—Icha tic yalan Jehová co Diosal: A dꞌa pecaꞌ, a ebꞌ e mam eyicham, aton vin̈aj Taré yedꞌ chavan̈ yuninal, aton vin̈aj Abraham yedꞌ vin̈aj Nacor, ecꞌnac cajan ebꞌ dꞌa yichan̈bꞌat aꞌ nivan Éufrates, yalnac sbꞌa ebꞌ dꞌa comon dios. 3 Ataꞌ vicꞌnaccot vin̈aj Abraham chiꞌ, vacꞌannaquecꞌ cajan vin̈ dꞌa yol yic lum Canaán tic. Vacꞌannacpax jun yuninal vin̈, aton vin̈aj Isaac, te qꞌuibꞌnacchaan̈ sbꞌisul yin̈tilal vin̈aj Abraham chiꞌ yuj vin̈ yuninal chiꞌ. 4 Vacꞌannac chavan̈ yuninal vin̈aj Isaac chiꞌ, aton vin̈aj Jacob yedꞌ vin̈aj Esaú. Vacꞌannac lum tzalquixtac yic Seir dꞌa vin̈aj Esaú chiꞌ. Axo vin̈aj Jacob yedꞌ ebꞌ yuninal bꞌatnaccan cajan ebꞌ dꞌa Egipto. 5 Nivan tiempo ecꞌnac ebꞌ taꞌ, slajvi chiꞌ in checannacbꞌat vin̈aj Moisés yedꞌ vin̈aj Aarón dꞌa Egipto chiꞌ, vacꞌannaccot juntzan̈ nivac yaelal dꞌa yibꞌan̈ ebꞌ aj Egipto chiꞌ, masanto cꞌochnac stiempoal yic vicꞌannaquelta ebꞌ e mam eyicham chiꞌ taꞌ. 6 Ayic yelnaccot ebꞌ chiꞌ taꞌ, cotnac tzacꞌan ebꞌ aj Egipto chiꞌ dꞌa spatic ebꞌ yedꞌ scarruaje yedꞌ nocꞌ chej masanto dꞌa stiꞌ aꞌ Chacchac Mar. 7 Yuj chiꞌ in yavtej ebꞌ e mam eyicham chiꞌ: A inxo vacꞌoch jun qꞌuicꞌalqꞌuinal dꞌa scal ebꞌ yedꞌ ebꞌ tzacꞌan yuj ebꞌ chiꞌ, vacꞌannac spoj sbꞌa aꞌ mar dꞌa yichan̈ ebꞌ, palta vacꞌanxi yil-laj sbꞌa aꞌ, smucchajnaccanbꞌat ebꞌ aj Egipto chiꞌ yuj aꞌ. A ex tic, eyilnac val sicꞌlabꞌil tas vutejnac ebꞌ chiꞌ.

Najtil ecꞌnacpax ebꞌ e mam eyicham chiꞌ dꞌa tzꞌinan luum, 8 masanto ex vicꞌcot yedꞌ ebꞌ dꞌa lum yic ebꞌ amorreo dꞌa stojolal bꞌaj sjavi cꞌu dꞌa aꞌ Jordán tic. Ix yacꞌ oval ebꞌ eyedꞌoc, palta a in ix vacꞌoch ebꞌ dꞌa yol e cꞌabꞌ. Ix eyacꞌan ganar ebꞌ, ix eyiquejcan sluum ebꞌ. 9 A vin̈aj Balac yuninal vin̈aj Zipor, sreyal ebꞌ moabita, snibꞌej vin̈ yacꞌnac oval eyedꞌoc. Yuj chiꞌ schecbꞌat yicꞌumal vin̈aj Balaam vin̈, aton vin̈ yuninal vin̈aj Beor, yuj ex scatabꞌan vin̈ yalan vin̈. 10 Palta maj ex in cha catabꞌaj yuj vin̈aj Balaam chiꞌ, yuj chiꞌ axo vachꞌ lolonel yalnaccan vin̈ dꞌa eyibꞌan̈. Icha chiꞌ aj ex in colancanel dꞌa yol scꞌabꞌ vin̈. 11 Slajvi chiꞌ ex ecꞌta dꞌa yol aꞌ Jordán, ex javi dꞌa Jericó. A ebꞌ ay dꞌa Jericó chiꞌ yedꞌ ebꞌ amorreo, ebꞌ ferezeo, ebꞌ cananeo, ebꞌ hitita, ebꞌ gergeseo, ebꞌ heveo yedꞌ ebꞌ jebuseo, ix yacꞌ oval ebꞌ eyedꞌoc, palta a inxo ix vacꞌoch ebꞌ dꞌa yol e cꞌabꞌ. 12 Eyacꞌnac ganar chavan̈ sreyal ebꞌ amorreo, palta man̈ yujoc qꞌuen eyespada yedꞌ e jul-labꞌ, palta a in vacꞌnacbꞌat jun nivan xivelal dꞌa yibꞌan̈ ebꞌ, yuj chiꞌ el ebꞌ dꞌayex. 13 A in ix vacꞌ lum e lum bꞌaj ex aj tic, man̈oc ex ix eyavej tas avabꞌil dꞌa sat luum. Ix vacꞌan e pat bꞌaj tzex cajnaji, palta man̈oc ex ix e bꞌoqꞌuei. A ticnaic, vachꞌxo eyaji, tze lo sat teꞌ uva yedꞌ sat teꞌ olivo, man̈oc ex eyavejnac teꞌ, xchi Jehová chiꞌ.

14 —Yuj masanil juntzan̈ tic ayocabꞌ yelcꞌoch Jehová dꞌa yol e sat, tzeyacꞌanem e bꞌa dꞌay dꞌa smasanil e cꞌool. Iqꞌuequel comon dios dꞌa e cal, icha juntzan̈ bꞌaj yacꞌnaquem sbꞌa ebꞌ co mam quicham dꞌa yichan̈bꞌat aꞌ Éufrates yedꞌ dꞌa Egipto, an̈ejocabꞌ dꞌa Jehová bꞌaj tzex och ejmelal. 15 Palta tato malaj e gana tzeyal e bꞌa dꞌa Jehová chiꞌ jun, sicꞌlejec mach bꞌaj tzeyal e bꞌa, tato a dꞌa juntzan̈ dios bꞌaj yalnac sbꞌa ebꞌ co mam quicham dꞌa yichan̈bꞌat aꞌ Éufrates chiꞌ, mato dꞌa sdiosal ebꞌ amorreo cajan dꞌa tic, palta a inxo tic yedꞌ masanil ebꞌ cajan vedꞌ dꞌa yol in pat, a dꞌa Jehová ol cal co bꞌa, xchi vin̈aj Josué chiꞌ.

16 Ix tacꞌvi ebꞌ anima chiꞌ icha tic:

—Malaj bꞌaqꞌuin̈ ol cactejcan Jehová co Diosal yic scalan co bꞌa dꞌa juntzan̈ comon dios chiꞌ. 17 Yujto a Jehová chiꞌ icꞌannac on̈ elta dꞌa Egipto bꞌaj ochnac ebꞌ co mam quicham checabꞌvumal. Aꞌ bꞌoannac juntzan̈ tas satubꞌtac yilji dꞌa quichan̈. On̈ stan̈vani, on̈ scolanpaxi ayic on̈ cot dꞌa yoltac bꞌe yedꞌ on̈ ecꞌta dꞌa scal juntzan̈ chon̈abꞌ. 18 A Jehová ix icꞌanel masanil juntzan̈ chon̈abꞌ dꞌa quichan̈, icha ix yutej ebꞌ amorreo cajan dꞌa tic. A yuj masanil juntzan̈ tastac ix scꞌulej chiꞌ, yuj chiꞌ an̈ej dꞌay ol caqꞌuem co bꞌa, yujto co Diosal, xchi ebꞌ anima chiꞌ.

19 Ix tacꞌvi vin̈aj Josué chiꞌ dꞌa ebꞌ icha tic:

—Man̈ ol yal-laj eyacꞌanem e bꞌa dꞌa Jehová yujto max techaj yuuj ayic syilanoch e chucal, yujto ste cot yoval scꞌool tato tzex och ejmelal dꞌa comon dios, man̈ jabꞌoc syacꞌ nivancꞌolal e mul chiꞌ. 20 Vachꞌchom tzijtum tastac vachꞌ ix sbꞌo Jehová dꞌayon̈, palta tato tze patiquejeli, axo dꞌa juntzan̈ comon dios tzeyal e bꞌa, ol cot yoval scꞌool dꞌa eyibꞌan̈, ol ex sataneli, xchi vin̈.

21 Ix tacꞌvi masanil ebꞌ anima chiꞌ icha tic:

—Man̈ ol caqꞌuemlaj co bꞌa dꞌa juntzan̈ chiꞌ, an̈ej dꞌa Jehová ol caqꞌuem co bꞌa, xchi ebꞌ. 22 Yuj chiꞌ ix yalan vin̈aj Josué chiꞌ icha tic:

—An̈ejaꞌ ex tzeyacꞌoch e bꞌa testigoal to an̈ej dꞌa Jehová ol eyaqꞌuem e bꞌa, an̈ej dꞌay ol ex och ejmelal, xchi vin̈.

—Yeltoni, a on̈ ton scalaꞌ, xchi ebꞌ anima chiꞌ.

23 Yuj chiꞌ ix yalxi vin̈aj Josué chiꞌ icha tic:

—Tato icha chiꞌ an, iqꞌuequel masanil comon dios dꞌa e cal, tzeyacꞌanem e bꞌa dꞌa Jehová co Diosal, xchi vin̈.

24 Ix tacꞌvi ebꞌ icha tic:

—A on̈ tic yedꞌ val smasanil co cꞌool scalani to a dꞌa Jehová co Diosal ol caqꞌuem co bꞌa, ol co cꞌanabꞌajan masanil tas syalaꞌ, xchi ebꞌ.

25 A dꞌa jun cꞌu chiꞌ ix sbꞌo jun trato vin̈aj Josué yedꞌ ebꞌ yetisraelal dꞌa Siquem, ix yacꞌancan juntzan̈ checnabꞌil vin̈ yedꞌ juntzan̈ cꞌaybꞌubꞌal dꞌa ebꞌ. 26 Ix stzꞌibꞌancan juntzan̈ scꞌaybꞌubꞌal Jehová vin̈. Ix lajvi chiꞌ, ix schecan vin̈ bꞌalchajcot jun qꞌuen nivan qꞌueen, ix yacꞌancanoch qꞌuen vin̈ dꞌa yich jun teꞌ machꞌ dꞌa slacꞌanil scajnubꞌ Jehová. 27 Ix yalan vin̈ dꞌa masanil ebꞌ ayecꞌ chiꞌ:

—A dꞌa yichan̈ jun qꞌuen tic tzꞌalchajcan tas ix yal Jehová dꞌayon̈. Ayic ol quilan qꞌueen, ol co naancoti to man̈ ol co patiquejcanel-laj co Diosal, xchi vin̈.

28 Ix lajvi chiꞌ, ix yalan vin̈ to smeltzaj ebꞌ dꞌa smacbꞌen junjun.

29 Ix lajvi chiꞌ, ix cham vin̈aj Josué schecabꞌ Jehová, aton vin̈ yuninal vin̈aj Nun, 110 abꞌil sqꞌuinal vin̈ ayic ix cham vin̈. 30 Ix mucji vin̈ dꞌa Timnat-sera, dꞌa tzalquixtac dꞌa yol yic Efraín, dꞌa snorteal svitzal Gaas. 31 A ebꞌ chon̈abꞌ israel chiꞌ, ix scꞌanabꞌajej Jehová ebꞌ yacbꞌan pitzanto vin̈aj Josué yedꞌ ebꞌ yichamtac vinaquil chon̈abꞌ ilannac masanil tas scꞌulejnac Jehová dꞌa ebꞌ.

32 Ix mucjipax sbꞌaquil vin̈aj José yicꞌnaccot ebꞌ israel chiꞌ dꞌa Egipto. A dꞌa Siquem ix mucji, dꞌa lum smannac vin̈aj Jacob dꞌa ebꞌ yuninal vin̈aj Hamor smam vin̈aj Siquem. 100 plata yacꞌnac lum vin̈aj Jacob chiꞌ. A jun lugar chiꞌ ochnaccan yicoc ebꞌ yin̈tilal José.

33 Ix champax vin̈aj Eleazar yuninal vin̈aj Aarón. A dꞌa jun tzalan ix mucchaj vin̈, dꞌa sat slum vin̈aj Finees, aton vin̈ yuninal vin̈, aton lum acꞌbꞌil smacbꞌenoc vin̈ dꞌa tzalquixtac dꞌa yol yic Efraín.