4 Dꞌa sbꞌabꞌelal ix och suerte dꞌa jun macan̈ ebꞌ levita yin̈tilal vin̈aj Coat, aton ebꞌ sacerdote yin̈tilal vin̈aj Aarón. 13 chon̈abꞌ ix acꞌji dꞌa ebꞌ, aton juntzan̈ chon̈abꞌ ay dꞌa yol yic ebꞌ yin̈tilal Judá, dꞌa yol yic ebꞌ yin̈tilal Simeón yedꞌ dꞌa yol yic ebꞌ yin̈tilal Benjamín. 5 An̈ejaꞌ juntzan̈xo ebꞌ coatita chiꞌ, ix acꞌji lajun̈exo chon̈abꞌ dꞌa ebꞌ dꞌa yol yic ebꞌ yin̈tilal Efraín, dꞌa yol yic ebꞌ yin̈tilal Dan yedꞌ dꞌa yol yic nan̈alxo ebꞌ yin̈tilal Manasés.

6 Ix acꞌjipax 13 chon̈abꞌ dꞌa ebꞌ levita yin̈tilal Gersón dꞌa yol yic ebꞌ yin̈tilal Isacar, dꞌa yol yic ebꞌ yin̈tilal Neftalí yedꞌ pax dꞌa yol yic nan̈alxo ebꞌ yin̈tilal Manasés ay dꞌa Basán. 7 Ix acꞌjipax 12 chon̈abꞌ dꞌa ebꞌ levita yin̈tilal Merari, dꞌa yol yic ebꞌ yin̈tilal Rubén, dꞌa yol yic ebꞌ yin̈tilal Gad yedꞌ dꞌa yol yic ebꞌ yin̈tilal Zabulón.

8 Aton juntzan̈ chon̈abꞌ chiꞌ ix acꞌji dꞌa ebꞌ yin̈tilal Leví yuj ebꞌ yetisraelal dꞌa suerteal. Masanil juntzan̈ chon̈abꞌ tic, ix acꞌjican slumal dꞌa spatictac icha val ajnac yalancan Jehová dꞌa vin̈aj Moisés. 9 A juntzan̈ chon̈abꞌ ol bꞌinaj tic, a dꞌa yol yic ebꞌ yin̈tilal Judá ay yedꞌ dꞌa yol yic ebꞌ yin̈tilal Simeón. 10 A ebꞌ levita yin̈tilal Coat yin̈tilal pax Aarón, a ebꞌ ix bꞌabꞌlaj chaan juntzan̈ chon̈abꞌ tic. 11 A dꞌa tzalquixtac dꞌa yol yic ebꞌ yin̈tilal Judá, ix acꞌji Quiriat-arba dꞌa ebꞌ, aton Hebrón schon̈abꞌcan vin̈aj Arba smam yicham vin̈aj Anac. 12 Axo pax masanil smacbꞌen jun chon̈abꞌ chiꞌ yedꞌ yaldeail acꞌbꞌilxo dꞌa vin̈aj Caleb yuninal vin̈aj Jefone.

13-19 A Hebrón chiꞌ, aton dꞌay scol sbꞌa ebꞌ smacꞌancham junoc anima. A ebꞌ yin̈tilal Aarón chiꞌ ix yicꞌpax juntzan̈ chon̈abꞌ tic ebꞌ: Libna, Jatir, Estemoa, Holón, Debir, Aín, Juta yedꞌ Bet-semes. Aton bꞌalun̈eꞌ chon̈abꞌ tic. Axo dꞌa yol yic ebꞌ yin̈tilal Benjamín, chan̈eꞌ chon̈abꞌ ix acꞌji dꞌa ebꞌ, aton Gabaón, Geba, Anatot yedꞌ Almón. Yuj chiꞌ a chon̈abꞌ ix yicꞌ ebꞌ yin̈tilal vin̈aj sacerdote Aarón, 13 dꞌa smasanil.

20-26 Axo dꞌa juntzan̈xo ebꞌ levita yin̈tilal pax Coat chiꞌ, ix acꞌji juntzan̈xo chon̈abꞌ dꞌa ebꞌ dꞌa yol yic ebꞌ yin̈tilal Efraín. A dꞌa tzalquixtac, ix acꞌji Siquem dꞌa ebꞌ, aton bꞌaj syal scolan sbꞌa ebꞌ smacꞌancham junoc anima. Ix acꞌjipax Gezer, Kibsaim yedꞌ pax Bet-horón dꞌa ebꞌ, chan̈eꞌ juntzan̈ chon̈abꞌ tic. Axo pax dꞌa yol yic ebꞌ yin̈tilal Dan, chan̈eꞌ chon̈abꞌ ix acꞌji dꞌa ebꞌ: Aton Elteque, Gibetón, Ajalón yedꞌ Gat-rimón. Axo pax dꞌa yol yic nan̈alxo ebꞌ yin̈tilal Manasés, chabꞌ chon̈abꞌ ix acꞌji dꞌa ebꞌ, aton Taanac yedꞌ Gat-rimón. Yuj chiꞌ lajun̈eꞌ chon̈abꞌ ix scha ebꞌ yin̈tilal Coat, ato syal jay macan̈ yaj ebꞌ.

27-33 Axo pax ebꞌ levita yin̈tilal Gersón, chabꞌ chon̈abꞌ ix acꞌji dꞌa ebꞌ dꞌa yol yic nan̈alxo ebꞌ yin̈tilal Manasés. A juntzan̈ chon̈abꞌ chiꞌ, aton Golán yedꞌ Beestera dꞌa yol yic Basán. A dꞌa chon̈abꞌ Golán chiꞌ syal scolan sbꞌa ebꞌ smacꞌancham junoc anima. Axo pax dꞌa yol yic ebꞌ yin̈tilal Isacar chan̈eꞌ chon̈abꞌ ix acꞌjipax dꞌa ebꞌ, aton Cisón, Daberat, Jarmut yedꞌ En-ganim. Axo dꞌa yol yic ebꞌ yin̈tilal Aser, an̈ejaꞌ chan̈eꞌ chon̈abꞌ ix acꞌjipax dꞌa ebꞌ, aton Miseal, Abdón, Helcat yedꞌ Rehob. Axo pax dꞌa yol yic ebꞌ yin̈tilal Neftalí, oxeꞌ chon̈abꞌ ix acꞌjipax dꞌa ebꞌ, aton Cedes dꞌa yol yic Galilea, bꞌaj syal scolan sbꞌa ebꞌ smacꞌancham junoc anima. Ix acꞌjipax chon̈abꞌ Hamot-dor yedꞌ Cartán dꞌa ebꞌ. Yuj chiꞌ a masanil chon̈abꞌ ix yicꞌ ebꞌ yin̈tilal Gersón, 13 dꞌa smasanil, ato syal jay macan̈ yaj ebꞌ.

34-40 Ayto ebꞌ levita ixto cani, aton ebꞌ yin̈tilal Merari. Ix acꞌji smacbꞌen ebꞌ dꞌa yol yic ebꞌ yin̈tilal Zabulón, chan̈eꞌ chon̈abꞌ ix acꞌji dꞌa ebꞌ: Aton Jocneam, Carta, Dimna yedꞌ Nahalal. Axo dꞌa yol yic ebꞌ yin̈tilal Rubén, chan̈eꞌ pax chon̈abꞌ ix acꞌji dꞌa ebꞌ: Aton Beser, Jahaza, Cademot yedꞌ Mefaat. Axo dꞌa yol yic ebꞌ yin̈tilal Gad, an̈ejaꞌ chan̈eꞌ chon̈abꞌ ix acꞌji dꞌa ebꞌ: Aton Ramot dꞌa yol yic Galaad, Mahanaim, Hesbón yedꞌ Jazer. A dꞌa Ramot chiꞌ syal scolan sbꞌa ebꞌ smacꞌancham junoc anima. 12 chon̈abꞌ ix yicꞌ ebꞌ yin̈tilal Merari, yuninal Leví, icha jay macan̈ yaj ebꞌ.

41 A jantac chon̈abꞌ ix acꞌjican dꞌa ebꞌ yin̈tilal Leví chiꞌ dꞌa yol smacbꞌen ebꞌ yetisraelal, 48 dꞌa smasanil. 42 Junjun juntzan̈ chon̈abꞌ chiꞌ, ix cann̈ej slumal dꞌa spatictac bꞌaj syal sva nocꞌ smolbꞌetzal nocꞌ ebꞌ.

43 Icha val chiꞌ ix aj yacꞌjican lum luum dꞌa ebꞌ israel yuj Jehová, aton masanil lum yacꞌnac stiꞌ yacꞌan dꞌa ebꞌ smam yicham ebꞌ. Yuj chiꞌ ix cajnajcan ebꞌ dꞌa sat lum smasanil. 44 Ix eln̈ejcꞌoch bꞌaj yacꞌnac stiꞌ Jehová chiꞌ, ix can ebꞌ taꞌ dꞌa juncꞌolal dꞌa masanil jun luum chiꞌ. Majxo yal-laj stecꞌbꞌan sbꞌa ebꞌ ajcꞌol dꞌa yichan̈ ebꞌ, yujto a Jehová ix acꞌanoch ebꞌ dꞌa yol scꞌabꞌ ebꞌ israel. 45 Malaj junoc bꞌelan̈ lolonel bꞌaj yacꞌnac stiꞌ Jehová chiꞌ dꞌa ebꞌ israel to maj elcꞌochoc.