Juntzan̈xo chon̈abꞌ ix can dꞌa lum Canaán
3
Ay juntzan̈xo chon̈abꞌ ixto can yuj Jehová dꞌa lum Canaán, yic vachꞌ tzꞌacꞌji proval ebꞌ israel, aton ebꞌ manto alji ayic ix och oval ayic ix acꞌji ganar lum Canaán chiꞌ. 2 Ix can juntzan̈ chon̈abꞌ chiꞌ yuj Jehová yic vachꞌ scꞌaybꞌej sbꞌa ebꞌ dꞌa oval, aton ebꞌ manto acꞌanlaj juneloc oval chiꞌ. 3 Oyeꞌ chon̈abꞌil ebꞌ filisteo ixto cani yedꞌ masanil ebꞌ cananeo, ebꞌ sidonio yedꞌ ebꞌ heveo, aton ebꞌ ecꞌnac cajan dꞌa tzalquixtac dꞌa Líbano, sbꞌatn̈ej dꞌa jolom vitz Baal-hermón, masanto scꞌoch dꞌa Hamat. 4 A yuj juntzan̈ ebꞌ chiꞌ, ix acꞌji proval ebꞌ israel yuj Jehová, yic vachꞌ syilaꞌ tato scꞌanabꞌajej masanil checnabꞌil ebꞌ schecnac yal vin̈aj Moisés dꞌa ebꞌ smam yicham ebꞌ. 5 Icha chiꞌ ix aj yecꞌ cajan ebꞌ israel dꞌa scal ebꞌ cananeo, ebꞌ hitita, ebꞌ amorreo, ebꞌ ferezeo, ebꞌ heveo yedꞌ dꞌa scal ebꞌ jebuseo. 6 Axo yuninal yedꞌ yisil ebꞌ israel chiꞌ, ix yicꞌlajqꞌue sbꞌa ebꞌ yedꞌ yuninal yedꞌ yisil ebꞌ anima chiꞌ. Ix och ebꞌ ejmelal dꞌa sdiosal ebꞌ chiꞌ.Ix colji ebꞌ israel yuj vin̈aj Otoniel
7 Te chuc tas scꞌulej ebꞌ israel dꞌa yichan̈ Jehová Dios, ix bꞌatcan satcꞌolal yuj ebꞌ, axon̈ej dꞌa yechel Baal yedꞌ dꞌa yechel Asera tzꞌoch ebꞌ ejmelal. 8 Yuj chiꞌ ix cot yoval scꞌol Jehová chiꞌ dꞌa ebꞌ, ix acꞌjioch ebꞌ dꞌa yol scꞌabꞌ vin̈aj Cusan-risataim, sreyal Mesopotamia. Vajxaqueꞌ abꞌil ix can ebꞌ dꞌa yalan̈ smandar vin̈. 9 Ichato chiꞌ ix avaj ebꞌ dꞌa Jehová. Axo Jehová chiꞌ ix och yedꞌ vin̈aj Otoniel, yuj chiꞌ a vin̈ ix och yajalil yic scolanel ebꞌ. A vin̈aj Otoniel chiꞌ yuninal vin̈aj Cenaz, slajvubꞌalxo yucꞌtac vin̈aj Caleb. 10 A Yespíritu Jehová ix och yedꞌ vin̈, yuj chiꞌ a vin̈ ix och yajaloc ebꞌ israel chiꞌ. Ix bꞌat vin̈ dꞌa oval, axo Jehová ix och yedꞌ vin̈, yuj chiꞌ ix yacꞌ ganar vin̈aj Cusan-risataim chiꞌ vin̈. 11 Ichato chiꞌ ix can ebꞌ israel dꞌa juncꞌolal dꞌa 40 abꞌil, masanto ix cham vin̈aj Otoniel chiꞌ.
Ix colji ebꞌ israel yuj vin̈aj Aod
12 Ix lajvi chiꞌ, ix ochxi ijan ebꞌ israel scꞌulan chucal dꞌa yichan̈ Jehová, yuj chiꞌ axo Jehová chiꞌ ix icꞌanchaan̈ vin̈aj Eglón sreyal Moab dꞌa yibꞌan̈ ebꞌ. 13 Junn̈ej ix yutej spensar vin̈aj Eglón chiꞌ yedꞌ ebꞌ amonita yedꞌ pax ebꞌ amalecita, ix och ebꞌ yacꞌ oval yedꞌ ebꞌ israel chiꞌ, ix yicꞌanecꞌ schon̈abꞌil teꞌ Palma ebꞌ, aton Jericó. 14 A ebꞌ israel chiꞌ, 18 abꞌil ix can ebꞌ dꞌa yalan̈ smandar vin̈aj Eglón chiꞌ, 15 masanto ix avaj ebꞌ dꞌa Jehová. Ichato chiꞌ ix acꞌjioch junxo scolumal ebꞌ yuj Jehová chiꞌ, aton vin̈aj Aod yuninal vin̈aj Gera, dꞌa yin̈tilal Benjamín, a sqꞌuexan̈cꞌabꞌ vin̈ smunlaji.
Ix schecbꞌat vin̈aj Aod chiꞌ ebꞌ israel chiꞌ bꞌat yacꞌcan qꞌuen tumin dꞌa vin̈aj Eglón, aton qꞌuen yovalil syacꞌ ebꞌ dꞌa vin̈. 16 Ix sbꞌoan jun qꞌuen scuchilubꞌ vin̈, ayqꞌue ye qꞌuen dꞌa schabꞌil pacꞌan̈, nan̈al am metro steel qꞌueen. Ix stzecꞌanoch qꞌuen vin̈ dꞌa snan̈al dꞌa svachꞌ dꞌa yol spichul. 17 Ix lajvi chiꞌ ix yicꞌanbꞌat qꞌuen tumin chiꞌ vin̈ dꞌa vin̈aj Eglón chiꞌ. A jun vin̈ rey chiꞌ te bꞌaqꞌuech yaj nayan vin̈. 18 Ayic toxo ix lajvi yacꞌancan qꞌuen tumin chiꞌ vin̈, ix elta vin̈ yedꞌ ebꞌ ajun yedꞌoc. 19 Palta ayic ix cꞌoch vin̈ bꞌaj ay juntzan̈ yechel comon dios dꞌa slacꞌanil Gilgal, ix bꞌatxi vin̈ dꞌa vin̈aj Eglón chiꞌ, ix yalan vin̈ dꞌa vin̈ icha tic:
—Mamin rey, ay val jun lolonel ol val dꞌayach, palta dꞌa cꞌubꞌeltac ol valaꞌ, xchi vin̈.
Ix yalan vin̈ rey chiꞌ dꞌa smasanil ebꞌ ayoch dꞌa yopisio yedꞌoc to sbꞌesel sbꞌa ebꞌ yic scan ebꞌ schꞌocoj. 20 Yuj chiꞌ axon̈ej ebꞌ vin̈ schavan̈il ix cani, cꞌojanem vin̈ rey dꞌa yol jun cuarto siclabꞌinac yool dꞌa chaan̈. Ix cꞌoch vin̈aj Aod chiꞌ dꞌa slacꞌanil vin̈, ix yalan vin̈ dꞌa vin̈:
—A tas vedꞌnac ol val chiꞌ dꞌayach, a Dios schecan valaꞌ, xchi vin̈.
Ayic ix yabꞌan vin̈aj Eglón icha chiꞌ, ix qꞌue lin̈an vin̈, 21-22 ix yacꞌanbꞌat sqꞌuexan̈cꞌabꞌ vin̈aj Aod chiꞌ, yic syicꞌanqꞌueta qꞌuen scuchilubꞌ vin̈ dꞌa stojolal svachꞌ cꞌabꞌ. Ix stipancꞌaxpaj qꞌuen vin̈ yedꞌ yoc qꞌuen dꞌa scꞌol vin̈aj Eglón chiꞌ. Yuj sbꞌaqꞌuechal vin̈aj Eglón chiꞌ, ix can chꞌapnaj qꞌuen bꞌaj ix och chiꞌ, yuj chiꞌ majxo yiqꞌueltalaj qꞌuen vin̈aj Aod chiꞌ, ix elta usnaj yol schꞌan̈tzaꞌ vin̈. 23 Ix lajvi chiꞌ, ix smacancan teꞌ puerta chiꞌ vin̈, ix yacꞌancanoch scꞌabꞌ teꞌ vin̈, ix paxta vin̈. 24 Ayic toxo ix paxta vin̈, ix javi ebꞌ vin̈ stan̈van vin̈ rey chiꞌ, ix yilan ebꞌ vin̈ to macan teꞌ puerta chiꞌ. A snaan ebꞌ vin̈ to van stzaji vin̈ yuj chiꞌ ix smac teꞌ puerta chiꞌ vin̈. 25 Junip ix stan̈vej ebꞌ vin̈, yujto max eltalaj vin̈ rey chiꞌ, yuj chiꞌ ix somchajqꞌue scꞌol ebꞌ vin̈. Ix yicꞌancot sllaveal puerta chiꞌ ebꞌ vin̈, ix sjacan ebꞌ vin̈, axo ix yilan ebꞌ vin̈ pacꞌjabꞌxo ecꞌ vin̈ scham dꞌa sat luum.
26 Yacbꞌan tzꞌecꞌ tiempo dꞌa ebꞌ vin̈ icha chiꞌ, axo vin̈aj Aod toxo ix el lemnaj vin̈. Toxo ix ecꞌta vin̈ bꞌaj ay juntzan̈ yechel comon dios dꞌa Gilgal, ix cot vin̈ elelal dꞌa yol yic Seirat. 27 Axo ix javi vin̈ dꞌa tzalquixtac dꞌa yol yic Efraín, ix spuꞌan nocꞌ chꞌaac vin̈ yic smolbꞌan ebꞌ yetisraelal. Junxon̈ej ix aj yem ebꞌ dꞌa jolom vitz chiꞌ, bꞌabꞌel vin̈aj Aod chiꞌ yuj ebꞌ. 28 Ix yalan vin̈ dꞌa ebꞌ: Ochan̈ec tzacꞌan vuuj, yujto a ebꞌ moabita ajcꞌol dꞌayon̈, toxo ix acꞌjioch ebꞌ dꞌa yol co cꞌabꞌ yuj Jehová, xchi vin̈. Yuj chiꞌ ix bꞌat ebꞌ yedꞌ vin̈, ix cꞌoch ebꞌ smac dꞌa sjayil stiꞌ aꞌ Jordán bꞌaj tzꞌecꞌ ebꞌ aj Moab chiꞌ, yuj chiꞌ man̈xa junoc mach ix scha cꞌaxpaj ebꞌ. 29 A dꞌa jun tiempoal chiꞌ, 10 mil ebꞌ moabita chiꞌ ix smilcham ebꞌ, aton juntzan̈ ebꞌ soldado te tecꞌan, man̈xo junoc ebꞌ ix eli. 30 Icha chiꞌ ix aj yacꞌji ganar ebꞌ aj Moab yuj ebꞌ israel chiꞌ. Ix lajvi chiꞌ, 80 abꞌil ix can ebꞌ israel chiꞌ dꞌa juncꞌolal.
Ix colji ebꞌ israel yuj vin̈aj Samgar
31 Axo ix lajvi yecꞌ vin̈aj Aod chiꞌ, axo vin̈aj Samgar yuninal vin̈aj Anat ix colvaji. Ix smilcham 600 ebꞌ filisteo vin̈ yedꞌ jun te teꞌ stecjioch dꞌa nocꞌ vacax, yuj chiꞌ ix coljipax ebꞌ israel chiꞌ yuj vin̈.