A Chꞌan̈ Biblia tic, cha macan̈ yaj chꞌan̈. Jun macan̈ chꞌan̈ scuchan Antiguo Testamento, axo junxo macan̈ chꞌan̈ scuchan Nuevo Testamento. A Chꞌan̈ Antiguo Testamento, tzꞌibꞌabꞌilcan chꞌan̈ dꞌa tiꞌ hebreo dꞌa pecaꞌ yuj ebꞌ schecabꞌ Dios. A tas syal chꞌan̈, aton yabꞌixal tas ajnac yel yich yolyibꞌan̈qꞌuinal, tas ajnac scajnaj ebꞌ bꞌabꞌel anima dꞌa sat lum luum tic, tas nabꞌil yuj Dios dꞌa ebꞌ. Syalpax chꞌan̈ tas ajnac yel yich chon̈abꞌ Israel yedꞌ tas yaji.

Axo chꞌan̈ Nuevo Testamento tzꞌibꞌabꞌil chꞌan̈ dꞌa tiꞌ griego. A tas syal chꞌan̈, aton yabꞌilxal Jesucristo, yic yaljubꞌal, yic ix munlaji, yic ix chami, masanto ix pax dꞌa satchaan̈. Syalanpax yabꞌixal ebꞌ apóstol chꞌan̈, tas ajnac yel yich iglesia yedꞌ tas ol aj slajvicꞌoch yolyibꞌan̈qꞌuinal tic.

Axo ebꞌ smunlaj dꞌa yic Sociedad Bíblica Unida, snibꞌej ebꞌ to a chꞌan̈ Biblia tic tzꞌacꞌji traducir chꞌan̈ dꞌa stiꞌ junjun chon̈abꞌil anima, yic vachꞌ syojtaquej slolonel Dios ebꞌ, icha syal Apocalipsis 1.3, xchi icha tic: “A ebꞌ tzꞌavtani yedꞌ ebꞌ tzꞌabꞌani, tato scꞌanabꞌajej ebꞌ tas syalaꞌ, te vachꞌ yic ebꞌ”, xchi. Anejaꞌ syalpaxcot dꞌa Apocalipsis 7.9 “Ix lajvi chiꞌ ix vilani, man̈xo jantacoc anima ayecꞌ dꞌa yichan̈ Dios, bꞌaj cꞌojanemi yedꞌ dꞌa yichan̈ jun Calnel sbꞌi. A ebꞌ chiꞌ, cotnac ebꞌ dꞌa junjun nación, dꞌa junjun in̈tilal, dꞌa junjun chon̈abꞌ yedꞌ dꞌa junjun tiꞌal. Man̈xo jantacoc sbꞌisul ebꞌ”, xchi.

Tato scavtej chꞌan̈, jantac tas tzꞌilchaj cuj dꞌa yol chꞌan̈, sjacvi co pensar yuuj, sjelanbꞌi co pensar. Tato scacꞌoch dꞌa co cꞌol cavtan slolonel Dios tic, sco cꞌaybꞌani, sco cꞌanabꞌajanpaxi, man̈ jantacoc tas scojtaquejeli.

Ayic squilan chꞌan̈ dꞌa juntac el, ay juntzan̈ letra ay dꞌa snan̈al ma dꞌa slajvubꞌ junjun versículo. A juntzan̈ letra chiꞌ schꞌoxani to ay junoc lolonel, ma junoc versículo ajaltac snachajeli, yuj chiꞌ syal co sayan quil dꞌa slajvubꞌ junjun página, ataꞌ syalaꞌ tas yaj jun lolonel chiꞌ, ma jun versículo chiꞌ.

Ay pax juntzan̈ yechel anima ma tastac ayoch dꞌa yol chꞌan̈, yic vachꞌ snachajel cuuj tas yedꞌnac juntzan̈ abꞌix chiꞌ.

Axo dꞌa slajvub chꞌan̈ Biblia tic ay jun yuneꞌ Diccionario, ay juntzan̈ bꞌi ma lolonel ay tas syalelcꞌochi. Ataꞌ aycani tas syalelcꞌoch jun bꞌi, ma lolonel chiꞌ. An̈ejtonaꞌ, ay pax juntzan̈ mapa bꞌaj slajvicꞌoch jun Diccionario chiꞌ, a juntzan̈ mapa chiꞌ, a schꞌoxan bꞌajtac scan junjun lugar ma junjun chon̈ab sbꞌinaj dꞌa yol chꞌan̈ Biblia tic. Schꞌox juntzan̈ lugar ma chon̈abꞌ ecꞌnac dꞌa stiempoal Antiguo Testamento yedꞌ pax juntzan̈ ecꞌnac dꞌa stiempoal Nuevo Testamento. Ay pax juntzan̈xo mapa schꞌoxani bꞌaj scan chon̈abꞌ Israel yedꞌ bꞌaj scan co nación tic.