Rut sbꞌi jun libro tic, yujto a dꞌay syalcot yabꞌixal jun ix ix scuchan Rut dꞌa stiempoal ebꞌ juez. A ix Rut chiꞌ, aj Moab ix, yicꞌlajnac sbꞌa ix yedꞌ jun vin̈ aj Israel. Ayic scham vin̈ yetbꞌeyum ix chiꞌ, vachꞌ yutej spensar ix dꞌa ix yalibꞌ. Yacꞌanoch sbꞌa ix aj chon̈abꞌil bꞌaj cajan ix yalibꞌ chiꞌ. Yacꞌanpaxoch sbꞌa ix dꞌa yol scꞌabꞌ sDiosal ix yalibꞌ chiꞌ, aton sDiosal Israel. Yuj sbꞌeybꞌal ix chiꞌ, a jun vin̈ bꞌeyum och yetbꞌeyumoc ix. A jun vin̈ chiꞌ, ayto yuj sbꞌa vin̈ yedꞌ vin̈ yetbꞌeyum ix chamnac chiꞌ, yujto icha chiꞌ yalan sley ebꞌ israel chiꞌ. Yuj bꞌaj yicꞌnac sbꞌa ix yedꞌ jun vin̈ chiꞌ, cannac ix dꞌa stzolal ebꞌ smam yicham vin̈aj rey David. A pax taꞌ cotnac ebꞌ smam yicham Jesús. Ayic scheclaj jun ix chꞌoc chon̈abꞌil chiꞌ dꞌa stzolal ebꞌ smam yicham Jesús, ichato tzꞌicꞌjichaan̈ juntzan̈xo chꞌoc nacional yedꞌ juntzan̈xo anima chꞌoc yilji. Chꞌoxnabꞌil yaj ix Rut chiꞌ to a mach syacꞌoch scꞌool dꞌa Dios, scꞌanabꞌajan tas syalaꞌ, chabꞌil yuuj. A Dios malaj sqꞌuexan̈il ebꞌ anima dꞌa yol sat.