ej steꞌal ix cani.

16 Dꞌa elan̈chamel ix avtajxicot ebꞌ vin̈ chavan̈ chiꞌ yuj vin̈ rey chiꞌ, ix yalan vin̈ dꞌa ebꞌ vin̈ icha tic:

—Ix och in mul dꞌa sat Jehová e Diosal yedꞌ dꞌayex. 17 Tzin tevi dꞌayex to tzeyacꞌ nivancꞌolal dꞌa in patic yuj in mul tic, axon̈ej dꞌa junel tic. Tze cꞌanan dꞌa Jehová e Diosal, yic tzꞌel jun yaelal to edꞌjinac chamel ayecꞌ dꞌa yol in macbꞌen tic, xchi vin̈.

18 A val yic ix elta vin̈aj Moisés dꞌa sdespacho vin̈ rey chiꞌ, ix lesalvi vin̈ dꞌa Jehová. 19 Ix lajvi chiꞌ, ix yacꞌancot jun icꞌ Jehová te ov. A bꞌaj sbꞌat cꞌu, ataꞌ ix cot jun icꞌ chiꞌ. Ix bꞌatcan nocꞌ cꞌulubꞌ chiꞌ dꞌa yol aꞌ Chacchac Mar yuuj, man̈xa junoc nocꞌ ix can dꞌa yol yic Egipto chiꞌ. 20 Ix pitbꞌixiel spensar vin̈ rey chiꞌ yuj Jehová, maj actajel-laj chon̈abꞌ Israel yuj vin̈.

21 Ix yalanxi Jehová dꞌa vin̈aj Moisés chiꞌ:

—A ticnaic, icꞌchaan̈ a cꞌabꞌ, yic vachꞌ sqꞌuicꞌbꞌiqꞌuinal dꞌa masanil yol yic Egipto tic. Yelxo val to qꞌuicꞌalqꞌuinal ol ajoc, xchi dꞌa vin̈.

22 Ix yicꞌanchaan̈ scꞌabꞌ vin̈ chiꞌ, ix ja jun nivan qꞌuicꞌalqꞌuinal dꞌa masanil yol yic Egipto chiꞌ. 23 Oxeꞌ cꞌual ix qꞌuicꞌbꞌi, man̈xa junoc ebꞌ syal yilanoch ebꞌ cajan dꞌa slacꞌanil, maxtzac yal-laj sbꞌeyecꞌ ebꞌ. Palta axo bꞌaj cajan ebꞌ israel sacqꞌuinal.

24 Yuj chiꞌ, ix avtajxicot vin̈aj Moisés yuj vin̈ rey chiꞌ, ix yalan vin̈:

—Syal bꞌat eyoch ejmelal dꞌa Jehová, iqꞌuecbꞌat eyetbꞌeyum yedꞌ eyuninal. An̈ej to tzeyactejcan masanil nocꞌ e molbꞌetzal nocꞌ, xchi vin̈.

25 Ix yalan vin̈aj Moisés chiꞌ: Yovalil tzon̈ a chabꞌat yedꞌ nocꞌ co molbꞌetzal nocꞌ chiꞌ, yujto a nocꞌ co nocꞌ chiꞌ ol cacꞌ co silabꞌoc dꞌa Jehová co Diosal. 26 Masanil nocꞌ co nocꞌ chiꞌ ol quicꞌbꞌat quedꞌoc, man̈xo junoc nocꞌ ol cactejcani, yujto dꞌa scal nocꞌ ol co siqꞌuel nocꞌ ol cacꞌ co silabꞌoc dꞌa Jehová co Diosal. Ayic manto on̈ cꞌochlaj taꞌ, maxto nachajel-laj cuuj mach nocꞌ ol cacꞌ co silabꞌoc chiꞌ, xchi vin̈aj Moisés chiꞌ.

27 An̈ejaꞌ ix pitbꞌixiel spensar vin̈ rey chiꞌ yuj Jehová, yic max actajel ebꞌ chon̈abꞌ israel yuj vin̈. 28 Yuj chiꞌ ix yalanxi vin̈ rey chiꞌ dꞌa vin̈aj Moisés chiꞌ:

—Elan̈ dꞌa vichan̈. Man̈xo a naꞌa to svil a sat junelxo dꞌa tic, yujto ta tzach javi junelxo dꞌa vichan̈ tic, a dꞌa jun cꞌual chiꞌ tzach chamxon̈ej, xchi vin̈.

29 Ix tacꞌvi vin̈aj Moisés chiꞌ icha tic:

—Ichaton val tzal chiꞌ, man̈xa bꞌaqꞌuin̈ ol vil a sat junelxo, xchi vin̈.