2 A jun uj tic nivanocabꞌ yelcꞌoch dꞌayex, bꞌabꞌel uj dꞌa yol junjun abꞌil tzꞌajcani. 3-5 Alec jun checnabꞌil tic dꞌa masanil ebꞌ eyetisraelal: A dꞌa slajun̈il cꞌual yoch jun uj tic, junjun vinac ol yicꞌcot junoc nocꞌ yuneꞌ calnel, ma junoc nocꞌ yuneꞌ chiva yic schiꞌan yedꞌ masanil ebꞌ cajan yedꞌoc. A nocꞌ nocꞌ chiꞌ junjun abꞌil ocabꞌ sqꞌuinal nocꞌ, mocabꞌa jabꞌoc spaltail nocꞌ, an̈ej to smam nocꞌ. Tato man̈ tzijtumoc anima dꞌa yol spat, max tzacꞌvan ebꞌ schiꞌan nocꞌ, syal yavtan vin̈ aj pat chiꞌ mach cajan dꞌa slacꞌanil yic scolvaj ebꞌ schiꞌan nocꞌ yedꞌoc, to spucchajecꞌ nocꞌ ato syalaꞌ jantac sbꞌisul anima, ma jantac schi junjun ebꞌ. 6 Tze sicꞌcanel nocꞌ masanto dꞌa 14 yoch jun uj tic. Tze milcham nocꞌ dꞌa yemcꞌualil dꞌa jun cꞌu chiꞌ. 7 Junjun ebꞌ aj pat chiꞌ sbꞌon̈och schiqꞌuil nocꞌ dꞌa smarcoal spuertail spat bꞌaj ol chijoc nocꞌ chiꞌ, dꞌa teꞌ yibꞌan̈ yedꞌ dꞌa stzꞌeytac teꞌ. 8 A dꞌa jun acꞌval chiꞌ ol schi nocꞌ chibꞌej chiꞌ ebꞌ anima, palta ton̈ej ol bꞌolchaj nocꞌ, ol schi an̈ itaj ebꞌ cꞌaꞌ yedꞌ nocꞌ, axo ixim pan malaj yich aybꞌat ol sva ebꞌ. 9 Malaj jabꞌoc nocꞌ tze chi dꞌa yaxto, mato tzꞌan̈bꞌil. Masanil nocꞌ sbꞌolchaji. A sjolom nocꞌ, yoc nocꞌ yedꞌ yol scꞌol nocꞌ, bꞌolbꞌiln̈ej tzꞌaji, tze chiꞌani. 10 Man̈xo eyacꞌcan jabꞌocxo nocꞌ dꞌa junxo cꞌu. Tato ayto nocꞌ max lajvi eyuj jun, tze n̈uscantzꞌa nocꞌ. 11 Ayic ol ex va chiꞌ, tzecꞌbꞌilocabꞌ e nan̈al, ayocabꞌoch e xan̈abꞌ, yambꞌilocabꞌqꞌue e cꞌococh eyuuj, dꞌa elan̈chamel ol aj e chiꞌan nocꞌ. Aton taꞌ tzeyacꞌoch qꞌuin̈, yic tzin eyicꞌanchaan̈ a in Jehová in tic, yujto ol in ecꞌ dꞌa stitac e pat. 12 A in Jehová in svalaꞌ to a val dꞌa jun acꞌval chiꞌ ol in ecꞌ dꞌa yol yic Egipto smasanil, yic tzin macꞌancham masanil bꞌabꞌel unin dꞌa junjun pat yedꞌ nocꞌ sbꞌabꞌel yuneꞌ nocꞌ nocꞌ. Ol vacꞌ checlajeloc to malaj yelcꞌoch masanil sdiosal ebꞌ aj Egipto chiꞌ.

13 A schiqꞌuil nocꞌ nocꞌ chiꞌ, tze bꞌon̈och dꞌa spuertail stiꞌ e pat bꞌaj cajan ex ecꞌ chiꞌ. Aꞌ ol chꞌoxanoc to ayic ol in ecꞌ in macꞌcham masanil ebꞌ bꞌabꞌel unin yic ebꞌ aj Egipto chiꞌ, malaj junoc ex ol ex chamoc. Ayic ol vilanoch chicꞌ chiꞌ, bꞌen̈ej ol in ecꞌbꞌatoc. 14 Aton val jun cꞌual chiꞌ nivan ol ajcan yelcꞌoch dꞌayex, tzeyacꞌanoch junoc nivan qꞌuin̈ yic tzin eyicꞌanchaan̈ a in Jehová in tic. Masanil tiempo tze nacoti. Yedꞌ ebꞌ eyuninal ol snacot jun tic ebꞌ. Ley tzꞌajcan jun tic dꞌa e cal dꞌa masanil tiempo. 15 A ixim pan tze va dꞌa uqueꞌ cꞌu, mocabꞌa yich aybꞌat dꞌa scal ixim. Yuj chiꞌ a dꞌa sbꞌabꞌel cꞌual tzeyiqꞌuelta masanil yan̈al yich pan dꞌa e pat junjun ex. Tato ay junoc mach svaan ixim pan ay yich dꞌa juntzan̈ cꞌual chiꞌ, tze satel dꞌa e cal. 16 A dꞌa bꞌabꞌel cꞌu tze molbꞌej e bꞌa tzex och ejmelal dꞌayin. Icha pax chiꞌ tzeyutej dꞌa yuquil cꞌual, an̈ejaꞌ tze molbꞌejpax e bꞌa. A dꞌa chabꞌ cꞌual chiꞌ malaj mach smunlaji, an̈ej e bꞌoan va e bꞌa syalaꞌ. 17 Yovalil tze cꞌanabꞌajej jun qꞌuin̈ yic ixim pan malaj yich, yujto a dꞌa jun cꞌual chiꞌ, stzolal ol ex viqꞌuelta e masanil dꞌa yol yic Egipto tic. Junjun abꞌil tzeyacꞌoch jun qꞌuin̈ chiꞌ. Ley ol ajcanoc, yovalil scꞌanabꞌajej ebꞌ eyin̈tilal yic ol bꞌeyn̈ejbꞌatoc. 18 Tzꞌel yich e vaan ixim pan malaj yich chiꞌ dꞌa 14 yoch bꞌabꞌel uj dꞌa yemcꞌualil masanto dꞌa 21 yoch jun uj chiꞌ dꞌa yemcꞌualil. 19 A dꞌa uqueꞌ cꞌual chiꞌ malaj junoc mach ayecꞌ yich pan dꞌa spat. Tato ay junoc mach svaan ixim pan to ay yich dꞌa juntzan̈ cꞌual chiꞌ, tze satel dꞌa e cal, vachꞌchom junoc chꞌoc chon̈abꞌil cajanecꞌ dꞌa e cal, ma junoc ex israel ex, satjieli. 20 Yuj chiꞌ man̈ e va tastac aybꞌat yich bꞌaj cajan ex eqꞌui, an̈ej ixim pan malaj yich tze vaꞌa, xa chi, xchi dꞌa vin̈.

21 Ix avtaj ebꞌ vin̈ yajalil chon̈abꞌ dꞌa scal ebꞌ yetisraelal yuj vin̈aj Moisés chiꞌ, ix yalan vin̈: Ixiquec, tzeyiqꞌuelta junjunoc nocꞌ quelemtac calnel, ma nocꞌ chiva yic tze chi yedꞌ ebꞌ cajan eyedꞌoc dꞌa yol e pat. Tze milcham nocꞌ, ol e chiꞌan nocꞌ dꞌa jun nivan qꞌuin̈ ol ochoc. 22 Tze chaan schiqꞌuil nocꞌ dꞌa yol junoc palangana. Tzeyicꞌancot junoc tobꞌan̈ te cꞌabꞌtac hisopo, tze labꞌanem dꞌa scal schiqꞌuil nocꞌ chiꞌ, tze bꞌon̈anoch dꞌa smarcoal yibꞌan̈ e puerta yedꞌ dꞌa stzꞌeytac. Malaj junoc ex tzex elta dꞌa yol spuertail e pat dꞌacꞌvalil. 23 Ayic ol ecꞌ Jehová dꞌacꞌvalil chiꞌ, yic smacꞌancham ebꞌ bꞌabꞌel yuninal ebꞌ aj Egipto, ol yilanoch chicꞌ dꞌa spuertail e pat chiꞌ, bꞌen̈ej ol ecꞌbꞌatoc, man̈ ol schaochlaj jun ángel ol macꞌancham ebꞌ bꞌabꞌel unin dꞌa yol e pat. 24 A jun checnabꞌil tic ol e cꞌanabꞌajejn̈ej, ol scꞌanabꞌajejn̈ej ebꞌ eyin̈tilal, icha ley tzꞌajcan dꞌa juneln̈ej. 25 Vachꞌchom ayic ayexxo ecꞌ dꞌa lum luum ix yacꞌ stiꞌ Jehová yacꞌan dꞌayex, yovalil ol eyacꞌoch jun qꞌuin̈ tic. 26 Ayic ol scꞌanbꞌan ebꞌ eyuninal dꞌayex: ¿Tas syalelcꞌoch jun qꞌuin̈ tic? tato xchi ebꞌ. 27 A exxo tic ol eyal dꞌa ebꞌ icha tic: A jun nocꞌ calnel sco milcham tic, yic sqꞌuin̈al yic sco naancot scꞌual ayic bꞌen̈ej ix ecꞌ Jehová dꞌa stiꞌ co pat ayic ix smacꞌancham ebꞌ bꞌabꞌel yuninal ebꞌ aj Egipto, axo dꞌa stitac co pat, bꞌen̈ej ix ecꞌbꞌati. Icha val chiꞌ ix yutej scolancanel cuninal Jehová dꞌa jun tiempoal chiꞌ, xe cham dꞌa ebꞌ, xchi vin̈aj Moisés chiꞌ.

Ayic ix lajvi yalan juntzan̈ tic vin̈, ix em cumuljoc ebꞌ israel ejmelal dꞌa yichan̈ Jehová. 28 A val dꞌa jun rato chiꞌ ix scꞌanabꞌajan ebꞌ icha val ix aj yalan Jehová dꞌa vin̈aj Moisés chiꞌ yedꞌ dꞌa vin̈aj Aarón.

29 A dꞌa chimilacꞌval, ix ecꞌ Jehová smacꞌcham ebꞌ bꞌabꞌel unin dꞌa Egipto dꞌa junjun patil. Syalelcꞌochi to ix cham jun sbꞌabꞌel unin vin̈ rey, vin̈ dꞌin̈an yochcan sqꞌuexuloc vin̈ dꞌa sdespacho, masanto ix champax sbꞌabꞌel yuninal ebꞌ vin̈ ayoch dꞌa preso. An̈ejaꞌ icha chiꞌ ix aj schampax sbꞌabꞌel yuneꞌ nocꞌ smolbꞌetzal nocꞌ ebꞌ. 30 Masanil ebꞌ anima dꞌa Egipto ix qꞌue vaan dꞌa jun acꞌval chiꞌ. Tzꞌocꞌ vin̈ rey yedꞌ ebꞌ ay yopisio yedꞌoc yedꞌ ebꞌ anima smasanil, yujto man̈xa junoc pat bꞌaj malaj chamnac. 31 A val dꞌa jun acꞌval chiꞌ, ix avtaj vin̈aj Moisés yedꞌ vin̈aj Aarón yuj vin̈ rey chiꞌ, ix yalan vin̈ dꞌa ebꞌ vin̈:

—A ticnaic ixiquec, iqꞌuecbꞌat masanil ebꞌ eyetchon̈abꞌ, bꞌesequel e bꞌa dꞌa scal ebꞌ vetchon̈abꞌ tic, sbꞌat eyacꞌanem e bꞌa dꞌa Jehová icha eyalan chiꞌ. 32 Iqꞌuecbꞌat masanil nocꞌ e molbꞌetzal nocꞌ: Nocꞌ calnel, nocꞌ vacax yedꞌ nocꞌ chiva, icha ix aj eyalan chiꞌ. Ixiquec, tzex tevipax dꞌa Jehová vuuj, xchi vin̈ rey chiꞌ.

33 Ajun ebꞌ aj Egipto chiꞌ ix checanel ebꞌ israel, yic tzꞌel ebꞌ dꞌa elan̈chamel dꞌa yol schon̈abꞌ ebꞌ chiꞌ, yujto ix sna ebꞌ talaj scham ebꞌ smasanil. 34 A ixim harina ayxo och yalil, ayem dꞌa yol yedꞌtal, manto somchajbꞌatlaj yich pan dꞌa scal, toxon̈ej ix spichoch ebꞌ dꞌa yol sábana yedꞌ scajonal, ix yicꞌanbꞌat ebꞌ dꞌa sjen̈jabꞌ. 35 Ix scꞌanan qꞌuen oro, qꞌuen plata ebꞌ israel chiꞌ yedꞌ pichul dꞌa ebꞌ aj Egipto icha yalnac vin̈aj Moisés dꞌa ebꞌ. 36 A Jehová ix qꞌuexan spensar ebꞌ aj Egipto chiꞌ, yuj chiꞌ vachꞌxon̈ej ix yutej scꞌol ebꞌ dꞌa ebꞌ israel chiꞌ. Masanil tastac ix scꞌan ebꞌ israel chiꞌ ix yacꞌ ebꞌ. Icha val chiꞌ ix aj yicꞌanecꞌ ebꞌ israel tastac ay dꞌa ebꞌ.

37 Ix el ebꞌ israel dꞌa Ramesés, ix cꞌoch ebꞌ dꞌa Sucot. Ay am 600 miloc ebꞌ vin̈ stiempo val yoch dꞌa soldadoal, max ochlaj ebꞌ ix ix yedꞌ ebꞌ cotac unin sbꞌisuloc. 38 Tzijtum nocꞌ scalnel ebꞌ ix yicꞌbꞌati, nocꞌ chiva yedꞌ nocꞌ vacax. Tzijtum pax anima chꞌoc chon̈abꞌil ix bꞌat yedꞌ ebꞌ. 39 Man̈xalaj tiempo yic ix sbꞌoan svael ebꞌ, yujto elan̈chamel ix pechjiel ebꞌ yuj ebꞌ aj Egipto chiꞌ, yuj chiꞌ toxon̈ej ix sbꞌol ixim pan ebꞌ, aton ixim malaj yich yedꞌnac ebꞌ.

40-41 A ebꞌ israel schon̈abꞌ Jehová chiꞌ, 430 abꞌil ecꞌnac ebꞌ dꞌa Egipto chiꞌ. A val dꞌa jun cꞌu yic ix tzꞌacvi 430 abꞌilxo yajecꞌ ebꞌ taꞌ ix el ebꞌ. 42 A val dꞌa jun acꞌval chiꞌ, ix munlaj Jehová yic syicꞌanelta schon̈abꞌ. Yuj chiꞌ a dꞌa jun acꞌval chiꞌ dꞌa junjun abꞌil, pitzan masanil ebꞌ israel yic syicꞌanchaan̈ Jehová ebꞌ dꞌa masanil tiempo.

43 Ix yalan Jehová dꞌa vin̈aj Moisés yedꞌ dꞌa vin̈aj Aarón:

A sleyal qꞌuin̈ yic tze naancoti, ayic bꞌen̈ej ix in ecꞌ dꞌa stiꞌ e pat, aton svalcan dꞌayex tic: Malaj junoc ebꞌ chꞌoc chon̈abꞌil syal schiꞌan nocꞌ silabꞌ. 44 A ebꞌ e checabꞌ manbꞌil eyuuj, syal schiꞌan nocꞌ ebꞌ, an̈ej tato acꞌbꞌilxo circuncidar ebꞌ. 45 A pax junoc ebꞌ anima chꞌoc chon̈abꞌil ayecꞌ dꞌa e cal, paxyalvum, ma munlajel syacꞌ dꞌa e cal, max yal-laj schiꞌan nocꞌ ebꞌ. 46 An̈ej dꞌa yol pat bꞌaj sbꞌoji nocꞌ, an̈ej taꞌ syal schiji nocꞌ. Max yal-laj yicꞌjibꞌat nocꞌ dꞌa junocxo pat, max yalpaxlaj smacꞌjipoj sbꞌaquil nocꞌ. 47 A jun ley tic masanil ebꞌ israel ol cꞌanabꞌajanoc. 48 Talaj ay junoc chꞌoc chon̈abꞌil snibꞌej syacꞌoch jun qꞌuin̈ chiꞌ dꞌa e cal yic tzin yicꞌanchaan̈, bꞌabꞌel tzꞌacꞌji circuncidar ebꞌ vin̈ vinac dꞌa jun patil anima chiꞌ. Ichato chiꞌ syal schiꞌan nocꞌ yic jun qꞌuin̈ chiꞌ ebꞌ. Ichato eyetchon̈abꞌ yaj ebꞌ. A pax junoc vin̈ to manto acꞌbꞌiloc circuncidar jun, max yal-laj schiꞌan nocꞌ silabꞌ chiꞌ vin̈. 49 A jun ley tic, yovalil scꞌanabꞌajej ebꞌ anima tzꞌalji dꞌa e cal yedꞌ ebꞌ anima chꞌoc chon̈abꞌil ayecꞌ cajan dꞌa e cal, xchi Jehová.

50 Masanil tas ix checji yal vin̈aj Moisés yedꞌ vin̈aj Aarón chiꞌ, ix scꞌanabꞌajej ebꞌ anima chiꞌ. 51 A val dꞌa jun cꞌual chiꞌ, dꞌa stzolal ix aj yelta ebꞌ israel yuj Jehová dꞌa yol smacbꞌen Egipto chiꞌ.