7 Ix yicꞌanpax Aín ebꞌ, Rimón, Eter yedꞌ Asán. 8 Chan̈eꞌ chon̈abꞌ yedꞌ yaldeail junjun, masanto dꞌa Baalat-beer, aton pax Ramat dꞌa Neguev. Aton juntzan̈ tic ix yicꞌ ebꞌ yin̈tilal Simeón chiꞌ 9 dꞌa yol smacbꞌen ebꞌ yin̈tilal Judá, yujto a jun in̈tilal ebꞌ chiꞌ te nivan lum macbꞌilcan yuj ebꞌ. Yuj chiꞌ ix acꞌji nan̈alxo lum dꞌa ebꞌ yin̈tilal Simeón chiꞌ.

10 Axo lum yoxil macan̈ ix och suerte dꞌay. A dꞌa ebꞌ yin̈tilal Zabulón ix can luum, ato syal jay macan̈ yaj ebꞌ. A smojonal luum, ix cꞌoch dꞌa Sarid, 11 sbꞌatn̈ej dꞌa stojolal bꞌaj tzꞌem cꞌu masanto dꞌa Marala, scꞌoch dꞌa Dabeset, slajvicancꞌoch dꞌa aꞌ taquin̈ melem dꞌa yichan̈ Jocneam. 12 Tzꞌelxi dꞌa Sarid chiꞌ, scꞌoch dꞌa stojolal bꞌaj sjavi cꞌu dꞌa smojonal Quislot-tabor, tzꞌecꞌpax dꞌa Daberat, sqꞌuecꞌoch dꞌa Jafía. 13 Sbꞌatxi dꞌa stojolal bꞌaj sjavi cꞌu dꞌa Gat-hefer, tzꞌecꞌ dꞌa Ita-cazín, tzꞌel dꞌa Rimón, syoyan sbꞌa dꞌa Nea. 14 Axo dꞌa norte smeltzajbꞌat smojonal chiꞌ dꞌa Hanatón, tzꞌelcꞌoch dꞌa schꞌolanil yol yic Jefte-el. 15 A dꞌa jun lum chiꞌ ay 12 chon̈abꞌ yedꞌ yaldeail junjun, a dꞌa scal juntzan̈ chiꞌ, ataꞌ ay Catat, Nahalal, Simrón, Idala yedꞌ Belén. 16 Aton jun lum chiꞌ ix yicꞌ ebꞌ yin̈tilal Zabulón yedꞌ juntzan̈ chon̈abꞌ yedꞌ yaldeail.

17-23 Axo lum schan̈il macan̈ ix och suerte dꞌay, a dꞌa ebꞌ yin̈tilal Isacar ix can luum, ato syal jay macan̈ yaj ebꞌ. A dꞌa jun lum chiꞌ ay 16 chon̈abꞌ dꞌa smasanil yedꞌ yaldeail junjun: Aton Jezreel, Quesulot, Sunem, Hafaraim, Sihón, Anaharat, Rabit, Quisión, Abez, Remet, En-ganim, En-hada yedꞌ Bet-pases. A smojonal lum scꞌoch dꞌa Tabor, Sahazima yedꞌ dꞌa Bet-semes, slajvicancꞌoch dꞌa aꞌ Jordán.

24-31 Axo lum yoil macan̈ ix och suerte dꞌay, a dꞌa ebꞌ yin̈tilal Aser ix can luum, ato syal jay macan̈ yaj ebꞌ. A dꞌa jun luum chiꞌ, ay 22 chon̈abꞌ dꞌa smasanil yedꞌ yaldeail junjun: Aton Helcat, Halí, Betén, Acsaf, Alamelec, Amad yedꞌ Miseal, masanto scꞌoch lum dꞌa jolom vitz Carmelo dꞌa stojolal bꞌaj tzꞌem cꞌu yedꞌ pax Sihor-libnat. Slajvi chiꞌ smeltzaj dꞌa stojolal bꞌaj sjavi cꞌu dꞌa Bet-dagón, scꞌoch dꞌa lum yic ebꞌ yin̈tilal Zabulón dꞌa schꞌolanil yic Jefte-el dꞌa stojolal norte yedꞌ dꞌa Bet-emec, dꞌa Neiel, tzꞌelcꞌoch dꞌa Cabul dꞌa stojolal norte chiꞌ. Syamchaj Hebrón yuuj yedꞌ Rehob, Hamón yedꞌ Caná, masanto scꞌoch dꞌa nivan chon̈abꞌ Sidón. Smeltzajxibꞌat smojonal chiꞌ dꞌa Ramá, masanto scꞌoch dꞌa jun chon̈abꞌ ayoch smuroal, aton Tiro, scꞌoch dꞌa Hosa tzꞌelcꞌoch dꞌa aꞌ mar Mediterráneo. Aypaxoch chon̈abꞌ Mahaleb yedꞌoc, Aczib, Uma, Afec yedꞌ Rehob.

32-39 A lum svaquil macan̈ ix och suerte dꞌay, a dꞌa ebꞌ yin̈tilal Neftalí ix can luum, ato syal jay macan̈ yaj ebꞌ. A slum ebꞌ chiꞌ sbꞌatn̈ej dꞌa Helef, Alón-saananim, Adami-neceb yedꞌ Jabneel, masanto dꞌa Lacum, tzꞌelcꞌoch dꞌa aꞌ Jordán. Axo smojonal dꞌa stojolal bꞌaj tzꞌem cꞌu, sbꞌat dꞌa Aznot-tabor, tzꞌecꞌ dꞌa Hucoc, yuj chiꞌ a dꞌa stojolal sur schalaj sbꞌa smojonal slum ebꞌ chiꞌ yedꞌ ebꞌ yin̈tilal Zabulón. Axo dꞌa stojolal bꞌaj tzꞌem cꞌu, schalaj sbꞌa lum yedꞌ lum yic ebꞌ yin̈tilal Aser. Axo dꞌa smojonal slum ebꞌ chiꞌ dꞌa stojolal bꞌaj sjavi cꞌu, a dꞌa aꞌ Jordán scꞌochcani. Axo juntzan̈ chon̈abꞌ ayoch smuroal ix can dꞌa ebꞌ, 19 dꞌa smasanil yedꞌ yaldeail junjun: Aton Sidim, Zer, Hamat, Racat, Cineret, Adama, Ramá, Hazor, Cedes, Edrei, En-hazor, Irón, Migdal-el, Horem, Bet-anat yedꞌ Bet-semes. Aton lum tic ix yicꞌ ebꞌ yin̈tilal Neftalí.

40-46 A lum yuquil macan̈ ix och suerte dꞌay, a dꞌa ebꞌ yin̈tilal Dan ix can luum, ato syal jay macan̈ yaj ebꞌ. A dꞌa lum chiꞌ ay juntzan̈ chon̈abꞌ tic: Zora, Estaol, Ir-semes, Saalabín, Ajalón, Jetla, Elón, Timnat, Ecrón, Elteque, Gibetón, Baalat, Jehúd, Bene-berac, Gat-rimón, Mejarcón, Racón yedꞌ lum ay dꞌa yichan̈ Jope. 47-48 Maj yabꞌlaj lum dꞌa ebꞌ, yuj chiꞌ ix bꞌat ebꞌ yacꞌ oval dꞌa chon̈abꞌ Lesem. Ayic ix lajvi xicancham masanil anima cajan ebꞌ taꞌ, ix cajnajcan ebꞌ dꞌa jun lum chiꞌ. Ix sqꞌuexan sbꞌi jun chon̈abꞌ chiꞌ ebꞌ, Dan ix sbꞌiej yuj ebꞌ yuj yicꞌanchaan̈ smam yicham ebꞌ. Aton lum tic ix yicꞌ ebꞌ yin̈tilal Dan chiꞌ.

49-51 Masanil juntzan̈ luum chiꞌ ix spuquecꞌ vin̈aj sacerdote Eleazar, vin̈aj Josué yedꞌ ebꞌ yajalil ebꞌ chon̈abꞌ. Dꞌa yichan̈ Jehová dꞌa yichan̈ scajnubꞌ bꞌaj schꞌox sbꞌa dꞌa Silo, ataꞌ ix pucchajecꞌ lum dꞌa suerteal, yuj chiꞌ te tzꞌacan ix aj yecꞌ luum. Ayic toxo ix lajvi spucchajecꞌ luum dꞌa ebꞌ, ix schaancan yic junjun in̈tilal ebꞌ. Ix acꞌjipax lum yic vin̈aj Josué dꞌa scal ebꞌ, icha val ix aj yalan Jehová. Ix acꞌji chon̈abꞌ Timnat-sera dꞌa vin̈, dꞌa tzalquixtac dꞌa yol yic ebꞌ yin̈tilal Efraín, yujto a lum chiꞌ ix scꞌan vin̈. Ix sbꞌoqꞌue jun chon̈abꞌ chiꞌ vin̈ dꞌa schaelal, ix cajnaj vin̈ dꞌay.