Ix acꞌji ganar vin̈aj Sísara
4
Ayic ayxo scham vin̈aj Aod, ix meltzajxibꞌat ebꞌ israel dꞌa chucal, yuj chiꞌ ix stzuntzejxicot yoval scꞌol Jehová ebꞌ. 2 Ix acꞌjioch ebꞌ dꞌa yol scꞌabꞌ vin̈aj Jabín, sreyal ebꞌ cananeo cajan dꞌa chon̈abꞌ Hazor yuj Jehová chiꞌ. A vin̈ yajalil ebꞌ soldado vin̈ rey chiꞌ, aton vin̈aj Sísara, cajan dꞌa Haroset-goim. 3 Ay 900 scarruaje vin̈aj Jabín chiꞌ, ayoch qꞌuen hierro dꞌa spatictac. 20 abꞌil ix can ebꞌ israel dꞌa yalan̈ smandar vin̈, ix te ixtaj ebꞌ yuj vin̈. Yuj val chiꞌ ix tevi ebꞌ dꞌa Jehová, yic scolvaj dꞌa ebꞌ.4 A dꞌa jun tiempoal chiꞌ, ay jun ix ix schecabꞌ Jehová scuchan Débora, yetbꞌeyum ix vin̈aj Lapidot, a ix sbꞌoan yaj yoval ebꞌ yetisraelal. 5 Tzꞌemn̈ej cꞌojan ix dꞌa yich jun teꞌ palma dꞌa tzalquixtac dꞌa yol yic Efraín, dꞌa snan̈al Ramá yedꞌ Betel. Ataꞌ xidꞌecꞌ ebꞌ chon̈abꞌ chiꞌ sbꞌo yaj yoval dꞌa ix. Yuj chiꞌ ix acꞌjican scuch teꞌ palma chiꞌ, Spalma ix Débora.
6 A dꞌa jun tiempoal chiꞌ, ay jun vin̈ vinac scuchan Barac yuninal vin̈aj Abinoam cajan dꞌa Cedes, dꞌa yol yic ebꞌ yin̈tilal Neftalí. Ix avtaj vin̈ yuj ix Débora chiꞌ, ix yalan ix dꞌa vin̈:
—A Jehová co Diosal tzꞌalan dꞌayach icha tic: Molbꞌej 10 miloc ebꞌ soldado dꞌa scal ebꞌ yin̈tilal Neftalí yedꞌ dꞌa scal ebꞌ yin̈tilal Zabulón, tzicꞌanbꞌat ebꞌ dꞌa lum svitzal Tabor. 7 A in ol in montejcot vin̈aj Sísara, yajalil ebꞌ soldado vin̈aj Jabín dꞌa stiꞌ a Cisón, yic syacꞌan oval vin̈ edꞌoc. Ol yicꞌcot scarruaje vin̈ yedꞌ ebꞌ soldado. A inxo ol vacꞌoch ebꞌ dꞌa yol a cꞌabꞌ, xchi Jehová dꞌayach, xchi ix Débora chiꞌ.
8 Ix yalan vin̈aj Barac chiꞌ icha tic: Ol in bꞌatoc, tato tzach bꞌat vedꞌoc. Tato max ach bꞌat vedꞌ jun, man̈ ol in bꞌatlaj, xchi vin̈ dꞌa ix.
9 Ix tacꞌvi ix: Ol in bꞌatoc, palta jun, man̈oc ach ol ach bꞌinaj yuj acꞌan ganar jun oval chiꞌ, yujto dꞌa yol scꞌabꞌ jun ix ix ol yacꞌoch vin̈aj Sísara chiꞌ Jehová, xchi ix.
Ix lajvi chiꞌ, ix bꞌat ix yedꞌ vin̈aj Barac chiꞌ dꞌa Cedes. 10 Ataꞌ ix smolbꞌej 10 mil ebꞌ soldado vin̈aj Barac chiꞌ dꞌa scal ebꞌ yin̈tilal Zabulón yedꞌ dꞌa scal ebꞌ yin̈tilal Neftalí. Ix qꞌue ebꞌ dꞌa svitzal Tabor chiꞌ, ajun pax ix Débora chiꞌ yedꞌ ebꞌ.
11 A dꞌa Cedes dꞌa slacꞌanil jun teꞌ machꞌ dꞌa Zaanaim, ataꞌ ay scampamento jun vin̈ quenita scuchan Heber, yicꞌnaquel sbꞌa vin̈ dꞌa scal ebꞌ yetchon̈abꞌ, aton ebꞌ yin̈tilal vin̈aj Hobab sn̈iꞌ vin̈aj Moisés dꞌa pecaꞌ. 12 Ayic ix yabꞌan vin̈aj Sísara to toxo ix qꞌuecꞌoch vin̈aj Barac dꞌa svitzal Tabor, 13 ix smolbꞌan 900 scarruaje vin̈, ayoch hierro dꞌay. Ix smolbꞌanpax masanil ebꞌ soldado vin̈. Ix el vin̈ yedꞌ ebꞌ soldado chiꞌ dꞌa Haroset-goim, ix cꞌoch ebꞌ dꞌa stiꞌ aꞌ Cisón. 14 Ix yalan ix Débora dꞌa vin̈aj Barac chiꞌ yedꞌ ebꞌ soldado icha tic:
—Eman̈ec, bꞌabꞌelxo Jehová eyuuj, aꞌ ol acꞌanoch vin̈aj Sísara dꞌa yol e cꞌabꞌ ticnaic, xchi ix.
Ix emta vin̈aj Barac yedꞌ 10 mil ebꞌ soldado dꞌa svitzal Tabor chiꞌ. 15 Ayic ix syamanoch oval vin̈aj Barac chiꞌ, a Jehová ix acꞌan somchajbꞌat ebꞌ soldado vin̈aj Sísara yedꞌ ebꞌ edꞌjinac masanil scarruaje chiꞌ yuj jun nivan xivelal. Yuj chiꞌ ix laj smilcham ebꞌ vin̈aj Barac yedꞌ ebꞌ soldado chiꞌ. Axo vin̈aj Sísara chiꞌ, ix emta vin̈ dꞌa yol scarruaje, ix el lemnaj vin̈.
16 Ix och vin̈aj Barac yedꞌ ebꞌ soldado dꞌa spatic ebꞌ soldado vin̈aj Sísara chiꞌ yedꞌ scarruaje ebꞌ, masanto ix cꞌoch ebꞌ dꞌa Haroset-goim. A dꞌa jun cꞌu chiꞌ, man̈xo junoc soldado vin̈aj Sísara ixto cani, ix cham ebꞌ smasanil.
17 A vin̈aj Heber yedꞌ ebꞌ scꞌabꞌ yoc, vachꞌ yacꞌan ebꞌ yedꞌ vin̈aj Jabín sreyal Hazor chiꞌ. Yuj chiꞌ ataꞌ ix bꞌat vin̈aj Sísara chiꞌ scol sbꞌa. Ix cꞌoch vin̈ dꞌa smantiado ix Jael yetbꞌeyum vin̈aj Heber chiꞌ. 18 Ix elta ix scha vin̈, ix yalan ix dꞌa vin̈ icha tic:
—Ochan̈ mamin, man̈ ach xivoc, xchi ix.
Ix och vin̈aj Sísara chiꞌ dꞌa yol smantiado ix chiꞌ, ix yicꞌanelta jun sábana ix, ix slichꞌanbꞌat ix dꞌa yibꞌan̈ vin̈ yic scꞌubꞌanel vin̈ ix. 19 Ix lajvi chiꞌ, ix scꞌanan aꞌ vin̈ yucꞌ dꞌa ix, yujto van stacji stiꞌ vin̈. Elan̈chamel ix yiqꞌuel smacul jun tzꞌuum ix bꞌaj sicꞌan lech, ix yacꞌan ix yuqꞌuej vin̈. Ix musajxi vin̈ yuj ix. 20 Ix yalan vin̈ dꞌa ix icha tic:
—Canan̈ dꞌa stiꞌ mantiado tic. Tato ay mach sjavi scꞌanbꞌej yabꞌ dꞌayach: ¿Malaj junoc mach ix javi scol sbꞌa dꞌayach? ta xchi, tzalani to malaj mach, xchi vin̈ dꞌa ix.
21 Ix sat cꞌol vin̈aj Sísara chiꞌ svayi, yujto ix te cꞌunbꞌi vin̈ sbꞌeyi. Axo ix Jael chiꞌ ix icꞌancot jun teꞌ yestacail mantiado yedꞌ jun teꞌ macꞌlabꞌ. Te chamnac el vin̈ svayi, cꞌojancꞌolal ix cꞌoch ix dꞌa stzꞌey vin̈, ix smacꞌanbꞌat teꞌ estaca chiꞌ ix dꞌa yibꞌschiquin vin̈, ix cꞌaxpaj em teꞌ, ix emcꞌoch teꞌ dꞌa yol luum. Icha chiꞌ ix aj scham vin̈aj Sísara chiꞌ yuj ix. 22 Ayic ix cꞌoch vin̈aj Barac say vin̈aj Sísara chiꞌ, elan̈chamel ix elta lemnaj ix scha vin̈, ix yalan ix:
—Ochan̈, ul ilaꞌ mach van a sayan chiꞌ, xchi ix dꞌa vin̈.
Axo ix ochcꞌoch vin̈aj Barac dꞌa yol smantiado ix chiꞌ, ix yilan vin̈ to chamnacxo vin̈aj Sísara chiꞌ, macꞌbꞌilbꞌat teꞌ estaca chiꞌ dꞌa sjolom vin̈.