A sluum ebꞌ yin̈tilal Efraín yedꞌ ebꞌ yic Manasés
16
A smojonal bꞌaj ix cꞌoch lum ix yicꞌ ebꞌ yin̈tilal vin̈aj José, ix schael yich dꞌa aꞌ Jordán, dꞌa stojolal bꞌaj sjavi cꞌu dꞌa sjaj a aꞌ dꞌa Jericó, sbꞌatn̈ej dꞌa tzꞌinan luum, sqꞌue dꞌa tzalquixtac dꞌa yol yic Betel. 2 A Betel chiꞌ an̈ejaꞌ scuchanpax Luz dꞌa pecaꞌ. Bꞌen̈ej tzꞌecꞌ dꞌa lum yic ebꞌ arquita, masanto scꞌoch dꞌa Atarot. 3 Sbꞌatpax dꞌa stojolal bꞌaj tzꞌem cꞌu dꞌa slum ebꞌ jafletita, masanto scꞌoch dꞌa smojonal Bet-horón, jun ay dꞌa yalan̈, scꞌochpax dꞌa Gezer, tzꞌelpaxcꞌoch dꞌa aꞌ mar Mediterráneo. 4 Aton lum tic ix scha ebꞌ yin̈tilal José smacbꞌenoc, aton ebꞌ yin̈tilal Manasés yedꞌ ebꞌ yic Efraín.A sluum ebꞌ yin̈tilal Efraín
5 A smojonal slum ebꞌ yin̈tilal Efraín ix schael yich dꞌa stojolal bꞌaj sjavi cꞌu dꞌa Atarot-adar, masanto scꞌoch dꞌa Bet-horón, jun ay dꞌa yibꞌan̈, 6 tzꞌemcancꞌoch dꞌa aꞌ mar Mediterráneo. A dꞌa snorteal slum ebꞌ chiꞌ, ataꞌ ay Micmetat, ix bꞌatn̈ej dꞌa smojonal dꞌa stojolal bꞌaj sjavi cꞌu, masanto scꞌoch dꞌa Taanat-silo, slajvi chiꞌ tzꞌecꞌ dꞌa Janoa, 7 tzꞌemcꞌoch dꞌa Atarot yedꞌ dꞌa Naarat, tzꞌecꞌ dꞌa stiꞌ smojonal Jericó, tzꞌemcꞌoch dꞌa aꞌ Jordán. 8 Sbꞌatpax dꞌa Tapúa, sbꞌatcan smojonal dꞌa stojolal bꞌaj tzꞌem cꞌu, masanto scꞌoch dꞌa a aꞌ dꞌa yol yic Caná, scꞌochcan dꞌa aꞌ mar Mediterráneo. Aton lum chiꞌ ix yicꞌ ebꞌ yin̈tilal Efraín, icha chiꞌ ix aj spojjiecꞌ lum dꞌa scal junjun macan̈ ebꞌ. 9 Aytopax juntzan̈xo chon̈abꞌ yedꞌ juntzan̈xo aldea ix yicꞌcan ebꞌ yic Efraín chiꞌ dꞌa yol smacbꞌen ebꞌ yin̈tilal Manasés. 10 Palta a ebꞌ yin̈tilal Efraín chiꞌ, maj spechel-laj ebꞌ cananeo ebꞌ cajan dꞌa Gezer. Yuj chiꞌ ix can ebꞌ dꞌa scal ebꞌ, ix acꞌji pural ebꞌ cananeo chiꞌ yochcan smunlajvumoc ebꞌ.