—Ol vacꞌcot junocxo yaelal dꞌa yibꞌan̈ vin̈ rey tic yedꞌ dꞌa yibꞌan̈ masanil anima dꞌa yol yic Egipto tic. Ol lajvoc yecꞌ jun tic, man̈ ton̈ejoc ol ex actajel yuj vin̈ rey tic, palta to a val lacꞌan vin̈ ol ex pechanel dꞌa tic dꞌa juneln̈ej. 2 Yuj chiꞌ al dꞌa masanil ebꞌ israel, ebꞌ vin̈ vinac yedꞌ ebꞌ ix ix to scꞌan qꞌuen oro ebꞌ yedꞌ qꞌuen plata dꞌa ebꞌ aj Egipto cajan dꞌa slacꞌanil, xchi.

3 (Axo Jehová ix lolon dꞌa spensar ebꞌ anima aj Egipto chiꞌ, yic syacꞌan svachꞌcꞌolal ebꞌ dꞌa ebꞌ israel. An̈ejaꞌ ebꞌ vin̈ ay yopisio yedꞌ vin̈ rey, ix yalan ebꞌ vin̈ to nivan yelcꞌoch vin̈aj Moisés dꞌa yol sat ebꞌ vin̈. An̈ejaꞌ icha chiꞌ ix aj yalan masanil ebꞌ anima dꞌa Egipto chiꞌ.)

4 Ayic manto eltalaj vin̈aj Moisés chiꞌ, ix yalanxican vin̈ dꞌa vin̈ rey chiꞌ:

—Icha tic yalan Jehová: Ayic ol och chimilacꞌval, ol in ecꞌ dꞌa masanil yol yic Egipto tic, 5 yic svacꞌancham masanil ebꞌ bꞌabꞌel unin dꞌa junjun patil ebꞌ aj Egipto. Ol schael yich dꞌa vin̈ a bꞌabꞌel uninal, vin̈ dꞌin̈an yochcan a qꞌuexuloc dꞌa a despacho tic, masanto schampax sbꞌabꞌel unin ebꞌ ix a checabꞌ van scheni dꞌa qꞌuen chaꞌ. Ol champax nocꞌ sbꞌabꞌel yuneꞌ nocꞌ nocꞌ. 6 A dꞌa masanil yol yic Egipto tic, man̈xo jantacoc oqꞌuel ol ujoc, malaj bꞌaj ix uji dꞌa yalan̈taxo, man̈xa pax bꞌaj olto ujoc. 7 Axo ebꞌ israel malaj tas ol icꞌan ebꞌ, malaj pax tas ol icꞌan nocꞌ smolbꞌetzal nocꞌ ebꞌ, yic tzeyojtaquejeli to chꞌoc yel ebꞌ israel dꞌa yichan̈ ebꞌ a chon̈abꞌ dꞌa yol in sat a in Jehová in tic, xchi Jehová. 8 Ichato val chiꞌ ol javoc juntzan̈ ebꞌ vin̈ ay yopisio edꞌoc yic ol ul in yilani, ol em cuman ebꞌ, ol yalan ebꞌ dꞌayin: Ixic yedꞌ masanil mach tzacꞌanoch uuj, xcham ebꞌ. Yuj chiꞌ, ato taꞌ ol on̈ bꞌatoc, xchi vin̈aj Moisés chiꞌ.

Yelxo val te yoval vin̈ ayic ix elixta vin̈ dꞌa yichan̈ vin̈ rey chiꞌ.

9 Yalnacpax Jehová dꞌa vin̈:

—Man̈ton val ol schalaj yabꞌ vin̈ rey tas ol eyalaꞌ. Yuj chiꞌ tzijtumto tas satubꞌtac ol in cꞌulej dꞌa Egipto tic, xchinaccani.

10 A vin̈aj Moisés yedꞌ vin̈aj Aarón ix laj scꞌulejn̈ej ebꞌ masanil tastac ix laj alchaj tic to satubꞌtac dꞌa yichan̈ vin̈ rey, palta toton val a Jehová ix acꞌann̈ej pitbꞌoquel spensar vin̈ rey chiꞌ, yuj chiꞌ maj actajel ebꞌ israel yuj vin̈ dꞌa yol smacbꞌen chiꞌ.