2 Chꞌoc tzeyiqꞌuel ebꞌ bꞌabꞌel vinac dꞌa e cal yic tzin yacꞌ servil ebꞌ, yujto vic yaj ebꞌ bꞌabꞌel unin dꞌa scal ebꞌ etchon̈abꞌ. An̈ejaꞌ pax sbꞌabꞌel yuneꞌ nocꞌ e molbꞌetzal nocꞌ, vic yaji, xchi dꞌa vin̈.

3 Yuj chiꞌ ix yal vin̈aj Moisés dꞌa masanil ebꞌ yetchon̈abꞌ:

Yovalil sco naeccot jun qꞌuin̈ tic dꞌa junjun abꞌil, yuj co naancoti to a Jehová ix on̈ icꞌanelta yedꞌ yipalil dꞌa yol yic Egipto, bꞌaj ayon̈ och dꞌa checabꞌoc. Mocabꞌ co va ixim pan aybꞌat yich dꞌa scal. 4 A ticnaic, dꞌa jun uj Abib tic ix on̈ el dꞌa Egipto tic. 5 Ayic ol on̈ cꞌoch yuj Jehová dꞌa lum luum yax sat, aton lum bꞌaj cajan ebꞌ cananeo, ebꞌ hitita, ebꞌ amorreo, ebꞌ heveo yedꞌ ebꞌ jebuseo, aton lum yalnac Jehová dꞌa ebꞌ co mam quicham to ol yacꞌ dꞌayon̈, an̈ejaꞌ dꞌa jun uj tic ol cacꞌoch qꞌuin̈ yic sco naancoti. 6 Dꞌa uqueꞌ cꞌual ol co va ixim pan malaj yich. Axo dꞌa yuquil cꞌual chiꞌ, aton taꞌ tzon̈ och ejmelal yuj quicꞌanchaan̈ Jehová. 7 A dꞌa uqueꞌ cꞌual chiꞌ, malaj ixim pan aybꞌat yich ol co vaꞌa. Man̈ ol ilchaj yich pan dꞌa co pat, man̈ ol ilchajpaxlaj dꞌa masanil yol co macbꞌen. 8 A dꞌa juntzan̈ cꞌual chiꞌ, ol cal dꞌa ebꞌ cuninal: A jun qꞌuin̈ tic yic sco nacoti tas ix yutej Jehová schꞌoxan svachꞌcꞌolal dꞌayon̈, ayic ix on̈ yicꞌanelta dꞌa Egipto, xco chama. 9 A jun qꞌuin̈ tic ol chꞌoxaneloc to chꞌoc queli, ichato ayoch junoc quechel dꞌa co cꞌabꞌ, ma dꞌa snan̈al co sat. A yuj jun qꞌuin̈ tic ol co nacoti to a Jehová ix on̈ icꞌanelta dꞌa Egipto yuj spoder, yuj chiꞌ ol caln̈ej scꞌaybꞌubꞌal Jehová, ol co cꞌanabꞌajanpaxi. 10 Yuj chiꞌ junjun abꞌil ol cacꞌoch jun qꞌuin̈ tic dꞌa jun uj tic.

11 Ayic ol on̈ cꞌoch yuj Jehová dꞌa lum sluum ebꞌ cananeo, lum yacꞌnac stiꞌ yacꞌan dꞌa ebꞌ co mam quicham yedꞌ dꞌayon̈, 12 ataꞌ ol co sicꞌcanel ebꞌ co bꞌabꞌel vinac unin yedꞌ nocꞌ vinac sbꞌabꞌel yuneꞌ nocꞌ co molbꞌetzal nocꞌ yic scacꞌ dꞌa Jehová. 13 An̈ejtonaꞌ ayic tzꞌalji sbꞌabꞌel yuneꞌ nocꞌ bꞌuru, tato vinac nocꞌ, syal yoch junoc nocꞌ yuneꞌ calnel, ma junoc nocꞌ yuneꞌ chiva sqꞌuexuloc nocꞌ. Palta tato max acꞌji nocꞌ calnel chiꞌ, smacꞌji can̈chaj sjaj nocꞌ yuneꞌ bꞌuru chiꞌ. Axo pax yuj ebꞌ bꞌabꞌel vinac unin, yovalil tzꞌacꞌchaj junoc nocꞌ yuneꞌ calnel sqꞌuexuloc ebꞌ. 14 Ayic ol scꞌanbꞌan ebꞌ eyuninal dꞌa bꞌaqꞌuin̈ tas syalelcꞌoch juntzan̈ tic, tzeyalani: Schꞌoxnabꞌil yaj bꞌaj yicꞌnacon̈elta Jehová yedꞌ spoder dꞌa Egipto bꞌaj ayon̈ och checabꞌoc. 15 A val yic ix pitbꞌiel spensar vin̈ rey, maj yal scꞌol vin̈ ix on̈ yactejeli, axo Jehová ix macꞌancham sbꞌabꞌel unin ebꞌ aj Egipto yedꞌ sbꞌabꞌel yuneꞌ nocꞌ smolbꞌetzal nocꞌ ebꞌ. Yuj chiꞌ a nocꞌ sbꞌabꞌel yuneꞌ nocꞌ co molbꞌetzal nocꞌ tic, sco milcham nocꞌ silabꞌoc dꞌa Jehová. Scacꞌanpax junjun nocꞌ sqꞌuexuloc ebꞌ co bꞌabꞌel unin, xe chi dꞌa ebꞌ. 16 A jun tic ol chꞌoxaneloc to chꞌoc queli ichato ayoch junoc quechel dꞌa co cꞌabꞌ, ma dꞌa snan̈al co sat. A yuuj ol co nacoti to a Jehová ix on̈ icꞌanelta dꞌa Egipto yuj spoder, xchi vin̈aj Moisés.

17 A ix yactanel ebꞌ chon̈abꞌ israel vin̈ rey dꞌa yol smacbꞌen Egipto, maj icꞌjibꞌatlaj ebꞌ yuj Dios dꞌa sbꞌe ebꞌ vin̈ filisteo, vachꞌchom dꞌin̈an jun bꞌe chiꞌ, yujto ix snaꞌa to man̈ vachꞌoc syacꞌ oval ebꞌ israel yedꞌ ebꞌ, talaj sna meltzaj sbꞌa ebꞌ dꞌa Egipto ayic ol yilan ebꞌ to ay oval. 18 Yuj val chiꞌ, ix ecꞌn̈ej oyoyoc ebꞌ yuj Jehová dꞌa tzꞌinan luum yedꞌ dꞌa stitac aꞌ Chacchac Mar.

Ayic ix el ebꞌ dꞌa yol yic Egipto chiꞌ, yedꞌnac syamcꞌabꞌ ebꞌ yic oval. 19 Ix yalan vin̈aj Moisés to tzꞌicꞌchajbꞌat snivanil vin̈aj José, yujto ayic pitzanto vin̈ yalannac vin̈ dꞌa ebꞌ yetchon̈abꞌ to syacꞌ stiꞌ ebꞌ to ol scꞌulej ebꞌ dꞌa icha chiꞌ. Yalnaccan vin̈ dꞌa ebꞌ: Val yel a Dios ol colvaj eyedꞌoc. Yuj chiꞌ, ayic ol ujoc jun tic, ol eyicꞌbꞌat in nivanil eyedꞌoc, xchinaccan vin̈.

20 Ix el ebꞌ israel chiꞌ dꞌa chon̈abꞌ Sucot, ix cꞌoch ebꞌ dꞌa chon̈abꞌ Etam dꞌa stitac taquin̈ luum. 21 A dꞌa cꞌualil, bꞌabꞌel Jehová dꞌa yichan̈ ebꞌ, schꞌoxan sbꞌa dꞌa jun topan̈ asun, aꞌ schꞌoxan bꞌe dꞌa ebꞌ. Axo dꞌacꞌvalil, an̈ejaꞌ dꞌa jun asun chiꞌ bꞌaj schꞌox sbꞌa Jehová, ayoch scꞌacꞌal jun asun chiꞌ yic syacꞌan saquilqꞌuinal dꞌa ebꞌ anima chiꞌ, yic vachꞌ syal sbꞌey ebꞌ dꞌa cꞌualil ma dꞌacꞌvalil. 22 A jun asun chiꞌ, bꞌabꞌeln̈ej sbꞌat dꞌa yichan̈ ebꞌ israel dꞌa cꞌualil, axo dꞌacꞌvalil ayoch scꞌacꞌal. Man̈ val jabꞌoc ix el dꞌa yichan̈ ebꞌ.