A vin̈aj Josué ix satanel ebꞌ rey dꞌa norte
11
Ayic ix yabꞌan vin̈aj Jabín sreyal Hazor masanil juntzan̈ chiꞌ, ix yacꞌanbꞌat schecabꞌ vin̈ dꞌa vin̈aj Jobab sreyal Madón, dꞌa vin̈ sreyal Simrón yedꞌ dꞌa vin̈ sreyal Acsaf, yic junn̈ej tzꞌaj ebꞌ vin̈. 2 Ix schecanpaxbꞌat schecabꞌ vin̈ dꞌa masanil ebꞌ vin̈ rey ay dꞌa tzalquixtac dꞌa norte yedꞌ pax dꞌa ebꞌ vin̈ ay dꞌa schꞌolquiltaquil aꞌ Jordán, dꞌa stojolal sur dꞌa aꞌ n̈ajabꞌ Cineret, dꞌa acꞌlic yedꞌ dꞌa slacꞌanil yic Dor dꞌa stojolal bꞌaj tzꞌem cꞌu. 3 Ix yalanxibꞌat vin̈ dꞌa ebꞌ cananeo ay dꞌa stojolal bꞌaj sjavi cꞌu yedꞌ dꞌa stojolal bꞌaj tzꞌem cꞌu yedꞌ dꞌa ebꞌ amorreo, ebꞌ hitita, ebꞌ ferezeo, ebꞌ jebuseo, aton ebꞌ ay dꞌa tzalquixtac yedꞌ pax dꞌa ebꞌ heveo dꞌa Hermón dꞌa yol yic Mizpa. 4 Masanil juntzan̈ ebꞌ vin̈ rey chiꞌ ix elta ebꞌ vin̈ yedꞌ soldado, nocꞌ chej yedꞌ carruaje yic oval. Man̈xo bꞌischajbꞌenoc jantac soldado ebꞌ vin̈, icha val yarenail stiꞌ aꞌ mar. 5 Ix smolbꞌan sbꞌa ebꞌ vin̈ smasanil dꞌa slacꞌanil aꞌ n̈ajabꞌ Merom, yuj yacꞌan oval ebꞌ vin̈ yedꞌ ebꞌ israel.6 Palta ix yalan Jehová dꞌa vin̈aj Josué icha tic: Man̈ ach xiv dꞌa juntzan̈ ebꞌ tic, yujto a in ol in och eyedꞌoc yic ol e satanel ebꞌ. Dꞌa yabꞌ icha tic qꞌuicꞌan, masanil ebꞌ ol chamem latzꞌnaj dꞌa eyichan̈. Ol e macꞌ can̈chaj yoc nocꞌ schej ebꞌ, ol e n̈usantzꞌa scarruaje ebꞌ chiꞌ, xchi dꞌa vin̈.
7 Yuj chiꞌ, a vin̈aj Josué chiꞌ yedꞌ masanil ebꞌ ajun yedꞌoc, ix cꞌoch ebꞌ yacꞌ oval yedꞌ juntzan̈ anima chiꞌ dꞌa stiꞌ aꞌ n̈ajabꞌ Merom ayic man̈ naanoc yuj ebꞌ. 8 Axo Jehová ix acꞌanoch juntzan̈ anima chiꞌ dꞌa yol scꞌabꞌ ebꞌ israel chiꞌ, yuj chiꞌ ix satel juntzan̈ chon̈abꞌ chiꞌ ebꞌ bꞌajtac ix bꞌat ebꞌ, masanto ix cꞌoch ebꞌ dꞌa nivan chon̈abꞌ Sidón yedꞌ dꞌa Misrefot-maim. Axo dꞌa stojolal bꞌaj sjavi cꞌu, masanto dꞌa acꞌlic yic Mizpa, man̈xalaj junoc anima pitzan ix can taꞌ. 9 Ix scꞌanabꞌajej vin̈aj Josué chiꞌ scꞌulan masanil tas ix yal Jehová, ix schecan vin̈ macꞌchaj can̈chaj yoc nocꞌ schej ebꞌ ajcꞌol chiꞌ, ix n̈usjipaxtzꞌa masanil scarruaje ebꞌ yic oval.
10 Ix lajvi chiꞌ, ix jax ebꞌ dꞌa chon̈abꞌ Hazor sat yaj dꞌa juntzan̈ chon̈abꞌ chiꞌ, ix smacꞌanpaxcham vin̈ sreyal jun chon̈abꞌ chiꞌ ebꞌ 11 yedꞌ masanil anima cajan taꞌ. Masanil ix satel ebꞌ, ix sn̈usancantzꞌa jun chon̈abꞌ chiꞌ ebꞌ. 12 Lajann̈ej ix yutej juntzan̈xo chon̈abꞌ ebꞌ, aton juntzan̈ junn̈ej ix aj yedꞌ Hazor chiꞌ, ix satel ebꞌ. Ix smilcham ebꞌ vin̈ sreyal juntzan̈ chon̈abꞌ chiꞌ ebꞌ, ix satanel masanil anima ebꞌ, icha val ajnac yalan vin̈aj Moisés schecabꞌ Jehová. 13 Palta maj sn̈ustzꞌa juntzan̈xo chon̈abꞌ ebꞌ ay dꞌa tzalquixtac, an̈ej chon̈abꞌ Hazor ix sn̈ustzꞌa ebꞌ. 14 Ix xicjicham masanil ebꞌ cajan taꞌ yedꞌ qꞌuen espada yuj ebꞌ, man̈xa junoc pitzan ix cani. Axon̈ej masanil nocꞌ nocꞌ yedꞌ masanil tastac ay taꞌ ix yicꞌcan ebꞌ. 15 Icha ajnac yalancan juntzan̈ checnabꞌil Jehová dꞌa vin̈aj Moisés, vin̈ schecabꞌ, icha pax chiꞌ ajnac yalancan vin̈aj Moisés dꞌa vin̈aj Josué chiꞌ. Yuj chiꞌ ix scꞌanabꞌajej vin̈ smasanil, malaj junoc maj scꞌanabꞌajej vin̈.
Ix yicꞌcanecꞌ masanil lum luum vin̈aj Josué
16 A vin̈aj Josué chiꞌ yedꞌ ebꞌ vin̈ soldado ix icꞌancanecꞌ masanil juntzan̈ lugar tic, aton lum tzalquixtac, masanil lum Neguev yedꞌ masanil lum yic Gosén, lum acꞌlic, lum chꞌolquixtac dꞌa stitac aꞌ Jordán yedꞌ masanil lum tzalquixtac ayxo och dꞌa yol scꞌabꞌ ebꞌ israel yedꞌ yacꞌlical. 17 Sbꞌatn̈ej lum dꞌa yich lum vitz Halac dꞌa slacꞌanil Seir masanto scꞌoch dꞌa Baal-gad, aton jun ay dꞌa yacꞌlical Líbano dꞌa yich lum vitz Hermón. Ix yamji masanil ebꞌ vin̈ sreyal juntzan̈ chon̈abꞌ chiꞌ yuj vin̈aj Josué chiꞌ, ix miljicham ebꞌ vin̈ yuj vin̈. 18 Te nivan tiempo ix yacꞌ oval vin̈ yedꞌ ebꞌ. 19 An̈ej val ebꞌ heveo dꞌa Gabaón ix yacꞌ strato yedꞌ ebꞌ israel, axo pax masanil juntzan̈xo chon̈abꞌ, ix satjiel ebꞌ dꞌa oval. 20 A Jehová ix acꞌan pitbꞌoquel spensar ebꞌ ajcꞌol chiꞌ, yic stecꞌbꞌan sbꞌa ebꞌ, yuj chiꞌ ix satjiel ebꞌ smasanil yuj ebꞌ israel chiꞌ, maj ocꞌlaj scꞌol ebꞌ dꞌa ebꞌ, icha ajnac yalan Jehová dꞌa vin̈aj Moisés.
21 An̈ejtonaꞌ dꞌa jun tiempoal chiꞌ ix satjiel masanil juntzan̈ chon̈abꞌ tic yuj vin̈aj Josué, aton bꞌaj cajan ebꞌ yin̈tilal vin̈aj Anac: Hebrón, Debir, Anab, masanil tzalquixtac yic Judá yedꞌ dꞌa yol yic Israel. 22 Yuj chiꞌ man̈xo junoc anima chaan̈ steel yin̈tilal vin̈aj Anac ixto can dꞌa yol smacbꞌen Israel, axon̈ej dꞌa Gaza, dꞌa Gat yedꞌ dꞌa Asdod ixto can jayvan̈xo ebꞌ.
23 Icha val chiꞌ ix aj yicꞌancanecꞌ masanil lum luum chiꞌ vin̈aj Josué chiꞌ, icha val ajnac yalan Jehová dꞌa vin̈aj Moisés. Ix lajvi chiꞌ, ix spucanecꞌ lum vin̈ dꞌa scal masanil yin̈tilal Israel chiꞌ, yic smacbꞌenan luum ebꞌ. Ix lajvi juntzan̈ chiꞌ, ichato chiꞌ ix och vaan oval dꞌa juntzan̈ lugar chiꞌ.