2 Al dꞌa ebꞌ etisraelal to sicꞌcanel juntzan̈ chon̈abꞌ ebꞌ bꞌaj ol scol sbꞌa ebꞌ, icha ajnac valan dꞌa vin̈aj Moisés. 3 Qꞌuinaloc ay junoc mach smacꞌancham junoc anima to man̈ scꞌanoc scꞌool, syal bꞌat scolan sbꞌa dꞌa junoc chon̈abꞌ chiꞌ, yic vachꞌ max macꞌjicham yuj junoc ayto yuj sbꞌa yedꞌ jun ix cham chiꞌ. 4 A jun mach sbꞌat scol sbꞌa chiꞌ, yovalil scꞌoch dꞌa spuertail jun chon̈abꞌ chiꞌ, syalan dꞌa ebꞌ yichamtac vinaquil jun chon̈abꞌ chiꞌ tas ix cot dꞌa yibꞌan̈, slajvi chiꞌ axo ebꞌ vin̈ schaanoch dꞌa yol chon̈abꞌ chiꞌ, tzꞌacꞌji junoc lugar bꞌaj scajnaji. 5 Tato sayjiecꞌ yuj junoc ayto yuj sbꞌa yedꞌ jun ix cham chiꞌ, axo ebꞌ vin̈ yichamtac vinaquil jun chon̈abꞌ chiꞌ max acꞌanoch dꞌa yol scꞌabꞌ jun sayanecꞌ chiꞌ, vachꞌchom ix cham jun yetanimail chiꞌ yuuj, palta man̈ scꞌanoc scꞌool, man̈ yajcꞌoloctaxon sbꞌa ebꞌ. 6 A jun sbꞌat scol sbꞌa chiꞌ, scann̈ej taꞌ masanto syal schꞌolbꞌitaj yuj ebꞌ chon̈abꞌ smasanil. Tato malaj smul, syal scann̈ej dꞌa jun chon̈abꞌ chiꞌ, masanto scham vin̈ sat sacerdote ayoch dꞌa yopisio dꞌa jun tiempoal chiꞌ. Slajvi chiꞌ syal smeltzajxi dꞌa schon̈abꞌ bꞌaj elnac chiꞌ, xchi dꞌa vin̈.

7 Yuj chiꞌ ix sicꞌcanel juntzan̈ chon̈abꞌ ebꞌ israel, bꞌaj scol sbꞌa ebꞌ smacꞌancham junoc anima, aton Cedes dꞌa Galilea, dꞌa tzalquixtac dꞌa yol yic ebꞌ yin̈tilal Neftalí yedꞌ Siquem dꞌa tzalquixtac dꞌa yol yic ebꞌ yin̈tilal Efraín yedꞌ Quiriat-arba, aton Hebrón dꞌa tzalquixtac dꞌa yol yic ebꞌ yin̈tilal Judá. 8 Axo dꞌa junxo scꞌaxepalecꞌ aꞌ Jordán, dꞌa stojolal bꞌaj sjavi cꞌu dꞌa Jericó, ataꞌ ix siqꞌuel oxexo chon̈abꞌ ebꞌ: Aton chon̈abꞌ Beser dꞌa acꞌlic yic tzꞌinan luum dꞌa yol yic ebꞌ yin̈tilal Rubén, chon̈abꞌ Ramot dꞌa yol yic Galaad dꞌa yol yic ebꞌ yin̈tilal Gad yedꞌ chon̈abꞌ Golán dꞌa Basán, dꞌa yol yic ebꞌ yin̈tilal Manasés. 9 Aton juntzan̈ chon̈abꞌ chiꞌ ix sicꞌcanel ebꞌ, yic vachꞌ ataꞌ sbꞌat scol sbꞌa junoc mach smacꞌancham junoc anima to man̈ scꞌanoc scꞌool. Taxon̈ej junoc ebꞌ israel ma junoc ebꞌ chꞌoc chon̈abꞌil ayecꞌ dꞌa scal ebꞌ, syal bꞌat scolan sbꞌa taꞌ yic max macꞌjicham yuj junoc ayto yuj sbꞌa yedꞌ jun ix cham chiꞌ ayic manto chꞌolbꞌitaj yuj ebꞌ yichamtac vinaquil chon̈abꞌ.