A strato Dios yedꞌ vin̈aj Noé
9
Ix lolon Dios dꞌa vin̈aj Noé yedꞌ dꞌa ebꞌ yuninal vin̈, ix yalani to ol yacꞌ syaxil dꞌa yibꞌan̈ ebꞌ. Ix yalan icha tic: Tzijtumocabꞌ eyuninal tzꞌalji, bꞌudꞌjocabꞌ yolyibꞌan̈qꞌuinal tic yuj ebꞌ. 2 Masanil nocꞌ nocꞌ ay dꞌa sat luum tic yedꞌ nocꞌ much yedꞌ nocꞌ ay dꞌa yol aꞌ mar ol xiv nocꞌ dꞌayex. Masanil juntzan̈ nocꞌ tic scan nocꞌ dꞌa yol e cꞌabꞌ. 3 A ticnaic syal e chiꞌan masanil nocꞌ nocꞌ tic. A in svacꞌ nocꞌ dꞌayex icha ix aj vacꞌan an̈ itaj e chiꞌa. 4 Palta ay jun tas man̈ ol yal-laj e chiꞌani, aton nocꞌ chibꞌej syucꞌ schiqꞌuil, yujto a dꞌa schiqꞌuil nocꞌ chiꞌ ay sqꞌuinal. 5 A in ol in chꞌolbꞌitej ebꞌ anima smilancham junoc yetanimail. A nocꞌ nocꞌ smilancham anima, ol miljocpaxcham nocꞌ.6 A mach smilancham yetanimail, anima pax ol milanchamoc, yujto a ex anima ex tic, icha on̈ tic, icha chiꞌ ex cutej co bꞌoani.
7 Tzijtumocabꞌ eyuninal tzꞌalji, bꞌudꞌjocabꞌel yolyibꞌan̈qꞌuinal tic eyuuj, xchi Dios.
8 Ix yalanpax Dios dꞌa vin̈aj Noé yedꞌ dꞌa ebꞌ yuninal icha tic: 9 A ticnaic, svacꞌcan jun in trato tic eyedꞌoc yedꞌ masanil ebꞌ eyin̈tilal, 10 yedꞌ masanil nocꞌ nocꞌ ix elta eyedꞌoc dꞌa yol teꞌ barco tic: Nocꞌ much, nocꞌ molbꞌetzal nocꞌ, nocꞌ cꞌultaquil nocꞌ yedꞌ masanil nocꞌ nocꞌ ay dꞌa yolyibꞌan̈qꞌuinal tic. 11 A jun in trato ol vacꞌ eyedꞌoc tic, man̈xo ol in qꞌuexaꞌ. Man̈xo ol in satel anima yedꞌ nocꞌ nocꞌ yuj junoc oval aꞌ mucvajum. Man̈xo ol jax jun oval aꞌ mucvajum yic satxiel sat luum tic, icha jun ix ecꞌ tic. 12 Aton yechel in trato tic svacꞌcan eyedꞌoc yedꞌ masanil nocꞌ nocꞌ dꞌa masanil qꞌuinal. 13 Svacꞌoch jun chacpan dꞌa cal asun, a jun chiꞌ, aton yechel in trato yedꞌ yolyibꞌan̈qꞌuinal tic. 14 Ayic svacꞌancot asun axo scheclaj jun chacpan chiꞌ dꞌa scal, 15 ataꞌ tzin nacot in trato ix vacꞌ eyedꞌoc yedꞌ nocꞌ nocꞌ, yuj chiꞌ man̈xo ol ex in satel yuj junoc oval aꞌ mucvajum. 16 Ayic svilan jun chacpan chiꞌ, tzin naancoti to ay jun in trato ix vacꞌ dꞌa juneln̈ej eyedꞌoc yedꞌ masanil nocꞌ nocꞌ ay dꞌa yolyibꞌan̈qꞌuinal tic. 17 Aton yechel in trato tic ix in bꞌo eyedꞌoc yedꞌ jantac nocꞌ nocꞌ, xchi Dios dꞌa vin̈aj Noé chiꞌ.
A vin̈aj Noé yedꞌ ebꞌ yuninal
18 A ebꞌ yuninal vin̈aj Noé ix elta dꞌa yol teꞌ barco yedꞌoc: Aton vin̈aj Sem, vin̈aj Cam yedꞌ vin̈aj Jafet. Ay jun yuninal vin̈aj Cam chiꞌ scuchan Canaán. 19 A ebꞌ tic yuninal ebꞌ vin̈aj Noé, axo dꞌa yin̈tilal ebꞌ ix pitzvielta jantac chon̈abꞌ ay dꞌa sat luum tic.
20 A vin̈aj Noé ix munlaj vin̈ dꞌa sat luum. A teꞌ uva ix sbꞌabꞌlaj avej vin̈. 21 Ay jun cꞌu ix yucꞌ yal sat teꞌ uva chiꞌ vin̈, ix qꞌue dꞌa sjolom vin̈, ix satel scꞌool vin̈ yuuj. Ix squichel spichul vin̈, ix can pacꞌjabꞌ vin̈ dꞌa yol smantiado. 22 Axo ix yilan vin̈aj Cam, smam vin̈aj Canaán to bꞌeranel vin̈aj Noé chiꞌ, van stzetzan vin̈ smam vin̈ chiꞌ ayic ix yalan vin̈ yabꞌ ebꞌ yucꞌtac chiꞌ schavan̈il. 23 Ayic ix yabꞌan ebꞌ yucꞌtac vin̈ chiꞌ, ix yacꞌancot jun cꞌapac sábana ebꞌ dꞌa sjolom sjen̈jabꞌ. Ix bꞌeybꞌat ebꞌ dꞌa spatic, ix ochcꞌoch ebꞌ bꞌaj ay smam chiꞌ, ix spichan vin̈ ebꞌ dꞌa cꞌapac sábana chiꞌ. Chꞌoc bꞌaj qꞌuelanbꞌat ebꞌ yic vachꞌ max yil snivanil smam ebꞌ chiꞌ.
24 Axo yic ix nachajxi scꞌol vin̈aj Noé chiꞌ, ix yabꞌan vin̈ tas ix yutej sbꞌa vin̈aj Cam chiꞌ, aton vin̈ schabꞌil yuninal. 25 Yuj chiꞌ ix yalan vin̈ icha tic:
Tzin catabꞌejcan vin̈aj Canaán. Checabꞌ emnaquil ol ajcan vin̈ dꞌa ebꞌ yucꞌtac, xchi vin̈.
26 Ix yalanxi vin̈ icha tic: Yacꞌocabꞌ svachꞌcꞌolal Jehová co Diosal dꞌa yibꞌan̈ vin̈aj Sem, axo vin̈aj Canaán tzꞌochcan schecabꞌoc vin̈.
27 Nivanocabꞌ tzꞌajcan slum vin̈aj Jafet yuj Dios. Cajnajocabꞌ Dios dꞌa scal yin̈tilal vin̈aj Sem, axo vin̈aj Canaán tzꞌochcan schecabꞌoc vin̈aj Jafet chiꞌ, xchi vin̈.