A juntzan̈xo lugar manto acꞌjilaj ganar
13
Ayic te icham vinacxo vin̈aj Josué, ix yalan Jehová dꞌa vin̈ icha tic: A ach tic ayxo a qꞌuinal, palta te nivanto lum luum manto eyiqꞌuecꞌ dꞌa ebꞌ anima tic. 2 Manto eyiqꞌuecꞌlaj lum yic ebꞌ vin̈ filisteo yedꞌ lum yic ebꞌ vin̈ gesureo, 3 aton lum sbꞌatn̈ej dꞌa aꞌ Sihor, dꞌa stojolal bꞌaj sjavi cꞌu dꞌa Egipto, masanto scꞌoch dꞌa smojonal yic Ecrón dꞌa stojolal norte, aton juntzan̈ lum chiꞌ yic ebꞌ cananeo. A dꞌa jun macan̈ chiꞌ ay ovan̈ ebꞌ vin̈ yajalil ebꞌ filisteo, aton ebꞌ vin̈ yajal yaj dꞌa Gaza, dꞌa Asdod, dꞌa Ascalón, dꞌa Gat yedꞌ dꞌa Ecrón. Axo smacbꞌen ebꞌ aveo 4 scan dꞌa sur yedꞌ masanil slum ebꞌ cananeo, sbꞌatn̈ej dꞌa Mehara dꞌa yol yic Sidón, masanto scꞌoch dꞌa Afec, dꞌa smojonal yic ebꞌ amorreo. 5 Ayto pax can lum yic ebꞌ giblita yedꞌ masanil lum Líbano dꞌa stojolal bꞌaj sjavi cꞌu, sbꞌatn̈ej dꞌa Baal-gad dꞌa yich lum vitz Hermón, masanto tzꞌochcꞌoch dꞌa Hamat. 6 Ol viqꞌuel masanil juntzan̈ ebꞌ tic dꞌa eyichan̈: Aton ebꞌ aj Sidón yedꞌ masanil ebꞌ cajan dꞌa tzalquixtac sbꞌatn̈ej dꞌa Líbano, masanto dꞌa Misrefot-maim. A ach ol a pojcanecꞌ luum, ol acꞌancan lum smacbꞌenoc ebꞌ etisraelal icha val ix aj valan dꞌayach. 7 Ol a pojcanecꞌ masanil juntzan̈ lum tic dꞌa bꞌalun̈ macan̈xo yin̈tilalcan Israel yedꞌ dꞌa nan̈alxo yin̈tilalcan Manasés, xchi Jehová dꞌa vin̈aj Josué chiꞌ.Lum yic Manasés, Rubén yedꞌ Gad
8 A ebꞌ yin̈tilalcan Rubén, ebꞌ yic Gad yedꞌ nan̈alxo ebꞌ yic Manasés, schanac smacbꞌen ebꞌ yacꞌnaccan vin̈aj Moisés schecabꞌ Jehová, aton slum ebꞌ dꞌa stojolal bꞌaj sjavi cꞌu dꞌa aꞌ Jordán. 9 Ix yicꞌn̈ej lum sbꞌatn̈ej dꞌa chon̈abꞌ Aroer ebꞌ, aton dꞌa stiꞌ a aꞌ scuch Arnón yedꞌ jun chon̈abꞌ ay dꞌa stiꞌ aꞌ chiꞌ yedꞌ masanil span̈anil yic Medeba masanto dꞌa Dibón, 10 masanil chon̈abꞌ macbꞌil yuj vin̈aj Sehón sreyal ebꞌ amorreo ecꞌnac cajan dꞌa Hesbón, masanto scꞌoch dꞌa smojonal yic ebꞌ amonita. 11 Ix yiquejcan lum Galaad ebꞌ, lum yic ebꞌ gesureo, lum yic ebꞌ maacateo, masanil lum svitzal Hermón yedꞌ masanil lum yic Basán, scꞌochn̈ej dꞌa Salca. 12 Ix yicꞌanpax masanil smacbꞌen vin̈aj Og sreyal Basán ebꞌ, vin̈ yacꞌnac reyal dꞌa Astarot yedꞌ dꞌa Edrei, axon̈ej vin̈ cannac dꞌa scal ebꞌ refaíta. A ebꞌ tic ix acꞌji ganar ebꞌ yuj vin̈aj Moisés, ix pechjipaxel ebꞌ dꞌa sluum chiꞌ. 13 Axo pax ebꞌ aj Gesur yedꞌ ebꞌ aj Maaca maj pechjiel-laj ebꞌ taꞌ, palta to ix cann̈ej ebꞌ dꞌa scal ebꞌ israel.
14 Axo pax ebꞌ yin̈tilalcan vin̈aj Leví, maj acꞌjoccan smacbꞌen ebꞌ yuj vin̈aj Moisés, yujto a masanil silabꞌ tzꞌacꞌji dꞌa Jehová sDiosal Israel, a chiꞌ smacbꞌen ebꞌ yajcani, icha ajnac yalan Jehová.
15 Acꞌbꞌilcan slum ebꞌ yin̈tilalcan Rubén yuj vin̈aj Moisés, icha jayeꞌ macan̈il ebꞌ. 16 Yuj chiꞌ, sbꞌatn̈ej slum ebꞌ chiꞌ dꞌa chon̈abꞌ Aroer dꞌa stiꞌ aꞌ Arnón yedꞌ dꞌa jun chon̈abꞌ ay dꞌa stiꞌ aꞌ chiꞌ yedꞌ masanil span̈anil yic Medeba, 17 masanto scꞌoch dꞌa Hesbón yedꞌ masanil chon̈abꞌ ay dꞌa pan̈an chiꞌ: Aton Dibón, Bamot-baal, Bet-baal-meón, 18 Jahaza, Cademot, Mefaat, 19 Quiriataim, Sibma, Zeret-sahar a jun chiꞌ ay dꞌa jun tzalan dꞌa snan̈al jun chꞌolan chiꞌ, 20 Bet-peor, Bet-jesimot yedꞌ masanil spacꞌanil lum vitz Pisga, 21 aton masanil junjun chon̈abꞌ ay dꞌa pan̈an yedꞌ masanil smacbꞌen vin̈aj Sehón sreyal ebꞌ amorreo ecꞌnac cajan dꞌa Hesbón. Acꞌbꞌil ganar vin̈aj Sehón chiꞌ yuj vin̈aj Moisés. Acꞌbꞌilpax ganar juntzan̈xo ebꞌ yajal aycan dꞌa yalan̈ smandar vin̈aj Sehón chiꞌ, aton ebꞌ yajal yaj dꞌa Madián: Aton vin̈aj Evi, vin̈aj Requem, vin̈aj Zur, vin̈aj Hur yedꞌ vin̈aj Reba. 22 Ix miljipaxcham vin̈aj Balaam yuninal vin̈aj Beor, vin̈ naumel lolonel. Tzijtumto juntzan̈xo ebꞌ vin̈ ix cham yedꞌ vin̈. 23 A juntzan̈ chon̈abꞌ chiꞌ yedꞌ yaldeail ix ochcan smacbꞌenoc ebꞌ yin̈tilalcan Rubén, ato syal jay macan̈ yaj ebꞌ. A smacbꞌen ebꞌ chiꞌ ix cꞌochn̈ej dꞌa aꞌ Jordán.
24 Yacꞌnacpaxcan slum ebꞌ yin̈tilalcan Gad vin̈aj Moisés chiꞌ icha jay macan̈ yaj ebꞌ. 25 Ix yiquejcan chon̈abꞌ Jazer ebꞌ, masanil chon̈abꞌ yic Galaad yedꞌ nan̈al lum yic ebꞌ amonita, masanto dꞌa chon̈abꞌ Aroer dꞌa yichan̈cot Rabá. 26 Sbꞌat lum dꞌa Hesbón, masanto scꞌoch lum dꞌa Ramat-mizpa yedꞌ Betonim, sbꞌatpax lum dꞌa Mahanaim masanto scꞌoch lum dꞌa smojonal yic Debir. 27 Axo dꞌa chꞌolquixtac ix yiquejpaxcan Bet-aram ebꞌ, Bet-nimra, Sucot yedꞌ Zafón, aton juntzan̈xo chon̈abꞌ chiꞌ ecꞌnac dꞌa yol smacbꞌen vin̈aj Sehón sreyal Hesbón. Icha chiꞌ ix aj sbꞌeyn̈ejbꞌat slum ebꞌ dꞌa stojolal bꞌaj sjavi cꞌu dꞌa aꞌ Jordán, ix cꞌochn̈ej dꞌa sur dꞌa aꞌ n̈ajabꞌ Cineret. 28 Aton masanil juntzan̈ chon̈abꞌ chiꞌ yedꞌ yaldeail ix yiquejcan ebꞌ yin̈tilalcan Gad, ato syal jay macan̈ yaj ebꞌ.
29 An̈ejtonaꞌ, yacꞌnacpaxcan slum nan̈alxo ebꞌ yin̈tilalcan Manasés vin̈aj Moisés chiꞌ, ato syal jay macan̈ pax yaj ebꞌ. 30-31 A slum ebꞌ chiꞌ sbꞌatn̈ej dꞌa Mahanaim, aton lum yic vin̈aj Og sreyal Basán dꞌa pecaꞌ yedꞌ pax chon̈abꞌ Astarot yedꞌ Edrei bꞌaj ecꞌnac cajan vin̈aj Og chiꞌ. Ix ochpaxcan nan̈alxo lum yic Galaad dꞌa yol smacbꞌen nan̈alxo ebꞌ yin̈tilal Maquir. Axo 60 chon̈abꞌ dꞌa yol yic Basán chiꞌ, ataꞌ ix can cajan ebꞌ yin̈tilal Jair yin̈tilalcan Manasés.
A ebꞌ yin̈tilalcan Manasés chiꞌ, ay bꞌaj scuchpax ebꞌ yin̈tilal Maquir, yujto a vin̈aj Maquir chiꞌ yuninal vin̈aj Manasés.
32 Aton juntzan̈ lum tic yacꞌnaccan vin̈aj Moisés smacbꞌenoc ebꞌ, ayic yecꞌnac ebꞌ dꞌa yacꞌlical Moab, dꞌa stojolal bꞌaj sjavi cꞌu dꞌa aꞌ Jordán, dꞌa yichan̈cot Jericó. 33 Axo pax ebꞌ yin̈tilal vin̈aj Leví, malaj lum ix acꞌji smacbꞌenoc ebꞌ, palta a Jehová sDiosal ebꞌ ayoch smacbꞌenoc icha ajnac yalchajcani.