—¿Tom tze naꞌ to ecꞌbꞌal yelcꞌoch tas ix co cꞌulej dꞌa sbꞌabꞌelal a on̈ yin̈til on̈ vin̈aj Abiezer tic dꞌa yichan̈ tas ix e cꞌulej dꞌa slajvubꞌalxo a ex yin̈tilal Efraín ex tic? 3 A Dios ix acꞌanoch ebꞌ yajalil ebꞌ madianita dꞌa yol e cꞌabꞌ a ex tic, aton vin̈aj Oreb yedꞌ vin̈aj Zeeb. Malaj yelcꞌoch tas ix in cꞌulej a in tic dꞌa yichan̈ tas nivan yelcꞌoch ix e cꞌulej chiꞌ a ex tic, xchi vin̈.

Ayic ix yabꞌan ebꞌ tas ix yal vin̈ chiꞌ, ix sicbꞌiem yoval scꞌol ebꞌ chiꞌ.

4 Ix emcꞌoch vin̈aj Gedeón yedꞌ 300 ebꞌ vin̈ soldado dꞌa stiꞌ aꞌ Jordán, vachꞌchom te cꞌunbꞌinacxo ebꞌ vin̈, palta ixto bꞌatn̈ej tzacꞌan ebꞌ vin̈ dꞌa spatic ebꞌ ajcꞌol chiꞌ, masanto ix cꞌaxpajecꞌ ebꞌ vin̈ dꞌa aꞌ. 5 Ayic ix cꞌoch ebꞌ vin̈ dꞌa Sucot, ix yalan vin̈aj Gedeón chiꞌ dꞌa ebꞌ cajan taꞌ icha tic:

—Comonoc tzꞌel dꞌa e cꞌool, tzeyacꞌ jabꞌoc tas sva ebꞌ vin̈ ajun vedꞌ tic, yujto tzꞌel yip ebꞌ vin̈ yuj vejel, yujto ayon̈ och dꞌa spatic vin̈aj Zeba yedꞌ vin̈aj Zalmuna, aton ebꞌ vin̈ sreyal ebꞌ madianita, xchi vin̈.

6 Ix tacꞌvi ebꞌ yajalil chon̈abꞌ chiꞌ dꞌa vin̈ icha tic:

—¿Tom toxo ix yamchaj vin̈aj Zeba yedꞌ vin̈aj Zalmuna chiꞌ eyuuj, yuj chiꞌ scacꞌ va ebꞌ vin̈ a soldado tic? xchi ebꞌ.

7 Ix tacꞌvi vin̈aj Gedeón chiꞌ:

—Ayic ol acꞌjococh vin̈aj Zeba yedꞌ vin̈aj Zalmuna chiꞌ dꞌa yol co cꞌabꞌ yuj Jehová, ayic ol on̈ jax dꞌa tic, ol co maqꞌuel tzililjoc e chibꞌejal dꞌa e patic dꞌa teꞌ qꞌuiix ol quicꞌcot dꞌa taquin̈ luum, xchi vin̈.

8 Ix el ebꞌ vin̈ dꞌa jun chon̈abꞌ chiꞌ, ix cꞌoch ebꞌ vin̈ dꞌa Peniel, ix scꞌananpax svael ebꞌ vin̈ soldado vin̈aj Gedeón chiꞌ taꞌ, palta icha ix aj yalan ebꞌ aj Sucot, icha pax chiꞌ ix aj yalan ebꞌ aj Peniel chiꞌ dꞌa vin̈. 9 Ix yalanxi vin̈ icha tic:

—Ayic ol on̈ meltzaj dꞌa juncꞌolal, ol co maqꞌuem vecnaj jun cuartel bꞌaj tze col e bꞌa tic, xchi vin̈.

10 Axo dꞌa Carcor ayecꞌ vin̈aj Zeba yedꞌ vin̈aj Zalmuna chiꞌ, 15 milto ebꞌ soldado madianita ayecꞌ yedꞌ ebꞌ vin̈. Axon̈ej ebꞌ chiꞌ, yujto 120 mil ebꞌ toxo ix chami. 11 Ix cꞌoch vin̈aj Gedeón yedꞌ ebꞌ soldado dꞌa spatic ebꞌ ajcꞌol chiꞌ dꞌa stitac tzꞌinan lum dꞌa yichan̈bꞌat Noba yedꞌ dꞌa Jogbeha. Satcꞌolal yaj ebꞌ soldado madianita chiꞌ ix cꞌoch ebꞌ.

12 Axo pax vin̈aj Zeba yedꞌ vin̈aj Zalmuna chiꞌ, ix bꞌat ebꞌ vin̈ elelal, palta ix och vin̈aj Gedeón chiꞌ dꞌa spatic ebꞌ vin̈, masanto ix yamchaj ebꞌ vin̈ yuj vin̈, axo ebꞌ soldado ebꞌ vin̈, ix saclemcanbꞌat ebꞌ yuj xivelal.

13 Axo yic ix paxta vin̈aj Gedeón yedꞌ ebꞌ soldado chiꞌ dꞌa oval, ix ecꞌ ebꞌ dꞌa xachanil lum svitzal Heres. 14 Ataꞌ ix yamchaj jun vin̈ quelem aj Sucot yuj ebꞌ, ix scꞌanbꞌan ebꞌ dꞌa vin̈ tastac sbꞌi ebꞌ yajal yaj dꞌa Sucot chiꞌ. Axo vin̈ quelem chiꞌ ix tzꞌibꞌan sbꞌi junjun ebꞌ, 77 ebꞌ dꞌa smasanil. 15 Ix lajvi chiꞌ ix bꞌat vin̈aj Gedeón dꞌa Sucot chiꞌ, ix yalan vin̈ dꞌa ebꞌ anima taꞌ icha tic:

—¿Tzam e nacot tas aj in e bꞌuchani? Eyalani: ¿Tom toxo ix yamchaj vin̈aj Zeba yedꞌ vin̈aj Zalmuna chiꞌ eyuuj, yuj chiꞌ scacꞌ va ebꞌ vin̈ a soldado cꞌunbꞌinac ay svejel tic? xe chi. A ticnaic jun, ina ebꞌ vin̈ tic, xchi vin̈.

16 Ix lajvi chiꞌ, ix yicꞌancot teꞌ qꞌuiix vin̈, teꞌ ix yicꞌcot ebꞌ dꞌa taquin̈ luum, ix smacꞌan ebꞌ yajalil chon̈abꞌ Sucot chiꞌ vin̈ dꞌa teꞌ. 17 Ix lajvi chiꞌ, ix bꞌatpax ebꞌ vin̈ dꞌa Peniel, ix smacꞌanem vecnaj jun cuartel ebꞌ vin̈, aton bꞌaj scol sbꞌa ebꞌ soldado, ix smilancham masanil ebꞌ vin̈ vinac ebꞌ. 18 Ix lajvi chiꞌ, ix scꞌanbꞌan vin̈aj Gedeón dꞌa vin̈aj Zeba yedꞌ dꞌa vin̈aj Zalmuna chiꞌ icha tic:

—¿Chajtil yilji ebꞌ vin̈ ix e milcham dꞌa Tabor? xchi vin̈ dꞌa ebꞌ vin̈.

Ix tacꞌvi ebꞌ vin̈:

—Icha val ilji tic, icha chiꞌ yilji ebꞌ vin̈. Icha yilji ebꞌ vin̈ yajal, icha chiꞌ yilji ebꞌ vin̈, xchi ebꞌ vin̈.

19 Ayic ix yabꞌan vin̈aj Gedeón chiꞌ icha chiꞌ, ix yalan vin̈:

—A ebꞌ vin̈ chiꞌ, vucꞌtac ebꞌ vin̈, junn̈ej in nun yedꞌ ebꞌ vin̈. Yuj chiꞌ sval dꞌa yichan̈ Jehová, tato maj e milcham e vin̈ vucꞌtac chiꞌ, max am ex in milpaxcham ticnaic, xchi vin̈.

20 Ix lajvi chiꞌ, ix yalan vin̈ dꞌa vin̈aj Jeter bꞌabꞌel yunin icha tic:

—Lemach, milcham ebꞌ vin̈ tic, xchi vin̈.

Yuneꞌ quelemto vin̈aj Jeter chiꞌ, yuj chiꞌ ix xiv vin̈ yicꞌanqꞌueta qꞌuen yespada yic smilancham ebꞌ vin̈. 21 Ix yalan vin̈aj Zeba yedꞌ vin̈aj Zalmuna dꞌa vin̈aj Gedeón chiꞌ icha tic:

—Cotan̈ ach tic, a ach lacꞌan tzon̈ a milchamoc, yujto ojtacabꞌilxo to max ach xivi, acꞌum oval ach paxi, xchi ebꞌ vin̈.

Ix qꞌue jucnaj vin̈aj Gedeón chiꞌ, ix smilancham chavan̈ ebꞌ vin̈ rey chiꞌ vin̈. Axo juntzan̈ qꞌuen qꞌueen ayoch yelvanubꞌoc sjaj nocꞌ scamello ebꞌ vin̈, ix yiqꞌuel qꞌueen vin̈. 22 Ix lajvi chiꞌ, ix yalan ebꞌ yetisraelal vin̈ chiꞌ dꞌay:

—A ach ix on̈ a colel dꞌa yol scꞌabꞌ ebꞌ madianita, yuj chiꞌ a ach yedꞌ ebꞌ in̈tilal ol ex ochcan cajaliloc, xchi ebꞌ.

23 Ix tacꞌvi vin̈ dꞌa ebꞌ icha tic:

—Man̈ ol in ochlaj eyajaliloc, man̈ ol ochpaxlaj ebꞌ vuninal, palta a Jehová Cajal yaji. 24 An̈ej jun tzin cꞌan dꞌayex to tzeyacꞌ qꞌuen uchiquin dꞌayin, aton qꞌuen ix eyiqꞌuecꞌ dꞌa ebꞌ madianita, xchi vin̈.

Yedꞌnac juntzan̈ qꞌuen uchiquin nabꞌa oro ebꞌ ajcꞌol chiꞌ, yujto icha chiꞌ sbꞌeybꞌal ebꞌ cajan dꞌa tzꞌinan luum. 25 Yuj chiꞌ ix slichꞌanem jun cꞌapac cꞌapac ebꞌ, ix yacꞌanem qꞌuen uchiquin chiꞌ ebꞌ dꞌa yibꞌan̈ cꞌapac. Ix yalan ebꞌ dꞌa vin̈ icha tic:

—Ina qꞌueen tic, dꞌa val smasanil co cꞌool scacꞌ qꞌuen dꞌayach, xchi ebꞌ.

26 A jantac qꞌuen oro ayoch dꞌa qꞌuen uchiquin chiꞌ, ay am 40 libraoc yalil qꞌueen. Chꞌoc pax yaj juntzan̈xo qꞌuen qꞌueen vachꞌ yilji yedꞌ yelvanubꞌ yedꞌ cꞌapac spichul ebꞌ vin̈ sreyal madianita yedꞌ pax qꞌuen qꞌueen ayoch yelvanubꞌoc sjaj nocꞌ scamello ebꞌ vin̈. 27 A yedꞌ juntzan̈ qꞌueen chiꞌ ix sbꞌo jun yechel vin̈aj Gedeón chiꞌ, ix yacꞌancan vin̈ dꞌa schon̈abꞌ scuch Ofra. Ix spatiquejel Jehová ebꞌ israel, axo dꞌa jun yechel chiꞌ scꞌanbꞌej sbꞌa ebꞌ. Yuj chiꞌ ix cotcan dꞌa yibꞌan̈ vin̈aj Gedeón chiꞌ yedꞌ yin̈tilal.

28 Ix can ebꞌ madianita dꞌa yalan̈ smandar ebꞌ israel chiꞌ, majxo yal-laj scolan sbꞌa ebꞌ. 40 abꞌil man̈xalaj oval, juncꞌolal ix aj ebꞌ israel chiꞌ ayic ayecꞌ vin̈aj Gedeón chiꞌ yedꞌ ebꞌ.

29 Ayic ix lajvi oval chiꞌ, ix pax vin̈aj Jerobaal, aton vin̈aj Gedeón yuninal vin̈aj Joás chiꞌ dꞌa spat. 30 Tzijtum ebꞌ vin̈ yuninal vin̈, 70 ebꞌ vin̈ dꞌa smasanil, yujto tzijtum ebꞌ ix ix, ix yicꞌ vin̈. 31 Ay pax junxo ix aj Siquem ix yicꞌ vin̈, ay jun yuneꞌ ix ix alji yedꞌ vin̈. Abimelec ix yacꞌ vin̈ sbꞌiej jun yunin chiꞌ.

32 Ayic ix cham vin̈aj Gedeón yuninal vin̈aj Joás chiꞌ, te icham vinacxo vin̈. Ix mucji vin̈ bꞌaj mucancan vin̈ smam vin̈ dꞌa Ofra, bꞌaj ay ebꞌ yin̈tilal Abiezer.

33 Ayic ayxo scham vin̈aj Gedeón chiꞌ, a ebꞌ israel chiꞌ, ix spatiquejxiel Jehová ebꞌ, ix ochxi ebꞌ ejmelal dꞌa comon dios scuchan Baal-berit.^* 34 Ix bꞌatcan Jehová sDiosal ebꞌ satcꞌolal yuuj, vachꞌchom a ix colan ebꞌ dꞌa ebꞌ dꞌa juntzan̈ nación ajcꞌol oyanoch dꞌa spatic yichan̈ ebꞌ. 35 Malaj jabꞌoc tas vachꞌ ix yacꞌ ebꞌ spacoc dꞌa ebꞌ yin̈tilal vin̈aj Gedeón chiꞌ yuj tas ix scꞌulej vin̈ yuj svachꞌiloc ebꞌ.