A in tic te icham vinac inxo, toxo ol in chamoc. 3 A ex tic ix eyil tastac ix utaj juntzan̈ chon̈abꞌ tic yuj Jehová co Diosal, ix stecꞌbꞌej sbꞌa ebꞌ yacꞌan oval quedꞌoc, palta a Jehová chiꞌ ix acꞌan oval cuuj. 4 A inxo ix in puquecꞌ masanil lum luum tic dꞌayex. Man̈ocn̈ej lum yic juntzan̈ chon̈abꞌ toxo ix co satel ix in puqueqꞌui, palta ix in pucpaxecꞌ lum yic juntzan̈xo chon̈abꞌ aytoeqꞌui, scotn̈ej dꞌa aꞌ Jordán, masanto scꞌoch dꞌa aꞌ mar Mediterráneo bꞌaj tzꞌem cꞌu. 5 A Jehová ol icꞌanel masanil ebꞌ anima cajan dꞌa juntzan̈ lum chiꞌ, a exxo tic ol eyiquejcan lum icha ajnac yacꞌancan stiꞌ Jehová chiꞌ.

6 Aqꞌuec val eyip e cꞌanabꞌajan masanil tas syal cꞌaybꞌubꞌal stzꞌibꞌejnaccan vin̈aj Moisés, tzꞌacan val tze cꞌanabꞌajej icha val yaj stzꞌibꞌchajcan chiꞌ. 7 Yuj chiꞌ man̈ junn̈ejoc tzeyutej e bꞌa yedꞌ juntzan̈ anima aytoecꞌ cajan chiꞌ. Man̈ ex och ejmelal dꞌa sdiosal ebꞌ, man̈ eyacꞌpaxem e bꞌa dꞌay, ma e locan sbꞌi yic tzeyacꞌan e tiꞌ, man̈ eyacꞌpax bꞌinajoc. 8 Tzex ochn̈ej tzacꞌan yuj Jehová co Diosal, icha ix aj co bꞌeyn̈ejcoti. 9 A val Jehová ix icꞌanel juntzan̈ nivac chon̈abꞌ ay smay tic dꞌa quichan̈. Malaj mach syal stecꞌbꞌan sbꞌa dꞌa quichan̈ masanto ticnaic. 10 A dꞌa junoc on̈ ix el lemnaj mil ebꞌ cajcꞌool, yujto a Jehová co Diosal ix acꞌan oval cuuj, icha aj yacꞌannaccan stiꞌ dꞌayon̈. 11 Tzeyaꞌilej val e bꞌa e xajanan Jehová co Diosal. 12 Tzeyojtaquejel juntzan̈ tic: Tato tze patiquejcan el Dios, junxon̈ej tzeyutej e bꞌa yedꞌ juntzan̈ anima chiꞌ, slaj eyicꞌlan e bꞌa yedꞌ ebꞌ, 13 man̈xo ol yiqꞌuel juntzan̈ anima chiꞌ Jehová dꞌa eyichan̈, palta to ol ex ixtaj yuj ebꞌ ichoc junoc scan dꞌa junoc yaal, ya ol eyabꞌ yuj ebꞌ, icha val syail yoch nocꞌ tzꞌuum dꞌa yich co patic, ma icha syail sbꞌat junoc teꞌ qꞌuiix dꞌa yol co sat, masanto ol ex satel dꞌa sat lum luum te vachꞌ ix yacꞌ Jehová co Diosal tic dꞌayon̈.

14 A in tic toxo ol in chamoc, palta a ex tic eyojtac val sicꞌlabꞌil to ix eln̈ejcꞌoch masanil tas vachꞌ bꞌaj yacꞌnaccan stiꞌ Jehová co Diosal dꞌayon̈, malaj junoc maj elcꞌochi. 15-16 Palta icha val ix aj yelcꞌoch masanil tastac vachꞌ bꞌaj yacꞌnaccan stiꞌ Jehová chiꞌ dꞌayon̈, icha pax chiꞌ ol aj yacꞌancot masanil macan̈il yaelal albꞌilcan yuuj dꞌa eyibꞌan̈. Tato man̈ ol e cꞌanabꞌajej e cꞌulan strato Jehová co Diosal ix sbꞌo quedꞌoc, axo dꞌa comon dios ol ex och ejmelal, tato a dꞌa juntzan̈ chiꞌ ol eyaqꞌuem e bꞌa, ol cot yoval scꞌol Jehová dꞌayex, elan̈chamel ol ex satjoquel dꞌa sat jun lum luum te vachꞌ ix yacꞌ tic dꞌayon̈, xchi vin̈aj Josué chiꞌ.