A Chꞌan̈ Libro
GÉNESIS
A yichbꞌanil smasanil
1
A dꞌa yichbꞌanil, a Dios ix bꞌoan satchaan̈ yedꞌ lum luum. 2 A dꞌa jun tiempoal chiꞌ malaj stzolal yaj jun yolyibꞌan̈qꞌuinal tic, tzꞌinan yilji. Ton̈ej pan̈an ecꞌ a aꞌ dꞌa yibꞌan̈ luum. Qꞌuicꞌolinac yilji masanil dꞌa yibꞌan̈ aꞌ, axo Yespíritu Dios tzꞌecꞌ dꞌa yibꞌan̈ aꞌ chiꞌ.3 Ix lajvi chiꞌ ix yalan Dios icha tic: Ayocabꞌ saquilqꞌuinal, xchi.
Icha chiꞌ bꞌian ix sacbꞌiqꞌuinal. 4 Ix yilan Dios to vachꞌ jun saquilqꞌuinal chiꞌ, ix spojanel saquilqꞌuinal chiꞌ dꞌa scal qꞌuicꞌalqꞌuinal. 5 A saquilqꞌuinal chiꞌ, cꞌualil ix sbꞌiejcan yuuj, axo qꞌuicꞌalqꞌuinal chiꞌ, dꞌacꞌvalil ix sbꞌiejcani. Ix qꞌuicꞌbꞌiemi, ix sacbꞌi, ix eqꞌuel jun bꞌabꞌel cꞌu.
6 Ix lajvi chiꞌ ix yalan Dios icha tic: Ayocabꞌ junoc tas scan dꞌa yibꞌan̈ sat luum tic yic spojan snan̈al a aꞌ, xchi.
7 Icha chiꞌ bꞌian, a Dios ix bꞌoan jun chiꞌ. Cha macan̈ ix ajcanel a aꞌ chiꞌ yuuj: Jun macan̈ aꞌ ix can dꞌa sat lum tic, junxo macan̈ aꞌ ix qꞌuecan dꞌa yibꞌan̈. Ichaton chiꞌ ix aji. 8 A jun ix can chiꞌ “satchaan̈” ix sbꞌiejcani. Ix qꞌuicꞌbꞌixiemi, ix sacbꞌixi, ix ecꞌ schabꞌil cꞌual.
9 Ix lajvi chiꞌ ix yalan Dios icha tic: Junxon̈ejocabꞌ tzꞌaj a aꞌ ay dꞌa yalan̈ satchaan̈ yic scheclajcan lum luum dꞌa taquin̈al, xchi.
Ichaton chiꞌ ix aji. 10 A bꞌaj ix checlajcan staquin̈al chiꞌ, “luum” ix sbꞌiejcani, axo a aꞌ junn̈ej ix aj chiꞌ, “mar” ix sbꞌiejcan aꞌ. Axo ix yilan Dios chiꞌ, te vachꞌ ix aji. 11 Ix lajvi chiꞌ ix yalan icha tic: Pacꞌocabꞌ an̈ an̈cꞌultac dꞌa sat lum luum yedꞌ te teꞌ syacꞌ sat. A dꞌa sat teꞌ chiꞌ yedꞌ an̈ an̈cꞌultac chiꞌ, ataꞌ ay yin̈atil ato syalaꞌ tas macan̈il, xchi.
Ichaton chiꞌ ix aji. 12 Ichaton chiꞌ ix aj spacꞌ an̈ an̈cꞌultac dꞌa sat lum luum tic, aton an̈ an̈cꞌultac yedꞌ te teꞌ syacꞌ sat ato syalaꞌ tas in̈atil. Axo ix yilan Dios te vachꞌ ix aji. 13 Ix qꞌuicꞌbꞌixiemi ix sacbꞌixi, ix ecꞌ yoxil cꞌual.
14-15 Ix lajvi chiꞌ ix yalan Dios icha tic: Ayocabꞌ juntzan̈ saquilqꞌuinal dꞌa satchaan̈ yic syacꞌ saquilqꞌuinal dꞌa sat luum tic, yic schꞌoxanel cꞌualil yedꞌ dꞌacꞌvalil, yic scheclaj junjun cꞌu, junjun abꞌil yedꞌ juntzan̈ tiempoal, xchi.
Ichaton chiꞌ ix aji. 16 A Dios ix bꞌoan chabꞌ nivac saquilqꞌuinal. A jun nivan scꞌacꞌal ix och yopisio dꞌa cꞌualil, axo jun quenn̈ej scꞌacꞌal ix och yopisio dꞌacꞌvalil, aton cꞌu yedꞌ qꞌuen uj. Ix sbꞌoanpax masanil qꞌuen cꞌanal. 17 Ix yacꞌanoch juntzan̈ saquilqꞌuinal chiꞌ dꞌa satchaan̈ yic syacꞌ yoc dꞌa sat luum tic 18 dꞌa cꞌualil yedꞌ dꞌacꞌvalil yuj spojanpaxel saquilqꞌuinal dꞌa qꞌuicꞌalqꞌuinal. Ix yilan Dios chiꞌ te vachꞌ ix aji. 19 Ix qꞌuicꞌbꞌixiemi, ix sacbꞌixi, ix ecꞌ schan̈il cꞌual.
20 Ix lajvi chiꞌ ix yalanxi Dios icha tic: Pitzvocabꞌ nocꞌ nocꞌ, nocꞌ ay dꞌa yol a aꞌ yedꞌ masanil macan̈il nocꞌ much tzꞌecꞌ jen̈en̈oc, xchi.
21 Ix sbꞌoan nocꞌ nivac nocꞌ Dios chiꞌ, nocꞌ ay dꞌa yol aꞌ mar yedꞌ masanil macan̈il nocꞌ nocꞌ ay dꞌa yol aꞌ chiꞌ yedꞌ masanil macan̈il nocꞌ much. Axo ix yilani te vachꞌ ix aji. 22 Ix yacꞌan svachꞌcꞌolal dꞌa yibꞌan̈ nocꞌ nocꞌ chiꞌ, ix yalan icha tic: Yuneꞌejocabꞌ sbꞌa nocꞌ, qꞌuibꞌocabꞌ sbꞌisul nocꞌ, bꞌudꞌjocabꞌel yol aꞌ mar yuj nocꞌ. An̈ejtonaꞌ nocꞌ much, qꞌuibꞌocabꞌ sbꞌisul nocꞌ dꞌa yolyibꞌan̈qꞌuinal tic, xchi. 23 Ix qꞌuicꞌbꞌixiemi, ix sacbꞌixi, ix ecꞌ yoil cꞌual.
24-25 Ix lajvi chiꞌ ix yalan Dios icha tic: Pitzvocabꞌ chaan̈ masanil macan̈ nocꞌ nocꞌ dꞌa sat luum tic, nocꞌ molbꞌetzal nocꞌ, nocꞌ cꞌultaquil nocꞌ yedꞌ nocꞌ tzꞌecꞌ n̈ern̈onoc ma tzꞌecꞌ jachjon dꞌa sat luum, xchi.
Ichaton chiꞌ ix aji, ix sbꞌoan masanil macan̈il nocꞌ nocꞌ ay dꞌa sat luum tic. Ix yilani, te vachꞌ ix aji.
26 Ix lajvi chiꞌ ix yalan Dios icha tic: A ticnaic co bꞌoec anima icha on̈ tic yic vachꞌ tzꞌoch ebꞌ yajalil dꞌa yibꞌan̈ nocꞌ chay ay dꞌa yol aꞌ mar, dꞌa yibꞌan̈ masanil nocꞌ much, dꞌa yibꞌan̈ nocꞌ molbꞌetzal nocꞌ, dꞌa yibꞌan̈ nocꞌ cꞌultaquil nocꞌ yedꞌ pax dꞌa yibꞌan̈ nocꞌ tzꞌecꞌ n̈ern̈onoc ma tzꞌecꞌ jachjon dꞌa sat luum tic, xchi.
27 Ichato chiꞌ ix bꞌoji ebꞌ anima chiꞌ yuj Dios, icha val Dios chiꞌ ix aj ebꞌ. Ix bꞌojican vin̈ vinac yedꞌ ix ix yuuj.
28 Ix lajvi chiꞌ ix yacꞌan svachꞌcꞌolal Dios dꞌa yibꞌan̈ ebꞌ. Ix yalan dꞌa ebꞌ icha tic: Aljocabꞌ eyuninal, qꞌuibꞌocabꞌ e bꞌisul, bꞌudꞌjocabꞌel sat lum luum tic eyuuj, ochan̈ec yajalil dꞌa yolyibꞌan̈qꞌuinal tic. Ochan̈ec yajalil dꞌa yibꞌan̈ nocꞌ chay ay dꞌa yoltac a aꞌ, dꞌa yibꞌan̈ nocꞌ much sjen̈vi yedꞌ dꞌa yibꞌan̈ masanil nocꞌ tzꞌecꞌ n̈ern̈onoc ma tzꞌecꞌ jachjon dꞌa sat lum tic, xchi.
29 Ix lajvi chiꞌ, ix yalanxi dꞌa ebꞌ anima chiꞌ icha tic: A in svacꞌ masanil macan̈il an̈ an̈cꞌultac ay yin̈atil yedꞌ masanil te teꞌ syacꞌ sat e loꞌo yic syacꞌ yip dꞌa e nivanil. 30 Masanil nocꞌ molbꞌetzal nocꞌ, nocꞌ cꞌultaquil nocꞌ, nocꞌ tzꞌecꞌ n̈ern̈onoc ma tzꞌecꞌ jachjon dꞌa sat luum yedꞌ nocꞌ much, a in svacꞌ an̈ an̈cꞌultac yedꞌ xiltac te teꞌ svaeloc nocꞌ, xchi.