3 Ix ecꞌ junoc tiempoal, ay jun cꞌu ix yicꞌbꞌat silabꞌ vin̈aj Caín dꞌa Jehová, aton tas ix yicꞌ vin̈ dꞌa smunlajel. 4 Ix yicꞌanpaxbꞌat silabꞌ vin̈aj Abel chiꞌ dꞌa yichan̈ Jehová, aton nocꞌ bꞌabꞌel yuneꞌ calnel, nocꞌ te bꞌaqꞌuech. Ix stzalaj Jehová yedꞌ vin̈ yedꞌ silabꞌ ix yacꞌ chiꞌ. 5 Palta maj tzalajlaj Jehová yedꞌ vin̈aj Caín yedꞌ pax silabꞌ. Yuj chiꞌ, ix te chichon scꞌol vin̈, te ov ix aj sat vin̈. 6 Axo ix yalan Jehová dꞌa vin̈ icha tic: ¿Tas yuj ste chichon a cꞌool, te ovxon̈ej a sat? 7 Tato vachꞌ tza cꞌulej, tzalajcꞌolal am ayach eqꞌui, palta to chuc ix a cꞌulej, yuj chiꞌ a a chucal chiꞌ, ayxon̈ejoch dꞌa ibꞌan̈ yic tzach em dꞌa chucal yuuj, palta tzato yal scan chucal chiꞌ dꞌa yalan̈ uuj, xchi Dios.

8 Ay jun cꞌu, a vin̈aj Caín ix avtan vin̈aj Abel yic sbꞌat ebꞌ bꞌeyelecꞌ. Ayic ayecꞌ ebꞌ bꞌaj ix cꞌoch chiꞌ, ix bꞌat jucnaj vin̈aj Caín dꞌa vin̈ yucꞌtac chiꞌ, ix smacꞌanchamoc. 9 Ix lajvi chiꞌ, ix scꞌanbꞌan Jehová dꞌa vin̈aj Caín chiꞌ:

—¿Bꞌajtil ay vin̈ ucꞌtac aj Abel? xchi dꞌa vin̈.

Axo ix tacꞌvi vin̈:

—Man̈ vojtacoclaj. ¿Tom yilumal vin̈ vaji? xchi vin̈.

10 Ix yalanpax Jehová dꞌa vin̈:

—¿Tas yuj icha chiꞌ ix a cꞌulej? A schiqꞌuil vin̈ ucꞌtac ix em dꞌa sat lum tic uuj, ichato syal sbꞌa dꞌayin to tzin bꞌo yaj edꞌoc. 11 A ticnaic, catabꞌil achxo, svicꞌcanel opisio dꞌa sat lum luum tic, aton lum ix ucꞌanem schiqꞌuil vin̈ ucꞌtac ix a macꞌcham chiꞌ. 12 Ayic ol ach munlaj dꞌa sat luum, malaj jabꞌoc tas ol icꞌaꞌ, ton̈ej ol ixtej a bꞌa, ton̈ej ol ach comon bꞌeyecꞌ dꞌa sat luum, xchi Dios dꞌa vin̈.

13 Ix tacꞌvi vin̈ icha tic:

—Te nivan jun yaelal scotcan tic dꞌa vibꞌan̈, man̈ ol techajlaj vuuj. 14 Ina ix iqꞌuel vopisio dꞌa sat lum tic, ix in icꞌanel dꞌa ichan̈ dꞌa juneln̈ej, toxon̈ej ol in comon bꞌeyecꞌoc. Yalxon̈ej mach ol in chalaj in bꞌa yedꞌoc, ol in smacꞌchamoc, xchi vin̈ dꞌa Dios.

15 Axo ix tacꞌvi Jehová:

—Maay. Tato ay junoc mach ol ach macꞌanchamoc, a jun chiꞌ, uquel ol ecꞌ spac dꞌay, xchi dꞌa vin̈.

Ix yacꞌanoch Jehová jun yechel vin̈aj Caín chiꞌ, yic vachꞌ tato ay mach schalaj sbꞌa vin̈ yedꞌoc, max macꞌjicham vin̈ yuuj. 16 Ix lajvi chiꞌ, ix el vin̈aj Caín bꞌaj ix lolon ebꞌ chiꞌ, ix bꞌat cajnaj vin̈ dꞌa jun lugar scuch Nod, dꞌa stojolal bꞌaj sjavi cꞌu dꞌa Edén.

17 Ix yil-lan sbꞌa vin̈aj Caín yedꞌ ix yetbꞌeyum, ix och ix yabꞌixal. Ix alji jun yuneꞌ ix, Enoc ix sbꞌiej. Ix sbꞌoan jun chon̈abꞌ vin̈aj Caín chiꞌ, axo sbꞌi yuninal vin̈ chiꞌ ix yacꞌoch sbꞌioc. 18 A vin̈aj Enoc smam vin̈aj Irad. Axo vin̈aj Irad smam vin̈aj Mehujael, axo vin̈aj Mehujael smam vin̈aj Metusael, axo vin̈aj Metusael smam vin̈aj Lamec. 19 A vin̈aj Lamec chiꞌ, chavan̈ ix aj yetbꞌeyum vin̈. Ay jun ix scuch Ada, axo junxo ix scuch Zila. 20 A ix Ada chiꞌ, ix alji jun svinac unin ix, Jabal ix sbꞌiej. Aton vin̈ ix bꞌabꞌlaj bꞌeyecꞌ yedꞌ spat mantiado yic smolan nocꞌ snocꞌ. 21 A vin̈aj Jabal chiꞌ, ay jun yucꞌtac vin̈ scuchan Jubal. A vin̈ ix bꞌabꞌlaj acꞌan teꞌ arpa yedꞌ spuꞌan flauta. 22 Axo ix Zila chiꞌ, ix aljipax jun yuneꞌ ix, vinac unin, Tubal-caín ix sbꞌiej. Bꞌoum qꞌueen ix aj vin̈. Ay tas ix sbꞌo vin̈ dꞌa qꞌuen bronce yedꞌ dꞌa qꞌuen hierro. Ay jun ix yanabꞌ vin̈ scuchan Naama.

23 Ay junel ix yal vin̈aj Lamec dꞌa ebꞌ ix yetbꞌeyum icha tic:

25 Axo vin̈aj Adán ix alji junxo yuninal vin̈ yedꞌ ix Eva. Set^* ix sbꞌiej yuj ix snun chiꞌ. Ix yalan ix icha tic: A Dios ix acꞌan junxo vuneꞌ tic sqꞌuexuloc vin̈aj Abel macꞌbꞌilcham yuj vin̈aj Caín, xchi ix.

26 Axo vin̈aj Set chiꞌ, ix alji jun yuninal vin̈, Enós ix yacꞌ vin̈ sbꞌioc. Atax dꞌa jun tiempoal chiꞌ, ix schael yich yalan sbꞌa ebꞌ anima dꞌa Jehová.