Génesis 5

Yin̈tilal vin̈aj Adán

Aton yabꞌixal ebꞌ yin̈tilal vin̈aj Adán tic dꞌa stzolal. Ayic ix bꞌoji ebꞌ anima yuj Dios, icha Dios ix aj ebꞌ. 2 Ix bꞌoji vin̈ vinac yedꞌ pax ix ix, ix yacꞌanpax svachꞌcꞌolal dꞌa yibꞌan̈ ebꞌ. Atax dꞌa jun cꞌu chiꞌ ayic ix bꞌojiel ebꞌ yuuj, anima^* ix sbꞌiejcan ebꞌ yuuj.

3 A vin̈aj Adán chiꞌ, 130 abꞌil sqꞌuinal vin̈ ayic ix alji junxo yuninal vin̈ scuchan Set, lajan ix aj yedꞌ smam chiꞌ. 4 Ix lajvi chiꞌ, 800 abꞌilto ix yil vin̈aj Adán chiꞌ. Ayto yuninal vin̈ yedꞌ yisil vin̈ ix alji. 5 930 abꞌil ix yil vin̈, ix cham vin̈ bꞌian.

6 A vin̈aj Set chiꞌ, 105 abꞌil sqꞌuinal vin̈ ayic ix alji jun yuninal vin̈ scuchan Enós. 7 Ix lajvi chiꞌ, 807 abꞌilto ix yil vin̈, ayto yuninal vin̈ yedꞌ yisil vin̈ ix alji. 8 912 abꞌil ix yil vin̈, ix cham vin̈ bꞌian.

9 A vin̈aj Enós chiꞌ, 90 abꞌil sqꞌuinal vin̈ ayic ix alji jun yuninal vin̈ scuchan Cainán. 10 Ix lajvi chiꞌ, 815 abꞌilto ix yil vin̈, ayto yuninal vin̈ yedꞌ yisil vin̈ ix alji. 11 905 abꞌil ix yil vin̈, ix cham vin̈ bꞌian.

12 A vin̈aj Cainán chiꞌ, 70 abꞌil sqꞌuinal vin̈ ayic ix alji jun yuninal vin̈ scuchan Mahalalel. 13 Ix lajvi chiꞌ, 840 abꞌilto ix yil vin̈, ayto yuninal vin̈ yedꞌ yisil vin̈ ix alji. 14 910 abꞌil ix yil vin̈, ix cham vin̈ bꞌian.

15 A vin̈aj Mahalalel chiꞌ, 65 abꞌil sqꞌuinal vin̈ ayic ix alji jun yuninal vin̈ scuchan Jared. 16 Ix lajvi chiꞌ, 830 abꞌilto ix yil vin̈, ayto yuninal vin̈ yedꞌ yisil vin̈ ix alji. 17 895 abꞌil ix yil vin̈, ix cham vin̈ bꞌian.

18 A vin̈aj Jared chiꞌ, 162 abꞌil sqꞌuinal vin̈ ayic ix alji jun yuninal vin̈ scuchan Enoc. 19 Ix lajvi chiꞌ, 800 abꞌilto ix yil vin̈, ayto yuninal vin̈ yedꞌ yisil vin̈ ix alji. 20 962 abꞌil ix yil vin̈, ix cham vin̈ bꞌian.

21 A vin̈aj Enoc chiꞌ, 65 abꞌil sqꞌuinal vin̈ ayic ix alji jun yuninal vin̈ scuchan Matusalén. 22 Yictax ix alji yuninal vin̈ chiꞌ, 300 abꞌil ix scꞌanabꞌajej Dios vin̈. Dꞌa jun tiempoal chiꞌ, ayto yuninal vin̈ yedꞌ yisil vin̈ ix alji. 23 365 abꞌil ix yil vin̈. 24 Ix sbꞌeybꞌalej val vin̈ icha sgana Dios, yuj chiꞌ ay jun cꞌu ix satem vin̈, yujto a Dios ix icꞌanbꞌat vin̈ yedꞌoc.

25 A vin̈aj Matusalén chiꞌ, 187 abꞌil sqꞌuinal vin̈ ayic ix alji jun yuninal vin̈ scuchan Lamec. 26 Ix lajvi chiꞌ 782 abꞌilto ix yil vin̈, ayto yuninal vin̈ yedꞌ yisil vin̈ ix alji. 27 969 abꞌil ix yil vin̈, ix cham vin̈ bꞌian.

28 A vin̈aj Lamec chiꞌ, 182 abꞌil sqꞌuinal vin̈ ayic ix alji jun yuninal vin̈. 29 Noé^* ix sbꞌiej yuj vin̈ yujto ix yal vin̈: A Jehová ix catabꞌan lum luum tic, yuj chiꞌ te ya co munlaj dꞌa sat luum, palta a vin̈ unin tic ol acꞌan snivanil co cꞌool, xchi vin̈aj Lamec chiꞌ. 30 Ayic toxo ix alji vin̈aj Noé chiꞌ, 595 abꞌilto ix yil vin̈aj Lamec chiꞌ, ayto yuninal vin̈ yedꞌ yisil vin̈ ix alji. 31 777 abꞌil ix yil vin̈, ix cham vin̈ bꞌian.

32 A vin̈aj Noé chiꞌ, 500 abꞌil sqꞌuinal vin̈ ayic ix syamanoch yalji ebꞌ yuninal vin̈, aton vin̈aj Sem, vin̈aj Cam yedꞌ vin̈aj Jafet.