2 —A ticnaic sval dꞌayex to vachꞌ tze montej ebꞌ eyetchon̈abꞌ dꞌa Siquem tic, tze cꞌanbꞌan dꞌa ebꞌ icha tic: ¿Vachꞌam tzeyabꞌi to a 70 ebꞌ yuninal vin̈aj Jerobaal syacꞌ yajalil dꞌa quibꞌan̈, mato vachꞌ to junn̈ej vin̈ tzꞌoch cajaliloc? xe chi dꞌa ebꞌ. Naeccoti to a inn̈ej ay vuj in bꞌa eyedꞌoc, xchi vin̈.

3 A ebꞌ ayto yuj sbꞌa chiꞌ yedꞌ vin̈, ix syamoch ebꞌ yalan dꞌa ebꞌ yetchon̈abꞌ dꞌa Siquem chiꞌ to a vin̈aj Abimelec chiꞌ tzꞌoch yajalil dꞌa scal ebꞌ. Ix scha scꞌol ebꞌ chon̈abꞌ chiꞌ icha chiꞌ, yujto ayto yuj sbꞌa ebꞌ yedꞌ vin̈. 4 Yuj chiꞌ ix yiqꞌuelta 70 siclo qꞌuen plata ebꞌ dꞌa yol stemplo comon dios scuchan Baal-berit, ix yacꞌan qꞌuen ebꞌ dꞌa vin̈aj Abimelec chiꞌ. A yedꞌ qꞌuen ix stup juntzan̈ ebꞌ vin̈ jaragana vinac vin̈ yic tzꞌoch ebꞌ vin̈ yedꞌ vin̈. Te chuc juntzan̈ ebꞌ vin̈ vinac chiꞌ. 5 Yuj chiꞌ ix bꞌat ebꞌ vin̈ yedꞌ vin̈ dꞌa Ofra, bꞌaj ecꞌnac vin̈ smam vin̈. Ataꞌ ix smilcham 70 ebꞌ yucꞌtac vin̈ dꞌa yibꞌan̈ jun qꞌuen qꞌueen. Axon̈ej vin̈aj Jotam ix colchajcani, yujto ix scꞌubꞌejcanel sbꞌa vin̈, aton vin̈ slajvubꞌ yuninal vin̈aj Jerobaal chiꞌ. 6 Ix lajvi chiꞌ, ix smolbꞌan sbꞌa ebꞌ aj Siquem yedꞌ ebꞌ aj Bet-milo dꞌa yich jun teꞌ machꞌ dꞌa Siquem chiꞌ, bꞌaj ay jun qꞌuen qꞌueen nivan yelcꞌoch dꞌa ebꞌ. Ataꞌ ix yacꞌoch vin̈aj Abimelec ebꞌ yajalil.

7 Ayic ix alchaj jun chiꞌ dꞌa vin̈aj Jotam chiꞌ, ix qꞌue vin̈ dꞌa jun tzalan dꞌa spacꞌul lum vitzal Gerizim, te chaan̈ ix avajemta vin̈ yic vachꞌ masanil mach tzꞌabꞌani, ix yalan vin̈ icha tic:

—Ex aj Siquem, maclejec eyabꞌ jun abꞌix ol val tic yic vachꞌ ol yabꞌ Dios tas ol eyalaꞌ.

8 A junel, masanil abꞌ te teꞌ ix snibꞌej yacꞌoch junoc yajalil. Yuj chiꞌ ix abꞌ yal teꞌ dꞌa teꞌ olivo to tzꞌoch teꞌ yajaliloc teꞌ smasanil. 9 Ix abꞌ tacꞌvi teꞌ olivo chiꞌ, ix yalan teꞌ: Maay, tato tzin och eyajaliloc e masanil, maxtzac am vacꞌlaj aceite scꞌanchaj yuj yicꞌjichaan̈ Dios, ma yic scꞌanpax ebꞌ anima, xchabꞌ teꞌ.

10 Ix lajvi chiꞌ, abꞌ yalanpax teꞌ smasanil dꞌa teꞌ higo yic tzꞌoch teꞌ yajalil. 11 Ix abꞌ yalanpax teꞌ higo chiꞌ: Maay, tato tzin och eyajaliloc e masanil, maxtzac am vacꞌ in sat te chiꞌ sloji, xchabꞌ teꞌ.

12 Ix abꞌ yalanpax teꞌ dꞌa teꞌ uva to tzꞌoch teꞌ yajalil. 13 Ix abꞌ yalanpax teꞌ uva chiꞌ: Maay, tato tzin och eyajaliloc e masanil, tzam vactej vacꞌan vino tzꞌacꞌan tzalajbꞌoc scꞌol Dios yedꞌ ebꞌ anima, xchabꞌ teꞌ.

14 Slajvubꞌalxo ix abꞌ yalan teꞌ dꞌa teꞌ qꞌuiix to tzꞌoch teꞌ yajalil. 15 Ix abꞌ yalan teꞌ qꞌuiix chiꞌ to syal yoch teꞌ yajaliloc te teꞌ chiꞌ smasanil. Ix abꞌ yalan teꞌ: Tato yel dꞌa smasanil e cꞌol tzin eyacꞌoch eyajaliloc, ochan̈ec dꞌa yalan̈ ven̈ul tic e masanil. Tato max yal e cꞌol tzin och eyajaliloc jun, elocabꞌcot jun nivan cꞌacꞌ dꞌayin yic stzꞌacanbꞌat teꞌ cꞌuteꞌ dꞌa Líbano, xchabꞌ teꞌ qꞌuiix chiꞌ.

16 A ticnaic jun, tzin cꞌanbꞌej dꞌayex: ¿Tom yel val vachꞌ ix e cꞌulej, yuj chiꞌ ix eyacꞌoch vin̈aj Abimelec chiꞌ eyajaliloc? ¿Tom smoj val icha chiꞌ tzeyutej yin̈tilal vin̈aj Jerobaal chiꞌ ticnaic? 17 Ix sbꞌec sbꞌa vin̈ in mam chiꞌ scham eyuuj ayic ex scolanelta vin̈ dꞌa yol scꞌabꞌ ebꞌ madianita. 18 A exxo tic, tas xom val eyaji, yuj chiꞌ tzex meltzajoch ajcꞌolal dꞌa yin̈tilal vin̈ in mam chiꞌ. Ix e milcham 70 yuninal vin̈ dꞌa jun qꞌuen qꞌueen, axo vin̈aj Abimelec yuneꞌ jun ix schecabꞌ vin̈ in mam chiꞌ ix eyacꞌoch eyajaliloc, an̈ej am yujto ayto eyuj e bꞌa yedꞌ vin̈ yuj snun. 19 Svalan dꞌayex ticnaic: Tato vachꞌ tze cꞌulej dꞌa xilbꞌa in mam yedꞌ dꞌa ebꞌ yin̈tilal, tzalajcꞌolalocabꞌ eyaj yedꞌ vin̈aj Abimelec chiꞌ, vachꞌn̈ejocabꞌ ol aj yelcꞌoch vin̈ dꞌa e cal. 20 Tato man̈ vachꞌoc jun, elocabꞌcot junoc nivan cꞌacꞌ dꞌa vin̈aj Abimelec chiꞌ, yic tzex tzꞌabꞌat ex aj Siquem yedꞌ ex aj Bet-milo. Axo dꞌayex tzꞌelpaxcot junoc cꞌacꞌ, yic stzꞌapaxbꞌat vin̈aj Abimelec chiꞌ, xchi vin̈aj Jotam chiꞌ.

21 Ix lajvi yalan juntzan̈ chiꞌ vin̈aj Jotam chiꞌ, el lemnaj vin̈, ix bꞌat cajnajcan vin̈ dꞌa Beer, yujto xiv vin̈ dꞌa vin̈aj Abimelec vin̈ yucꞌtac chiꞌ.

22 Oxeꞌ abꞌil ix yacꞌ yajalil vin̈aj Abimelec dꞌa yibꞌan̈ chon̈abꞌ Israel chiꞌ. 23 Axo Dios ix acꞌanoch jun ajcꞌolal dꞌa scal vin̈ yedꞌ ebꞌ aj Siquem chiꞌ, ix meltzajoch ebꞌ ajcꞌolal dꞌa vin̈. 24 Icha chiꞌ ix aj yacꞌji spac dꞌa vin̈ yuj schamel 70 ebꞌ vin̈ yucꞌtac smilnacchamoc. Ix acꞌjipax spac dꞌa ebꞌ aj Siquem chiꞌ, yujto ix yacꞌoch sbꞌa ebꞌ yedꞌ vin̈aj Abimelec chiꞌ dꞌa schucal chiꞌ. 25 A ebꞌ aj Siquem chiꞌ, ay ebꞌ sbꞌat scꞌubꞌejel sbꞌa dꞌa titac bꞌe dꞌa spacꞌultac lum vitz, tzꞌelta ebꞌ dꞌa ebꞌ anima tzꞌecꞌ dꞌa yol bꞌe tzꞌecꞌ dꞌa slacꞌanil chon̈abꞌ chiꞌ yic tzꞌelcꞌan ebꞌ. Ix alji yabꞌ vin̈aj Abimelec to icha chiꞌ scꞌulej ebꞌ.

26 A dꞌa jun tiempoal chiꞌ, ix cꞌoch jun vin̈ scuchan Gaal yuninal vin̈aj Ebed yedꞌ ebꞌ scꞌabꞌ yoc dꞌa Siquem chiꞌ, vachꞌ ix can vin̈ dꞌa yol sat ebꞌ anima taꞌ. 27 Ayic qꞌuin̈xo teꞌ uva, tzꞌel ebꞌ dꞌa spatiquel chon̈abꞌ, yic smolan teꞌ ebꞌ, sbꞌoan vino ebꞌ. Ix yacꞌanoch jun qꞌuin̈ ebꞌ, ix och ijan ebꞌ svaꞌi yedꞌ yucꞌvi an̈ ebꞌ dꞌa yol stemplo sdiosal. A val taꞌ te chuc ix yal ebꞌ dꞌa spatic vin̈aj Abimelec chiꞌ. 28 Ix och ijan vin̈aj Gaal chiꞌ yalani: ¿Mach jun vin̈aj Abimelec chiꞌ yalani, yuj chiꞌ tzon̈ yacꞌ mandar vin̈? A vin̈ chiꞌ, yuninal vin̈ vin̈aj Jerobaal, axo pax vin̈aj Zebul schecabꞌ vin̈. A ebꞌ vin̈ chiꞌ malaj yelcꞌoch ebꞌ vin̈. A on̈ pax aj Siquem on̈ tic, ¿tas yuj ton̈ej scacꞌ co bꞌa dꞌa vin̈? ¿Tom ol on̈ ochn̈ej schecabꞌoc ebꞌ vin̈? Co naeccot ticnaic to a vin̈ co mam quicham, aton vin̈aj Hamor, vin̈ bꞌoannacqꞌue chon̈abꞌ Siquem tic, yuj chiꞌ quiqꞌuequel co bꞌa dꞌa yol scꞌabꞌ vin̈aj Abimelec chiꞌ. 29 A... tato a in eyajalil in, toxom ix in satel vin̈aj Abimelec chiꞌ, tzam val dꞌa vin̈: Molbꞌej ebꞌ a soldado scacꞌan oval, xin chama, xchi vin̈.

30 Ayic ix yabꞌan vin̈aj Zebul, yajal dꞌa Siquem chiꞌ tas ix yal vin̈aj Gaal chiꞌ, ix te cot yoval vin̈. 31 Elan̈chamel ix yalbꞌat vin̈ dꞌa vin̈aj Abimelec dꞌa elcꞌaltac icha tic: Ix javi vin̈aj Gaal yuninal vin̈aj Ebed yedꞌ ebꞌ yucꞌtac dꞌa tic, van yacꞌan scꞌol ebꞌ anima ebꞌ vin̈ dꞌa a patic. 32 Yuj chiꞌ cotan̈ yedꞌ ebꞌ a soldado dꞌacꞌvalil, tze cꞌubꞌanel e bꞌa dꞌa titac chon̈abꞌ tic. 33 Axo yic toxo sacbꞌi, tzex och eyacꞌ oval dꞌa chon̈abꞌ tic, axo yic tzꞌelta vin̈aj Gaal chiꞌ yacꞌ oval edꞌoc yedꞌ ebꞌ soldado, ol xo ilaꞌ tas ol utej vin̈, xchibꞌat vin̈aj Zebul chiꞌ.

34 Yuj chiꞌ ix bꞌat vin̈aj Abimelec dꞌacꞌvalil yedꞌ ebꞌ soldado. Chan̈ macan̈ ix aj scꞌubꞌanel sbꞌa ebꞌ dꞌa spatictac chon̈abꞌ Siquem chiꞌ. 35 Ayic van yelta vin̈aj Gaal dꞌa spuertail chon̈abꞌ chiꞌ, ix eltapax vin̈aj Abimelec yedꞌ ebꞌ soldado bꞌaj cꞌubꞌanel chiꞌ. 36 Ayic ix yilan vin̈aj Gaal chiꞌ, ix yalan vin̈ dꞌa vin̈aj Zebul icha tic:

—Iltonabꞌi, masanil dꞌa sattac vitz tzꞌemul ebꞌ soldado, xchi vin̈.

—Maay, a yen̈ul lum vitz tzal animail chiꞌ a ach tic, xchi vin̈aj Zebul chiꞌ.

37 Ix yalanxi vin̈aj Gaal chiꞌ:

—An̈ejtonaꞌ ay ebꞌ van yemta dꞌa tzalan scuchan Smuxuc Lum Luum. Van yempaxul ebꞌ soldado dꞌa sbꞌeal bꞌaj nabꞌa ji yic ebꞌ naumel lolonel, xchi vin̈.

38 Ix yalanxi vin̈aj Zebul chiꞌ dꞌa vin̈ icha tic:

—Bꞌajtil ay a lolonel ix laj al chiꞌ ticnaic. Ix alaꞌ to malaj yelcꞌoch vin̈aj Abimelec yic tzon̈ och schecabꞌoc vin̈. A ticnaic chiꞌ sjavi ebꞌ soldado ix a bꞌuch chiꞌ, ixic chinaic, yic tzacꞌ oval yedꞌ ebꞌ, xchi vin̈.

39 Ix lajvi chiꞌ, ix och vin̈aj Gaal scuchbꞌan ebꞌ anima dꞌa Siquem, ix bꞌat yacꞌan oval ebꞌ yedꞌ vin̈aj Abimelec yedꞌ ebꞌ soldado. 40 Axo vin̈aj Abimelec chiꞌ ix och dꞌa spatic vin̈aj Gaal yedꞌ ebꞌ ayoch yedꞌoc. Maj techajlaj scolan sbꞌa vin̈aj Gaal chiꞌ, ix och lemnaj vin̈ scol sbꞌa dꞌa yol chon̈abꞌ chiꞌ. Tzijtum mach ix cham dꞌa stiel chon̈abꞌ chiꞌ. 41 Ix lajvi chiꞌ, ix meltzaj vin̈aj Abimelec chiꞌ dꞌa chon̈abꞌ Aruma. Axo vin̈aj Zebul chiꞌ ix pechanel vin̈aj Gaal yedꞌ ebꞌ scꞌabꞌ yoc dꞌa Siquem chiꞌ dꞌa juneln̈ej.

42 Axo dꞌa junxo cꞌu, ix bꞌat ebꞌ aj Siquem chiꞌ munlajel, ix yabꞌan vin̈aj Abimelec chiꞌ, 43 yuj chiꞌ ox macan̈ ix yutej ebꞌ soldado vin̈, ix scꞌubꞌanel sbꞌa ebꞌ dꞌa caltac teꞌ. Ayic ix yilan ebꞌ soldado chiꞌ yelul ebꞌ anima dꞌa spuertail chon̈abꞌ, ix elta ebꞌ bꞌaj cꞌubꞌan chiꞌ, ix yacꞌan oval ebꞌ yedꞌ ebꞌ. 44 Dꞌa jun rato chiꞌ, ix bꞌat vin̈aj Abimelec yedꞌ jun macan̈ ebꞌ soldado smaccan spuertail chon̈abꞌ chiꞌ. Palta axo cha macan̈xo ebꞌ jun, ix yacꞌ oval ebꞌ yedꞌ ebꞌ anima ix elta munlajel dꞌa spatictac chon̈abꞌ Siquem chiꞌ. 45 Pilan cꞌu ix yacꞌ oval vin̈aj Abimelec chiꞌ, masanto ix yacꞌ ganar vin̈ satanel jun chon̈abꞌ chiꞌ. Ix smilcham masanil anima vin̈, ix smaqꞌuem vecnaj jun chon̈abꞌ chiꞌ vin̈, ix secancanem atzꞌam atzꞌam vin̈ dꞌa yibꞌan̈.

46 Ayic ix yabꞌan ebꞌ anima dꞌa cuartel bꞌaj scol sbꞌa ebꞌ dꞌa Siquem tas ix ajcan Siquem chiꞌ yuj vin̈aj Abimelec chiꞌ, ix bꞌat ebꞌ scꞌubꞌejel sbꞌa dꞌa yol stemplo comon dios scuch El-berit. 47 Ayic ix yabꞌan vin̈aj Abimelec to ataꞌ cꞌubꞌanel ebꞌ anima chiꞌ, 48 ix bꞌat vin̈ yedꞌ masanil ebꞌ soldado dꞌa jun vitz scuchan Salmón. Ix yicꞌanbꞌat jun qꞌuen chꞌacabꞌ vin̈, ix schꞌacanel jun scꞌabꞌ jun te teꞌ vin̈, ix yacꞌanqꞌue teꞌ vin̈ dꞌa sjolom sjen̈jabꞌ. Ix yalan vin̈ dꞌa masanil ebꞌ anima to icha pax chiꞌ syutej ebꞌ dꞌa elan̈chamel. 49 Yuj chiꞌ masanil anima ix chꞌacanel junjun scꞌabꞌ te teꞌ. Ix och tzacꞌan ebꞌ yuj vin̈ masanto ix cꞌoch ebꞌ dꞌa templo chiꞌ. Ix smolbꞌancanoch scꞌabꞌtac te teꞌ chiꞌ ebꞌ dꞌa spatic bꞌaj cꞌubꞌanel ebꞌ anima chiꞌ. Ix yacꞌanoch scꞌacꞌal teꞌ ebꞌ, yuj chiꞌ ix cham masanil ebꞌ anima ayecꞌ chiꞌ taꞌ. Ay am miloc ebꞌ vin̈ vinac yedꞌ ebꞌ ix ix, ix chami.

50 Ix lajvi chiꞌ, ix bꞌat vin̈aj Abimelec chiꞌ yedꞌ ebꞌ vin̈ soldado yacꞌ oval dꞌa chon̈abꞌ Tebes. Elan̈chamel ix yoy sbꞌa ebꞌ dꞌa spatic chon̈abꞌ chiꞌ, ix yacꞌan ganar ebꞌ. 51 A dꞌa snan̈al yol jun chon̈abꞌ chiꞌ, ataꞌ ay jun cuartel bꞌaj scol sbꞌa ebꞌ anima ayic ay oval. Ataꞌ ix bꞌat ebꞌ anima scꞌubꞌejel sbꞌa. Te vachꞌ ix yutej ebꞌ smacan spuertail, ix qꞌue ebꞌ dꞌa yibꞌan̈. 52 Ix cꞌoch lemnaj vin̈aj Abimelec chiꞌ dꞌa spuertail chiꞌ yic syacꞌanoch scꞌacꞌal vin̈ yalani. 53 Axo jun ix ix ayqꞌue dꞌa yibꞌan̈ cuartel chiꞌ ix actanemta jun qꞌuen qꞌueen yic molino. Cꞌocbꞌil val dꞌa sjolom vin̈aj Abimelec chiꞌ ix em qꞌueen, ix apchaj vin̈ yuj qꞌueen. 54 Elan̈chamel ix yal vin̈ dꞌa jun vin̈ scuchumal syamcꞌabꞌ yic oval: Icꞌcot qꞌuen espada, milinchamoc, malaj in gana ol alchajoc to a junoc ix ix, ix in milani, xchi vin̈. Yuj chiꞌ ix yicꞌcot qꞌuen yespada vin̈ chiꞌ, ix stecanoch qꞌuen vin̈ dꞌa vin̈aj Abimelec chiꞌ, ix cham vin̈. 55 Ayic ix yilan ebꞌ soldado to toxo ix cham vin̈, ix meltzaj ebꞌ dꞌa spat junjun.

56 Icha chiꞌ ix yutej Dios yacꞌan spac dꞌa vin̈aj Abimelec chiꞌ yuj chucal scꞌulejnac dꞌa vin̈ smam, ayic smilannaccham 70 ebꞌ vin̈ yucꞌtac vin̈. 57 An̈ejaꞌ icha chiꞌ ix ajpax yacꞌji spac dꞌa ebꞌ anima dꞌa Siquem chiꞌ yuj schucal, ix elcꞌoch scatabꞌ vin̈aj Jotam yuninal vin̈aj Jerobaal dꞌa yibꞌan̈ ebꞌ.