Ix ecꞌ ebꞌ israel dꞌa yol aꞌ Jordán
3
Axo dꞌa junxo cꞌu te acꞌvalto, ix bꞌat vin̈aj Josué yedꞌ ebꞌ yetisraelal, ix el ebꞌ dꞌa Sitim, ix cꞌoch ebꞌ dꞌa stiꞌ aꞌ Jordán, ix och vaan ebꞌ dꞌa stiꞌ aꞌ chiꞌ, majto ecꞌlaj ebꞌ. 2 Axo dꞌa schabꞌjial ix ecꞌ ebꞌ yajalil chon̈abꞌ dꞌa masanil campamento, 3 ix yalan ebꞌ dꞌa masanil ebꞌ yetisraelal chiꞌ icha tic: A val ol eyilan yecꞌ teꞌ scaxail strato Jehová co Diosal yuj ebꞌ sacerdote, ebꞌ yin̈tilalcan vin̈aj Leví, tzex och tzacꞌan yuj teꞌ. 4 Icha chiꞌ ol aj eyojtacaneli, bꞌajtil ol ex bꞌatoc, yujto mantalaj junoc ex eyojtac jun bꞌe chiꞌ, man̈ ex te cꞌoch dꞌa slacꞌanil teꞌ, najat tzacꞌanto e bꞌat yuj teꞌ, icha am junoc kilómetro tzacꞌan ex dꞌa spatic teꞌ, xchi ebꞌ.5 Ix yalan vin̈aj Josué dꞌa ebꞌ anima chiꞌ: A ticnaic, sacbꞌitejec e bꞌa yujto a qꞌuicꞌan schꞌox Jehová tas satubꞌtac yilji dꞌa co cal, xchi vin̈. 6 Ix yalanpax vin̈ dꞌa ebꞌ sacerdote: Iqꞌuecbꞌat teꞌ scaxail trato, tzex bꞌabꞌlaj yuj masanil ebꞌ anima tic, xchi vin̈. Yuj chiꞌ ix sbꞌachanbꞌat teꞌ ebꞌ, ix bꞌabꞌlaj ebꞌ yuj ebꞌ anima chiꞌ.
7 Ix lajvi chiꞌ, ix yalan Jehová dꞌa vin̈aj Josué chiꞌ: A ticnaic ol in chael yich ach vicꞌanchaan̈ yedꞌ opisio, yic vachꞌ syil ebꞌ to ayinn̈ejoch edꞌoc, icha ix in ochn̈ej yedꞌ vin̈aj Moisés. 8 Tzalan dꞌa ebꞌ sacerdote tzꞌicꞌanbꞌat teꞌ scaxail trato tic: Ayic ol ex cꞌoch dꞌa aꞌ Jordán chiꞌ, ol ex bꞌat jabꞌoc dꞌa yol aꞌ, ol ex can tecꞌtecꞌ dꞌa yol aꞌ chiꞌ, xa chi dꞌa ebꞌ, xchi Jehová. 9 Ix yalan vin̈aj Josué dꞌa ebꞌ israel chiꞌ: Nitzeccot e bꞌa tzeyabꞌan tas syal Jehová co Diosal. 10 A yuj tas ol eyil ticnaic, ataꞌ ol nachajel eyuuj to ayecꞌ Dios pitzan dꞌa co cal. A Jehová chiꞌ ol icꞌanel ebꞌ cananeo, ebꞌ hitita, ebꞌ heveo, ebꞌ ferezeo, ebꞌ gergeseo, ebꞌ amorreo yedꞌ ebꞌ jebuseo dꞌa quichan̈. 11 Axo ticnaic jun, a teꞌ scaxail strato Jehová, aton Dios ay yic masanil yolyibꞌan̈qꞌuinal tic, ol bꞌabꞌlaj bꞌachchajbꞌat teꞌ dꞌa yol aꞌ Jordán dꞌa quichan̈. 12 Yuj chiꞌ tze siqꞌuel jayvan̈oc ebꞌ yajalil chon̈abꞌ ol och yopisio, junjun ebꞌ dꞌa junjun in̈tilal. 13 Ayic ol yacꞌanem yoc ebꞌ sacerdote dꞌa yol aꞌ chiꞌ, aton ebꞌ edꞌjinac teꞌ scaxail strato Jehová, aton Dios ay yic masanil yolyibꞌan̈qꞌuinal tic, ol spojan sbꞌa aꞌ, a aꞌ tzꞌemul dꞌa yibꞌan̈, ol vanaj aꞌ, icha n̈ajabꞌ ol yutoccan sbꞌa aꞌ, xchi vin̈.
14 Yuj chiꞌ ix yicꞌanqꞌue van scꞌael ebꞌ, yic scꞌaxpajecꞌ ebꞌ dꞌa aꞌ Jordán chiꞌ, bꞌabꞌel ebꞌ sacerdote edꞌjinac teꞌ scaxail trato chiꞌ yuj ebꞌ. 15 Te ayqꞌue aꞌ, tzꞌel aꞌ dꞌa stitac smelemal, aton val dꞌa stiempoal sjochchaj ixim trigo. An̈ej yic ix yacꞌanem yoc ebꞌ sacerdote chiꞌ dꞌa yol aꞌ, 16 elan̈chameln̈ej ix och vaan aꞌ yemuli. Najatto ix smolbꞌejcan sbꞌa aꞌ dꞌa stojolal chon̈abꞌ Adán masanto ix cꞌoch aꞌ dꞌa chon̈abꞌ Saretán. Axo pax aꞌ ix can dꞌa yalan̈ chiꞌ jun, ix bꞌatn̈ej aꞌ masanto ix lajvibꞌat aꞌ dꞌa yol aꞌ mar Muerto. Ichaton chiꞌ ix aj spojan sbꞌa aꞌ Jordán chi. Ix ecꞌ ebꞌ israel dꞌa staquin̈al dꞌa yol aꞌ chiꞌ, dꞌa yichan̈cot chon̈abꞌ Jericó. 17 Axo ebꞌ sacerdote edꞌjinac teꞌ scaxail strato Jehová chiꞌ, ix ochcan vaan ebꞌ dꞌa snan̈al yol sbꞌe aꞌ chiꞌ, taquin̈ lum bꞌaj ix can tecꞌtecꞌ ebꞌ chiꞌ, axo masanil ebꞌ israel van scꞌaxpajecꞌ ebꞌ.