A schucal ebꞌ anima
6
Ayic ix te qꞌuibꞌ sbꞌisul ebꞌ anima dꞌa sat luum tic, ay pax yisil ebꞌ vin̈ vinac ix alji. 2 Axo ebꞌ vin̈ yuninal Dios,* ayic ix yilan ebꞌ ix yisil ebꞌ anima chiꞌ ebꞌ vin̈, te vachꞌ yilji ebꞌ ix, ix laj sicꞌlan ebꞌ vin̈ machtac ebꞌ ix syicꞌ ebꞌ vin̈. 3 Yuj chiꞌ ix yal Jehová: Man̈xo ol vacꞌ sqꞌuinal ebꞌ anima tic yuj spital. Chamelbꞌa anima yaj ebꞌ, yuj chiꞌ axon̈ej 120 abꞌil olto ecꞌ ebꞌ dꞌa yolyibꞌan̈qꞌuinal tic, xchi.4 Ayic ix bꞌeycot tiempo, ix yicꞌlan sbꞌa ebꞌ vin̈ yuninal Dios yedꞌ ebꞌ ix yisil ebꞌ anima chiꞌ, axo yuninal ebꞌ scuch Nefilim.* A ebꞌ chiꞌ te tecꞌan ebꞌ, te bꞌinajnac ebꞌ dꞌa pecatax chiꞌ. 5 Ix yilan Jehová to yelcꞌolal sqꞌuibꞌ schucal ebꞌ anima dꞌa sat luum tic, to axon̈ej tas malaj svachꞌil ayecꞌ dꞌa spensar ebꞌ. 6 Yuj chiꞌ ix yalaꞌ: Octom maj in bꞌolaj juntzan̈ anima tic. Te ya svabꞌ yuj ebꞌ. 7 Ol in satel juntzan̈ anima ix in bꞌo dꞌa sat luum tic yedꞌ pax nocꞌ molbꞌetzal nocꞌ, nocꞌ cꞌultaquil nocꞌ yedꞌ nocꞌ tzꞌecꞌ n̈ern̈onoc ma tzꞌecꞌ jachjon dꞌa sat luum yedꞌ pax nocꞌ much. Ste tac val in cꞌool yujto ix in bꞌo masanil juntzan̈ tic, xchi Dios.
8 An̈ej val vin̈aj Noé vachꞌ dꞌa yichan̈ Jehová.
A teꞌ nivan barco ix sbꞌo vin̈aj Noé
9 Aton yabꞌixal vin̈aj Noé tic:
A vin̈aj Noé chiꞌ, te vachꞌ ix yutej sbꞌa vin̈ dꞌa yichan̈ Dios, an̈ej vin̈ vachꞌ spensar dꞌa scal ebꞌ anima dꞌa jun tiempoal chiꞌ. Ix sbꞌeybꞌalej vin̈ icha sgana Dios. 10 Ay oxvan̈ yuninal vin̈, aton vin̈aj Sem, vin̈aj Cam yedꞌ vin̈aj Jafet.
11 Axo ebꞌ anima, ix te chucbꞌi ebꞌ dꞌa yichan̈ Dios, comonxon̈ej syixtej yetanimail ebꞌ, smil-lajcham sbꞌa ebꞌ. 12 Ix yilan Dios to masanil anima ix te juvieli, axon̈ej ixtoj anima scꞌulej ebꞌ. 13 Yuj chiꞌ ix yal Dios dꞌa vin̈aj Noé chiꞌ: Toxo ix in naꞌ to ol in satel masanil anima tic. Yujto axon̈ej ixtoj anima scꞌulej ebꞌ, yuj chiꞌ ol in satel ebꞌ yedꞌ masanil yolyibꞌan̈qꞌuinal tic. 14 A ticnaic, tza bꞌo junoc teꞌ nivan barco. A te teꞌ ay stzatajil, a teꞌ tzacꞌoch steꞌaloc teꞌ. Macquiltac tzutej yool teꞌ, vachꞌ tzutej acꞌanoch tzataj chiꞌ bꞌaj snubꞌlaj sbꞌa teꞌ. Tzacꞌoch dꞌa spatic yedꞌ dꞌa yool, yic vachꞌ malaj bꞌaj ol och aꞌ dꞌa yol teꞌ. 15 135 metro tzutej scꞌatul teꞌ, 22 metro yedꞌ nan̈alxo tzutej sat teꞌ, 13 metro yedꞌ nan̈alxo steel teꞌ. 16 Oxeꞌ piso tzutej teꞌ. Axo dꞌa sjajqꞌuecꞌoch teꞌ, ataꞌ scan jacan smasanil, nan̈al metro tzꞌajcan schaan̈il, scanpax junoc spuertail dꞌa junoc pacꞌan̈. 17 Yujto ol vacꞌcot jun oval aꞌ yic smucan* sat luum tic, ol bꞌudꞌjoccanel yuj aꞌ, axo satel jantac tas syicꞌ yicꞌ dꞌa yolyibꞌan̈qꞌuinal tic. 18 An̈ej edꞌoc tzin bꞌocan jun in trato tic. A dꞌa yol teꞌ nivan barco chiꞌ ol ach ochcan yedꞌ ix etbꞌeyum, ebꞌ uninal yedꞌ pax ebꞌ ix alibꞌ. 19 Ol ochpax nocꞌ nocꞌ eyedꞌoc, junjun mojan̈ nocꞌ dꞌa junjun macan̈ ay dꞌa yolyibꞌan̈qꞌuinal tic, yic vachꞌ ol colchajcan nocꞌ eyedꞌoc. 20 Chatacvan̈ nocꞌ dꞌa junjun macan̈ tzꞌochcani: Nocꞌ much, nocꞌ molbꞌetzal nocꞌ, nocꞌ cꞌultaquil nocꞌ yedꞌ nocꞌ tzꞌecꞌ n̈ern̈onoc ma tzꞌecꞌ jachjon dꞌa sat luum, yic vachꞌ man̈ ol satel nocꞌ. 21 Ol a molancanoch jantac tas ol vajoc, yic vachꞌ ay tas tze va yedꞌ tas sva nocꞌ, xchi Dios dꞌa vin̈aj Noé chiꞌ. 22 Ix scꞌanabꞌajan vin̈aj Noé chiꞌ masanil tas ix yal Dios.