—¿Tom yel ix yal Dios to max yal e loan sat masanil teꞌ avbꞌen teꞌ tic? xchi nocꞌ.

2 Ix tacꞌvi ix dꞌa nocꞌ icha tic:

—Masanil teꞌ syal co loan sat, 3 an̈ej jun teꞌ ay dꞌa snan̈al teꞌ avbꞌen teꞌ tic, ix yal Dios to max yal-laj co loan sat teꞌ, ma co yamani, yic vachꞌ max on̈ chami, xchi ix.

4 Ix tacꞌvi nocꞌ chan chiꞌ dꞌa ix:

—Ton̈ej syal Dios chiꞌ. Man̈ ol ex chamlaj. 5 Palta yojtac Dios, ayic ol e loan sat teꞌ chiꞌ, ol tzꞌacvoc e pensar, lajan ol ex ajcan yedꞌoc, ol nachajel vachꞌil yedꞌ chucal eyuuj, xchi nocꞌ dꞌa ix.

6 Axo ix yilanoch sat teꞌ chiꞌ ix, te vachꞌ am sloji, te vachꞌ yiljiochi, ix snibꞌanoch ix, yic vachꞌ stzꞌacviel spensar ix snaani. Yuj chiꞌ ix sbꞌixanelta jun sat teꞌ chiꞌ ix, ix sloan ix. Ix lajvi chiꞌ ix yacꞌanpax ix dꞌa vin̈ yetbꞌeyum chiꞌ, ix sloanpax teꞌ vin̈ yedꞌ ix. 7 A dꞌa jun rato chiꞌ, ix nachajel yuj ebꞌ, ix yilanoch sbꞌa ebꞌ to bꞌeranel ebꞌ, yuj chiꞌ a xil teꞌ higo ix smol ebꞌ, ix stzꞌisan ebꞌ spichuloc, yic tzꞌoch dꞌa snan̈al ebꞌ. 8 Axo ix yabꞌan vin̈ vinac chiꞌ yedꞌ ix ix chiꞌ to van yecꞌ Jehová Dios dꞌa scal te avbꞌen teꞌ chiꞌ dꞌa yemxocꞌualil, yic sicxo cꞌu, ix el lemnaj ebꞌ scꞌubꞌejel sbꞌa dꞌay dꞌa scal te avbꞌen teꞌ chiꞌ. 9 Axo ix avtaj vin̈ yuj Jehová Dios:

—Ach Adán, ¿bꞌajtil ayach eqꞌui? xchi.

10 Ix tacꞌvi vin̈:

—Ina vajecꞌ tic, ix vabꞌi to van ecꞌ dꞌa scal teꞌ avbꞌen teꞌ tic, ix in xivbꞌati yujto bꞌeran in eli, yuj chiꞌ ix in cꞌubꞌejel in bꞌa, xchi vin̈.

11 Ix scꞌanbꞌan Dios dꞌa vin̈:

—¿Mach ix alan dꞌayach to bꞌeran ach eli? Tope ix a lo sat te teꞌ, teꞌ ix val dꞌayach to max yal-laj a loani, xchi dꞌa vin̈.

12 Ix tacꞌvixi vin̈ icha tic:

—A ix ix, ix acꞌ vetbꞌeyumoc, a ix, ix acꞌan teꞌ dꞌayin, yuj chiꞌ ix in lo teꞌ, xchi vin̈.

13 Ix scꞌanbꞌan Dios dꞌa ix:

—¿Tas yuj icha chiꞌ ix a cꞌulej? xchi.

Ix tacꞌvi ix:

—A nocꞌ chan in acꞌan musansatil, yuj chiꞌ ix in lo teꞌ, xchi ix.

14 Yuj chiꞌ ix yalan Jehová Dios dꞌa nocꞌ chan chiꞌ:

—Yujto icha tic ix a cꞌulej, yuj chiꞌ tzach in catabꞌejcan dꞌa scal masanil nocꞌ molbꞌetzal nocꞌ yedꞌ nocꞌ cꞌultaquil nocꞌ. Dꞌa juneln̈ej a yalan̈ a cꞌool ol n̈ervoc. A spococal lum luum ol a loꞌo. 15 Ol vacꞌcanoch ajcꞌolal dꞌa a cal yedꞌ ix ix tic yedꞌ masanil in̈tilal yedꞌ pax yin̈tilal ix. A yin̈tilal ix chiꞌ ol macꞌanpoj a jolom. A ach xo, ol a chi yich yoc yin̈tilal ix chiꞌ, xchi Jehová.

16 Ix yalanxi Dios dꞌa ix icha tic:

—Ol vacꞌ a yaelal ayic yabꞌix ach, axo yic ol aljoc uneꞌ, ol vacꞌan nivtaj a yaelal chiꞌ. Vachꞌchom ay yaelal ol ilaꞌ, ol a nibꞌejn̈ejoch vin̈ etbꞌeyum. A vin̈ ol och ajaloc, xchi Dios.

17 Ix yalanpax Jehová Dios dꞌa vin̈aj Adán chiꞌ icha tic:

—Yujto ix a cꞌanabꞌajej ix etbꞌeyum tic a loan sat te teꞌ ix valaꞌ to max a loꞌo, a ticnaic jun, uuj tzin catabꞌejcan lum luum tic, yuj chiꞌ dꞌa scal yaelal ol ach vaoc yacbꞌan ayach ecꞌ dꞌa yolyibꞌan̈qꞌuinal tic. 18 Ol qꞌuibꞌchaan̈ teꞌ qꞌuiix yedꞌ an̈ an̈cꞌultac ay sqꞌuixal dꞌa sat lum luum tic. A yuj juntzan̈ aval in̈at ol icꞌan yecꞌ tiempo eyuuj. 19 Ol el alil a munlaji, icha chiꞌ ol aj a vaꞌi masanto ol ach meltzajxoc och luumal. Yujto dꞌa lum ix ach coti, lum ach taxoni, yuj chiꞌ ol ach meltzajxoc och luumal, xchi Jehová dꞌa vin̈.

20 Eva^* ix yacꞌ vin̈aj Adán sbꞌioc ix yetbꞌeyum chiꞌ, yujto dꞌa ix, ix pitzvi masanil anima. 21 A stzꞌumal nocꞌ nocꞌ ix sbꞌo Jehová Dios spichuloc vin̈ vinac yedꞌ ix yetbꞌeyum, ix yacꞌanoch spichuloc ebꞌ.

22 Ix yalan Jehová Dios: A ticnaic, icha on̈ tic, icha chiꞌ ix aj ebꞌ anima. Tzaxo nachajel yuj ebꞌ bꞌaj ay vachꞌil yedꞌ chucal. Yuj chiꞌ ay smay sloan sat te teꞌ ebꞌ, aton teꞌ tzꞌacꞌan qꞌuinal yic pitzann̈ej ebꞌ dꞌa masanil tiempo, xchi Dios.

23 Yuj chiꞌ ix pechjielta ebꞌ dꞌa Edén chiꞌ yuj Jehová, ix ochcan vin̈aj Adán chiꞌ smunlaj dꞌa sat luum bꞌaj ix cot snivanil. 24 Ix lajvi yelcancot ebꞌ, ix acꞌjicanoch juntzan̈ querubín yuj Jehová dꞌa stojolal bꞌaj sjavi cꞌu yedꞌ jun qꞌuen espada tzꞌititi yel scꞌacꞌal yecꞌ oyoyoc, yic man̈xa junoc mach syal yochi yic sloan sat te teꞌ tzꞌacꞌan qꞌuinal chiꞌ.