A sluum ebꞌ yin̈tilal Manasés
17
Aton lum tic ix yicꞌcan ebꞌ yin̈tilal Manasés, sbꞌabꞌel yuninal vin̈aj José. Axo vin̈aj Maquir bꞌabꞌel yuninal vin̈aj Manasés, aton smam yicham ebꞌ yic Galaad. A ebꞌ ix icꞌancan lum ix yacꞌ scuch ebꞌ Galaad yedꞌ lum yic Basán yujto jelan ebꞌ dꞌa oval. 2 A juntzan̈xo ebꞌ yin̈tilal vin̈aj Manasés yuninal vin̈aj José, dꞌa suerteal ix aj schaan slum ebꞌ dꞌa stojolal bꞌaj tzꞌem cꞌu dꞌa aꞌ Jordán. A ebꞌ mam ichamabꞌil dꞌa junjun macan̈ ebꞌ tic: Aton vin̈aj Abiezer, vin̈aj Helec, vin̈aj Asriel, vin̈aj Siquem, vin̈aj Hefer yedꞌ vin̈aj Semida.3 A vin̈aj Manasés chiꞌ ay yuninal vin̈aj Maquir, axo vin̈aj Maquir chiꞌ ay yuninal vin̈aj Galaad, smam vin̈aj Hefer. Axo vin̈aj Hefer chiꞌ ay yuninal vin̈aj Zelofehad, aton vin̈ malaj junoc yuninal, an̈ej ovan̈ ebꞌ ix yisil vin̈ ay, aton ix Maala, ix Noa, ix Hogla, ix Milca yedꞌ ix Tirsa. 4 Ix cꞌoch ebꞌ ix dꞌa yichan̈ vin̈aj sacerdote Eleazar yedꞌ dꞌa yichan̈ vin̈aj Josué yedꞌ ebꞌ yajalil chon̈abꞌ. Ix yalan ebꞌ ix icha tic dꞌa ebꞌ: A Jehová ix alancan dꞌa vin̈aj Moisés to tzꞌacꞌjican co luum, icha ix aj yacꞌji slum masanil ebꞌ ay cuj co bꞌa yedꞌoc, xchi ebꞌ ix. Yuj chiꞌ ix acꞌji slum ebꞌ ix yuj vin̈aj Josué icha ix aj yacꞌji yic ebꞌ ayto yuj sbꞌa ebꞌ ix yedꞌoc, icha ajnac yalan Jehová.
5-6 Yujto ix acꞌji slum ebꞌ ix yisil vin̈aj Zelofehad chiꞌ, icha ix aj yacꞌji yic masanil ebꞌ vin̈ vinac, yuj chiꞌ lajun̈ macan̈ luum ix scha ebꞌ yin̈tilal Manasés chiꞌ. Chꞌoc pax yaj lum ix yicꞌ nan̈alxo ebꞌ dꞌa Galaad yedꞌ dꞌa Basán, aton lum ay dꞌa stojolal bꞌaj sjavi cꞌu dꞌa aꞌ Jordán. 7 A slum ebꞌ chiꞌ, ix bꞌatn̈ej lum dꞌa Aser masanto ix cꞌoch dꞌa Micmetat. Aton jun ay dꞌa yichan̈cot Siquem, sbꞌatn̈ej dꞌa sur masanto bꞌaj ay sjaj a aꞌ dꞌa Tapúa. 8 Vachꞌchom a lum Tapúa chiꞌ yic ebꞌ yin̈tilal Manasés, palta a chon̈abꞌ Tapúa chiꞌ, yic ebꞌ yin̈tilal Efraín. 9-10 A smojonal lum sbꞌatn̈ej dꞌa schꞌolanil aꞌ Caná dꞌa stojolal bꞌaj tzꞌem cꞌu, masanto scꞌoch dꞌa aꞌ mar Mediterráneo. A lum ay dꞌa snorteal jun chꞌolan chiꞌ, aton lum yic ebꞌ yin̈tilal Manasés. Axo lum ay dꞌa sur jun schꞌolanil chiꞌ yic ebꞌ yin̈tilal Efraín. A ebꞌ yin̈tilal Efraín chiꞌ ay jayeꞌ schon̈abꞌ ebꞌ dꞌa yol yic ebꞌ yin̈tilal Manasés, palta axo slumal dꞌa spatictac, yic ebꞌ yin̈tilal Manasés chiꞌ. A smojonal slum ebꞌ chiꞌ scꞌochcan dꞌa slum ebꞌ yin̈tilal Aser scan dꞌa norte dꞌa slacꞌanilxo aꞌ mar Mediterráneo, axo junxo smojonal scꞌochcan dꞌa slum ebꞌ yic Isacar, an̈ejaꞌ dꞌa norte dꞌa slacꞌanil aꞌ Jordán. 11 Ix yicꞌanpax juntzan̈xo chon̈abꞌ tic ebꞌ yin̈tilal Manasés chiꞌ dꞌa slum ebꞌ yin̈tilal Isacar yedꞌ dꞌa yol yic Aser, junjun yedꞌ yaldeail ay dꞌa slacꞌanil: Aton Bet-seán, Ibleam, Dor, Endor, Taanac yedꞌ Meguido, a jun yoxil chon̈abꞌ tic, scuchpax Nafot Dor. 12 A ebꞌ yin̈tilal Manasés chiꞌ, maj yal-laj spechjiel ebꞌ cananeo cajan dꞌa juntzan̈ chon̈abꞌ chiꞌ yuj ebꞌ, yujto ix stecꞌbꞌej sbꞌa ebꞌ scan cajan taꞌ. 13 Palta axo yic ix yicꞌan yipoc ebꞌ israel chiꞌ, ix yacꞌan pural ebꞌ cananeo chiꞌ ebꞌ yochcan smunlajvumoc.
A ebꞌ yin̈tilal José ix icꞌancan lum yax luum
14 Ix yalan ebꞌ yin̈tilal José dꞌa vin̈aj Josué icha tic:
—¿Tas yuj junn̈ej macan̈ co lum ix acꞌaꞌ? A on̈ tic tzijtum co bꞌisul, yujto ix yicꞌqꞌue vaan co bꞌisul Jehová, xchi ebꞌ.
15 Ix yalan vin̈aj Josué chiꞌ dꞌa ebꞌ icha tic:
—Yacbꞌan to tzijtum e bꞌisul, maxtzac yabꞌlaj bꞌaj tzex aj dꞌa lum tzalquixtac ix acꞌji dꞌayex, ixiquec dꞌa caltac yax lum yic ebꞌ ferezeo yedꞌ yic ebꞌ refaíta. A lum chiꞌ tze chꞌaquemi, xchi vin̈.
16 Ix yalan ebꞌ icha tic:
—Tocval ol yabꞌ lum tzalquixtac tic dꞌayon̈. A ebꞌ cananeo cajan dꞌa acꞌlic chiꞌ ay scarruaje ebꞌ, icha pax chiꞌ ebꞌ cajan dꞌa Bet-seán yedꞌ ebꞌ cajan dꞌa juntzan̈ aldea dꞌa acꞌlic Jezreel, xchi ebꞌ.
17 Ix tacꞌvi vin̈aj Josué chiꞌ dꞌa ebꞌ, aton ebꞌ yin̈tilal Efraín yedꞌ ebꞌ yic Manasés:
—A ex tic te nivan e bꞌisul, ay smay e bꞌinaji, yuj chiꞌ max yal-laj an̈ej junoc macan̈ lum tic ol eyicꞌaꞌ. 18 Yuj chiꞌ a lum tzalquixtac te ay steꞌal tzeyiquejcan smasanil, ol laj e chꞌaquel teꞌ steꞌal lum chiꞌ. Ol e satel ebꞌ cananeo cajan taꞌ, vachꞌchom te jelan ebꞌ, vachꞌchom ay pax scarruaje ebꞌ qꞌueen yic oval, xchi vin̈.