Ix yacꞌ yajalil vin̈aj Tola yedꞌ vin̈aj Jair
10
Ayic toxo ix cham vin̈aj Abimelec, ay jun vin̈ dꞌa yin̈tilal Isacar scuchan Tola yuninal vin̈aj Fúa, yixchiquin vin̈aj Dodo. A vin̈aj Tola chiꞌ ix colvaj vin̈ dꞌa ebꞌ yetisraelal. A dꞌa chon̈abꞌ Samir dꞌa tzalquixtac dꞌa yol yic Efraín cajan vin̈. 2 A vin̈aj Tola chiꞌ, 23 abꞌil ix yacꞌ yajalil vin̈ dꞌa scal ebꞌ yetisraelal, masanto ayic ix cham vin̈. A dꞌa Samir chiꞌ ix mucji vin̈.3 Ix lajvi chiꞌ, axo vin̈aj Jair aj Galaad, ix acꞌan yajalil, 22 abꞌil ix yacꞌ yajalil chiꞌ vin̈ dꞌa scal ebꞌ yetisraelal. 4 A vin̈aj Jair chiꞌ, 30 ebꞌ vin̈ yuninal vin̈, yibꞌan̈n̈ej nocꞌ bꞌuru tzꞌecꞌ junjun ebꞌ vin̈ yuninal vin̈ chiꞌ. Ay junjun schon̈abꞌ ebꞌ vin̈ dꞌa yol smacbꞌen Galaad chiꞌ. A yuj 30 schon̈abꞌ ebꞌ vin̈ chiꞌ, ix bꞌinajcan icha tic: A juntzan̈ schon̈abꞌ vin̈aj Jair, xchi.
5 Ayic ix cham vin̈aj Jair chiꞌ, a dꞌa chon̈abꞌ Camón ix mucji vin̈.
Tzꞌixtax ebꞌ israel yuj ebꞌ amonita
6 Ix cha ochxi ijan ebꞌ israel scꞌulan chucal dꞌa yichan̈ Jehová. Ix laj yaqꞌuem sbꞌa ebꞌ dꞌa juntzan̈ yechel Baal yedꞌ Astarot. Ix yacꞌpaxem sbꞌa ebꞌ dꞌa sdiosal ebꞌ aj Siria, ebꞌ aj Sidón, ebꞌ aj Moab, ebꞌ aj Amón yedꞌ dꞌa sdiosal ebꞌ filisteo. Icha val chiꞌ ix aj yactancan Jehová Dios ebꞌ, majxo ochlaj ebꞌ ejmelal dꞌay. 7 Yuj chiꞌ ix cot yoval scꞌol Jehová chiꞌ dꞌa ebꞌ, ix acꞌjioch ebꞌ dꞌa yol scꞌabꞌ ebꞌ filisteo yedꞌ dꞌa yol scꞌabꞌ ebꞌ amonita. A dꞌa jun abꞌil chiꞌ, ix acꞌji ganar ebꞌ yuj ebꞌ ajcꞌol chiꞌ. 8 Ay 18 abꞌil ix can ebꞌ dꞌa yol scꞌabꞌ ebꞌ ajcꞌol chiꞌ. Ix ste aqꞌuej val chucal ebꞌ ajcꞌol chiꞌ dꞌa ebꞌ israel cajan dꞌa Galaad dꞌa scꞌaxepalecꞌ aꞌ Jordán dꞌa sluumcan ebꞌ amorreo. 9 Ix cꞌaxpajpaxecꞌ ebꞌ amonita chiꞌ dꞌa aꞌ Jordán yacꞌ oval yedꞌ ebꞌ yin̈tilal Judá yedꞌ ebꞌ yin̈tilal Benjamín yedꞌ pax ebꞌ yin̈tilal Efraín. Ix yilan ebꞌ israel to yelcꞌolal val tzꞌixtaj ebꞌ. 10 Ichato chiꞌ ix scꞌanan scolval Jehová ebꞌ yedꞌoc, ix yalan ebꞌ icha tic: Ach co Diosal, ix och val co mul dꞌayach, ix ach cactejcani, axon̈ej dꞌa Baal ix caqꞌuem co bꞌa, xchi ebꞌ.
11 Ix yalan Jehová dꞌa ebꞌ icha tic: Yixtejnac ex ebꞌ aj Egipto, ebꞌ amorreo, ebꞌ amonita, ebꞌ filisteo, 12 ebꞌ sidonio, ebꞌ amalecita yedꞌ pax ebꞌ madianita, axo yic ex avaj dꞌayin, ex in colani. 13 Vachꞌchom ix ex in coloꞌ, palta ix in eyactejcani, axo dꞌa juntzan̈ comon dios ix eyaqꞌuem e bꞌa, yuj chiꞌ a ticnaic, man̈xo ol in colvajlaj dꞌayex. 14 Ixiquec cꞌanec scolval juntzan̈ dios ix e nibꞌej chiꞌ. Aocabꞌ scolvaj eyedꞌoc ayic tzex cꞌoch ijan dꞌa schucal icha tic, xchi dꞌa ebꞌ.
15 Yuj chiꞌ ix tacꞌvi ebꞌ dꞌa Jehová chiꞌ icha tic: Dꞌa val yel ix och co mul dꞌayach, palta a ticnaic syal tza bꞌo tas a gana dꞌa co patic, palta an̈ej to tzon̈ a coloꞌ, xchi ebꞌ. 16 Ix smacꞌanpoj jantac sdiosal ebꞌ chꞌoc chon̈abꞌil ebꞌ, axo dꞌa Jehová ix ochxi ebꞌ ejmelal. Yuj chiꞌ maj techaj yuj Jehová chiꞌ, ix te cus yilanoch syaelal ebꞌ chiꞌ.