4 Aton yabꞌixal tas ix aj sbꞌo satchaan̈ yedꞌ lum luum tic. Ayic ix sbꞌoan satchaan̈ Jehová Dios yedꞌ lum luum tic, 5 mantalaj junoc te teꞌ ma junoc an̈ an̈cꞌultac sqꞌuibꞌi, yujto mantalaj n̈abꞌ syacꞌ dꞌa yibꞌan̈ luum yuj Jehová. Mantalaj pax mach smunlaj dꞌa sat luum. 6 Ton̈ej xobꞌanqꞌueul a aꞌ dꞌa sat luum yic schꞌayxi luum. 7 A dꞌa jun tiempoal chiꞌ, ix sbꞌo jun anima^* Jehová Dios. A spococal lum luum ix yacꞌlabꞌej sbꞌoani. Ix lajvi chiꞌ, axo yicꞌ ix spuoch dꞌa yol sn̈iꞌ. Icha chiꞌ ix aj spitzvi vin̈ anima chiꞌ.

8 Ix yavej juntzan̈ avbꞌen teꞌ Jehová Dios dꞌa jun lugar scuch Edén, dꞌa stojolal bꞌaj sjavi cꞌu. Ataꞌ ix yacꞌcanoch vin̈ vinac ix sbꞌo chiꞌ. 9 Ix yacꞌan qꞌuibꞌ masanil te teꞌ te vachꞌ yilji, man̈xo jantacoc svachꞌil sat teꞌ syacꞌaꞌ, te vachꞌ sloji. A dꞌa snan̈al jun avbꞌen teꞌ chiꞌ, ay jun teꞌ tzꞌacꞌan qꞌuinal, ay pax junxo teꞌ tzꞌacꞌan nachajel bꞌaj ay vachꞌil yedꞌ chucal.

10 A dꞌa Edén chiꞌ, sqꞌueul jun a aꞌ tzꞌacꞌanoch yal masanil teꞌ avbꞌen teꞌ chiꞌ. Axo tzꞌel aꞌ dꞌa Edén chiꞌ, chan̈eꞌ tzꞌaj yel scꞌabꞌ aꞌ. 11 A jun aꞌ bꞌabꞌel, Pisón sbꞌi aꞌ, aton aꞌ tzꞌecꞌ oyoyoc dꞌa yol lum scuch Havila bꞌaj ay qꞌuen oro. 12 A qꞌuen oro ay dꞌa jun lugar chiꞌ, te vachꞌ qꞌueen. Ay pax juntzan̈ te teꞌ ay stzatajil te sumumi sjabꞌ. Ay pax juntzan̈ qꞌuen qꞌueen scuchan ónice te caro stojol. 13 Axo aꞌ schabꞌil, Gihón sbꞌi aꞌ. Aton aꞌ tzꞌecꞌ oyoyoc dꞌa yol lum scuchan Cus. 14 Axo aꞌ yoxil, Tigris sbꞌi aꞌ. Aton aꞌ tzꞌecꞌ oyoyoc dꞌa stojolal bꞌaj sjavi cꞌu dꞌa lum Asiria. Axo aꞌ schan̈il, aton aꞌ Éufrates.

15 Ix yacꞌancan vin̈ vinac Jehová Dios dꞌa scal teꞌ avbꞌen teꞌ dꞌa Edén chiꞌ yic smunlaj vin̈ yic stan̈vanpax vin̈. 16 Ix yalan Dios dꞌa vin̈ icha tic:

—Syal a loꞌan sat te teꞌ tic smasanil. 17 Axo pax teꞌ tzꞌacꞌan nachajel bꞌaj ay vachꞌil yedꞌ chucal, man̈ a lo sat teꞌ. Tato ol a lo sat teꞌ chiꞌ, dꞌa val yel ol ach chamoc, xchi Dios dꞌa vin̈.

18 Ix yalanxi Jehová Dios icha tic: Man̈ vachꞌoc yajecꞌ vin̈ vinac tic schꞌocoj. Ol in bꞌo junoc yetbꞌeyum vin̈ to smoj val scolvaj yedꞌoc, xchi. 19 Masanil nocꞌ nocꞌ ix sbꞌo Dios dꞌa sat lum tic, nocꞌ cꞌultaquil nocꞌ yedꞌ masanil nocꞌ much, ix icꞌjibꞌat nocꞌ yuj Dios dꞌa vin̈ vinac chiꞌ yic say sbꞌi junjun nocꞌ vin̈. A sbꞌi junjun nocꞌ ix say vin̈, aton ix sbꞌiejcan nocꞌ. 20 Ix say sbꞌi masanil nocꞌ vin̈, nocꞌ cꞌultaquil nocꞌ, nocꞌ much yedꞌ nocꞌ molbꞌetzal nocꞌ. Palta malaj junoc nocꞌ dꞌa scal nocꞌ chiꞌ tzꞌacan tzꞌaj scolvaj yedꞌ vin̈. 21 Axo Dios ix acꞌancot jun nivan vayan̈ dꞌa vin̈. Ayic chamnac el vin̈ svay chiꞌ, ix icꞌjielta jun sbꞌaquil scostil vin̈ yuj Dios. Ix lajvi chiꞌ ix smacanxi bꞌaj ix yiqꞌuelta jun bꞌac chiꞌ. 22 Aton sbꞌaquil scostil vin̈ chiꞌ ix bꞌoji ixal yuj Dios. Ix lajvi chiꞌ, ix acꞌjicanoch ix dꞌa yol scꞌabꞌ vin̈aj Adán chiꞌ yuj Dios. 23 Axo yic ix yilanoch ix vin̈, ix yalan vin̈ icha tic:

—Aton val jun tic val yel in bꞌaquil, in bꞌacꞌchil, yujto a dꞌayin ix elta yuj Dios. Yuj chiꞌ “Ix”^* ol sbꞌiejcani, xchi vin̈.

24 Yuj chiꞌ a vin̈ vinac, ol yactejcan smam snun vin̈ yic junxon̈ej tzꞌajcan vin̈ yedꞌ ix yetbꞌeyum, junxon̈ej nivanil tzꞌajcan ebꞌ schavan̈il.

25 Malaj spichul ebꞌ schavan̈il, palta max qꞌuixvilaj ebꞌ dꞌay junjun.