—Ix in javi yedꞌ ix vetbꞌeyum chiꞌ dꞌa chon̈abꞌ Gabaa dꞌa yol yic Benjamín yic tzin vaycan taꞌ. 5 Axo dꞌa jun acꞌval chiꞌ, ix smolbꞌej sbꞌa ebꞌ vin̈ vinac ay dꞌa jun chon̈abꞌ chiꞌ dꞌa spatictac teꞌ pat bꞌaj ay in ecꞌ chiꞌ, yic tzin smilancham ebꞌ vin̈ yalani. Ix och ijan ebꞌ vin̈ yixtan ix vetbꞌeyum chiꞌ, masanto ix cham ix yuj ebꞌ vin̈. 6 Yuj chiꞌ ix vicꞌcot snivanil ix chiꞌ, ix in xicanbꞌati. Ix vacꞌanbꞌat dꞌa masanil yol co macbꞌen, yic vachꞌ tzeyil e masanil tas ix aj yoch jun nivan mul te chucxo pax tic. 7 Axo ticnaic yujto vetisraelal ex, a ex ol e naꞌa, ol eyalaꞌ tas ol aj jun tic, xchi vin̈.

8 Junxon̈ej ix yutej spensar ebꞌ smasanil, ix yalan ebꞌ icha tic:

—Malaj junoc on̈ tzon̈ pax dꞌa co pat masanto ol yal sbꞌa tas ol aj jun tic. 9 A ticnaic a tas sco cꞌulej to tzꞌoch suerte dꞌa co cal yic vachꞌ ol quilaꞌ mach on̈ ol on̈ bꞌat cacꞌ oval dꞌa chon̈abꞌ Gabaa chiꞌ. 10 Junjun vinac dꞌa scal lajlajun̈van̈ vinac dꞌa junjun in̈tilal scan dꞌa yibꞌan̈ sayan co vael a on̈ soldado on̈ tic. A on̈xo co masanil, ol on̈ bꞌat caqꞌuecꞌ spac dꞌa ebꞌ aj Gabaa yuj jun chucal ix scꞌulej ebꞌ chiꞌ, xchi ebꞌ.

11 Junxon̈ej ix yutej sbꞌa ebꞌ israel chiꞌ yic ix bꞌat ebꞌ yacꞌ oval dꞌa jun chon̈abꞌ chiꞌ. 12 Ix yacꞌanbꞌat schecabꞌ ebꞌ dꞌa masanil yol yic Benjamín. Ix ecꞌ yalan ebꞌ icha tic: Yelxo val te chuc tas ix scꞌulej jayvan̈ ebꞌ vinac aj Gabaa. 13 Yuj chiꞌ a ticnaic, a juntzan̈ vinac ix cꞌulan chucal dꞌa e cal chiꞌ, iqꞌuequelta ebꞌ, tzeyacꞌanoch ebꞌ dꞌa yol co cꞌabꞌ yic sco milancham ebꞌ, icha chiꞌ ol aj satel jun chucal chiꞌ dꞌa co cal a on̈ israel on̈ tic, xchi ebꞌ.

Maj schalaj yabꞌ ebꞌ yin̈tilal Benjamín chiꞌ. 14 Palta to ix smolbꞌej sbꞌa ebꞌ soldado ebꞌ dꞌa Gabaa chiꞌ yic syacꞌan oval ebꞌ yedꞌ juntzan̈xo ebꞌ yetisraelal chiꞌ. 15 Ay am 26 mil ebꞌ soldado ix cot dꞌa juntzan̈ chon̈abꞌ dꞌa yol yic Benjamín chiꞌ, yedꞌnac syamcꞌabꞌ ebꞌ yic oval. Chꞌoc pax yaj 700 ebꞌ soldado te jelan, aj Gabaa chiꞌ ebꞌ. 16 A dꞌa scal masanil ebꞌ soldado chiꞌ, 700 ebꞌ to a dꞌa sqꞌuexan̈ sjulvaj yedꞌ chꞌan̈ mejmeech. Te tojol sjulvaj ebꞌ, vachꞌchom a junoc tas te xiꞌ sjul ebꞌ, palta syamchaj yuj ebꞌ. 17 Axo pax juntzan̈xo ebꞌ israel chiꞌ, ay am 400 mil ebꞌ soldado te cꞌajan dꞌa oval, malaj ebꞌ aj Benjamín chiꞌ dꞌa scal ebꞌ.

18 Ix bꞌat ebꞌ israel chiꞌ bꞌaj ayecꞌ scajnubꞌ Dios yic scꞌanbꞌan ebꞌ mach in̈tilal ebꞌ sbꞌabꞌlaj och yacꞌ oval yedꞌ ebꞌ yin̈tilal Benjamín chiꞌ. Ix yalan Jehová to a ebꞌ yin̈tilal Judá sbꞌabꞌlaj ochi. 19 Ix qꞌue vaan ebꞌ israel chiꞌ dꞌa qꞌuin̈ibꞌalil, ix bꞌat sbꞌoanqꞌue scampamento ebꞌ dꞌa yichan̈ chon̈abꞌ Gabaa chiꞌ. 20 Ix sbꞌoanoch sbꞌa ebꞌ dꞌa yichan̈ chon̈abꞌ chiꞌ yic syacꞌan oval ebꞌ. 21 Axo ebꞌ yin̈tilal Benjamín chiꞌ, ix elta ebꞌ dꞌa yol chon̈abꞌ chiꞌ. A dꞌa jun cꞌu chiꞌ, 22 mil ebꞌ yetisraelal ebꞌ chiꞌ ix smilchamoc. 22-24 Yuj chiꞌ ix bꞌat ebꞌ israel chiꞌ dꞌa yichan̈ Jehová, cuscꞌolal yaj ebꞌ ix ecꞌ cꞌu, masanto ix qꞌuicꞌbꞌiemi. Ix lajvi chiꞌ ix scꞌanbꞌan ebꞌ dꞌa Jehová: ¿Tzam on̈ bꞌatxi cacꞌ oval yedꞌ ebꞌ quetisraelal yin̈tilal Benjamín? xchi ebꞌ. Ix yalan Jehová: Ixiquec, xchi dꞌa ebꞌ. Yuj chiꞌ ix yicꞌanxi yip ebꞌ, axo dꞌa junxo cꞌu ix bꞌat ebꞌ yacꞌxi oval yedꞌ ebꞌ yin̈tilal Benjamín chiꞌ. An̈ejaꞌ bꞌaj ix och ebꞌ dꞌa sbꞌabꞌelal, ataꞌ ix ochxi ebꞌ. 25 An̈ejaꞌ dꞌa junelxo chiꞌ, ix elixta ebꞌ yin̈tilal Benjamín chiꞌ yacꞌ oval yedꞌ ebꞌ. 18 mil soldado yetisraelal ebꞌ chiꞌ ix smilchamoc. 26 Yuj chiꞌ, ix bꞌatxi ebꞌ soldado smasanil yedꞌ masanil ebꞌ chon̈abꞌ dꞌa scajnubꞌ Dios. Ix ochxi ebꞌ dꞌa cuscꞌolal dꞌa yichan̈ Jehová. Pilan cꞌu maj va jabꞌoc ebꞌ. Ix sn̈usan silabꞌ ebꞌ, ix yacꞌanpax silabꞌ ebꞌ yic juncꞌolal.

27-28 A dꞌa jun tiempoal chiꞌ, a teꞌ scaxail strato Jehová, ayecꞌ teꞌ dꞌa scajnubꞌ Dios chiꞌ. A vin̈aj Finees yuninal vin̈aj Eleazar, yixchiquin vin̈aj Aarón ayoch sacerdoteal. Ix scꞌanbꞌan ebꞌ israel chiꞌ dꞌa Jehová tato syal yacꞌanxi oval chiꞌ ebꞌ yedꞌ ebꞌ yin̈tilal Benjamín chiꞌ, mato man̈xo. Ix yalan Jehová dꞌa ebꞌ: Aqꞌuec oval yedꞌ ebꞌ, a qꞌuicꞌan svacꞌoch ebꞌ dꞌa yol e cꞌabꞌ, xchi dꞌa ebꞌ.

29 Yuj chiꞌ ix bꞌat juntzan̈ ebꞌ soldado yic Israel scꞌubꞌejel sbꞌa dꞌa spatictac chon̈abꞌ Gabaa chiꞌ. 30 Axo juntzan̈xo ebꞌ, ix bꞌat ebꞌ yacꞌ oval yedꞌ ebꞌ soldado yic Benjamín chiꞌ. Ix sbꞌoanoch sbꞌa ebꞌ yic syacꞌan oval ebꞌ yedꞌ ebꞌ aj Gabaa chiꞌ, icha ix yutej sbꞌa ebꞌ dꞌa sbꞌabꞌelal yedꞌ dꞌa schaelal. 31 Ix elixta ebꞌ yic Benjamín chiꞌ dꞌa yol chon̈abꞌ chiꞌ yacꞌ oval yedꞌ ebꞌ. Najat ix cot ebꞌ yacꞌ oval yedꞌ ebꞌ yetisraelal chiꞌ. Ix to val yacꞌ ganar ebꞌ smilancham 30-xo ebꞌ israel dꞌa yol sbꞌeal Betel yedꞌ dꞌa yol sbꞌeal Gabaa yedꞌ bꞌaj man̈xa mach cajan. 32 A val snaan ebꞌ to van yel ebꞌ yetisraelal ebꞌ chiꞌ dꞌay, van yacꞌan ganar ebꞌ snaani, icha ix yacꞌ ebꞌ dꞌa sbꞌabꞌelal yedꞌ dꞌa schaelal, palta ton̈ej ix stzꞌaquel sbꞌa ebꞌ soldado israel chiꞌ, yacbꞌan van scot ebꞌ dꞌa yoltac bꞌe najat dꞌa stiel chon̈abꞌ. 33 Ayic ix cꞌoch ebꞌ israel chiꞌ dꞌa slacꞌanil Baal-tamar, elan̈chamel ix sbꞌoxioch sbꞌa ebꞌ yacꞌ oval chiꞌ. Ix elpaxcot ebꞌ ix scꞌubꞌejel sbꞌa dꞌa spatictac chon̈abꞌ Gabaa chiꞌ. 34 Lajun̈eꞌ mil ebꞌ sicꞌbꞌilel dꞌa scal masanil soldado yic Israel ix och dꞌa chon̈abꞌ chiꞌ yacꞌ oval, yelcꞌolal ix te och yip oval chiꞌ. A ebꞌ yic Benjamín najat ix bꞌat chiꞌ, max snalaj ebꞌ tato van satel ebꞌ. 35 Yuj Jehová ix yacꞌ ganar ebꞌ israel chiꞌ dꞌa ebꞌ yic Benjamín chiꞌ. A dꞌa jun cꞌu chiꞌ, 25 mil yedꞌ 100-xo ebꞌ yin̈tilal Benjamín chiꞌ ix chami. Ichato chiꞌ ix yilanelta sbꞌa ebꞌ to van yacꞌji ganar ebꞌ.

36 Icha tic ix aj yoch oval chiꞌ. A dꞌa sbꞌabꞌelal, a ebꞌ soldado israel chiꞌ najat ix el ebꞌ dꞌa yichan̈ ebꞌ yic Benjamín chiꞌ, yujto yipcꞌolal yaj ebꞌ vin̈ ix scꞌubꞌejel sbꞌa dꞌa spatictac chon̈abꞌ Gabaa chiꞌ, yic satel jun chon̈abꞌ chiꞌ ebꞌ. 37 Axo ebꞌ soldado ix scꞌubꞌejel sbꞌa chiꞌ, elan̈chamel ix och ebꞌ dꞌa yol chon̈abꞌ chiꞌ, ix smilancham masanil ebꞌ anima chiꞌ ebꞌ. 38 A ebꞌ ix scꞌubꞌejcanel sbꞌa chiꞌ, lajtiꞌ yaj ebꞌ yedꞌ ebꞌ soldado yetbꞌeyum ebꞌ to ayic ol och ebꞌ dꞌa yol chon̈abꞌ chiꞌ, ol yacꞌ checlaj qꞌue stabꞌil ebꞌ, yic vachꞌ snachajel yuj ebꞌ chiꞌ to toxo ix yacꞌ ganar jun chon̈abꞌ chiꞌ ebꞌ. 39 A val yic van yel ebꞌ israel dꞌa ebꞌ yin̈tilal Benjamín chiꞌ, ix yilan jun nivan tabꞌ chiꞌ ebꞌ, yuj chiꞌ ix meltzaj ebꞌ, ix stecꞌbꞌan sbꞌa ebꞌ dꞌa yichan̈ ebꞌ yin̈tilal Benjamín chiꞌ.

Toxo ix cham 30 ebꞌ yuj ebꞌ yic Benjamín chiꞌ, yuj chiꞌ ix snaꞌ ebꞌ yic Benjamín chiꞌ to van yacꞌan ganar ebꞌ, icha ix yacꞌ ebꞌ dꞌa sbꞌabꞌelal. 40 A val dꞌa jun rato chiꞌ ix qꞌue juyuyoc tabꞌ dꞌa chon̈abꞌ chiꞌ. Ayic ix yilanbꞌat ebꞌ yic Benjamín chiꞌ dꞌa spatic, juyuyi sqꞌue stabꞌil schon̈abꞌ ebꞌ chiꞌ dꞌa chaan̈. 41 Icha val chiꞌ ix aj stecꞌbꞌan sbꞌa ebꞌ israel dꞌa yichan̈ ebꞌ yic Benjamín chiꞌ, ix te xivqꞌue ebꞌ yic Benjamín chiꞌ, ix nachajel yuj ebꞌ to van yacꞌji ganar ebꞌ. 42 Yuj chiꞌ ix el lemnaj ebꞌ dꞌa yichan̈ ebꞌ israel chiꞌ, ix bꞌatcan ebꞌ bꞌaj sbꞌatcan sbꞌeal tzꞌinan luum, palta maxtzac yal-laj yel ebꞌ yujto ix yamji ebꞌ. Ix miljicham ebꞌ yuj ebꞌ israel tzꞌelta dꞌa yol schon̈abꞌ ebꞌ chiꞌ. 43 Ix oymaj ebꞌ israel chiꞌ dꞌa spatictac ebꞌ. Icha val chiꞌ ix aj yacꞌji ganar ebꞌ smasanil, ix pechji ebꞌ yuj ebꞌ bꞌaj syicꞌ yip ebꞌ anima masanto dꞌa stojolal bꞌaj sjavi cꞌu dꞌa Gabaa chiꞌ

44 Ataꞌ ix cham 18 mil ebꞌ yin̈tilal Benjamín chiꞌ. 45 Axo juntzan̈xo ebꞌ, ix bꞌat ebꞌ elelal dꞌa tzꞌinan luum dꞌa stojolal qꞌuen tenam scuch Rimón, palta oyeꞌ mil ebꞌ chiꞌ ix cham dꞌa yoltac bꞌe. Ix ochn̈ej ebꞌ israel chiꞌ dꞌa spatic ebꞌ ixto can chiꞌ, masanto dꞌa Gidom. Ix acꞌji ganar ebꞌ yuj ebꞌ israel chiꞌ. Chabꞌto mil ebꞌ soldado chiꞌ ix cham yuj ebꞌ israel chiꞌ. 46 Yuj chiꞌ a dꞌa jun cꞌu chiꞌ, 25 mil ebꞌ soldado yic Benjamín chiꞌ ix chami, aton ebꞌ soldado te jelan dꞌa oval. 47 Palta 600 to ebꞌ vin̈ ix bꞌatcan elelal dꞌa tzꞌinan luum. Chan̈eꞌ ujal ix aj ebꞌ vin̈ dꞌa qꞌuen tenam scuchan Rimón chiꞌ. 48 Axo ebꞌ israel ix bꞌat ebꞌ dꞌa masanil chon̈abꞌ dꞌa yol yic Benjamín chiꞌ, ix xicancham masanil anima ebꞌ yedꞌ masanil nocꞌ molbꞌetzal nocꞌ. Ix sn̈usanpaxtzꞌa junjun chon̈abꞌ ebꞌ yedꞌ masanil tastac ay dꞌay.