2 Ix yal ix Rut chiꞌ dꞌa ix Noemí icha tic:

—Tzin tevi dꞌayach, comonoc tzin a chabꞌati, bꞌat vilaꞌ talaj ay bꞌaj van sjochchaj ixim cebada, talaj scha scꞌol ebꞌ vin̈ aj munlajel chiꞌ tzin sicꞌ jayeoc sjolom quic dꞌa spatictac ebꞌ vin̈, xchi ix.

—Ixic, xchi ix.

3 Ix bꞌat ix Rut chiꞌ bꞌaj van sjochchaj ixim cebada chiꞌ, ix och ijan ix sicꞌan ixim scan yuj ebꞌ vin̈ sjochan ixim chiꞌ. Cꞌocbꞌil val a jun munlajel bꞌaj ix cꞌoch ix chiꞌ yic vin̈aj Booz, aton jun vin̈ ayto yuj sbꞌa yedꞌ vin̈ xilbꞌa Elimelec chiꞌ. 4 Ayic van sicꞌan ixim ix, ix cꞌoch vin̈aj Booz chiꞌ, spetoj vin̈ dꞌa Belén. Ix yalan vin̈ dꞌa ebꞌ smunlajvum chiꞌ icha tic:

—Aocabꞌ Jehová ayoch eyedꞌoc, xchi vin̈.

—Yacꞌocabꞌ svachꞌcꞌolal Jehová dꞌayach, xchi ebꞌ munlajvum chiꞌ dꞌa vin̈.

5 Ix scꞌanbꞌan vin̈ dꞌa vin̈ ayoch yil ebꞌ smunlajvum chiꞌ:

—¿Mach ay yic jun ix cobꞌes chiꞌ? xchi vin̈.

6 Ix tacꞌvi vin̈:

—Aton jun ix aj Moab ix javi yedꞌ ix Noemí. 7 Ix scꞌan spermiso ix dꞌayin yic tzꞌecꞌ ix dꞌa scal ixim jochbꞌilxo, yic sicꞌanchaan̈ ixim scan yuj ebꞌ munlajvum tic ix. Atax dꞌa qꞌuin̈ibꞌalil ix javi ix, max och vaan ix sicꞌanchaan̈ ixim, ato val yicꞌan yip ix tic, xchi vin̈.

8 Yuj chiꞌ, ix yalan vin̈aj Booz chiꞌ dꞌa ix Rut chiꞌ icha tic:

—Ach ix, abꞌ tas ol valaꞌ: Man̈xo ach bꞌat a sicꞌchaan̈ ixim cebada tic dꞌa yic junocxo mach, palta canan̈ yedꞌ ebꞌ ix in checabꞌ tic. 9 A yedꞌ ebꞌ ix ol ach bꞌat bꞌaj sjochvi cebada ebꞌ vin̈ in munlajvum tic. Toxo ix val dꞌa ebꞌ vin̈ to malaj tas syal ebꞌ vin̈ dꞌayach. Ayic stacji a tiꞌ, syal icꞌanelta aꞌ ucꞌ dꞌa yol chꞌubꞌ bꞌaj syiqꞌuelta yic ebꞌ vin̈ in munlajvum chiꞌ, xchi vin̈ dꞌa ix.

10 Ayic ix yabꞌan ix icha chiꞌ, ix em n̈ojan ix dꞌa sat luum, ix yalan ix dꞌa vin̈ icha tic:

—¿Tas yuj te vachꞌ tzutej a cꞌool dꞌayin, ina to a in tic chꞌoc chon̈abꞌil in? xchi ix.

11 Ix tacꞌvi vin̈ dꞌa ix icha tic:

—Yujto ix vabꞌ masanil tas ix a cꞌulej dꞌa ix alibꞌ atax yic ix cham vin̈ etbꞌeyum, ix actejcan a mam a nun yedꞌ a chon̈abꞌ bꞌaj aljinac ach, ix ach ja dꞌa co chon̈abꞌ to man̈ ojtacoctaxon tic. 12 Aocabꞌ Jehová co Diosal a on̈ israel on̈ tic tzꞌacꞌan spac dꞌayach yuj tas ix a cꞌulej chiꞌ, syacꞌan svachꞌcꞌolal dꞌayach, aton co Diosal bꞌaj ix ach javi a col a bꞌa tic, xchi vin̈.

13 Ix tacꞌvi ix icha tic:

—Mamin, ste tzalaj in cꞌool yuj tas tzal tic dꞌayin, te vachꞌ tzutej a cꞌool dꞌayin vachꞌchom man̈ in lajanoc yedꞌ junoc ebꞌ ix a checabꞌ tic, xchi ix.

14 Ayic ix cꞌoch yorail sva ebꞌ, ix yavtejcot ix Rut chiꞌ vin̈ vael, ix yalan̈ vin̈ icha tic:

—Cotan̈, vaꞌan̈ quedꞌoc. Labꞌejem ixim a pan chiꞌ dꞌa scal vinagre tic, xchi vin̈.

Ix em cꞌojan ix dꞌa stzꞌey ebꞌ munlajvum chiꞌ, ix yacꞌan ixim maybꞌil cebada vin̈ dꞌa ix, yic scꞌux ix yedꞌ svael chiꞌ. Ix va ix masanto ix bꞌudꞌji ix, ayto maj lajvilaj yuj ix. 15 Ayic ix bꞌatxi ix sicꞌoj cebada chiꞌ, ix yalan vin̈aj Booz chiꞌ dꞌa ebꞌ vin̈ smunlajvum chiꞌ icha tic:

—A ixim somchajbꞌat dꞌa scal ixim manojaxo yaj chiꞌ, syal sicꞌan ixim ix. Man̈ eyacꞌ qꞌuixvelal ix. 16 Syal eyactancan junjunoc ixim manojaxo yaj chiꞌ yic sicꞌchaan̈ ixim ix. Man̈ e tumej ix, xchi vin̈.

17 Axo yic vanxo yem cꞌu, ix yactan ix sicꞌan ixim, ix smacꞌanel ixim ix, ay am oxeoc almul ixim ix yicꞌ ix. 18 Ix lajvi chiꞌ, ix meltzaj ix dꞌa yol chon̈abꞌ chiꞌ, ix schꞌoxan ix dꞌa ix yalibꞌ chiꞌ jantac ixim ix yicꞌ ix. Yedꞌnac pax ixim maybꞌil cebada chiꞌ ix dꞌa ix yalibꞌ chiꞌ, aton ixim maj lajvoclaj scꞌuxan ix chiꞌ.

19 Ix scꞌanbꞌan ix yalibꞌ ix chiꞌ dꞌay: ¿Mach ay yic bꞌaj ach xidꞌecꞌ chiꞌ? ¿Bꞌajtil ix a sicꞌ ixim cebada tic? Yacꞌocabꞌ svachꞌcꞌolal Jehová dꞌa yibꞌan̈ jun mach vachꞌ ix yutej sbꞌa chiꞌ dꞌayach, xchi ix.

Ix yalan ix Rut chiꞌ icha tic:

—A jun vin̈ ay yic bꞌaj in xidꞌecꞌ chiꞌ, Booz sbꞌi vin̈, xchi ix.

20 Ix yalanxi ix yalibꞌ ix chiꞌ icha tic:

—Yacꞌocabꞌ svachꞌcꞌolal Jehová dꞌa yibꞌan̈ vin̈aj Booz chiꞌ, yujto vachꞌ syutej spensar vin̈ dꞌayon̈ a on̈ pitzan on̈ tic, icha yutejnac spensar vin̈ dꞌa ebꞌ vin̈ co chamnac.

Ix yalanxi ix:

—A vin̈ chiꞌ te ayto cuj co bꞌa yedꞌ vin̈, yuj chiꞌ smoj ton scolvaj vin̈ dꞌayon̈, xchi ix.^*

21 Ix yalan ix Rut chiꞌ icha tic:

—Ix yalpax vin̈ dꞌayin icha tic: Syal a cotn̈ej a sicꞌ ixim, an̈ej yedꞌ ebꞌ ix in checabꞌ tic tzach bꞌati, masanto ol lajvoc munlajel tic, xchi vin̈ dꞌayin, xchi ix.

22 Ix tacꞌvi ix yalibꞌ ix chiꞌ: Vachꞌ jun ach valibꞌ, vachꞌ tato tzach bꞌatn̈ej yedꞌ ebꞌ ix schecabꞌ vin̈ chiꞌ, max ach bꞌatlaj dꞌa junocxo chꞌoc, yic vachꞌ malaj mach tzach tzuntzani, xchi ix.

23 Yuj chiꞌ ix bꞌatn̈ej ix Rut yedꞌ ebꞌ ix schecabꞌ vin̈aj Booz chiꞌ, masanto ix lajvi sjochchaj ixim cebada yedꞌ ixim trigo. Ayn̈ejecꞌ ix Rut yedꞌ ix yalibꞌ chiꞌ.