Ix schꞌox sbꞌa Yángel Jehová dꞌa Boquim
2
A dꞌa Boquim ix schꞌox sbꞌa Yángel Jehová, ix cot dꞌa Gilgal, ix yalan dꞌa ebꞌ chon̈abꞌ israel icha tic: A in ex viqꞌuelta dꞌa Egipto, ex vicꞌancot dꞌa sat lum luum vacꞌnac in tiꞌ vacꞌan dꞌa ebꞌ e mam eyicham. Valannac to malaj bꞌaqꞌuin̈ ol satel jun in trato vacꞌ eyedꞌ tic, 2 an̈ej to malajocabꞌ e trato tze bꞌo yedꞌ ebꞌ anima cajan dꞌa sat lum luum bꞌaj cajan ex ecꞌ tic, tze satanel yaltar ebꞌ bꞌaj slesalvi, xin chi, palta a ex tic, maj e cꞌanabꞌajej tas valnac chiꞌ. ¿Tas yuj pit ix eyutej e bꞌa? 3 Yuj chiꞌ svalcan dꞌayex to man̈ ol viqꞌuel-laj juntzan̈ chon̈abꞌ tic dꞌa e cal. Ol ochn̈ejcan ebꞌ ajcꞌolal dꞌayex, axo sdiosal ebꞌ ol ex juaneloc, ichato ol ex can dꞌa junoc yaal, xchi Yángel Jehová chiꞌ.4 Ayic ix lajvi slolon Yángel Jehová chiꞌ, masanil ebꞌ chon̈abꞌ, te chaan̈ ix el yav ebꞌ yoqꞌui, 5 yuj chiꞌ Boquim ix sbꞌiejcan jun lugar chiꞌ. Axo taꞌ ix yacꞌ silabꞌ ebꞌ dꞌa Jehová.*
A schamel vin̈aj Josué
6 Atax yic stacꞌlannaccan sbꞌa vin̈aj Josué yedꞌ ebꞌ chon̈abꞌ israel chiꞌ, ataꞌ bꞌatnaccan junjun ebꞌ dꞌa smacbꞌen chabꞌilxo yuuj. 7 A ebꞌ israel chiꞌ, ix scꞌanabꞌajej ebꞌ tas ix yal Jehová yacbꞌan aytoecꞌ vin̈aj Josué chiꞌ yedꞌ ebꞌ yichamtac vinaquil chon̈abꞌ tzacꞌanto chamnac yuj vin̈, aton ebꞌ ix ilan tastac satubꞌtac ix sbꞌo Jehová yuj svachꞌiloc ebꞌ israel chiꞌ. 8 Ayxo 110 abꞌil sqꞌuinal vin̈aj Josué schecabꞌ Jehová, ayic ix cham vin̈. 9 A dꞌa sluum vin̈ dꞌa Timnat-sera dꞌa snorteal svitzal Gaas dꞌa tzalquixtac dꞌa yol yic Efraín, ataꞌ ix mucji vin̈.
Ix spatiquejel Jehová ebꞌ israel
10 Ix champax ebꞌ israel ix ecꞌ yedꞌ vin̈aj Josué chiꞌ, axo ebꞌ toto ix alji, man̈xo yojtacoc Jehová ebꞌ, maj yil-laj ebꞌ tastac satubꞌtac sbꞌonac Jehová yuj svachꞌiloc ebꞌ. 11 Yuj chiꞌ axon̈ej chucal ix scꞌulej ebꞌ dꞌa yichan̈ Jehová. Ix och ebꞌ ejmelal dꞌa comon dios scuchan Baal. 12 Ix spatiquejcanel Jehová ebꞌ, aton sDiosal smam yicham ebꞌ, jun icꞌannaquelta ebꞌ dꞌa Egipto. Ix och ebꞌ ejmelal dꞌa sdiosal ebꞌ anima cajan dꞌa slacꞌanil ebꞌ chiꞌ. Ix ste tzuntzejcot yoval scꞌol Jehová chiꞌ ebꞌ, 13 yujto ix paticajcanel yuj ebꞌ, axo dꞌa juntzan̈ comon dios Baal yedꞌ Astarot ix yaqꞌuem sbꞌa ebꞌ. 14 Yuj chiꞌ ix te cot yoval scꞌol Jehová dꞌa ebꞌ, ix acꞌjioch ebꞌ dꞌa yol scꞌabꞌ ebꞌ ajcꞌool, ix elcꞌajbꞌat tastac ay dꞌa ebꞌ, majxo yal-laj scolan sbꞌa ebꞌ dꞌa ebꞌ ajcꞌol ay dꞌa slacꞌanil ebꞌ chiꞌ. 15 Ayic sbꞌat ebꞌ israel chiꞌ yacꞌ oval yedꞌ ebꞌ ajcꞌol chiꞌ, axo Jehová tzꞌacꞌanoch ebꞌ dꞌa yol scꞌabꞌ ebꞌ yajcꞌol chiꞌ, icha ajnac yalani. Yuj chiꞌ te ilbꞌajcꞌol tzꞌutaj ebꞌ.
16 Juntaquel scan ebꞌ israel dꞌa yol scꞌabꞌ ebꞌ yajcꞌol chiꞌ, ste ixtaj val ebꞌ yuj ebꞌ, yuj chiꞌ axo Jehová tzꞌacꞌanoch juntzan̈ ebꞌ scolumal ebꞌ yic scoljiel ebꞌ dꞌa ebꞌ ajcꞌol chiꞌ. 17 Vachꞌchom icha chiꞌ, palta man̈ val jabꞌoc scꞌanabꞌajej ebꞌ scolumal ebꞌ chiꞌ, maxtzac scꞌanabꞌajej Jehová ebꞌ. An̈ej dꞌa comon dios tzꞌoch ebꞌ ejmelal. A ebꞌ smam yicham ebꞌ, scꞌanabꞌajejnac schecnabꞌil Jehová ebꞌ, axo pax ebꞌ, ix yactejcan sbꞌeybꞌal ebꞌ smam yicham ebꞌ chiꞌ. 18 Juntaquel tzꞌel yav ebꞌ yuj yabꞌan syail yuj ebꞌ yajcꞌool chiꞌ, axo Jehová tzꞌocꞌ scꞌol dꞌa ebꞌ, syacꞌanoch juntzan̈ ebꞌ scolvaj yedꞌ ebꞌ. Ayic pitzanto ebꞌ scolumal ebꞌ chiꞌ, ayoch Jehová yedꞌ ebꞌ, scoljiel ebꞌ dꞌa yol scꞌabꞌ ebꞌ yajcꞌool chiꞌ. 19 Ayic scham junjun ebꞌ scolumal ebꞌ chiꞌ, scꞌulanxi chucal ebꞌ, ecꞌbꞌalxo te chuc scꞌulej ebꞌ chiꞌ dꞌa yichan̈ sbꞌeybꞌal ebꞌ smam yicham, tzꞌochpax ebꞌ ejmelal dꞌa comon dios. Max yactejcan chucal bꞌeybꞌal chiꞌ ebꞌ, pit syutej sbꞌa ebꞌ dꞌa Jehová. 20 Yuj chiꞌ ste cot yoval scꞌol Jehová chiꞌ dꞌa ebꞌ, snaan icha tic: A juntzan̈ anima tic, man̈ val jabꞌoc scꞌanabꞌajej in trato ebꞌ, aton vacꞌnac yedꞌ smam yicham ebꞌ. 21 A yuj chiꞌ jun, man̈xo ol viqꞌuel juntzan̈xo ebꞌ anima dꞌa scal ebꞌ, aton ebꞌ ixto can yuj vin̈aj Josué ayic ix cham vin̈. 22 Ol cann̈ej ebꞌ yuj vacꞌan proval spensar ebꞌ israel tic, tato tzꞌoch tzacꞌan ebꞌ vuuj, icha scꞌulejnac ebꞌ smam yicham ebꞌ, mato maay, xchi. 23 Yuj chiꞌ, a jantac ebꞌ anima ayecꞌ dꞌa scal ebꞌ israel chiꞌ, aton ebꞌ majxo yacꞌoch Jehová dꞌa yol scꞌabꞌ vin̈aj Josué, majxo icꞌjiel-laj ebꞌ yuj Jehová chiꞌ.