Jun aꞌ oval aꞌ mucvajum
7
Axo yic ix cꞌoch scꞌual sjavi jun oval aꞌ mucvajum chiꞌ, ix yalan Jehová Dios dꞌa vin̈aj Noé chiꞌ icha tic: Ochan̈ dꞌa yol teꞌ nivan barco tic yedꞌ ix etbꞌeyum, ebꞌ uninal yedꞌ ebꞌ ix alibꞌ, yujto a achn̈ej ix a cꞌanabꞌajej dꞌayin dꞌa scal masanil ebꞌ anima dꞌa jun tiempoal tic. 2 Icꞌoch uc mojan̈oc nocꞌ nocꞌ syal yoch silabꞌoc sn̈uschaji, axo pax masanil nocꞌ comon nocꞌ, junjunn̈ej mojan̈ nocꞌ tzꞌochi. 3 Icꞌpaxoch uc mojan̈oc junjun macan̈ nocꞌ much, yic vachꞌ max lajviel yin̈tilal nocꞌ. 4 Yic val ucubꞌix ticnaic, ol vaqꞌuem n̈abꞌ. Chavinac cꞌu, chavinac acꞌval ol yacꞌaꞌ. Icha chiꞌ ol aj in satanel masanil tas ix vacꞌ pitzvoc dꞌa sat lum tic, xchi Jehová dꞌa vin̈.5 Ichaton chiꞌ ix aj scꞌanabꞌajan vin̈aj Noé masanil tas ix yal Jehová chiꞌ dꞌay. 6 Ayic ix ja jun oval aꞌ mucvajum chiꞌ, 600 abꞌil sqꞌuinal vin̈aj Noé chiꞌ. 7 Ix ochcan vin̈ dꞌa yol teꞌ nivan barco chiꞌ yedꞌ ix yetbꞌeyum, ebꞌ yuninal yedꞌ ebꞌ ix yalibꞌ, yic scolchaj ebꞌ dꞌa jun oval aꞌ mucvajum chiꞌ. 8 Ix ochpax nocꞌ nocꞌ: Nocꞌ syal yoch silabꞌil sn̈usji, nocꞌ comon nocꞌ, nocꞌ much yedꞌ nocꞌ tzꞌecꞌ n̈ern̈onoc ma tzꞌecꞌ jachjon dꞌa sat luum. 9 Junjun mojan̈ ix aj sjavi nocꞌ yic tzꞌoch nocꞌ dꞌa yol barco chiꞌ yedꞌ vin̈, icha ix aj yalan Dios dꞌa vin̈.
10 Axo dꞌa yuquil cꞌual chiꞌ ix javi secnaj jun oval aꞌ mucvajum chiꞌ dꞌa sat luum. 11 A val stzꞌacvi 600 abꞌil sqꞌuinal vin̈aj Noé chiꞌ, yic 17 yoch schabꞌil ujal, ix qꞌueul dꞌin̈naj aꞌ nivac aꞌ dꞌa yol luum, ix cotpax secnaj aꞌ nivac aꞌ dꞌa satchaan̈. 12 40 cꞌual, 40 acꞌval ix yacꞌ n̈abꞌ dꞌa sat luum tic. 13 A dꞌa scꞌual scot n̈abꞌ chiꞌ, ataꞌ ochnaccan vin̈aj Noé dꞌa yol teꞌ barco yedꞌ oxvan̈ ebꞌ yuninal vin̈, aton vin̈aj Sem, vin̈aj Cam yedꞌ vin̈aj Jafet yedꞌ ix yetbꞌeyum vin̈ yedꞌ oxvan̈ ebꞌ ix yalibꞌ vin̈. 14 Ayxo och masanil macan̈il nocꞌ nocꞌ yedꞌ vin̈, nocꞌ molbꞌetzal nocꞌ, nocꞌ cꞌultaquil nocꞌ, nocꞌ tzꞌecꞌ n̈ern̈onoc ma tzꞌecꞌ jachjon dꞌa sat luum yedꞌ pax nocꞌ much. 15 Masanil nocꞌ nocꞌ syicꞌ yicꞌ, chatacvan̈il ix aj sjavi nocꞌ dꞌa vin̈aj Noé chiꞌ yic tzꞌochcan nocꞌ dꞌa yol teꞌ barco chiꞌ, 16 jun nocꞌ smam, jun nocꞌ snun. Icha chiꞌ ix aj yoch masanil macan̈il nocꞌ, icha ix aj yalan Dios dꞌa vin̈aj Noé chiꞌ. Ix lajvi chiꞌ, a val Jehová ix macancan spuertail teꞌ nivan barco chiꞌ.
17-18 Chavinac cꞌualxo sqꞌue sibꞌibꞌoc a aꞌ chiꞌ, ix cuchjichan̈ teꞌ barco chiꞌ yuj aꞌ. 19 Ix mucchaj jantac nivac vitz yuj aꞌ. 20 Ix qꞌuen̈ej aꞌ, ay am uqueoc metro ix ecꞌ aꞌ dꞌa yibꞌan̈ lum nivac vitz. 21 Ichaton chiꞌ ix aj scham masanil anima ay dꞌa yolyibꞌan̈qꞌuinal tic yedꞌ masanil nocꞌ nocꞌ, nocꞌ much, nocꞌ molbꞌetzal nocꞌ, nocꞌ cꞌultaquil nocꞌ yedꞌ nocꞌ tzꞌecꞌ n̈ern̈onoc ma tzꞌecꞌ jachjon dꞌa sat luum. 22 Masanil tastac syicꞌ yicꞌ dꞌa sat luum tic, pilan ix chameli. 23 Axon̈ej vin̈aj Noé yedꞌ ebꞌ ayoch yedꞌ dꞌa yol teꞌ barco chiꞌ yedꞌ nocꞌ nocꞌ ix colchaji. Axo anima smasanil, ix satel ebꞌ. 24 Oyeꞌ ujal ix can pan̈an aꞌ dꞌa yibꞌan̈ luum.