A lum sluum ebꞌ yic Judá
15
A lum luum ix yicꞌ ebꞌ yin̈tilal Judá, ato syal jay macan̈ yaj ebꞌ, ix cꞌoch lum dꞌa smojonal yic Edom. Axo dꞌa sur, ix cꞌoch lum dꞌa taquin̈ lum yic Zin. 2 A dꞌa jun pacꞌan chiꞌ tzꞌecꞌ smojonal sur yic aꞌ mar Muerto, 3 sbꞌat dꞌa lum vitz sqꞌue dꞌa Acrabim, tzꞌecꞌ dꞌa taquin̈ lum yic Zin, tzꞌecꞌ dꞌa sur dꞌa yic Cades-barnea. Slajvi chiꞌ, sbꞌatn̈ej dꞌa Hezrón, sqꞌuecꞌoch dꞌa Adar, smeltzajbꞌat dꞌa Carca. 4 Ataꞌ sbꞌatn̈ej masanto dꞌa Asmón, tzꞌelcꞌoch dꞌa aꞌ elumaꞌ dꞌa yol yicꞌ Egipto, scꞌochcan dꞌa aꞌ mar Mediterráneo, aton jun tic ix och smojonaloc Judá dꞌa sur. 5 Axo dꞌa stojolal bꞌaj sjavi cꞌu, a aꞌ mar Muerto ayoch smojonaloc, masanto bꞌaj scꞌochcan aꞌ Jordán dꞌa aꞌ mar Muerto chiꞌ. Ataꞌ sbꞌatpaxcan smojonal dꞌa norte, 6 sqꞌuecꞌoch dꞌa Bet-hogla, tzꞌecꞌ dꞌa snorteal Bet-arabá, sbꞌatxi lum taꞌ, masanto scꞌoch dꞌa qꞌuen tenam yic vin̈aj Bohán, yuninal vin̈aj Rubén. 7 Slajvi chiꞌ, sqꞌue dꞌa schꞌolanil yic Acor scꞌoch dꞌa Debir, axo taꞌ smeltzajbꞌat dꞌa Gilgal ay dꞌa yichan̈cot lum vitz dꞌa Adumín, dꞌa stojolal sur dꞌa jun a aꞌ sbꞌeyi. Slajvi chiꞌ, tzꞌecꞌ jun mojon chiꞌ dꞌa sjaj a aꞌ yic En-semes, masanto scꞌoch dꞌa sjaj aꞌ yic En-rogel, 8 tzꞌecꞌ dꞌa schꞌolanil lum yic vin̈ yuninal vin̈aj Hinom, dꞌa stojolal sur yic Jebús, aton chon̈abꞌ Jerusalén. Slajvi chiꞌ sqꞌue dꞌa sjolom lum vitz dꞌa stojolal bꞌaj tzꞌem cꞌu dꞌa schꞌolanil Hinom yedꞌ dꞌa snorteal schꞌolanil Refaim, 9 smeltzajbꞌat dꞌa jolom vitz chiꞌ, masanto bꞌaj sqꞌueul sjaj aꞌ yic Neftoa, masanto dꞌa nivac chon̈abꞌ dꞌa jolom vitz yic Efrón, tzꞌecꞌ dꞌa Baala, scuchpax Quiriat-jearim. 10 A dꞌa Baala chiꞌ smeltzajbꞌat smojonal dꞌa stojolal bꞌaj tzꞌem cꞌu, masanto scꞌoch dꞌa jolom vitz yic Seir, tzꞌecꞌ dꞌa scostil lum vitz Jearim ma Quesalón dꞌa norte, slajvi chiꞌ tzꞌemcꞌoch dꞌa chon̈abꞌ Bet-semes, tzꞌecꞌcꞌoch dꞌa chon̈abꞌ Timna, 11 masanto dꞌa stojolal norte yic Ecrón, sbꞌatxi, masanto scꞌoch dꞌa Sicrón, tzꞌecꞌ dꞌa jolom vitz yic Baala. Slajvi chiꞌ tzꞌelcꞌoch dꞌa Jabneel, axo slajvicancꞌoch chiꞌ dꞌa aꞌ mar Mediterráneo. 12 Aton aꞌ mar Mediterráneo chiꞌ ayoch smojonaloc dꞌa stojolal bꞌaj tzꞌem cꞌu. Aton juntzan̈ chiꞌ smojonal lum ix can smacbꞌenoc ebꞌ yin̈tilal Judá, ayic ix pojchajbꞌat lum dꞌa scal junjun macan̈ ebꞌ.Ix acꞌji ganar chon̈abꞌ Hebrón yedꞌ chon̈abꞌ Debir yuj vin̈aj Caleb
13 Ix yacꞌan jun macan̈ lum yol smacbꞌen Judá vin̈aj Josué dꞌa vin̈aj Caleb yuninal vin̈aj Jefone, icha aj yalan Jehová, aton lum Hebrón ix acꞌji dꞌa vin̈. A jun chon̈abꞌ Hebrón chiꞌ schon̈abꞌ vin̈aj Arba dꞌa pecaꞌ. A vin̈aj Arba chiꞌ, a vin̈aj Anac aycan yin̈tilal vin̈. 14 Oxvan̈ yin̈tilal vin̈aj Anac chiꞌ ix spechel vin̈aj Caleb chiꞌ dꞌa Hebrón, aton vin̈aj Sesai, vin̈aj Ahimán yedꞌ vin̈aj Talmai. 15 Ix lajvi chiꞌ, ix bꞌatpax vin̈aj Caleb chiꞌ yacꞌ oval yedꞌ ebꞌ ay dꞌa chon̈abꞌ Debir, Quiriat-sefer sbꞌi dꞌa pecaꞌ. 16 Ix yalan vin̈: A mach tzꞌacꞌan oval yedꞌ jun chon̈abꞌ tic, tato syacꞌ ganar oval chiꞌ, ol vacꞌ ix Acsa ix visil yetbꞌeyumoc, xchi vin̈.
17 A vin̈ ix acꞌan ganar jun chon̈abꞌ chiꞌ, aton vin̈aj Otoniel yuninal vin̈aj Cenaz, yucꞌtac vin̈aj Caleb chiꞌ, yuj chiꞌ ix yacꞌ ix yisil vin̈ chiꞌ yetbꞌeyumoc vin̈aj Otoniel chiꞌ. 18 Axo yic ix lajvi yicꞌlan sbꞌa ebꞌ chiꞌ, ix yalan vin̈aj Otoniel chiꞌ dꞌa ix Acsa chiꞌ to scꞌan slum ix dꞌa vin̈ smam chiꞌ. Yuj chiꞌ ayic ix emta ix dꞌa yibꞌan̈ nocꞌ bꞌuru, ix scꞌanbꞌan vin̈ smam ix chiꞌ dꞌay icha tic:
—¿Tas tza nibꞌej? xchi vin̈ dꞌa ix.
19 Ix yalan ix:
—Ina a lum taquin̈ lum ix acꞌ dꞌayin dꞌa Neguev, elocabꞌ dꞌa a cꞌol to tzacꞌ lum yax sat dꞌayin, lum ay yal sat, xchi ix.
Yuj chiꞌ ix yacꞌ junxo lum vin̈ dꞌa ix. Ay sjaj a aꞌ dꞌa sat luum dꞌa sjolomtac yedꞌ junxo aꞌ dꞌa syoptac luum.
Juntzan̈ chon̈abꞌ yic ebꞌ yin̈tilal Judá
20 Aton lum smacbꞌen ebꞌ yin̈tilal Judá tic, ix pojchajcanbꞌat lum dꞌa scal ebꞌ dꞌa macquiltaquil, ato syal jay macan̈ yaj ebꞌ. 21-32 A dꞌa lum bꞌabꞌel macan̈, 29 chon̈abꞌ ay dꞌa luum yedꞌ yaldeail junjun, a dꞌa tzꞌinan lum dꞌa sur scan luum, dꞌa smojonal yic Edom, aton sbꞌi juntzan̈ chon̈abꞌ chiꞌ: Cabseel, Edar, Jagur, Cina, Dimona, Adada, Cedes, Hazor, Itnán, Zif, Telem, Bealot, Hazor-hadata, Queriot, Hezrón scuchanpax Hazor, Amam, Sema, Molada, Hazar-gada, Hesmón, Bet-pelet, Hazar-sual, Beerseba, Bizotia, Baala, Iim, Esem, Eltolad, Quesil, Horma, Siclag, Madmana, Sansana, Lebaot, Silhim, Aín yedꞌ Rimón.
33-36 Axo lum schabꞌil macan̈, 14 chon̈abꞌ ay dꞌa luum yedꞌ yaldeail junjun, a dꞌa yichtac lum vitz dꞌa stojolal norte scan luum, aton sbꞌi juntzan̈ chon̈abꞌ chiꞌ: Estaol, Zora, Asena, Zanoa, En-ganim, Tapúa, Enam, Jarmut, Adulam, Soco, Azeca, Saaraim, Aditaim, Gedera yedꞌ Gederotaim.
37-41 Axo lum yoxil macan̈, 16 chon̈abꞌ ay dꞌa luum yedꞌ yaldeail junjun, a dꞌa yichtac lum vitz dꞌa stojolal sur scan luum, aton sbꞌi juntzan̈ chon̈abꞌ chiꞌ: Zenán, Hadasa, Migdal-gad, Dileán, Mizpa, Jocteel, Laquis, Boscat, Eglón, Cabón, Lahmam, Quitlis, Gederot, Bet-dagón, Naama yedꞌ Maceda.
42-44 Axo lum schan̈il macan̈, bꞌalun̈eꞌ chon̈abꞌ ay dꞌa luum yedꞌ yaldeail junjun, a dꞌa yichtac lum vitz dꞌa scal norte yedꞌ sur scan luum, aton sbꞌi juntzan̈ chon̈abꞌ chiꞌ: Libna, Eter, Asán, Jifta, Asena, Nezib, Keila, Aczib yedꞌ Maresa.
45-47 Axo lum yoil macan̈, a dꞌa stiꞌ aꞌ mar Mediterráneo ay luum. Aton juntzan̈ chon̈abꞌ tic yedꞌ yaldeail junjun: Aton Ecrón yedꞌ juntzan̈xo chon̈abꞌ ay dꞌa slacꞌanil, Asdod yedꞌ juntzan̈xo nivac chon̈abꞌ ay dꞌa slacꞌanil yedꞌ Gaza yedꞌ juntzan̈xo chon̈abꞌ dꞌa stitac aꞌ mar Mediterráneo masanto scꞌoch dꞌa aꞌ elumaꞌ dꞌa yol yic Egipto.
48-51 Axo lum svaquil macan̈, uxlucheꞌ chon̈abꞌ ay dꞌa luum yedꞌ yaldeail junjun, a dꞌa lum tzalquixtac scan luum, aton sbꞌi juntzan̈ chon̈abꞌ chiꞌ: Samir, Jatir, Soco, Dana, Quiriat-sana scuchanpax Debir, Anab, Estemoa, Anim, Gosén, Holón yedꞌ Gilo.
52-54 Axo lum yuquil macan̈, bꞌalun̈eꞌ chon̈abꞌ ay dꞌa luum yedꞌ yaldeail junjun, a dꞌa tzalquixtac scan luum, aton sbꞌi juntzan̈ chon̈abꞌ chiꞌ: Arab, Duma, Esán, Janum, Bet-tapúa, Afeca, Humta, Quiriat-arba aton Hebrón yedꞌ Sior.
55-57 Axo lum svajxaquil macan̈, lajun̈eꞌ chon̈abꞌ ay dꞌa luum yedꞌ yaldeail junjun, a dꞌa tzalquixtac scan luum, aton sbꞌi juntzan̈ chon̈abꞌ chiꞌ: Maón, Carmel, Zif, Juta, Jezreel, Jocdeam, Zanoa, Caín, Gabaa yedꞌ Timna.
58-59 Axo lum sbꞌalun̈il macan̈, vaqueꞌ chon̈abꞌ ay dꞌa luum yedꞌ yaldeail junjun, an̈ejaꞌ pax dꞌa tzalquixtac scan luum, aton sbꞌi juntzan̈ chon̈abꞌ chiꞌ: Halhul, Bet-sur, Gedor, Maarat, Bet-anot yedꞌ Eltecón.
60 Axo lum slajun̈il macan̈, chabꞌ chon̈abꞌ ay dꞌa luum yedꞌ yaldeail junjun, a dꞌa tzalquixtac pax scan luum, aton sbꞌi juntzan̈ chon̈abꞌ chiꞌ: Quiriat-baal, scuchanpax Quiriat-jearim yedꞌ Rabá.
61-62 Axo lum yuxluchil macan̈, vaqueꞌ chon̈abꞌ ay dꞌa luum yedꞌ yaldeail junjun, a dꞌa tzꞌinan lum scan luum, aton sbꞌi juntzan̈ chon̈abꞌ chiꞌ: Bet-arabá, Midín, Secaca, Nibsán, schon̈abꞌil Atzꞌam Atzꞌam yedꞌ En-gadi.
63 A ebꞌ yin̈tilal Judá chiꞌ, maj yal-laj spechanel ebꞌ jebuseo ebꞌ cajan dꞌa Jerusalén, yuj chiꞌ ix cann̈ej ebꞌ jebuseo chiꞌ dꞌa scal ebꞌ.