A Yabꞌixal Ebꞌ
JUEZ
Ix acꞌji ganar vin̈ sreyal Bezec
1
Ayic toxo ix cham vin̈aj Josué, masanil ebꞌ yetisraelal vin̈ ix cꞌanbꞌan dꞌa Jehová icha tic: ¿Mach junoc macan̈ in̈tilal dꞌa co cal tic ol bꞌabꞌlaj och yacꞌ oval yedꞌ ebꞌ cananeo? xchi ebꞌ. 2 Ix tacꞌvi Jehová icha tic: A ebꞌ yin̈tilal Judá sbꞌabꞌlajochi, yujto a dꞌa ebꞌ ol acꞌchaj luum, xchi. 3 Yuj chiꞌ a ebꞌ yin̈tilal Judá ix avtan ebꞌ yin̈tilal Simeón, ix yalan ebꞌ dꞌa ebꞌ icha tic: Coyec quedꞌ dꞌa lum luum ix acꞌji quiquej, ol cacꞌan oval yedꞌ ebꞌ cananeo cajan taꞌ. Ol lajvoc chiꞌ, ol on̈ ochpax eyedꞌoc ayic ol eyacꞌan oval yuj lum ol eyiquejpax chiꞌ, xchi ebꞌ. Yuj chiꞌ ix bꞌat ebꞌ yin̈tilal Simeón chiꞌ yedꞌ ebꞌ. 4-5 Icha chiꞌ ix aj yacꞌan oval ebꞌ yedꞌ ebꞌ cananeo yedꞌ pax ebꞌ ferezeo, axo Jehová ix acꞌanoch ebꞌ dꞌa yol scꞌabꞌ ebꞌ. A dꞌa Bezec ix acꞌji ganar 10 mil ebꞌ cananeo yuj ebꞌ. Ajun pax vin̈ sreyal Bezec chiꞌ dꞌa scal ebꞌ. 6 Vachꞌchom ix el lemnaj vin̈, palta ix bꞌatn̈ej tzacꞌan ebꞌ dꞌa spatic vin̈, masanto ix yamchaj vin̈ yuj ebꞌ, ix spolel yiximal smam scꞌabꞌ vin̈ ebꞌ yedꞌ yiximal smam yoc vin̈. 7 Yuj chiꞌ ix yalan vin̈: A dꞌa yalan̈taxo, ix viqꞌuel yiximal smam scꞌabꞌ yedꞌ yiximal smam yoc 70 ebꞌ vin̈ rey, ix vacꞌan sicꞌqꞌue scꞌajiltac vael ebꞌ vin̈ dꞌa yalan̈ in mexa. Palta axo ticnaic jun, lajan val tzin yutej Dios icha vutejnac ebꞌ vin̈ chiꞌ, xchi vin̈. Ix yicꞌanbꞌat vin̈ ebꞌ israel chiꞌ dꞌa Jerusalén, axo taꞌ ix cham vin̈.Ix acꞌji ganar Jerusalén yedꞌ Hebrón
8 A ebꞌ yin̈tilal Judá ix och ebꞌ yacꞌ oval dꞌa chon̈abꞌ Jerusalén, ix yacꞌan ganar ebꞌ. Ix xicancham masanil anima ebꞌ, ix sn̈usantzꞌa jun chon̈abꞌ chiꞌ ebꞌ. 9 Ix lajvi chiꞌ, ix laj empax ebꞌ yacꞌ oval yedꞌ ebꞌ cananeo, ebꞌ cajan dꞌa tzalquixtac, dꞌa yol smacbꞌen Neguev yedꞌ dꞌa acꞌlictac. 10 Ix yacꞌanpax oval ebꞌ yedꞌ ebꞌ cananeo dꞌa chon̈abꞌ Hebrón, aton Quiriat-arba dꞌa pecaꞌ, ix miljicancham vin̈aj Sesai, vin̈aj Ahimán yedꞌ vin̈aj Talmai yuj ebꞌ.
Ix acꞌji ganar chon̈abꞌ Debir
11 Elan̈chamel ix och ebꞌ yacꞌ oval dꞌa chon̈abꞌ Debir, aton Quiriat-sefer dꞌa pecaꞌ. 12 Ay jun vin̈ yajal yaj dꞌa scal ebꞌ yin̈tilal Judá scuchan Caleb. Ix yal vin̈ icha tic: A junoc mach ol bꞌat yacꞌ oval yedꞌ ebꞌ cajan dꞌa Quiriat-sefer, tato ol yacꞌ ganar yicꞌan jun chon̈abꞌ chiꞌ, ol vacꞌ ix Acsa ix visil yetbꞌeyumoc, xchi vin̈. 13 Axo vin̈aj Otoniel yuninal vin̈aj Cenaz slajvubꞌ yucꞌtac vin̈aj Caleb chiꞌ ix acꞌan ganar jun chon̈abꞌ chiꞌ, yuj chiꞌ ix yacꞌ ix yisil vin̈aj Caleb chiꞌ yetbꞌeyumoc vin̈. 14 Axo yic ix lajvi yicꞌlan sbꞌa ebꞌ chiꞌ, ix yalan vin̈aj Otoniel chiꞌ dꞌa ix Acsa chiꞌ to scꞌan sluum ix dꞌa vin̈ smam chiꞌ. Yuj chiꞌ ix emta ix dꞌa yibꞌan̈ nocꞌ bꞌuru, ix scꞌanbꞌan vin̈ smam ix chiꞌ dꞌay icha tic:
—¿Tas tza nibꞌej? xchi vin̈ dꞌa ix.
15 Ix yalan ix:
—Ina to ix acꞌ lum taquin̈ luum dꞌayin dꞌa Neguev, yuj chiꞌ eloc val dꞌa a cꞌool tzacꞌ lum yax sat dꞌayin, lum bꞌaj ay sjaj a aꞌ, xchi ix.
Yuj chiꞌ ix yacꞌ junocxo lum vin̈ dꞌa ix, ay sjaj a aꞌ dꞌa luum dꞌa sjolomtac yedꞌ junocxo aꞌ dꞌa syoptac luum.
A sluum ebꞌ yin̈tilal Judá yedꞌ ebꞌ yic Benjamín
16 A ebꞌ yin̈tilal vin̈aj Hobab vin̈ quenita, aton vin̈ sn̈iꞌ vin̈aj Moisés, ix el ebꞌ dꞌa schon̈abꞌil teꞌ Palma, ix bꞌat ebꞌ yedꞌ ebꞌ yin̈tilal Judá, ix bꞌat cajnaj ebꞌ dꞌa scal ebꞌ anima cajan dꞌa tzꞌinan lum dꞌa yol smacbꞌen Judá dꞌa Neguev, dꞌa slacꞌanil chon̈abꞌ Arad. 17 Axo ebꞌ yin̈tilal Judá yedꞌ ebꞌ yic Simeón, ix yacꞌ oval ebꞌ yedꞌ ebꞌ cananeo cajan dꞌa Sefat. Ix satel jun chon̈abꞌ chiꞌ ebꞌ dꞌa juneln̈ej, yuj chiꞌ Horma ix sbꞌiejcan yuj ebꞌ.* 18 Ix yicꞌanpax chon̈abꞌ Gaza ebꞌ, Ascalón yedꞌ Ecrón yedꞌ slumal dꞌa spatictac. 19 Yujto ayoch Jehová yedꞌ ebꞌ yin̈tilal Judá chiꞌ, yuj chiꞌ ix yacꞌ ganar ebꞌ cajan dꞌa tzalquixtac ebꞌ, palta maj yal-laj spechanel ebꞌ anima cajan dꞌa acꞌlictac ebꞌ, yujto a ebꞌ chiꞌ, ay sqꞌueen carruaje ebꞌ yic oval. 20 Ix acꞌji lum Hebrón dꞌa vin̈aj Caleb icha ajnac yalancan vin̈aj Moisés. A vin̈aj Caleb chiꞌ ix acꞌan ganar yicꞌanel oxvan̈ ebꞌ yuninal vin̈aj Anac. 21 Axo pax ebꞌ yin̈tilal Benjamín jun, maj yal-laj yicꞌanel ebꞌ jebuseo ebꞌ dꞌa Jerusalén, yuj chiꞌ junn̈ej ix can cajan ebꞌ yedꞌ ebꞌ dꞌa Jerusalén chiꞌ.
Ix yacꞌ ganar chon̈abꞌ Betel ebꞌ yin̈tilal José
22-23 A ebꞌ yin̈tilal José, ix yacꞌ lista sbꞌa ebꞌ sbꞌat yacꞌ oval dꞌa chon̈abꞌ Betel, aton Luz dꞌa pecaꞌ. Ayic ix schecanbꞌat ebꞌ ilum lum ebꞌ taꞌ, a Jehová ix colvaj yedꞌ ebꞌ. 24 A ebꞌ ilum luum chiꞌ, ix yil ebꞌ yelta jun vin̈ vinac dꞌa chon̈abꞌ chiꞌ, ix yalan ebꞌ dꞌa vin̈: Tato ol on̈ a chꞌox dꞌa tas ol aj coch dꞌa yol chon̈abꞌ tic, malaj tas ol ach cutej, xchi ebꞌ dꞌa vin̈. 25 Axo jun vin̈ chiꞌ ix chꞌoxani tas tzꞌaj yoch ebꞌ dꞌa jun chon̈abꞌ chiꞌ. Yuj chiꞌ ix cot ebꞌ soldado yin̈tilal José, ix xicancham masanil ebꞌ anima ebꞌ ayecꞌ cajan taꞌ, palta a jun vin̈ ix chꞌoxan ebꞌ chiꞌ, maj miljichamlaj vin̈ yuj ebꞌ yedꞌ masanil ebꞌ cajan yedꞌ vin̈ dꞌa yol spat. 26 A jun vin̈ chiꞌ, ix bꞌatcan vin̈ dꞌa slum ebꞌ hitita, ix sbꞌoanqꞌue jun chon̈abꞌ vin̈ taꞌ, Luz ix yacꞌ vin̈ sbꞌiej. Ix ochn̈ejcan jun bꞌi chiꞌ dꞌa jun chon̈abꞌ chiꞌ.
Juntzan̈ chon̈abꞌ maj acꞌji ganar yuj ebꞌ israel
27 A ebꞌ yin̈tilal Manasés, maj yal-laj spechanel juntzan̈ anima tic ebꞌ: Ebꞌ aj Bet-seán, ebꞌ aj Taanac, ebꞌ aj Dor, ebꞌ aj Ibleam yedꞌ ebꞌ aj Meguido yedꞌ pax yaldeail juntzan̈ chon̈abꞌ chiꞌ. Yuj chiꞌ ix cann̈ej cajan ebꞌ cananeo chiꞌ taꞌ. 28 Palta axo yic ix yicꞌan yip ebꞌ israel chiꞌ, ix yacꞌan pural ebꞌ cananeo chiꞌ ebꞌ yochcan smunlajvumoc. Maj pechjiel-laj ebꞌ dꞌa juneln̈ej yuj ebꞌ.
29 An̈ejaꞌ pax ebꞌ yin̈tilal Efraín, maj spechel-laj ebꞌ cananeo ebꞌ cajan dꞌa Gezer, yuj chiꞌ a ebꞌ cananeo chiꞌ, ix cann̈ej cajan ebꞌ dꞌa scal ebꞌ.
30 An̈ejaꞌ ebꞌ yin̈tilal Zabulón, maj spechel-laj ebꞌ cananeo ebꞌ cajan dꞌa Quitrón yedꞌ dꞌa Nahalal. Yuj chiꞌ ix cann̈ej cajan ebꞌ cananeo chiꞌ dꞌa scal ebꞌ, palta ix acꞌji pural ebꞌ yochcan smunlajvumoc ebꞌ yin̈tilal Zabulón chiꞌ.
31-32 An̈ejaꞌ ebꞌ yin̈tilal Aser, maj spechel-laj ebꞌ cananeo ebꞌ cajan dꞌa Aco, dꞌa Sidón, dꞌa Ahlab, dꞌa Aczib, dꞌa Helba, dꞌa Afec yedꞌ dꞌa Rehob. Yuj chiꞌ ix cann̈ej cajan ebꞌ yin̈tilal Aser chiꞌ dꞌa scal ebꞌ cananeo chiꞌ.
33 An̈ejaꞌ pax ebꞌ yin̈tilal Neftalí, maj spechel-laj ebꞌ cananeo ebꞌ cajan dꞌa Bet-semes yedꞌ dꞌa Bet-anat, yuj chiꞌ ix cann̈ej cajan ebꞌ dꞌa scal ebꞌ cananeo chiꞌ, palta ix acꞌji pural ebꞌ cananeo chiꞌ yochcan smunlajvumoc ebꞌ.
34 A ebꞌ amorreo cajan dꞌa lum acꞌlictac, maj chajiochlaj ebꞌ yin̈tilal Dan yuj ebꞌ, yuj chiꞌ ix cann̈ej ebꞌ yin̈tilal Dan chiꞌ dꞌa lum tzalquixtac. 35 Icha chiꞌ ix aj scann̈ej cajan ebꞌ amorreo chiꞌ dꞌa yich vitz Heres, dꞌa Ajalón yedꞌ dꞌa Saalbim, palta axo yic ix yicꞌan yip ebꞌ yin̈tilal José, ix yacꞌ pural ebꞌ amorreo chiꞌ ebꞌ yochcan smunlajvumoc.
36 A smojonal slum ebꞌ amorreo chiꞌ, sbꞌatn̈ej dꞌa spacꞌanil yic Acrabim, masanto scꞌoch dꞌa Sela, sbꞌatn̈ej dꞌa yibꞌan̈qꞌue chiꞌ.