Ix avtaj vin̈aj Gedeón yuj Dios
6
Ix lajvi chiꞌ, ix scha cꞌulanxi chucal ebꞌ israel chiꞌ dꞌa yichan̈ Jehová. Yuj chiꞌ uqueꞌ abꞌil ix acꞌjioch ebꞌ dꞌa yol scꞌabꞌ ebꞌ madianita yuuj. 2 Ix och val ebꞌ dꞌa syaelal yuj ebꞌ madianita chiꞌ. Ix laj say ebꞌ bꞌajtac scꞌubꞌejel sbꞌa dꞌa lum vitz, dꞌa yoltac qꞌuen n̈aqꞌueen yedꞌ bꞌaj max yal scꞌoch anima. Ataꞌ ix laj cajnaj ebꞌ. 3 Ayic qꞌuin̈xo sat yavbꞌen ebꞌ israel chiꞌ, axo ebꞌ madianita chiꞌ, ebꞌ amalecita yedꞌ juntzan̈xo ebꞌ scot yedꞌ ebꞌ dꞌa stojolal bꞌaj sjavi cꞌu, sjavi ebꞌ yacꞌ oval yedꞌ ebꞌ. 4 Sbꞌat sbꞌoanqꞌue scampamento ebꞌ dꞌa sat slum ebꞌ israel chiꞌ, satanel ebꞌ masanil tas avabꞌil yuj ebꞌ israel chiꞌ, masanto dꞌa smojonal chon̈abꞌ Gaza. Man̈xa jabꞌoc tas sva ebꞌ scan yuj ebꞌ ajcꞌol chiꞌ, syicꞌanpaxbꞌat nocꞌ calnel ebꞌ, nocꞌ vacax yedꞌ nocꞌ bꞌuru. 5 Yujto yedꞌnac smolbꞌetzal nocꞌ ebꞌ scꞌoch ebꞌ dꞌa sat sluum ebꞌ israel chiꞌ, yuj chiꞌ, masanil tas ay dꞌa sat luum, pilan slajvieli. Man̈ bꞌischajbꞌenoc ebꞌ yedꞌ nocꞌ scamello chiꞌ, icha val nocꞌ cꞌulubꞌ. Slajvicanel tastac ay dꞌa sat luum bꞌajtac tzꞌecꞌ ebꞌ chiꞌ. 6-7 Icha val chiꞌ ix aj scan ebꞌ israel mebꞌail yuj tas tzꞌutaj yuj ebꞌ madianita chiꞌ. Yuj chiꞌ ix tevi ebꞌ dꞌa Jehová yic scolvaj dꞌa ebꞌ.8 Yuj chiꞌ axo Jehová ix acꞌancot jun schecabꞌ dꞌa ebꞌ israel chiꞌ, ix yalan icha tic: A Jehová co Diosal tzꞌalan icha tic: A in vicꞌnac ex elta dꞌa Egipto bꞌaj ayex och checabꞌil. 9 Man̈ocn̈ej dꞌa yol scꞌabꞌ ebꞌ aj Egipto in colnac ex elta, palta ex in colpax dꞌa ebꞌ ix ex ixtani, ix viqꞌuel ebꞌ dꞌa eyichan̈, ix vacꞌancan lum sluum ebꞌ dꞌayex. 10 Ix val dꞌayex to a inton Jehová e Diosal in. Ix valanpaxi to max yal-laj eyacꞌanem e bꞌa dꞌa juntzan̈ sdiosal ebꞌ amorreo ay dꞌa lum luum bꞌaj ayex ecꞌ tic, palta maj e cꞌanabꞌajej tas ix valaꞌ, xchi Jehová, xchi jun schecabꞌ chiꞌ.
11 Dꞌa jun tiempoal chiꞌ ix emul Yángel Jehová, ix em cꞌojan dꞌa yich jun teꞌ machꞌ dꞌa Ofra, dꞌa yol yic vin̈aj Joás yin̈tilal Abiezer. Ay jun vin̈ yuninal vin̈aj Joás chiꞌ scuchan Gedeón. A vin̈aj Gedeón chiꞌ, van stecꞌanel ixim strigo vin̈ dꞌa yol jun bꞌaj stecꞌchajel yal teꞌ uva, yic scꞌubꞌejel ixim vin̈ dꞌa ebꞌ madianita chiꞌ.
12 Ataꞌ ix schꞌox sbꞌa Yángel Jehová dꞌa vin̈, ix yalan dꞌa vin̈ icha tic:
—Ach vinac tecꞌan. A Jehová ayoch edꞌoc, xchi dꞌa vin̈.
13 Ix tacꞌvi vin̈aj Gedeón chiꞌ:
—Mamin, acꞌ in nivancꞌolal yuj tas ol valaꞌ. Tato ayoch Jehová quedꞌoc, ¿tas yuj sjavi juntzan̈ tic dꞌa quibꞌan̈? ¿Bꞌajtil ay juntzan̈ tas satubꞌtac yilji yalnaccan ebꞌ co mam quicham dꞌayon̈, ayic yalannac ebꞌ to a Jehová icꞌannaquelta ebꞌ dꞌa Egipto? Palta axo ticnaic, on̈ yactejcan co chꞌocoj, on̈ yacꞌancanoch dꞌa yol scꞌabꞌ ebꞌ madianita, xchi vin̈ dꞌay.
14 Ix och qꞌuelan Jehová chiꞌ dꞌa vin̈, ix yalani:
—A in tzach in checbꞌati, ol vacꞌn̈ej ip yic tza colanel ebꞌ etchon̈abꞌ dꞌa yol scꞌabꞌ ebꞌ madianita chiꞌ, xchi dꞌa vin̈.
15 Ix tacꞌvi vin̈ icha tic:
—Ay Mamin, acꞌ val nivancꞌolal dꞌayin junelxo. ¿Tas val ol aj in colan ebꞌ vetchon̈abꞌ tic? Yujto a in tic yedꞌ ebꞌ ayto vuj in bꞌa yedꞌoc te mebꞌaꞌ on̈ dꞌa scal ebꞌ yin̈tilal Manasés. Slajvubꞌ unin in dꞌa scal ebꞌ vucꞌtac, xchi vin̈.
16 Ix yalanxi Jehová dꞌa vin̈ icha tic:
—Ayinoch edꞌoc, yuj chiꞌ ol acꞌ ganar ebꞌ madianita chiꞌ. Icha val tzꞌaj yacꞌji ganar junoc anima schꞌocoj, icha chiꞌ ol aj acꞌan ganar ebꞌ, xchi dꞌa vin̈.
17 Ix yalanxi vin̈ dꞌay:
—Mamin, tato vachꞌ in dꞌa yol a sat, chꞌox junoc yechel vilaꞌ yic vachꞌ snachajel vuuj to schecabꞌ ach Dios. 18 Tzin tevi dꞌayach to max ach el dꞌa tic, ol vicꞌcot junoc in silabꞌ dꞌayach, xchi vin̈.
Ix tacꞌvi Jehová chiꞌ:
—Ayinn̈ej ecꞌ dꞌa tic masanto ol ach jaxoc, xchi.
19 Ix lajvi chiꞌ ix bꞌat vin̈aj Gedeón sbꞌo jun nocꞌ yuneꞌ chiva, ix sbꞌoanpax ixim pan vin̈ dꞌa jun echlabꞌ ixim harina, malaj yich pan ix yacꞌbꞌat vin̈ dꞌa scal. Ix lajvi chiꞌ ix yacꞌanem nocꞌ chibꞌej chiꞌ vin̈ dꞌa yol jun teꞌ mooch, axo dꞌa yol jun lum chen ix yaqꞌuem yalil nocꞌ vin̈. Ix yicꞌancot masanil juntzan̈ chiꞌ vin̈ dꞌa yichan̈ Ángel chiꞌ dꞌa yich jun teꞌ machꞌ chiꞌ. 20 Ix yalan Yángel Jehová chiꞌ icha tic: Aqꞌuem nocꞌ chibꞌej yedꞌ ixim pan chiꞌ dꞌa yibꞌan̈ jun qꞌuen qꞌueen tic, tza tobꞌanem yal nocꞌ chiꞌ dꞌa yibꞌan̈, xchi. Ix scꞌanabꞌajan vin̈ masanil tas ix yal chiꞌ. 21 Axo Yángel Jehová chiꞌ, ix stenoch sn̈iꞌ scꞌococh dꞌa juntzan̈ chiꞌ, ix qꞌueul cꞌacꞌ dꞌa yol qꞌuen nivan qꞌueen chiꞌ, ix tzꞌabꞌat nocꞌ chibꞌej yedꞌ ixim pan chiꞌ. Val dꞌa yichan̈ vin̈ ix satem Yángel Jehová chiꞌ. 22 Ayic ix yilan jun chiꞌ vin̈, ix nachajel yuj vin̈ to Yángel Jehová jun ix lolon chiꞌ yedꞌ vin̈. Yuj chiꞌ ix yalan vin̈ icha tic:
—Mamin Jehová, qꞌuelcꞌumbꞌa val ix aj in lolon yedꞌ Ángel ix a checcoti, xchi vin̈.
23 Ix yalan Jehová dꞌa vin̈ icha tic:
—Man̈ ach xivoc, man̈ ol ach chamlaj, xchi dꞌa vin̈.
24 Ix lajvi chiꞌ, ix sbꞌoanqꞌue jun altar vin̈ taꞌ yic syicꞌanchaan̈ Jehová vin̈. Ix yacꞌancan vin̈ sbꞌiej: A Jehová acꞌum juncꞌolal. A jun altar chiꞌ ix cann̈ej dꞌa Ofra dꞌa yol smacbꞌen ebꞌ yin̈tilal Abiezer.
25 A dꞌa jun acꞌval chiꞌ, ix yal Jehová dꞌa vin̈aj Gedeón chiꞌ:
—Iqꞌuelta nocꞌ schabꞌil mam vacax dꞌa scal nocꞌ svacax vin̈ a mam, nocꞌ uqueꞌ abꞌil sqꞌuinal. Tza macꞌan vecchaj yaltaril comon dios Baal bꞌobꞌilqꞌue yuj vin̈ a mam chiꞌ, tza chꞌacanpaxel jun te teꞌ yechel comon dios Asera dꞌa stzꞌey altar chiꞌ. 26 A dꞌa sjolom qꞌuen nivan qꞌuen chaan̈ ayqꞌuei, ataꞌ tza bꞌoqꞌue junoc altar dꞌayin Jehová a Diosal in tic. Vachꞌ tzutej a latzꞌanqꞌue qꞌueen. Axo te teꞌ ix a chꞌaquel chiꞌ, a teꞌ tzacꞌoch scꞌatzitzaloc. Slajvi chiꞌ tza milancham nocꞌ vacax chiꞌ, tza n̈usantzꞌa nocꞌ silabꞌil dꞌa yibꞌan̈, xchi dꞌa vin̈.
27 Yuj chiꞌ ix bꞌat vin̈, ix yicꞌanbꞌat lajun̈van̈ schecabꞌ vin̈, ix scꞌanabꞌajan vin̈ icha ix aj yalan Jehová chiꞌ. Palta ix xiv vin̈ sbꞌoan dꞌa cꞌualil yuj ebꞌ scꞌabꞌ yoc vin̈ smam. Ix xivpax vin̈ dꞌa ebꞌ anima cajan dꞌa chon̈abꞌ chiꞌ, yuj chiꞌ dꞌacꞌvalil ix laj sbꞌo juntzan̈ chiꞌ vin̈. 28 Axo ix qꞌuin̈ibꞌi dꞌa junxo cꞌu, ayic ix qꞌue vaan ebꞌ anima dꞌa jun chon̈abꞌ chiꞌ, ix yilan ebꞌ to toxo ix macꞌji vecchaj altar yic Baal chiꞌ, ix yilanpax ebꞌ to toxo ix chꞌacjiel teꞌ yechel Asera dꞌa stzꞌey altar chiꞌ. Ix yabꞌanpax ebꞌ to ay jun nocꞌ vacax ix n̈usjitzꞌa silabꞌil dꞌa yibꞌan̈ jun altar toto ix bꞌo chiꞌ. 29 Ix scꞌanbꞌanecꞌ ebꞌ:
—¿Mach ix bꞌoan juntzan̈ tic? xchi ebꞌ.
Ix laj scꞌanbꞌanecꞌ yabꞌ ebꞌ, axo ix yabꞌan ebꞌ to a vin̈aj Gedeón yuninal vin̈aj Joás ix bꞌoani. Yuj chiꞌ ix yal ebꞌ dꞌa vin̈aj Joás chiꞌ icha tic:
30 —Iqꞌuelta vin̈ uninal chiꞌ, ol co milcham vin̈. ¿Tas yuj ix smacꞌvecchaj altar yic Baal vin̈, ix schꞌacanpaxel teꞌ yechel Asera vin̈ dꞌa stzꞌey chiꞌ? xchi ebꞌ anima chiꞌ.
31 Ix tacꞌvi vin̈aj Joás dꞌa masanil ebꞌ anima oyanoch dꞌa spatic chiꞌ icha tic:
—¿Tom tze col jun comon dios scuchan Baal chiꞌ, tzeyacꞌan yovalil? Tato icha chiꞌ, chamocabꞌ jun mach scolan Baal chiꞌ dꞌa qꞌuin̈ibꞌalil tic. Tato yel Dios jun Baal chiꞌ, yacꞌocabꞌ yovalil dꞌa mach ix macꞌan vecchaj jun yaltar chiꞌ, xchi vin̈.
32 A dꞌa jun cꞌu chiꞌ, Jerobaal ix sbꞌiejcan vin̈aj Gedeón chiꞌ, yujto ix yal ebꞌ anima chiꞌ icha tic: Yacꞌocabꞌ oval jun Baal chiꞌ yedꞌ vin̈, yujto ix smacꞌ vecchaj yaltar vin̈, xchi ebꞌ.*
33 A dꞌa jun tiempoal chiꞌ, ix smolbꞌej sbꞌa ebꞌ madianita, ebꞌ amalecita yedꞌ ebꞌ cajan dꞌa stojolal bꞌaj sjavi cꞌu, ix cꞌaxpajecꞌta ebꞌ dꞌa yol aꞌ Jordán, ix sbꞌoanqꞌue scampamento ebꞌ dꞌa yacꞌlical Jezreel. 34 Axo Yespíritu Jehová ix och dꞌa vin̈aj Gedeón chiꞌ. Ayic ix spuꞌan jun nocꞌ schꞌaac vin̈, ix smolbꞌan sbꞌa ebꞌ yin̈tilal Abiezer, aton ebꞌ scꞌabꞌ yoc vin̈. 35 Ix yacꞌanpaxbꞌat schecabꞌ vin̈ yavtejcot ebꞌ yin̈tilal Manasés, ebꞌ yin̈tilal Aser, ebꞌ yin̈tilal Zabulón yedꞌ ebꞌ yic Neftalí, yuj chiꞌ ix smolbꞌej sbꞌa ebꞌ yedꞌ vin̈.
36 Ix yalan vin̈ dꞌa Dios icha tic: Tato dꞌa val yel a in tzin acꞌlabꞌej a colan ebꞌ vetisraelal tic, icha val ix aj alani, chꞌox junoc yechel dꞌayin. 37 A ticnaic ol vacꞌcanem junoc nocꞌ tzꞌumal calnel dꞌa sat tecꞌlabꞌ trigo. Axo dꞌa qꞌuin̈ibꞌalil qꞌuicꞌan, tato teꞌ chꞌayan nocꞌ tzꞌum chiꞌ yuj yal acꞌval, axo pax dꞌa sat lum dꞌa spatic yichan̈ nocꞌ, taquin̈, ol vojtaquejeli to yel a in ol in acꞌlabꞌej a colanel ebꞌ vetchon̈abꞌ tic, icha ix aj alani, xchi vin̈.
38 Icha val ix aj yalan vin̈ chiꞌ, icha chiꞌ ix aji. Ayic ix qꞌue vaan vin̈ dꞌa qꞌuin̈ibꞌalil, ix spitzꞌanel nocꞌ tzꞌuum chiꞌ vin̈, jun ucꞌabꞌ aꞌ ix el dꞌa nocꞌ. 39 Ix yalanxi vin̈ dꞌa Dios: Mamin, mocabꞌ cot yoval a cꞌol dꞌayin, ol in cꞌan junxo chꞌoxnabꞌil dꞌayach. A dꞌa junelxo tic, a sat lum schꞌayxi yuj yal acꞌval chiꞌ, axo pax nocꞌ tzꞌuum chiꞌ, mocabꞌ chꞌayxoc nocꞌ, xchi vin̈.
40 Icha val ix aj yalan vin̈ chiꞌ, icha chiꞌ ix yutej Dios dꞌa junxo acꞌval chiꞌ. Ayic ix sacbꞌi, te taquin̈ nocꞌ tzꞌuum chiꞌ, axo pax sat luum, te chꞌayan yuj yal acꞌval.