Rut 1

A Yabꞌixal Ix

RUT

Ix bꞌat vin̈aj Elimelec yedꞌ yal yuninal dꞌa Moab

Ayic ayoch ebꞌ juez yajalil dꞌa chon̈abꞌ Israel, ix javi jun nivan vejel dꞌa chon̈abꞌ chiꞌ. A dꞌa jun tiempoal chiꞌ, ay jun vin̈ aj chon̈abꞌ Belén dꞌa yol yic Judá, ix bꞌat cajnaj vin̈ yedꞌ ix yetbꞌeyum yedꞌ chavan̈ yuninal dꞌa yol yic Moab yuj jun vejel chiꞌ. 2-4 A jun vin̈ chiꞌ, Elimelec sbꞌi vin̈, axo ix yetbꞌeyum vin̈, Noemí sbꞌi ix. Axo ebꞌ vin̈ yuninal vin̈ chiꞌ, aton vin̈aj Mahlón yedꞌ vin̈aj Quelión. Aj Efrata ebꞌ, Belén pax sbꞌi. Ix bꞌatcan cajan ebꞌ dꞌa yol yic Moab chiꞌ. Lajun̈eꞌ abꞌil ix ecꞌ ebꞌ taꞌ. Yacbꞌan ayecꞌ ebꞌ chiꞌ taꞌ, ix cham vin̈aj Elimelec yetbꞌeyum ix Noemí chiꞌ, ix can ix yedꞌ chavan̈ ebꞌ vin̈ yuneꞌ chiꞌ. Ix lajvi chiꞌ, ix och yetbꞌeyum ebꞌ vin̈ schavan̈il. Ix yicꞌlaj sbꞌa ebꞌ vin̈ yedꞌ chavan̈ ebꞌ ix aj Moab chiꞌ, jun ix scuch Orfa, axo junxo ix scuch Rut. 5 Axo ix aji, ix champax vin̈aj Mahlón yedꞌ vin̈aj Quelión chiꞌ, yuj chiꞌ ix can ix Noemí schꞌocoj, yujto ix cham ebꞌ vin̈ yuneꞌ ix chiꞌ, ix champax vin̈ yetbꞌeyum ix.

Ix meltzaj ix Noemí yedꞌ ix Rut dꞌa Belén

6 Axo ix yabꞌan ix Noemí chiꞌ to ix ocꞌxi scꞌool Jehová dꞌa chon̈abꞌ Israel, man̈xalaj vejel taꞌ. 7 Yuj chiꞌ ix meltzaj ix dꞌa Judá yedꞌ chavan̈ ebꞌ ix yalibꞌ chiꞌ. 8 Ayic van scot ebꞌ ix dꞌa yoltac bꞌe, ix yalan ix dꞌa ebꞌ ix yalibꞌ chiꞌ icha tic:

—A ticnaic, paxan̈ec dꞌa spat e mam e nun. A Jehová ol och eyedꞌoc yujto vachꞌn̈ej ix eyutej e bꞌa dꞌayin yedꞌ dꞌa ebꞌ vin̈ vuneꞌ. 9 Aocabꞌ Jehová ol och eyedꞌoc yic ol ochxoc eyetbꞌeyum, vachꞌn̈ej ol aj eyajxiecꞌ dꞌa e pat, xchi ix.

Ix tzꞌubꞌanelta stiꞌ ebꞌ ix yalibꞌ ix chiꞌ, ix syamanoch ebꞌ ix yoqꞌui. 10 Ix yalan ebꞌ ix icha tic:

—Max on̈ canlaj. Ol on̈ bꞌat edꞌoc dꞌa a chon̈abꞌ chiꞌ, xchi ebꞌ ix.

11 Ix yalanxi ix dꞌa ebꞌ ix:

—Ex valibꞌ, paxan̈ec dꞌa e pat. ¿Tasto val yuj tzex och tzacꞌan vuuj? Malaj vuneꞌ toxo tzꞌaji yic tzeyicꞌlan e bꞌa yedꞌoc. 12 Yuj chiꞌ ixiquec, paxan̈ec dꞌa e pat. Yujto a in tic, chichim inxo, man̈xo ol ochlaj vetbꞌeyum. Vachꞌchom sval ticnaic to a dꞌa jun acꞌval tic ol och vetbꞌeyum, olto aljoc vuneꞌ, ta xin chi, 13 ¿palta tom olto e tan̈vej sqꞌuibꞌ ebꞌ vin̈, yic ol eyicꞌan e bꞌa yedꞌ ebꞌ vin̈? ¿Tom yujn̈ej e tan̈vani, man̈xo ol och eyetbꞌeyum? Maay ex valibꞌ, man̈ ol yal-laj icha chiꞌ. A in tic, victaxon yaj yaelal ix yacꞌcot Jehová dꞌa vibꞌan̈. Ol am in te cus eyuuj tato ol vilaꞌ to ol eyabꞌ syail, xchi ix dꞌa ebꞌ ix yalibꞌ chiꞌ.

14 Ix ochxi ijan ebꞌ ix yoqꞌui. Ix lajvi chiꞌ, axo ix Orfa ix tzꞌubꞌancanelta stiꞌ ix, ix meltzaj ix. Axo pax ix Rut jun, ix cann̈ej ix yedꞌ ix. 15 Ix yalanxi ix Noemí chiꞌ dꞌa ix Rut chiꞌ icha tic:

—Tzam ilaꞌ to a ix a muꞌ toxo ix pax ix dꞌa schon̈abꞌ yedꞌ dꞌa sdiosal, ixic pax a ach tic, xchi ix.

16 Ix tacꞌvi ix Rut chiꞌ icha tic:

—Man̈ ach och ijan alan dꞌayin yic tzach vactejcani. Yaln̈ej bꞌaj ol ach bꞌatoc, ol in bꞌatn̈ej edꞌoc. A bꞌaj ol ach ajoc, ataꞌ ol in aj pax edꞌoc. A a chon̈abꞌ, a ol och in chon̈abꞌoc, a a Diosal, a ol ochpax in Diosaloc. 17 A bꞌaj ol ach chamoc, ataꞌ ol in champaxoc, ataꞌ ol in mucnajoc. Yacꞌocabꞌ in yaelal Jehová tato tzach vactejcani, masanto a chamel ol icꞌan co pojan co bꞌa, xchi ix Rut chiꞌ.

18 Axo ix yilan ix Noemí chiꞌ to ay val och dꞌa scꞌol ix Rut chiꞌ sbꞌat yedꞌoc, man̈xalaj tas ix yal ix dꞌa ix. 19 Ix bꞌeyxicot ebꞌ ix schavan̈il, masanto ix javi ebꞌ ix dꞌa Belén.

Ayic ix javi ebꞌ ix taꞌ, masanil ebꞌ anima ay taꞌ ix te sat scꞌol ebꞌ. Ix yalan ebꞌ ix ix icha tic:

—¿Mantoc a ix Noemí tic? xchi ebꞌ ix.

20 Yuj chiꞌ ix tacꞌvi ix dꞌa ebꞌ ix icha tic:

—Man̈xo eyal Noemí dꞌayin, palta Mara^* tzeyacꞌ in bꞌiej, yujto a Dios Syal Yuj Smasanil, aꞌ ix acꞌan in yaelal. 21 Ayic ix in bꞌat dꞌa tic, man̈ jantacoc tas ay dꞌayin, axo yic tzin meltzaj tic, man̈xalaj jabꞌoc. Icha chiꞌ ix el dꞌa scꞌool Jehová sjavi dꞌa vibꞌan̈, ¿tasto val yuj tzeyal Noemí chiꞌ dꞌayin yujto toxo ix ja dꞌa vibꞌan̈ vabꞌan syail yuj Dios Syal Yuj Smasanil? xchi ix.

22 Ichaton chiꞌ ix aj sjavi ix Noemí yedꞌ ix Rut dꞌa Belén chiꞌ, spetoj ebꞌ ix dꞌa yol yic Moab. A ix javi ebꞌ ix chiꞌ, van val syamchajoch sjochchaj ixim cebada.