6-8 Paxan̈ec dꞌa e luum yedꞌ jantac e bꞌeyumal, jantac nocꞌ e molbꞌetzal nocꞌ, jantac qꞌuen oro, qꞌuen plata, qꞌuen bronce yedꞌ qꞌuen hierro yedꞌ pax jantac pichul ix eyicꞌcanecꞌ dꞌa ebꞌ eyajcꞌool dꞌa oval. Tze pucanecꞌ masanil juntzan̈ chiꞌ dꞌa masanil ebꞌ eyetchon̈abꞌ aycan taꞌ. Yacꞌocabꞌ svachꞌcꞌolal Jehová co Diosal dꞌa eyibꞌan̈, xchi vin̈ dꞌa ebꞌ. Ix lajvi stacꞌlancan sbꞌa ebꞌ yedꞌ vin̈, ix meltzaj ebꞌ dꞌa slum acꞌbꞌilcan dꞌa ebꞌ yuj vin̈aj Moisés dꞌa yol yic Basán. Axo nan̈alxo ebꞌ yin̈tilal Manasés chiꞌ, a vin̈aj Josué chiꞌ ix acꞌancan slum ebꞌ dꞌa stojolal bꞌaj tzꞌem cꞌu dꞌa aꞌ Jordán yedꞌ ebꞌ yetisraelal. 9 Yuj chiꞌ ix elta ebꞌ chiꞌ dꞌa scal ebꞌ yetisraelal dꞌa Silo, dꞌa yol yic Canaán, yic smeltzaj ebꞌ dꞌa smacbꞌen dꞌa yol yic Galaad, lum acꞌbꞌilcan dꞌa ebꞌ yuj vin̈aj Moisés, icha ajnac yalan Jehová.

10 Ayic ix cꞌoch ebꞌ vin̈ soldado chiꞌ dꞌa aꞌ Jordán, dꞌa yolto smacbꞌen Canaán, ix sbꞌo jun altar ebꞌ, te nivan ix aji. 11 Ix cꞌoch yabꞌixal jun tic dꞌa juntzan̈xo ebꞌ yetisraelal ebꞌ chiꞌ, to ix sbꞌoqꞌue jun altar ebꞌ dꞌa smojonal Canaán dꞌa stojolal bꞌaj tzꞌem cꞌu dꞌa aꞌ Jordán. 12 Ayic ix yabꞌan ebꞌ icha chiꞌ, ix smolbꞌan sbꞌa ebꞌ smasanil dꞌa Silo, yic sbꞌat ebꞌ yacꞌ oval yedꞌ ebꞌ. 13 Ix checjibꞌat vin̈aj Finees yuninal vin̈aj sacerdote Eleazar dꞌa sbꞌabꞌelal yuj ebꞌ dꞌa Galaad bꞌaj ayecꞌ ebꞌ nan̈al yoxil in̈tilal chiꞌ. 14 Ix bꞌat lajun̈van̈ ebꞌ yajal yaj dꞌa junjun in̈tilal dꞌa scal ebꞌ israel yedꞌ vin̈. 15 Masanil juntzan̈ ebꞌ chiꞌ, ix bꞌatn̈ej ebꞌ dꞌa Galaad bꞌaj ayecꞌ nan̈al yoxil in̈tilal ebꞌ chiꞌ, ix yalan ebꞌ icha tic:

16 —A on̈ tic ix on̈ checjicot yuj ebꞌ schon̈abꞌ Jehová yic tzul cabꞌ dꞌayex yuj jun tas man̈ vachꞌoc ix e cꞌulej dꞌa Jehová co Diosal. ¿Tas yuj ix e patiquejel co Diosal chiꞌ, ix e bꞌoanqꞌue jun altar yuj eyicꞌanel e bꞌa dꞌay? 17 ¿Tom max e nacot jantac chucal ix uji dꞌa Peor? Aytocan stzꞌaubꞌal dꞌa quibꞌan̈ ticnaic. Yujn̈ej jun chiꞌ tzijtum ebꞌ quetchon̈abꞌ chamnac yuj Jehová. 18 Axo ticnaic tato a ex tic tze patiquejxiel Jehová, axo scot yoval scꞌool chiꞌ dꞌa quibꞌan̈ co masanil. 19 Tato tze naꞌ to max yal eyoch ejmelal dꞌa co Diosal dꞌa jun lum bꞌaj ayex ecꞌ tic, coyec quedꞌoc dꞌa lum bꞌaj ayecꞌ scajnubꞌ Jehová, tzeyicꞌcan e macbꞌen dꞌa co cal chiꞌ. Palta man̈ pitoc tzeyutej e bꞌa dꞌa Jehová yedꞌ dꞌayon̈, tze bꞌoanqꞌue junocxo altar dꞌa yichan̈ jun yic Jehová co Diosal chiꞌ. 20 Naeccoti tas scꞌulejnac vin̈aj Acán yuninal vin̈aj Zera ayic yicꞌannaccot juntzan̈ tas vin̈ ay yovalil yuj Jehová. Yuj smul vin̈ chiꞌ, cotnac yoval scꞌol Jehová dꞌa quibꞌan̈ co masanil. Man̈ocn̈ejlaj vin̈aj Acán chiꞌ chamnac yuj smul chiꞌ, xchi ebꞌ.

21 Ix lajvi chiꞌ ix tacꞌvi ebꞌ ix xidꞌecꞌ dꞌa oval chiꞌ dꞌa ebꞌ yajal yaj dꞌa scal ebꞌ yetisraelal chiꞌ icha tic:

22 —A Jehová Syal Yuj Smasanil, yojtac to ix co bꞌo jun altar chiꞌ, man̈ yujoc co paticaneli, man̈ yujoc pax quicꞌanel co bꞌa dꞌay. Yojtac Jehová chiꞌ tas yaji. Comonoc snachajpaxel eyuuj. Tato yuj co pitan co bꞌa dꞌay, mocabꞌ on̈ eyacꞌ nivancꞌolal. 23 Tato yuj quicꞌanel co bꞌa dꞌa Jehová, yuj chiꞌ ix co bꞌoqꞌue jun altar chiꞌ, ma yuj co n̈usantzꞌa silabꞌ dꞌa yibꞌan̈, ma yuj cacꞌan ixim trigo co silabꞌoc, ma cacꞌan juntzan̈xo silabꞌ yic juncꞌolal dꞌa yibꞌan̈, aocabꞌ Jehová tzꞌacꞌan yovalil dꞌayon̈.

24 Palta ix co bꞌoqꞌue jun altar chiꞌ, yujto ix co naꞌ talaj ay jun cꞌual ol yal ebꞌ eyin̈tilal dꞌa ebꞌ quin̈tilal icha tic: Malaj eyalan eyic dꞌa Jehová co Diosal a on̈ israel on̈ tic, 25 yujto a Jehová acꞌannaccan aꞌ Jordán tic co mojonoc eyedꞌoc a ex yin̈tilal ex Rubén tic yedꞌ ex yin̈tilal Gad tic, yuj chiꞌ malaj eyalan eyic dꞌa Jehová, qꞌuinaloc xchi ebꞌ. Tato icha chiꞌ, a ebꞌ syamancanoch vaan ebꞌ quin̈tilal chiꞌ yic max yal sbꞌa ebꞌ dꞌa Jehová. Man̈xa am yelcꞌoch Jehová chiꞌ dꞌa ebꞌ quin̈tilal chiꞌ. 26 Yuj chiꞌ ix co bꞌoqꞌue jun altar chiꞌ, man̈ yujoc co n̈usan silabꞌ yedꞌ cacꞌan juntzan̈xo silabꞌ dꞌa Jehová. 27 Palta to chꞌoxnabꞌil tzꞌajcan dꞌa co cal eyedꞌoc yedꞌ dꞌa scal ebꞌ quin̈tilal, yic vachꞌ a on̈ tic syalpax cacꞌan servil Jehová yedꞌ coch dꞌa yichan̈ co n̈usan co silabꞌ yedꞌ co silabꞌ yuj co mul yedꞌ co silabꞌ yic co juncꞌolal yedꞌoc. Yuj chiꞌ a ebꞌ eyin̈tilal chiꞌ, man̈ ol yal-laj yalan ebꞌ dꞌa ebꞌ quin̈tilal chiꞌ icha tic: A ex tic malaj eyalan eyic dꞌa Jehová, man̈ xchioc ebꞌ. 28 Yuj chiꞌ ix co naꞌ talaj ay mach tzꞌalan icha chiꞌ dꞌayon̈, ma dꞌa ebꞌ quin̈tilal dꞌa bꞌaqꞌuin̈, syal co tacꞌvi dꞌa ebꞌ icha tic: Ilec val, a ebꞌ co mam quicham ix sbꞌoqꞌue jun altar tic ebꞌ, lajan yilji icha jun yic Jehová, man̈ yujoc sn̈usji silabꞌ, ma junocxo macan̈ silabꞌ, palta an̈ej to aycanoch chꞌoxnabꞌilal dꞌa co cal eyedꞌoc, xco chama. 29 Colvajocabꞌ Jehová quedꞌoc yic malaj bꞌaqꞌuin̈ ol co pitej co bꞌa dꞌay, ma ol cactejcani, sco bꞌoanqꞌue junocxo altar yic sco n̈usantzꞌa silabꞌ yedꞌ cacꞌan ixim trigo ofrendail, ma cacꞌan juntzan̈xo silabꞌ. Palta to a dꞌa altar yic Jehová co Diosal ay dꞌa yichan̈ scajnubꞌ, an̈ej taꞌ smoj tzꞌacꞌji silabꞌ chiꞌ, xchi ebꞌ.

30 Ayic ix yabꞌan vin̈aj sacerdote Finees yedꞌ ebꞌ yajalil chon̈abꞌ, aton ebꞌ yajal yaj dꞌa junjun in̈tilal, tas ix yal ebꞌ yin̈tilal Rubén, ebꞌ yic Gad yedꞌ nan̈alxo ebꞌ yin̈tilal Manasés, vachꞌ ix yabꞌ ebꞌ. 31 Ix lajvi chiꞌ, a vin̈aj Finees chiꞌ ix alan dꞌa ebꞌ icha tic:

—A ticnaic jun, toxo ix nachajel cuuj to ayoch Jehová quedꞌoc, yujto a ex tic man̈ pitoc ix eyutej e bꞌa dꞌay, yuj chiꞌ malaj yaelal ol yacꞌcot dꞌa quibꞌan̈.

32 Ix lajvi chiꞌ, a vin̈aj Finees chiꞌ yedꞌ ebꞌ ajun yedꞌoc ix stacꞌlancan sbꞌa ebꞌ yedꞌ ebꞌ chiꞌ, ix meltzaj ebꞌ. Ix el ebꞌ dꞌa yol yic Galaad, ix cꞌochxi ebꞌ dꞌa yol yic Canaán, bꞌaj ayecꞌ ebꞌ yetisraelal ebꞌ chiꞌ. Ix yalan ebꞌ dꞌa ebꞌ aycan chiꞌ masanil tas ix yal juntzan̈xo ebꞌ chiꞌ. 33 Ix scha scꞌol ebꞌ tas ix yalcot juntzan̈xo ebꞌ chiꞌ, yuj chiꞌ ix yalan vachꞌ lolonel ebꞌ dꞌa Dios yuj ebꞌ. Atax taꞌ man̈xalaj tas ix yal ebꞌ yuj yacꞌan oval ebꞌ yedꞌ ebꞌ yin̈tilal Rubén yedꞌ ebꞌ yic Gad, yic bꞌat satjiel ebꞌ yuj ebꞌ. 34 Yuj chiꞌ a ebꞌ yin̈tilal Rubén yedꞌ ebꞌ yic Gad chiꞌ, ix yacꞌ scuch jun altar chiꞌ ebꞌ, Chꞌoxnabꞌil. Ix yalan ebꞌ: A jun altar tic, chꞌoxnabꞌil tzꞌajcan dꞌa co cal to a Jehová, co Diosal toni, xchi ebꞌ.