4 Axo dꞌa junxo cꞌu, ix qꞌue vaan ebꞌ, ix sbꞌoanqꞌue jun altar ebꞌ, ix sn̈usantzꞌa silabꞌ ebꞌ dꞌa yichan̈ Jehová, ix yacꞌanpax silabꞌ ebꞌ yic juncꞌolal. 5 Ix och ijan ebꞌ scꞌanbꞌan yabꞌi: ¿Mach ebꞌ quetchon̈abꞌ maj xidꞌecꞌ quedꞌoc dꞌa molchajel dꞌa yichan̈ Jehová dꞌa Mizpa? xchi ebꞌ. Yujto yacꞌnac stiꞌ ebꞌ, tato ay mach max bꞌat dꞌa jun molchajel chiꞌ, smiljichamoc.

6 Te cuscꞌolal yaj ebꞌ yuj tas ix scꞌulej ebꞌ yedꞌ ebꞌ yetisraelal yin̈tilal Benjamín chiꞌ. Ix och ijan ebꞌ yalani: A val dꞌa jun cꞌu tic ix satel jun in̈tilal dꞌa co cal. 7 ¿Tas vachꞌ sco cꞌulej yic tzꞌochxi yetbꞌeyum ebꞌ vin̈ ixto can chiꞌ? A on̈ tic ix cacꞌ co tiꞌ dꞌa yichan̈ Jehová to malaj junoc on̈ ol cacꞌ ebꞌ ix quisil yetbꞌeyumoc ebꞌ vin̈. 8 ¿Ay am ebꞌ quetisraelal maj xidꞌecꞌ quedꞌoc dꞌa Mizpa molchajel dꞌa yichan̈ Jehová? xchi ebꞌ.

Axo ix snaancot ebꞌ to a ebꞌ cajan dꞌa Jabes dꞌa yol yic Galaad, malaj junoc ebꞌ ix xidꞌecꞌ dꞌa molchajel chiꞌ. 9 Ayic ix avtaj lista, malaj junoc ebꞌ aj Jabes chiꞌ ix tacꞌvi. 10-11 Ayic ix yabꞌan jun chiꞌ ebꞌ chon̈abꞌ smasanil, ix schecanbꞌat 12 mil soldado ebꞌ, yic bꞌat miljicham masanil ebꞌ aj Jabes chiꞌ, masanil ebꞌ vinac, ebꞌ unin yedꞌ masanil ebꞌ ix ix ayxo vinac scꞌumej. 12 A dꞌa scal masanil ebꞌ aj Jabes chiꞌ, ix ilchaj 400 ebꞌ ix cobꞌestac mantalaj vinac tzꞌecꞌ dꞌa spatic, ix icꞌjicot ebꞌ ix dꞌa campamento dꞌa Silo dꞌa yol yic Canaán. 13 Ix lajvi chiꞌ, masanil ebꞌ chon̈abꞌ chiꞌ, ix schecbꞌat yalumal ebꞌ dꞌa ebꞌ vin̈ yin̈tilal Benjamín aycanbꞌat scꞌubꞌejel sbꞌa dꞌa qꞌuen tenam scuchan Rimón, ix bꞌat icꞌchajcot ebꞌ vin̈ dꞌa juncꞌolal. 14 Yuj chiꞌ ix meltzajcot ebꞌ vin̈ aj Benjamín chiꞌ. Axo ebꞌ israel ix acꞌan ebꞌ ix cobꞌestac ix yicꞌcot ebꞌ dꞌa Jabes chiꞌ yetbꞌeyumoc ebꞌ. Palta ayto maj tzꞌacvoc yicꞌan yetbꞌeyum ebꞌ smasanil.

15 A masanil ebꞌ israel chiꞌ ix ocꞌ scꞌol ebꞌ yuj ebꞌ yin̈tilal Benjamín chiꞌ, yujto ix satjiel jun in̈tilal chiꞌ yuj Jehová. 16 Axo ebꞌ yajal yaj dꞌa cal chon̈abꞌ chiꞌ ix scꞌanbꞌej ebꞌ icha tic: ¿Tas val ol aj yilchajpax ebꞌ ix yetbꞌeyum juntzan̈xo ebꞌ vin̈ ix can tic, yujto masanil ebꞌ ix yetbꞌeyum ebꞌ vin̈, ix cham ebꞌ ix smasanil? 17 A yuj juntzan̈ ebꞌ vin̈ ixto can chiꞌ, yuj chiꞌ olto pitzvocchaan̈ jun in̈tilal tic, yic max satel dꞌa co cal a on̈ israel on̈ tic. 18 Palta a on̈ tic, max yal-laj cacꞌan ebꞌ ix quisil yic tzꞌoch yetbꞌeyumoc ebꞌ vin̈, yujto co masanil ix cacꞌ co tiꞌ dꞌa yichan̈ Dios to max cacꞌlaj ebꞌ ix quisil dꞌa ebꞌ vin̈, yuj chiꞌ a mach syacꞌ yisil, scotcan catabꞌ dꞌa yibꞌan̈. 19 Palta junjun abꞌil ay jun nivan qꞌuin̈ tzꞌoch dꞌa yichan̈ Jehová dꞌa Silo, aton jun ay dꞌa snorteal Betel, dꞌa stojolal bꞌaj tzꞌem cꞌu dꞌa bꞌe sbꞌat dꞌa Betel chiꞌ scꞌoch dꞌa Siquem, dꞌa stojolal sur yic Lebona, xchi ebꞌ.

20 A ebꞌ yajal yaj dꞌa scal ebꞌ israel chiꞌ, ix yalbꞌat jun lolonel tic ebꞌ dꞌa ebꞌ yin̈tilal Benjamín chiꞌ: Tzex bꞌat e cꞌubꞌejel e bꞌa dꞌa scaltac teꞌ uva dꞌa slacꞌanil Silo. 21 Vachꞌ tzeyutej e cꞌubꞌanel e bꞌa taꞌ, lista eyaji. Ayic ol eyilan yelta n̈ililoc ebꞌ ix cobꞌestac aj Silo chan̈al taꞌ, tzex elta bꞌaj cꞌubꞌan ex chiꞌ, tzeyicꞌancot junjunoc ebꞌ ix eyetbꞌeyumoc. Slajvi chiꞌ tzex paxcan dꞌa e chon̈abꞌ. 22 Tato ol javoc ebꞌ vin̈ smam, ma ebꞌ vin̈ snulej ebꞌ ix cobꞌestac chiꞌ yal dꞌayon̈, ol calan dꞌa ebꞌ: Sco cꞌan nivancꞌolal dꞌayex dꞌa spatic ebꞌ vin̈, yujto maj ilchaj yetbꞌeyum ebꞌ vin̈ smasanil cuuj, ayic ix och oval dꞌa Jabes. An̈ejtonaꞌ, tic val man̈oc ex ix eyacꞌ ebꞌ ix dꞌa ebꞌ vin̈, yuj chiꞌ max ochlaj e mul bꞌaj ix eyacꞌ e tiꞌ, xco cham dꞌa ebꞌ, xchi ebꞌ yajalil Israel chiꞌ.

23 Ix schaan scꞌol ebꞌ vin̈ yic Benjamín chiꞌ scꞌulan icha ix alchaj chiꞌ. Yuj chiꞌ junjun ebꞌ vin̈ ix yicꞌbꞌat junjun ebꞌ ix cobꞌestac chiꞌ ayic van schan̈alvi ebꞌ ix. Ix yicꞌanbꞌat ebꞌ ix ebꞌ vin̈ dꞌa elan̈chamel dꞌa schon̈abꞌ, ix sbꞌoanxiqꞌue schon̈abꞌ ebꞌ vin̈ chiꞌ yic scajnajxi ebꞌ vin̈ taꞌ.

24 An̈ejaꞌ juntzan̈xo ebꞌ vin̈ yetisraelal ebꞌ vin̈ chiꞌ, ix meltzajpax junjun ebꞌ vin̈ dꞌa sluum yedꞌ dꞌa spat.

25 A dꞌa jun tiempoal chiꞌ mantalaj sreyal ebꞌ israel, junjun ebꞌ scꞌulej icha tas snibꞌej.