3 Yuj chiꞌ ix yal vin̈aj Josué dꞌa ebꞌ icha tic: ¿Bꞌaqꞌuin̈ val ol ex cajnaj dꞌa sat lum luum ix yacꞌ Jehová dꞌayon̈, aton co Diosal yedꞌ sDiosal ebꞌ co mam quicham? 4 Siqꞌuequel oxtacvan̈oc vinac dꞌa scal junjun macan̈ in̈tilal, yic tzin checbꞌat yil masanil lum luum chiꞌ. Ol yalan ebꞌ vabꞌi tas val yaj luum, yic vachꞌ ol yal in pucanbꞌat lum dꞌayex. 5 A juntzan̈ ebꞌ vin̈ chiꞌ uc macan̈ ol aj yechtanel lum ebꞌ vin̈, a lum yic ebꞌ yin̈tilal Judá aycan lum dꞌa sur, axo lum yic ebꞌ yin̈tilal José aycan lum dꞌa norte. 6 Ayic ol lajvoc yechtan lum ebꞌ vin̈, ol yicꞌancot ebꞌ vin̈ dꞌayin tas yaj luum. A in xo ol vacꞌoch suerte dꞌa luum dꞌa yichan̈ Jehová co Diosal. 7 Axo pax ebꞌ levita, malaj junoc macan̈ slum ebꞌ ol yicꞌaꞌ. A tas ol yicꞌ ebꞌ, aton sacerdoteal dꞌa yichan̈ Jehová. A pax ebꞌ yin̈tilal Gad, ebꞌ yic Rubén yedꞌ nan̈alxo yin̈tilal Manasés, ayxo smacbꞌen ebꞌ dꞌa stojolal bꞌaj sjavi cꞌu dꞌa aꞌ Jordán, aton lum yacꞌnaccan vin̈aj Moisés schecabꞌ Jehová dꞌa ebꞌ, xchi vin̈aj Josué chiꞌ.

8 Ayic van sbꞌat ebꞌ vin̈ yechtej lum chiꞌ, ix yalan vin̈aj Josué chiꞌ dꞌa ebꞌ vin̈: Ixiquec dꞌa masanil juntzan̈ luum chiꞌ, tze tzꞌibꞌani chajtil yaj luum. Ayic slajvi eyilan lum chiꞌ, tzex paxta, a inxo ol vacꞌoch suerte dꞌa luum dꞌa yichan̈ Jehová dꞌa Silo tic, xchi vin̈ dꞌa ebꞌ vin̈.

9 Ix bꞌat ebꞌ vin̈ yil luum, ix ecꞌ ebꞌ vin̈ dꞌa masanil juntzan̈ chon̈abꞌ chiꞌ. Uc macan̈ ix aj yechtan lum ebꞌ vin̈, ix stzꞌibꞌancot ebꞌ vin̈ masanil tastac ix aj junjun macan̈ luum, ato syal sbꞌisul juntzan̈ chon̈abꞌ. Ix lajvi chiꞌ, ix jax ebꞌ vin̈ dꞌa campamento dꞌa Silo bꞌaj aycan vin̈aj Josué chiꞌ. 10 Icha chiꞌ ix aj spojanecꞌ lum luum chiꞌ vin̈ dꞌa ebꞌ yetchon̈abꞌ dꞌa Silo, ix yacꞌanoch suerte vin̈ dꞌa luum dꞌa yichan̈ Jehová.

11 A lum bꞌabꞌel macan̈ ix och suerte dꞌay, aton lum ix yicꞌ ebꞌ yin̈tilal Benjamín, ato syal jay macan̈ yaj ebꞌ. A lum ix yicꞌ ebꞌ chiꞌ, a dꞌa snan̈al lum yic ebꞌ yin̈tilal Judá yedꞌ lum yic ebꞌ yin̈tilal José ix can luum. 12 A smojonal luum dꞌa norte, tzꞌel yich dꞌa aꞌ Jordán, sbꞌatn̈ej dꞌa snorteal Jericó, sbꞌatn̈ej dꞌa tzalquixtac dꞌa stojolal bꞌaj tzꞌem cꞌu, tzꞌelcꞌoch dꞌa tzꞌinan lum dꞌa yol yic Bet-avén. 13 Sbꞌatn̈ej, tzꞌecꞌ dꞌa yalan̈ emta chon̈abꞌ Luz scuchanpax Betel dꞌa sur, tzꞌemcꞌoch dꞌa Atarot-adar dꞌa slacꞌanil lum vitz ay dꞌa sur yic junxo Bet-horón ay dꞌa yalan̈. 14 Smeltzajbꞌat smojonal chiꞌ dꞌa stojolal sur dꞌa lum vitz ay dꞌa yichan̈ Bet-horón chiꞌ, masanto dꞌa Quiriat-baal, scuchanpax Quiriat-jearim, yic ebꞌ yin̈tilal Judá yaj jun chon̈abꞌ chiꞌ. Aton smojonal dꞌa stojolal bꞌaj tzꞌem cꞌu.

15 Axo smojonal dꞌa sur tzꞌelcꞌoch dꞌa Quiriat-jearim dꞌa stojolal bꞌaj tzꞌem cꞌu, masanto bꞌaj sqꞌueul sjaj a aꞌ yic Neftoa, 16 masanto tzꞌemcꞌoch dꞌa lum vitz ay dꞌa yichan̈ schꞌolanil yic Ben-hinom, dꞌa snorteal chꞌolan yic Refaim. Tzꞌempaxcꞌoch dꞌa schꞌolanil yic Hinom, tzꞌecꞌ dꞌa stzꞌeyel lum vitz yic Jebús, sbꞌatn̈ej dꞌa sjaj aꞌ Rogel. 17 Slajvi chiꞌ smeltzajpaxbꞌat dꞌa norte, tzꞌelcꞌoch dꞌa En-semes, sbꞌatn̈ej masanto dꞌa Gelilot, dꞌa yichan̈ lum vitzal Adumín, tzꞌemcꞌoch dꞌa sat qꞌueen yic vin̈aj Bohán yuninal vin̈aj Rubén. 18 Tzꞌecꞌpax dꞌa svitzal stojolal norte, dꞌa yichan̈ schꞌolanil aꞌ Jordán, masanto dꞌa aꞌ Jordán chiꞌ. 19 Tzꞌecꞌpax dꞌa norte yic Bet-hogla, slajvicancꞌoch dꞌa jun scꞌabꞌ aꞌ mar dꞌa snorteal yic aꞌ mar Muerto, bꞌaj scꞌochcan aꞌ Jordán, aton smojonal dꞌa sur chiꞌ.

20 Axo aꞌ Jordán ayoch smojonaloc dꞌa stojolal bꞌaj sjavi cꞌu. Aton juntzan̈ tic smojonal lum ix pojchajecꞌ dꞌa scal yin̈tilal Benjamín.

21-24 A juntzan̈ chon̈abꞌ ix yicꞌcan ebꞌ yin̈tilal Benjamín chiꞌ, 12 dꞌa smasanil yedꞌ yaldeail, aton Jericó, Bet-hogla, Emec-casis, Bet-arabá, Zemaraim, Betel, Avim, Pará, Ofra, Quefar-haamoni, Ofni yedꞌ Geba. 25-28 Yic pax 14 chon̈abꞌ ebꞌ yedꞌ yaldeail, aton Gabaón, Ramá, Beerot, Mizpa, Cafira, Mozah, Requem, Irpeel, Tarala, Zela, Elef, Jebús, aton chon̈abꞌ Jerusalén, Gabaa yedꞌ Quiriat. Aton lum tic ix yicꞌ ebꞌ yin̈tilal Benjamín.