A jun vin̈ levita yedꞌ ix yetbꞌeyum
19
Ayic mantalaj sreyal ebꞌ israel, ay jun vin̈ levita najattac yajcanbꞌat dꞌa tzalquixtac dꞌa yol yic Efraín. Ton̈ej scomon bꞌeyecꞌ vin̈. Ay jun ix aj Belén dꞌa yol yic Judá ix yicꞌ vin̈. 2 Palta ix mulan ix dꞌa yol scꞌabꞌ vin̈, yuj chiꞌ ix pax ix dꞌa spat vin̈ smam dꞌa Belén chiꞌ. Ayic toxo ix el schan̈il ujal yajecꞌ ix taꞌ, 3 ix cꞌochxi vin̈ levita chiꞌ smontejxi ix, talaj scotxi ix yedꞌ vin̈. Yedꞌnac jun vin̈ schecabꞌ vin̈ yedꞌ chavan̈ nocꞌ bꞌuru. Ix chaji vin̈ yuj ix dꞌa spat vin̈ smam chiꞌ. 4 An̈ejtonaꞌ ix chajipax vin̈ dꞌa tzalajcꞌolal yuj vin̈ smam ix chiꞌ. Ix yalan vin̈ smam ix chiꞌ to scan vin̈ yedꞌ ebꞌ. Yuj chiꞌ oxeꞌ cꞌual ix can vin̈ yedꞌ vin̈ schecabꞌ chiꞌ dꞌa spat vin̈ smam ix chiꞌ. Ix va ebꞌ, ix yucꞌan aꞌ ebꞌ, ix vaypax ebꞌ taꞌ. 5 Axo dꞌa schan̈il cꞌual jun, ix qꞌue vaan vin̈ dꞌa qꞌuin̈ibꞌalil yic smeltzaj ebꞌ vin̈ yalani. Ayic vanxo smeltzaj ebꞌ chiꞌ, ix yalan vin̈ sn̈iꞌ vin̈ chiꞌ dꞌay:—Vaec junoc eyooch ichato chiꞌ tzex bꞌati yic vachꞌ ay eyip ol ex bꞌeyoc, xchi vin̈.
6 Yuj chiꞌ ix em cꞌojan ebꞌ svaꞌi, ix yucꞌan aꞌ ebꞌ, ix och tean vin̈ sn̈iꞌ vin̈ chiꞌ dꞌay to scan junocxo acꞌval vin̈ dꞌa tzalajcꞌolal. 7 Vachꞌchom ix qꞌue lin̈an vin̈ yic smeltzaj vin̈ snaani, palta ix ochxi tean vin̈ sn̈iꞌ vin̈ chiꞌ dꞌay, yuj chiꞌ ix canxi vin̈.
8 Axo dꞌa yoil cꞌual jun, ix qꞌue vaan vin̈ dꞌa qꞌuin̈ibꞌalil yic smeltzaji, palta ix ochxi tean vin̈ sn̈iꞌ vin̈ chiꞌ dꞌay yic svaꞌi, ichato chiꞌ smeltzaj vin̈ yic vachꞌ ay yip vin̈ sbꞌat dꞌa yoltac bꞌe. Ix va ebꞌ yacbꞌan van sqꞌue cꞌu. 9 Axo ix qꞌue vaan vin̈ yic smeltzaj ebꞌ yalani. Ix yalanxi vin̈ sn̈iꞌ vin̈ chiꞌ dꞌay to toxo ix qꞌue cꞌu, ix ochxi tean vin̈ dꞌa vin̈ yic scanxi vin̈ dꞌa junxo acꞌval chiꞌ dꞌa tzalajcꞌolal, axo dꞌa junxo cꞌu, sacbꞌi sbꞌat ebꞌ. 10 Palta axo pax vin̈ levita chiꞌ, majxo yal-laj scꞌol vin̈ ix can dꞌa junxo acꞌval chiꞌ, palta ix meltzajxon̈ej vin̈ yedꞌ ix ix chiꞌ yedꞌ vin̈ schecabꞌ vin̈ chiꞌ yedꞌ chavan̈ nocꞌ sbꞌuru vin̈ ayoch stzꞌuum. Ayic ix cꞌoch ebꞌ dꞌa yichan̈ Jebús, aton chon̈abꞌ Jerusalén, vanxo yem cꞌu. 11 Ix yalan vin̈ checabꞌ chiꞌ dꞌa vin̈ levita chiꞌ:
—¿Tas am xa chi, tato tzon̈ can dꞌa chon̈abꞌ Jebús tic dꞌa jun acꞌval tic? xchi vin̈.
12 Ix yalan vin̈ levita chiꞌ icha tic:
—Maay, max on̈ canlaj vayan̈ dꞌa junoc chon̈abꞌ to man̈oc ebꞌ quetisraelal cajan dꞌay. Ol on̈ bꞌatn̈ej masanto ol on̈ cꞌoch dꞌa chon̈abꞌ Gabaa. 13 A dꞌa Gabaa chiꞌ ol on̈ vayoc, ma dꞌa Ramá, xchi vin̈.
14 Ix bꞌatn̈ej ebꞌ. Vanxo sqꞌuicꞌbꞌi ix cꞌoch ebꞌ dꞌa Gabaa chiꞌ, dꞌa yol yic Benjamín. 15 Ix elcan ebꞌ dꞌa yol bꞌe, ix bꞌatcan ebꞌ dꞌa Gabaa. Ataꞌ ol vay ebꞌ snaani. Ix bꞌat em cꞌojan ebꞌ dꞌa mercado dꞌa jun chon̈abꞌ chiꞌ, yujto malaj mach ix acꞌan sposado ebꞌ.
16 Axo yic vanxo sqꞌue acꞌval ix ecꞌ jun vin̈ icham vinac spetoj dꞌa smunlajel. A dꞌa tzalquixtac dꞌa yol yic Efraín ay schon̈abꞌ vin̈, palta cajan vin̈ dꞌa Gabaa dꞌa scal ebꞌ yin̈tilal Benjamín dꞌa jun tiempoal chiꞌ. 17 Ayic ix yilanoch jun vin̈ levita chiꞌ vin̈ icham vinac chiꞌ, ix scꞌanbꞌan vin̈ icha tic:
—¿Bꞌajtil ex coti, bꞌajpax tzex bꞌati? xchi vin̈ dꞌa vin̈.
18 Ix tacꞌvi vin̈ levita chiꞌ icha tic:
—Ton̈ej tzon̈ ecꞌ dꞌa tic. Co petoj dꞌa Belén. Van co pax dꞌa co chon̈abꞌ najat dꞌa tzalquixtac dꞌa yol yic Efraín. Ix on̈ ecꞌ jayeꞌ cꞌual dꞌa Belén chiꞌ, axo ticnaic jun, van co bꞌat dꞌa scajnubꞌ Jehová, palta malaj junoc mach tzꞌacꞌan co posado dꞌa tic. 19 Ay yan̈ nocꞌ in bꞌuru tic, ay pax co vael yedꞌ ix vetbꞌeyum tic yedꞌ vin̈ in checabꞌ tic. Malaj tas syacꞌ palta dꞌayon̈, xchi vin̈.
20 Ix tacꞌvi vin̈ icham vinac chiꞌ dꞌa vin̈:
—Malaj tas tza naꞌ, a in ol vacꞌ masanil tas ol och eyuj, max yal in cꞌol tzex can dꞌa mercado tic dꞌa dꞌacꞌvalil tic, xchi vin̈.
21 Yuj chiꞌ ix yicꞌbꞌat ebꞌ vin̈ icham chiꞌ dꞌa spat, ix yacꞌan svael nocꞌ sbꞌuru vin̈ chiꞌ vin̈. Ix lajvi chiꞌ, ix sbꞌican yoc ebꞌ, ix va ebꞌ, ix yucꞌan a ebꞌ. 22 Yacbꞌan van stzalaj ebꞌ, ix ja n̈ilnaj juntzan̈ ebꞌ vin̈ puch vinac aj chon̈abꞌ chiꞌ dꞌa spatictac teꞌ pat chiꞌ. Ix och ijan ebꞌ spon̈ubꞌtan̈an och teꞌ puerta chiꞌ, ix yalan ebꞌ dꞌa vin̈ icham vinac chiꞌ:
—Aqꞌuelta jun vin̈ ix vaycan chiꞌ dꞌayach. Co gana squixtej vin̈, xchi ebꞌ vin̈.
23 Ix elta vin̈ aj pat chiꞌ, ix yalan vin̈ dꞌa ebꞌ:
—Maay ex vetanimail. Man̈ e na eyacꞌ chucal chiꞌ dꞌa jun vin̈ anima ayecꞌ posado tic dꞌayin. 24 Ina jun ix visil cobꞌesto yedꞌ pax jun ix ix yedꞌnac jun vin̈ vinac tic. A ebꞌ ix tic, syal vacꞌanel ebꞌ ix dꞌayex yic tze cꞌulan tas e gana chiꞌ dꞌa ebꞌ ix, palta man̈ e cꞌulej chucal chiꞌ dꞌa jun vin̈ tic, xchi vin̈.
25 Palta maj schalaj yabꞌ ebꞌ vin̈ tas ix yal vin̈ icham vinac chiꞌ. Ix spechanelta ix yetbꞌeyum vin̈ levita chiꞌ dꞌa yol calle. Ix yixtan ix ebꞌ vin̈ ix ecꞌ acꞌval, masanto ix sacbꞌi, ichato chiꞌ ix yactancan ix ebꞌ vin̈. 26 Vanxo sacbꞌi, ix bꞌat ix dꞌa spat vin̈ icham vinac bꞌaj ayecꞌ vin̈ yetbꞌeyum chiꞌ, axo yic cꞌoch ix dꞌa tiꞌ pat chiꞌ, ix telvi ix, ix cham ix. 27 Ayic ix qꞌue vaan vin̈ levita chiꞌ dꞌa qꞌuin̈ibꞌalil, ix sjacan spuertail teꞌ pat chiꞌ vin̈ yic smeltzaji. Ix yilan vin̈, pacꞌjabꞌecꞌ ix yetbꞌeyum vin̈ chiꞌ dꞌa tiꞌ pat chiꞌ, jichancanbꞌat scꞌabꞌ ix dꞌa yibꞌan̈ smarcoal stiꞌ teꞌ pat chiꞌ. 28 Ix yalan vin̈ dꞌa ix:
—Qꞌuean̈ vaan, con̈, xchi vin̈ dꞌa ix.
Palta majxo tacꞌvoclaj ix. Ix yicꞌanqꞌue van snivanil ix chiꞌ vin̈, ix yacꞌanqꞌue vin̈ dꞌa yibꞌan̈ nocꞌ bꞌuru, ix yicꞌanbꞌat vin̈ dꞌa spat. 29 Ayic ix cꞌoch vin̈ dꞌa spat chiꞌ, ix xicanbꞌat snivanil ix yetbꞌeyum vin̈ chiꞌ. Lajchaveꞌ ix yutej vin̈ xicanbꞌati. Ix laj yacꞌanbꞌat vin̈ dꞌa masanil yol smacbꞌen ebꞌ yetisraelal. 30 A masanil ebꞌ ix ilan jun chiꞌ, ix yalan ebꞌ:
—Yictax quelnaccot dꞌa Egipto, mantalaj bꞌaj ix quil junoc icha jun tic. Yovalil scham val co naanec tas ol co cꞌulejec yedꞌoc, xchi ebꞌ.