A sbꞌit ix Débora yedꞌ vin̈aj Barac
5
A dꞌa jun cꞌu chiꞌ, ix sbꞌitej jun bꞌit ix Débora yedꞌ vin̈aj Barac yuninal vin̈aj Abinoam, ix yalan ebꞌ icha tic:2 Con̈ bꞌitanec co masanil dꞌa Jehová, yujto dꞌa val yel ay ebꞌ yajalil israel stecꞌbꞌej sbꞌa dꞌa oval, ay pax soldado dꞌa co chon̈abꞌ tic bꞌecan scꞌol sbꞌat dꞌa oval chiꞌ.
3 Ex rey, abꞌec tas ol cal dꞌayex. Ex yajal, abꞌec co bꞌitan dꞌa Jehová. To sco bꞌitej co Diosal a on̈ israel on̈ tic.
4 Mamin Jehová, ayic ach el dꞌa Seir, yic ach cot acꞌ oval dꞌa Edom, ix te ibꞌxi val lum luum, ix acꞌanpaxcot n̈abꞌ.
5 Mamin Jehová co Diosal, ix te ibꞌxiqꞌue lum vitz dꞌa ichan̈, ix ibꞌxipaxqꞌue lum vitzal Sinaí.
6 A dꞌa stiempoal vin̈aj Samgar yuninal vin̈aj Anat yedꞌ dꞌa stiempoal ix Jael, man̈xalaj mach sbꞌeyecꞌ dꞌa nivac bꞌe, axon̈ej dꞌa qꞌuex bꞌe cꞌubꞌeltac yeqꞌui, ataꞌ tzꞌecꞌ ebꞌ.
7 Masanil munlajel najat ayeli, ix can tzꞌinan. Ato yic ix in qꞌue vaan a in Débora in tic, ix in och nunabꞌilal dꞌa chon̈abꞌ.
8 A val taꞌ ix sayecꞌ juntzan̈ comon dios ebꞌ quetchon̈abꞌ, yic syaqꞌuem sbꞌa ebꞌ dꞌay. Yuj chiꞌ ix javi ebꞌ tzꞌacꞌan oval dꞌa spuertailtac co chon̈abꞌ. Malaj smaclabꞌil jul-labꞌ, malaj pax lanza ix ilchaj dꞌa scal 40 mil soldado quetisraelal.
9 A in pensar, icha val to ajun yedꞌ ebꞌ yajalil in chon̈abꞌ yedꞌ ebꞌ chon̈abꞌ bꞌecan scꞌol sbꞌat dꞌa oval chiꞌ. Calec vachꞌ lolonel dꞌa Jehová.
10 Ex nivac vinac tzex qꞌue dꞌa yibꞌan̈ nocꞌ sacsac bꞌuru te vachꞌ stzꞌaam ayqꞌuei, alec tas ix scꞌulej Jehová. Alecpax a ex tzex bꞌeyi.
11 A ex ayex ecꞌ bꞌajtac ay a ucꞌbꞌilaꞌ, najatocabꞌ sbꞌat sjaj e son yedꞌ e platillo yuj eyicꞌanchaan̈ Jehová, yujto toxo ix satjiel ebꞌ cajcꞌool yuuj, yujto ix colvajpax dꞌa ebꞌ munlajvum ayic ix yacꞌan oval ebꞌ, ix yacꞌan ganar ebꞌ.
Ichato chiꞌ ix yal co meltzaj emta a on̈ schon̈abꞌ on̈ Jehová dꞌa co chon̈abꞌ.
12 Ach Débora, cuchbꞌej ebꞌ anima dꞌa bꞌit. A achxo pax ach Barac yuninal vin̈aj Abinoam, ixic, a ebꞌ ix yamchaj uuj dꞌa oval, icꞌbꞌat ebꞌ.
13 Ix emul ebꞌ yajalil chon̈abꞌ yacꞌ oval. Ix emul ebꞌ soldado Jehová yacꞌ oval yedꞌ ebꞌ soldado te tecꞌan.
14 Ix empaxul ebꞌ yin̈tilal Efraín, ix cot ebꞌ bꞌaj ecꞌnac ebꞌ amalecita. Bꞌabꞌel ix emul ebꞌ yin̈tilal Benjamín yuj ebꞌ. Ix empaxul ebꞌ yajalil ebꞌ soldado dꞌa yin̈tilal Maquir yedꞌ ebꞌ yajal pax yaj dꞌa scal ebꞌ yin̈tilal Zabulón.
15 Yedꞌ pax ebꞌ yajal yaj dꞌa scal ebꞌ yin̈tilal Isacar ix colvaj ebꞌ yedꞌ ix Débora. Ix colvajpax ebꞌ yedꞌ vin̈aj Barac. Yelcꞌolal te tzacꞌanoch ebꞌ yuj vin̈ ayic ix emcꞌoch ebꞌ dꞌa chꞌolan.
Palta ay chabꞌcꞌolal dꞌa scal ebꞌ yin̈tilal Rubén.
16 ¿Tas yuj ix can ebꞌ bꞌaj macan nocꞌ calnel dꞌa yol smacteꞌ, syabꞌan ebꞌ yavtaj nocꞌ calnel chiꞌ yuj ebꞌ stan̈vumal? Val yel a dꞌa scal ebꞌ yin̈tilal Rubén ay chabꞌcꞌolal.
17 Axo pax ebꞌ aj Galaad, ix can ebꞌ dꞌa scꞌaxepalecꞌ aꞌ Jordán. Axo ebꞌ yin̈tilal Dan, ix can ebꞌ dꞌa stzꞌey bꞌaj ay teꞌ barco, an̈ejaꞌ pax ebꞌ yin̈tilal Aser, ix can ebꞌ dꞌa stiꞌ aꞌ mar, majxo el jabꞌoc ebꞌ bꞌaj sjavi teꞌ barco.
18 Axo ebꞌ yin̈tilal Zabulón yedꞌ ebꞌ yin̈tilal Neftalí, ix sbꞌecxon̈ej sbꞌa ebꞌ scham dꞌa oval.
19 Ix javi ebꞌ vin̈ sreyal ebꞌ cananeo dꞌa Taanac, dꞌa slacꞌanil stiꞌ aꞌ Meguido, ix javi ebꞌ yic syacꞌan oval ebꞌ yalani, palta malaj qꞌuen plata yedꞌ bꞌeyumal ix yicꞌ ebꞌ.
20 Ato dꞌa satchaan̈ bꞌaj sbꞌey qꞌuen cꞌanal, ato taꞌ ix cot tas ix acꞌan oval yedꞌ vin̈aj Sísara.
21 A aꞌ Cisón aytaxon dꞌa pecaꞌ, acꞌum oval aꞌ, a aꞌ ix cuchanbꞌat ebꞌ.
Caqꞌuec quip co bꞌatec dꞌa quichan̈.
22 Ix cꞌan̈ val yem yoc nocꞌ chej ayic ix bꞌat lemnaj nocꞌ dꞌa oval.
23 Ix yalan Yángel Jehová: Cotocabꞌ yoval scꞌol Jehová dꞌa yibꞌan̈ chon̈abꞌ Meroz yedꞌ dꞌa yibꞌan̈ ebꞌ cajan taꞌ. Cotocabꞌcan dꞌa yibꞌan̈ ebꞌ yujto maj colvaj ebꞌ yedꞌ Jehová, maj colvaj ebꞌ yacꞌan oval yedꞌ ebꞌ soldado te tecꞌan, xchi.
24 Te vachꞌ yic ix Jael yetbꞌeyum vin̈aj Heber ceneo dꞌa yichan̈ masanil ebꞌ ix ix. Vachꞌ yic ix dꞌa yichan̈ masanil ebꞌ ix ix cajan dꞌa yoltac mantiado.
25 Ayic ix scꞌanan aꞌ vin̈aj Sísara yuqꞌuej dꞌa ix, axo lech te vachꞌ ix yacꞌ ix yuqꞌuej vin̈. A lech ix yacꞌ ix yuqꞌuej vin̈ dꞌa yol jun yedꞌtal te vachꞌ yilji.
26 Ix yicꞌanqꞌue jun teꞌ estaca ix dꞌa sqꞌuexan̈cꞌabꞌ, ix yicꞌanpaxqꞌue jun teꞌ macꞌlabꞌ ix dꞌa svachꞌcꞌabꞌ. Ix poj sbꞌaquil sjolom vin̈, ix smacꞌan cꞌaxpaj teꞌ ix dꞌa yibꞌschiquin vin̈.
27 Toxon̈ej ix ecꞌ bꞌalbꞌon vin̈ dꞌa yichan̈ ix yuj syail. An̈ejaꞌ taꞌ ix chamcan vin̈.
28 A ix snun vin̈aj Sísara chiꞌ, ayic ix elta dꞌan̈an ix dꞌa sventenail spat, te cusnac scꞌol ix.
Ix yalan ix: ¿Tas yuj tzꞌecꞌ tiempo sjavi vin̈ vuneꞌ yedꞌ scarruaje? ¿Tas yuj maxto cabꞌ scꞌan̈ yoc nocꞌ schej vin̈ stocꞌan scarruaje chiꞌ? xchi ix.
29 A tas van snaan ix snun vin̈ chiꞌ, an̈ejaꞌ chiꞌ ix yalpax juntzan̈ ebꞌ ix ix te ay spensar ayecꞌ yedꞌ ix. Ix yalan ebꞌ ix icha tic:
30 Tecan van spucanecꞌ ebꞌ vin̈ jantac tas ix yicꞌcanecꞌ dꞌa oval chiꞌ. Van am sicꞌlan junjunoc ebꞌ ix ix ebꞌ vin̈ yic syicꞌaꞌ, ma chatacvan̈oc ebꞌ ix. Axo vin̈aj Sísara chiꞌ yedꞌ ebꞌ soldado, van am sicꞌlan cꞌapac pichul ebꞌ te vachꞌ, cꞌapac te vachꞌ yajoch yelvanubꞌ dꞌa junjun pacꞌan̈, yic vachꞌ ol yacꞌoch ebꞌ dꞌa sjaj, yujto ix yacꞌ ganar oval chiꞌ ebꞌ, xchi ebꞌ ix.
31 Mamin Jehová, ichocabꞌ chiꞌ tzꞌaj satel ebꞌ ayoch ajcꞌolal dꞌayach. Axo ebꞌ tzach xajanani, lajanocabꞌ ebꞌ icha scopopial yoc cꞌu, xchi ix Débora yedꞌ vin̈aj Barac dꞌa sbꞌit chiꞌ.
Ayic ix lajvican jun oval chiꞌ, 40 abꞌil man̈xalaj oval.