Ayic ix tupem aꞌ
8
Yujto naan vin̈aj Noé chiꞌ yuj Dios yedꞌ masanil nocꞌ nocꞌ ayoch yedꞌ vin̈ dꞌa yol teꞌ barco chiꞌ, yuj chiꞌ ix acꞌjicot jun icꞌ te ov yuj Dios dꞌa yibꞌan̈ a aꞌ chiꞌ, yic vachꞌ stupem aꞌ. 2 Ix macchaj masanil sjaj a aꞌ, aꞌ sqꞌueul dꞌa yol luum yedꞌ jantac aꞌ nivac aꞌ scot sequecoc dꞌa satchaan̈. Ix och vaan yacꞌan n̈abꞌ. 3 Oyeꞌ ujal ix can aꞌ, ix och ijan stupxiem aꞌ, cꞌojancꞌolal ix tupem aꞌ. 4 17 cꞌualxo yoch yuquil uj, ix can bꞌachnaj te nivan barco chiꞌ dꞌa sjolom jun lum vitz dꞌa yol yic Ararat. 5 Numumi yem a aꞌ chiꞌ. A dꞌa bꞌabꞌel cꞌual yic lajun̈exo ujal, chequelxo sjolom lum nivac vitz.6 Axo yic ix ecꞌ 40 cꞌualxo, ix sjacan teꞌ ventena vin̈aj Noé bꞌobꞌil yuj dꞌa teꞌ barco chiꞌ. 7 Ix yactanelta jun nocꞌ joj vin̈, ix ecꞌ jen̈en̈oc nocꞌ stan̈van stupem aꞌ dꞌa sat luum. 8 Ix yactanpaxelta jun nocꞌ uch vin̈ yic syil nocꞌ tato taquin̈xo sat luum. 9 Axo nocꞌ uch chiꞌ, ix cꞌochxi nocꞌ dꞌa teꞌ barco chiꞌ, yujto malaj bꞌaj syal scan vaan nocꞌ. Te sibꞌanto ecꞌ aꞌ dꞌa sat luum chiꞌ. Ix yacꞌanelta scꞌabꞌ vin̈ yic schaanxioch nocꞌ vin̈ dꞌa yol teꞌ barco chiꞌ.
10 Ixto stan̈vej uquexo cꞌual vin̈aj Noé chiꞌ, ix yacꞌanelta nocꞌ uch chiꞌ vin̈ junelxo. 11 Numumixo sqꞌuicꞌbꞌi ix cꞌochxi nocꞌ, n̈acꞌbꞌilxo jun teꞌ xil olivo yaxxo yuj nocꞌ. Icha chiꞌ ix aj yojtacanel vin̈ to van stacji sat luum. 12 Uqueto cꞌu ix stan̈vej vin̈, ichato chiꞌ ix sjacanelta nocꞌ vin̈ junelxo, palta majxo cꞌochxoclaj nocꞌ.
13 601 abꞌilxo sqꞌuinal vin̈aj Noé chiꞌ, ayic ix tacjixi lum luum chiꞌ. Ayic bꞌabꞌel cꞌu yoch bꞌabꞌel uj ix yicꞌanel yibꞌan̈ teꞌ barco chiꞌ vin̈, axo ix yilan vin̈ to taquin̈xo luum. 14 Axo dꞌa 27-xo cꞌual yoch yic schabꞌil ujal, te taquin̈xo luum. 15 Axo ix yalan Dios dꞌa vin̈: 16 Elan̈cot dꞌa yol teꞌ barco yedꞌ ix etbꞌeyum yedꞌ ebꞌ uninal yedꞌ ebꞌ ix alibꞌ. 17 Tzicꞌanelta masanil macan̈il nocꞌ nocꞌ ayoch edꞌoc: Nocꞌ much, nocꞌ molbꞌetzal nocꞌ, nocꞌ cꞌultaquil nocꞌ, nocꞌ tzꞌecꞌ n̈ern̈onoc ma tzꞌecꞌ jachjon dꞌa sat luum. Unevocabꞌ nocꞌ yic sbꞌudꞌjixi sat luum tic yuj nocꞌ, xchi Dios.
18 Ix lajvi chiꞌ, ix elta vin̈aj Noé chiꞌ yedꞌ ix yetbꞌeyum yedꞌ ebꞌ yuninal yedꞌ ebꞌ ix yalibꞌ dꞌa yol teꞌ barco chiꞌ. 19 Ix elixta nocꞌ nocꞌ chiꞌ smasanil dꞌa junjun macan̈. 20 Ix lajvi chiꞌ, ix sbꞌoan jun altar vin̈ dꞌa yichan̈ Jehová. Ix yicꞌancot nocꞌ molbꞌetzal nocꞌ vin̈ yedꞌ nocꞌ much, aton nocꞌ smoj yoch silabꞌil dꞌa Dios. Dꞌa junjun macan̈ nocꞌ chiꞌ ix yicꞌcanel junjun nocꞌ vin̈ sn̈ustzꞌa silabꞌoc dꞌa yichan̈ Jehová. 21 Te vachꞌ sjabꞌ nocꞌ silabꞌ chiꞌ ix yabꞌ Jehová. Yuj chiꞌ ix yalan icha tic: Man̈xo ol in catabꞌej lum luum tic yuj smul ebꞌ anima, yujto yictax unin anima ebꞌ, an̈ej chucal sgana ebꞌ scꞌulej. Man̈xa bꞌaqꞌuin̈ ol in satel masanil tas pitzan, icha ix vutej dꞌa junel tic.
22 Yacbꞌan ayto ecꞌ yolyibꞌan̈qꞌuinal tic, ol avchaj sat aval in̈at, ol molchajpax sat. Ay stiempoal cꞌacꞌ, ay stiempoal siic. Ay stiempoal n̈abꞌil qꞌuinal, ay stiempoal varesma. Ay cꞌualil, ay pax dꞌacꞌvalil, xchi Jehová.