Ebꞌ rey ix satjiel yuj vin̈aj Moisés
12
Ay chavan̈ ebꞌ vin̈ rey ix acꞌji ganar yuj ebꞌ israel dꞌa stojolal bꞌaj sjavi cꞌu dꞌa aꞌ Jordán. Masanil lum ix yicꞌcan ebꞌ, sbꞌatn̈ej lum dꞌa a aꞌ scuch Arnón masanto scꞌoch dꞌa jolom vitz Hermón yedꞌ masanil span̈anil stiꞌ aꞌ Jordán dꞌa stojolal bꞌaj sjavi cꞌu.2 Ix acꞌji ganar vin̈aj Sehón sreyal ebꞌ amorreo, cajan dꞌa Hesbón. A smacbꞌen vin̈ chiꞌ, sbꞌatn̈ej dꞌa chon̈abꞌ Aroer dꞌa stiꞌ aꞌ Arnón, schael dꞌa snan̈al yol chꞌolan masanto dꞌa a aꞌ scuch Jaboc, aton bꞌaj schael yich slum ebꞌ amonita, syalelcꞌochi aton nan̈al lum Galaad. 3 Ix icꞌjipaxecꞌ lum schꞌolanil dꞌa stojolal bꞌaj sjavi cꞌu dꞌa aꞌ Jordán yuj ebꞌ, tzꞌel yich dꞌa aꞌ n̈ajabꞌ Cineret scꞌochn̈ej dꞌa aꞌ mar Muerto, dꞌa stojolal yic Bet-jesimot, dꞌa stojolal sur masanto dꞌa yich lum vitz Pisga.
4 Ix acꞌjipax ganar vin̈aj Og sreyal Basán yuj ebꞌ, aton vin̈ slajvubꞌalxo dꞌa scal ebꞌ refaíta. A schon̈abꞌ vin̈, aton Astarot yedꞌ Edrei. 5 A smacbꞌen vin̈ bꞌaj yacꞌnac reyal, tzꞌel yich dꞌa jolom vitz Hermón, tzꞌecꞌ dꞌa Salca yedꞌ dꞌa yol smacbꞌen Basán, scꞌoch dꞌa smojonal yic Gesur yedꞌ yic Maaca, masanto dꞌa nan̈alxo lum Galaad, lum yiquejnac vin̈aj Sehón sreyal Hesbón.
6 Ix acꞌji ganar juntzan̈ ebꞌ vin̈ rey chiꞌ yuj vin̈aj Moisés, vin̈ schecabꞌ Jehová yedꞌ ebꞌ israel. Ix acꞌjican juntzan̈ lum chiꞌ dꞌa ebꞌ yin̈tilalcan Rubén, dꞌa ebꞌ yin̈tilalcan Gad yedꞌ dꞌa nan̈alxo ebꞌ yin̈tilalcan Manasés.
A sbꞌi juntzan̈ chon̈abꞌ ix acꞌji ganar
7 Aton masanil juntzan̈ ebꞌ vin̈ rey ix acꞌji ganar yuj vin̈aj Josué yedꞌ ebꞌ israel dꞌa stojolal bꞌaj tzꞌem cꞌu dꞌa aꞌ Jordán. Scot dꞌa Baal-gad dꞌa schꞌolanil Líbano masanto dꞌa yich lum vitz Halac, dꞌa slacꞌanil Seir. Ix lajvi chiꞌ, ix spucanecꞌ masanil juntzan̈ lum chiꞌ vin̈aj Josué chiꞌ dꞌa scal ebꞌ yetisraelal, ato syal junjun macan̈ yin̈tilal ebꞌ, yuj chiꞌ ix acꞌjican lum yicoc ebꞌ dꞌa juneln̈ej. 8 Masanil lum tzalquixtac, lum acꞌlictac, lum schꞌolanil aꞌ Jordán, lum pacꞌan, lum taquin̈tac luum yedꞌ lum Neguev. Masanil juntzan̈ lum chiꞌ aton lum yiccan ebꞌ hitita, ebꞌ amorreo, ebꞌ cananeo, ebꞌ ferezeo, ebꞌ heveo yedꞌ ebꞌ jebuseo.
9-24 A juntzan̈ chon̈abꞌ tic ix acꞌji ganar yedꞌ sreyal: Aton chon̈abꞌ Jericó, Hai aton jun chon̈abꞌ ay dꞌa slacꞌanil Betel, chon̈abꞌ Jerusalén, Hebrón, Jarmut, Laquis, Eglón, Gezer, Debir, Geder, Horma, Arad, Libna, Adulam, Maceda, Betel, Tapúa, Hefer, Afec, Sarón, Madón, Hazor, Simron-merón, Acsaf, Taanac, Meguido, Cedes, Jocneam dꞌa yol yic Carmelo, Dor, dꞌa svitzaltac yol yic Dor chiꞌ, Goim dꞌa yol yic Gilgal yedꞌ Tirsa. A juntzan̈ chon̈abꞌ tic yedꞌ sreyal junjun, 31 dꞌa smasanil.