Ix acꞌji slum juntzan̈xo ebꞌ yin̈tilal Israel
14
1-2 Ay nan̈al slajun̈il ebꞌ yin̈tilalcan Israel mantzac scha sluum. Ix scha slum ebꞌ chiꞌ dꞌa lum Canaán, ix pojchajecꞌ luum yuj vin̈aj sacerdote Eleazar yedꞌ vin̈aj Josué yuninal vin̈aj Nun yedꞌ ebꞌ yajal yaj dꞌa junjun yin̈tilal ebꞌ israel. Ix pojjiecꞌ lum dꞌa ebꞌ dꞌa suerteal, ato syal bꞌaj ix schꞌox Dios dꞌa junjun macan̈ ebꞌ icha val ajnac yalan Jehová dꞌa vin̈aj Moisés. 3-4 Yacꞌnacxopaxcan lum scꞌaxepalecꞌ aꞌ Jordán vin̈aj Moisés dꞌa nan̈al yoxilxo macan̈ ebꞌ yin̈tilalcan Israel chiꞌ. Axo pax ebꞌ yin̈tilalcan vin̈aj Leví, malaj slum ebꞌ ix acꞌji, yujto a ebꞌ yin̈tilalcan José, chabꞌ macan̈ ix aj ebꞌ, aton ebꞌ yic Manasés yedꞌ ebꞌ yic Efraín. Yuj chiꞌ a ebꞌ yin̈tilalcan vin̈aj Leví chiꞌ maj yicꞌ junoc macan̈ sluum ebꞌ bꞌaj junn̈ej tzꞌajcani, palta an̈ej juntzan̈ chon̈abꞌ bꞌaj syal scajnaj ebꞌ yedꞌ lum ay dꞌa spatictac schon̈abꞌ ebꞌ chiꞌ bꞌaj sva nocꞌ smolbꞌetzal nocꞌ ebꞌ, aton chiꞌ ix acꞌji dꞌa ebꞌ. 5 Ix spojecꞌ lum ebꞌ israel chiꞌ dꞌa spatic icha val ajnac yalan Jehová dꞌa vin̈aj Moisés.Lum smacbꞌen vin̈aj Caleb
6 A ebꞌ yin̈tilal Judá ix javi ebꞌ dꞌa Gilgal yic slolon ebꞌ yedꞌ vin̈aj Josué. Axo vin̈aj Caleb cenezeo yuninal vin̈aj Jefone, ix alan dꞌa vin̈aj Josué chiꞌ icha tic: Nacot tas yalnac Jehová dꞌa vin̈ schecabꞌ, aton vin̈aj Moisés, ayic yalannac uuj yedꞌ vuuj ayic ayon̈ ecꞌ dꞌa Cades-barnea. 7 Yictax 40 abꞌil in qꞌuinal, schecannac on̈ cot vin̈ dꞌa Cades-barnea chiꞌ, yuj culnaquecꞌ quil tastac yilji jun luum tic. Axo yic co cꞌochnacxi, icha val aj vilan luum, icha chiꞌ vutej valani.
8 Axo pax juntzan̈xo ebꞌ vin̈ ulecꞌ quedꞌoc, man̈ vachꞌoc yutej ebꞌ vin̈ yalani, xibꞌtej ebꞌ anima chiꞌ ebꞌ vin̈, a on̈xo pax tic jun, vachꞌ cutej calani, yujto tojoln̈ej yaj co pensar dꞌa yichan̈ Jehová co Diosal. 9 Yuj chiꞌ a dꞌa jun cꞌu chiꞌ, yacꞌcan stiꞌ vin̈aj Moisés dꞌayin, yalan vin̈ icha tic: A lum luum bꞌaj ix ach ecꞌ il chiꞌ, ic yaj lum yedꞌ ebꞌ in̈tilal dꞌa juneln̈ej, yujto te tojol a pensar dꞌa yichan̈ Jehová co Diosal, xchican vin̈. 10 A jun tic 45 abꞌilxo yalancan vin̈aj Moisés chiꞌ yuj Jehová, ayic ayon̈ecꞌ dꞌa tzꞌinan luum. A yuj tas yalnaccan vin̈ chiꞌ, yuj chiꞌ pitzan into ecꞌ yuj Jehová. A ticnaic jun, ayxo 85 abꞌil in qꞌuinal, 11 palta tecꞌan into svabꞌi, icha yic schecannac on̈ cot vin̈aj Moisés chiꞌ quil luum, an̈ejaꞌ icha chiꞌ in tecꞌanil svabꞌi, tzato yal vibꞌxi yedꞌ vacꞌan oval, icha dꞌa yic chiꞌ. 12 Yuj chiꞌ sval dꞌayach to tzacꞌ lum tzalquixtac dꞌayin, icha ajnac yalan Jehová dꞌayin. Abꞌnac to ataꞌ cajan ebꞌ nivac vinac yin̈tilal vin̈aj Anac, te nivac yaj schon̈abꞌ ebꞌ sbꞌoani, te vachꞌ yajoch smuroal, palta a in tic, svacꞌoch Jehová yipoc in cꞌool to aꞌ ol colvaj vedꞌoc, yic ol yal vicꞌanel ebꞌ taꞌ, icha ix yutej yalani, xchi vin̈aj Caleb chiꞌ.
13 Yuj chiꞌ ix yal vachꞌ lolonel vin̈aj Josué dꞌa yibꞌan̈ vin̈aj Caleb chiꞌ, ix yacꞌan lum Hebrón vin̈ dꞌa vin̈ yedꞌ dꞌa masanil yin̈tilal. 14 Icha chiꞌ ix aj yochcan lum Hebrón chiꞌ yicoc vin̈aj Caleb yedꞌ ebꞌ yin̈tilal dꞌa juneln̈ej, yujto tojol spensar vin̈ dꞌa yichan̈ Jehová sDiosal Israel. 15 A chon̈abꞌ Hebrón chiꞌ, Arba sbꞌi dꞌa pecaꞌ, yujto Arba sbꞌi jun vin̈ te chaan̈ steel ay smay dꞌa scal ebꞌ yin̈tilal vin̈aj Anac. Ix lajvi yicꞌancan slum junjun macan̈ yin̈tilal ebꞌ israel chiꞌ, ix och vaan oval dꞌa jun lugar chiꞌ.