—Ach Rut, smoj tzin say junoc etbꞌeyum nu yic vachꞌ tzalajcꞌolal tzach aji. 2 A vin̈aj Booz, vin̈ ay schecabꞌ ebꞌ ix junn̈ej ix ach munlaj chiꞌ yedꞌoc, te ayto cuj co bꞌa yedꞌ vin̈. A dꞌa jun acꞌval tic ol bꞌat vin̈ acꞌojel matzꞌil cebada. 3 A ticnaic, icha tic ol a cꞌulej: Bꞌiquel a bꞌa, tzacꞌanecꞌ perfume dꞌayach, a a pichul vachꞌ tzacꞌochi, tzach bꞌat bꞌaj ayecꞌ vin̈ chiꞌ, palta man̈ a comon chꞌoxej a bꞌa ayic manto lajvi sva vin̈. 4 Ton̈ej tzilaꞌ bꞌajtil tzꞌecꞌ jichan vin̈ svayi, slajvi chiꞌ tzach ecꞌ jichan dꞌa yoctac vin̈, tzacꞌanqꞌue stiꞌ scꞌuꞌ vin̈ dꞌa yoctac chiꞌ dꞌa ibꞌan̈. Axo vin̈ ol alanoc tas ol a cꞌulej, xchi ix Noemí chiꞌ.

5 Ix tacꞌvi ix Rut chiꞌ icha tic:

—Ol in cꞌanabꞌajej masanil tas ix al tic, xchi ix.

6 Yuj chiꞌ ix bꞌat ix bꞌaj smunlaj vin̈aj Booz chiꞌ, ix scꞌanabꞌajej ix icha ix aj yalan ix yalibꞌ chiꞌ. 7 Ayic ix lajvi sva vin̈aj Booz chiꞌ yedꞌ yucꞌan aꞌ, te tzalajcꞌolal ix aj vin̈. Ix lajvi chiꞌ ix ecꞌ jichan vin̈ svay dꞌa slacꞌanil bꞌaj cun̈anecꞌ ixim sat cebada chiꞌ. Axo yic ix qꞌue acꞌval, te cꞌojancꞌolal ix aj scꞌoch ix Rut chiꞌ, ix yicꞌanchaan̈ scꞌuꞌ vin̈ ix dꞌa yoctac, ix ecꞌ jichan ix svay taꞌ. 8 Axo dꞌa chimilacꞌval ix qꞌue jucnaj vin̈, ix sutmaj vin̈ bꞌaj vaynac chiꞌ, axo ix yabꞌan vin̈ to ay jun ix ix jichanecꞌ dꞌa yoctac chiꞌ.

9 —¿Mach ach? xchi vin̈.

—A in Rut in a checabꞌ in. A ach tic, smoj tzach colvaj dꞌayin, yujto te ayto uj a bꞌa yedꞌ vin̈ vetbꞌeyum chamnac, xchi ix.

10 —Yacꞌocabꞌ svachꞌcꞌolal Jehová dꞌayach. A ticnaic, ix nachajel vuuj chajtil to vachꞌ a pensar, yujto tza nibꞌej sbꞌinajcan vin̈ etbꞌeyum chamnac. Qꞌuinaloc ta man̈ ichocta, syal icꞌan a bꞌa yedꞌ junocxo vin̈ to quelemto, vachꞌchom mebꞌaꞌ, ma bꞌeyum, an̈ej tato syal a cꞌool, palta maj a cꞌulej icha chiꞌ. 11 Man̈ acꞌ pensar, yujto a dꞌa yol co chon̈abꞌ tic, ojtacabꞌilxo to vachꞌ a bꞌinaji, yuj chiꞌ ol in cꞌanabꞌajej masanil tas tzal tic. 12 Yeltoni ayto vuj in bꞌa edꞌoc, palta ayto val junxo vin̈ te ayto uj a bꞌa yedꞌoc dꞌa vichan̈. 13 Canan̈ dꞌa tic dꞌa jun acꞌval tic. Ato qꞌuicꞌan svalaꞌ, tato scha scꞌol vin̈ chiꞌ ach yicꞌan icha sleyal. Tato icha chiꞌ, vachꞌ toni. Tato man̈ ol yal scꞌol vin̈ jun, svacꞌ in tiꞌ dꞌa yichan̈ Jehová ach vicꞌani. Vayan̈ ticnaic, axo yic ol sacbꞌoc, ol ach paxoc, xchi vin̈.

14 Yuj chiꞌ ix vaycan ix dꞌa yoctac vin̈aj Booz chiꞌ dꞌa jun acꞌval chiꞌ. Ayto sacbꞌi ix qꞌue vaan ix, yujto ix yal vin̈ dꞌa ix to malajocabꞌ mach tzꞌilani to ay junoc ix ix, ix ulecꞌ bꞌaj smunlaj vin̈ chiꞌ.

15 Ix yalan vin̈ dꞌa ix icha tic:

—Iqꞌuel a xotil chiꞌ, tza pixan sn̈iꞌ cꞌapac, xchi vin̈ dꞌa ix.

Ayic yambꞌil sn̈iꞌ cꞌapac xotil ix chiꞌ yuuj, ix secanem ixim cebada vin̈ dꞌa yool, ay am vaqueoc almul ixim ix yaqꞌuem vin̈. Ix schelanqꞌue vin̈ dꞌa sjolom sjen̈jabꞌ ix, ix yicꞌanbꞌat ixim ix dꞌa chon̈abꞌ chiꞌ.

16 Axo ix cꞌoch ix dꞌa ix yalibꞌ chiꞌ, ix scꞌanbꞌan ix:

—¿Tas ix a cꞌulej nu? xchi ix.

Ix yalan ix Rut chiꞌ tas ix yal vin̈aj Booz chiꞌ icha tic:

17 —A masanil ixim cebada tic ix yacꞌ vin̈ dꞌayin. Ix yalanpax vin̈ to max yal in javi dꞌayach tato malaj jabꞌoc tas vedꞌnac, xchi ix.

18 Ix yalan ix yalibꞌ ix chiꞌ:

—A ticnaic jun nu, tan̈vej tas ol ajelcꞌoch jun tic. Man̈ ol ecꞌ tiempo yuj vin̈. Ol sbꞌo yaj vin̈ ticnaic, xchi ix dꞌa ix Rut chiꞌ.