2 Ix yalan Jehová dꞌa vin̈aj Gedeón chiꞌ icha tic: Te tzijtum ebꞌ vin̈ vinac tic edꞌnac. Tato svacꞌoch ebꞌ madianita dꞌa yol e cꞌabꞌ ticnaic, axom ol eyalani to yuj e jelanil ix eyacꞌ ganar ebꞌ. 3 Yuj chiꞌ al dꞌa ebꞌ vin̈ soldado smasanil, tato ay mach xiv sbꞌat dꞌa oval chiꞌ, meltzajocabꞌ dꞌa svitzal Galaad tic, spax dꞌa spat, xchi dꞌa vin̈.

Yuj chiꞌ 22 mil ebꞌ vin̈ ix paxta, 10 milxon̈ej ebꞌ vin̈ ix cani. 4 Ix yalanxi Jehová: An̈ejaꞌ tzijtumto ebꞌ vin̈ soldado tic. Icꞌbꞌat ebꞌ vin̈ yuqꞌuej aꞌ dꞌa stiꞌ aꞌ melem. Ataꞌ ol vil ebꞌ vin̈, a in xo ol valaꞌ machtac ol can edꞌoc, xchi dꞌa vin̈.

5 Ix yicꞌanbꞌat ebꞌ vin̈ ixto can chiꞌ vin̈aj Gedeón yuqꞌuej aꞌ dꞌa stiꞌ aꞌ melem chiꞌ. Ix yalan Jehová: Masanil mach sbꞌechanqꞌueta aꞌ dꞌa yol scꞌabꞌ yuqꞌuej, chꞌoc tzicꞌcanel dꞌa scal ebꞌ vin̈ tzꞌem cuman syucꞌan aꞌ, xchi dꞌa vin̈.

6 A ebꞌ vin̈ ix bꞌechanqꞌueta aꞌ dꞌa yol scꞌabꞌ, ix yucꞌani, 300 ebꞌ vin̈, axo jantacxo ebꞌ vin̈ jun, ix em cuman ebꞌ vin̈ ix yucꞌan aꞌ ebꞌ vin̈. 7 Ix lajvi chiꞌ, ix yalan Jehová dꞌa vin̈aj Gedeón chiꞌ: Cꞌocbꞌil ebꞌ vin̈ 300 chiꞌ ol in cꞌanaꞌ yic ol eyacꞌan ganar ebꞌ madianita chiꞌ. Axo pax ebꞌ vin̈ ix em cuman yucꞌan a aꞌ chiꞌ jun, paxocabꞌ ebꞌ vin̈ dꞌa spat, xchi dꞌa vin̈.

8 Yuj chiꞌ ix yal vin̈aj Gedeón chiꞌ to smeltzaj ebꞌ vin̈ dꞌa spat. Axo vin̈ ix icꞌancanecꞌ svael ebꞌ vin̈ yedꞌ nocꞌ schꞌaac ebꞌ vin̈ spuꞌu. Axon̈ej ebꞌ vin̈ 300 ix sicꞌjicanel chiꞌ ix can yedꞌ vin̈. A scampamento ebꞌ vin̈, ayecꞌ dꞌa jolom vitz dꞌa yibꞌan̈ bꞌaj ay scampamento ebꞌ madianita chiꞌ.

9 A dꞌa jun acꞌval chiꞌ, ix yal Jehová dꞌa vin̈aj Gedeón chiꞌ: Qꞌuean̈ vaan, ixic, eman̈ acꞌ oval yedꞌ ebꞌ madianita chiꞌ, yujto ol vacꞌoch ebꞌ dꞌa yol a cꞌabꞌ. 10 Tato tzach xiv a bꞌati, emocabꞌ vin̈ a checabꞌ aj Fura edꞌoc dꞌa scampamento ebꞌ chiꞌ, 11 ol e maclan eyabꞌi tas van yalan ebꞌ, yuj chiꞌ man̈ ol ach xiv och dꞌa oval chiꞌ, xchi dꞌa vin̈.

Yuj chiꞌ ix emcꞌoch vin̈ yedꞌ vin̈ schecabꞌ chiꞌ dꞌacꞌvalil bꞌaj ayel ebꞌ stan̈van scampamento ebꞌ madianita chiꞌ, yic smaclan yabꞌ ebꞌ vin̈ tas syal ebꞌ. 12 A ebꞌ madianita chiꞌ yedꞌ ebꞌ amalecita yedꞌ ebꞌ ix cot dꞌa stojolal bꞌaj sjavi cꞌu, ix majel sat lum acꞌlic chiꞌ yuj ebꞌ, ichoc nocꞌ cꞌulubꞌ. Man̈xo bꞌischajbꞌenoc jantac nocꞌ camello yedꞌnac ebꞌ, icha val yarenail dꞌa stiꞌ aꞌ mar.

13 Ayic ix cꞌoch vin̈aj Gedeón chiꞌ bꞌaj ayecꞌ ebꞌ van stan̈van scampamento ebꞌ chiꞌ, ix yabꞌan vin̈ yalan svayich jun vin̈ soldado dꞌa junxo vin̈ icha tic.

—Ix in vayichej to ay jun ixim pan cebada ix cot bꞌalbꞌon dꞌa sat vitz tic. Ix emul ixim dꞌa yol co campamento tic, ix och pocꞌnaj ixim dꞌa jun mantiado, ix em lan̈naj yuj ixim, xchi vin̈.

14 Ix tacꞌvi junxo vin̈ chiꞌ icha tic:

—A jun ixim pan chiꞌ syalelcꞌochi to a vin̈aj Gedeón yuninal vin̈aj Joás yedꞌ ebꞌ soldado israel ol on̈ acꞌan ganar. Yujto a Dios ol on̈ acꞌanoch co masanil dꞌa yol scꞌabꞌ ebꞌ, xchi vin̈.

15 Ayic ix yabꞌan vin̈aj Gedeón tas ix yutej yalan jun vayich chiꞌ ebꞌ vin̈, ix em cuman vin̈ dꞌa yichan̈ Jehová, ix yacꞌan yuj diosal vin̈ dꞌay. Ix lajvi chiꞌ, ix qꞌuexta vin̈ dꞌa scampamento, ix yalan vin̈:

—Coyec, yujto toxo ix yacꞌoch ebꞌ madianita Jehová dꞌa yol co cꞌabꞌ, xchi vin̈.

16 Ox macan̈ ix yutej 300 ebꞌ vin̈ soldado chiꞌ vin̈. Junjun nocꞌ chꞌaac ix yacꞌ vin̈ dꞌa junjun ebꞌ vin̈ soldado chiꞌ yic spu nocꞌ ebꞌ vin̈, ix yacꞌanpax junjun chen vin̈ dꞌa ebꞌ vin̈, ayem staj ebꞌ vin̈ ayoch scꞌacꞌal dꞌa yol chen chiꞌ. 17 Ix yalan vin̈ dꞌa ebꞌ vin̈ icha tic:

—Ayic ol in cꞌoch dꞌa junxo stibꞌat scampamento ebꞌ cajcꞌol chiꞌ, tzeyil val tas ol in cꞌulej, icha pax chiꞌ ol e cꞌulejpax a ex tic. 18 A ol eyabꞌan in puꞌan nocꞌ chꞌaac tic yedꞌ ebꞌ tzacꞌanoch vuuj, ol e puꞌanpax nocꞌ eyic e masanil dꞌa spatictac campamento chiꞌ, ol ex avajoc. Ol eyalan icha tic: Caqꞌuec oval yuj Jehová yedꞌ vin̈aj Gedeón, xe chi, xchi vin̈.

19 Ayic ix cꞌoch vin̈aj Gedeón chiꞌ yedꞌ 100 ebꞌ vin̈ soldado ajun yedꞌoc dꞌa junxo stibꞌat scampamento ebꞌ madianita chiꞌ dꞌa chimilacꞌval, ato val sqꞌuexlan sbꞌa ebꞌ bꞌabꞌel ayel stan̈vej campamento chiꞌ. A val taꞌ ix spu schꞌaac ebꞌ vin̈ yic vin̈aj Gedeón chiꞌ, ix smacꞌanpaxpoj schen ebꞌ vin̈ yedꞌnac. 20 Junn̈ej ix aj spuꞌan schꞌac ebꞌ vin̈ yedꞌnac dꞌa svachꞌ cꞌabꞌ yox macan̈il, junn̈ej pax ix aj smacꞌanpoj schen ebꞌ vin̈, axo scꞌabꞌ ebꞌ vin̈ dꞌa sqꞌuexan̈ ix tzꞌicanchaan̈ staj, chaan̈ ix avaj ebꞌ vin̈: Caqꞌuec oval yuj Jehová yedꞌ vin̈aj Gedeón, xchi ebꞌ vin̈. 21 Ix cann̈ej tecꞌtecꞌ ebꞌ vin̈ dꞌa spatic campamento chiꞌ. Axo ebꞌ ajcꞌol chiꞌ, yelcꞌolalxon̈ej ix bꞌat ebꞌ elelal, ix el yav ebꞌ yuj xivelal. 22 Ayic ix spuꞌan nocꞌ schꞌaac 300 ebꞌ vin̈ israel chiꞌ, axo Jehová ix acꞌan somchajbꞌat spensar ebꞌ ajcꞌol chiꞌ. Munil a ebꞌ ix laj smil-lajcham sbꞌa. Ay pax ebꞌ ix el lemnajoc, ix bꞌat ebꞌ dꞌa Bet-sita dꞌa stojolal Zerera, masanto ix cꞌoch ebꞌ dꞌa smojonal Abel-mehola dꞌa slacꞌanil Tabat.

23 Ix lajvi chiꞌ, ix smolbꞌan sbꞌa ebꞌ yin̈tilal Neftalí yedꞌ ebꞌ yin̈tilal Aser yedꞌ masanil ebꞌ yic Manasés, ix bꞌat ebꞌ dꞌa spatic ebꞌ madianita chiꞌ. 24 Axo vin̈aj Gedeón chiꞌ, ix schecbꞌat yalumal vin̈ dꞌa ebꞌ yin̈tilal Efraín cajan dꞌa tzalquixtac, to sbꞌat ebꞌ smac dꞌa elan̈chamel dꞌa sjayil stiꞌ aꞌ Jordán dꞌa Bet-bara, yacbꞌan manto cꞌoch ebꞌ ajcꞌol chiꞌ. Ix scꞌanabꞌajej ebꞌ sbꞌati.

25 Ix yamchaj chavan̈ ebꞌ vin̈ sat yajal yaj dꞌa ebꞌ madianita chiꞌ yuj ebꞌ, jun vin̈ scuch Oreb, junxo vin̈ scuchan Zeeb. A vin̈aj Oreb chiꞌ, ix miljicham vin̈ bꞌaj ay jun qꞌuen tenam, aton qꞌuen ix scuchcan Oreb. Axo vin̈aj Zeeb chiꞌ, ix cham vin̈ bꞌaj ay jun tecꞌlabꞌel yal uva, yuj chiꞌ Zeeb ix sbꞌiejcan jun chiꞌ. Ix bꞌatn̈ej ebꞌ yin̈tilal Efraín chiꞌ dꞌa spatic ebꞌ madianita chiꞌ, ix yicꞌancot sjolom vin̈aj Oreb chiꞌ ebꞌ yedꞌ yic vin̈aj Zeeb chiꞌ dꞌa vin̈aj Gedeón chiꞌ dꞌa stiꞌ aꞌ Jordán chiꞌ.