4 Yuj chiꞌ, ix yavtancot ebꞌ vin̈ lajchavan̈ chiꞌ vin̈aj Josué chiꞌ, aton ebꞌ vin̈ ix siqꞌuel vin̈ chiꞌ. 5 Ix yalan vin̈ dꞌa ebꞌ vin̈ icha tic: Eman̈ec dꞌa snan̈al yol sbꞌe aꞌ chiꞌ, tzex cꞌoch dꞌa yichan̈ teꞌ scaxail strato Jehová co Diosal, junjun ex tzeyicꞌqꞌueta junjunoc qꞌuen qꞌueen, junjun dꞌa junjun in̈tilal, lajchaveꞌ syil sbꞌa qꞌueen. 6 A qꞌuen qꞌueen chiꞌ yic ol nachajcot bꞌaqꞌuin̈ ayic ol scꞌanbꞌan ebꞌ eyuninal dꞌayex: ¿Tas syalelcꞌoch juntzan̈ qꞌuen qꞌueen tic? ta xchi ebꞌ, 7 ol eyalan dꞌa ebꞌ icha tic: A syalelcꞌoch juntzan̈ qꞌuen qꞌueen tic to ayic scꞌaxpajnac ecꞌta ebꞌ sacerdote yedꞌ teꞌ scaxail strato Jehová, ix spojan sbꞌa aꞌ Jordán dꞌa yichan̈ teꞌ caxa chiꞌ. Yuj chiꞌ a qꞌuen qꞌueen tic nanabꞌilcot yajcan qꞌueen dꞌa tas ujinac dꞌa tic dꞌayon̈ israel on̈ tic, xe cham dꞌa ebꞌ, xchi vin̈aj Josué chiꞌ. 8 Ix scꞌanabꞌajan ebꞌ vin̈ scꞌulan tas ix yal vin̈ chiꞌ. Ix em ebꞌ vin̈, ix yicꞌanqꞌueta junjun qꞌuen qꞌueen chiꞌ ebꞌ vin̈ dꞌa yol aꞌ, junjun qꞌuen dꞌa junjun ebꞌ yin̈tilal Israel, ix yicꞌanbꞌat qꞌuen ebꞌ vin̈ dꞌa campamento, ix smolbꞌancan qꞌuen ebꞌ vin̈ icha ix aj yalan Jehová dꞌa vin̈aj Josué chiꞌ. 9 Ix schecan vin̈aj Josué chiꞌ molbꞌajpax lajchavexo qꞌuen dꞌa yol sbꞌe aꞌ Jordán chiꞌ, bꞌaj ix och vaan ebꞌ sacerdote dꞌa yol sbꞌe aꞌ yedꞌ teꞌ scaxail trato chiꞌ, a juntzan̈ qꞌuen qꞌueen chiꞌ ix cann̈ej qꞌueen taꞌ.

10-13 Ayic lin̈anoch ebꞌ sacerdote dꞌa snan̈al yol sbꞌe aꞌ Jordán chiꞌ, ix scꞌanabꞌajan ebꞌ israel tas ix schec Jehová yal vin̈aj Josué chiꞌ. Masanil ix elcꞌoch icha ix yutej yalancan vin̈aj Moisés dꞌa vin̈aj Josué chiꞌ. Ix ecꞌ ebꞌ vin̈ soldado yic yin̈tilal Rubén, ebꞌ vin̈ yic Gad yedꞌ nan̈alxo ebꞌ vin̈ yic Manasés. Yedꞌnac syamcꞌabꞌ ebꞌ vin̈ yic oval, ix bꞌabꞌlaj ebꞌ vin̈ dꞌa yichan̈ ebꞌ anima chiꞌ, icha ix aj yalancan vin̈aj Moisés chiꞌ. Ay am junoc 40 mil ebꞌ vin̈ ix bꞌabꞌlaj dꞌa yichan̈ ebꞌ schon̈abꞌ Jehová chiꞌ, ix cꞌoch ebꞌ vin̈ smasanil dꞌa yichan̈cot Jericó. Elan̈chamel ix laj ecꞌ ebꞌ israel chiꞌ. Ayic ix ecꞌcan masanil ebꞌ anima chiꞌ, ichato chiꞌ ix ecꞌ ebꞌ sacerdote yedꞌ teꞌ scaxail strato Jehová chiꞌ. Ix lajvi chiꞌ, ix bꞌabꞌlajxi ebꞌ dꞌa yichan̈ masanil anima chiꞌ. 14 A dꞌa jun cꞌu chiꞌ, a Jehová ix icꞌanchaan̈ vin̈aj Josué chiꞌ dꞌa yopisio dꞌa yichan̈ ebꞌ anima chiꞌ, yic nivan tzꞌaj yelcꞌoch vin̈ dꞌa yol sat ebꞌ dꞌa masanil tiempo, icha ix yutej sbꞌa ebꞌ dꞌa vin̈aj Moisés.

15 Ayic ix lajvi yecꞌcan ebꞌ dꞌa yol aꞌ Jordán chiꞌ, ix yalan Jehová dꞌa vin̈aj Josué chiꞌ icha tic: 16 Al dꞌa ebꞌ sacerdote edꞌjinac teꞌ scaxail trato chiꞌ to tzꞌecꞌta ebꞌ dꞌa yol aꞌ chiꞌ, xchi dꞌa vin̈.

17 Ix yalan vin̈: Qꞌuean̈eccot dꞌa yol aꞌ, xchi vin̈. 18 Ixn̈ej qꞌueul ebꞌ dꞌa stiꞌ aꞌ, ix cotxi usnaj aꞌ molancan dꞌa yibꞌan̈ chiꞌ, ix laj bꞌatxican aꞌ dꞌa yol sbꞌe icha yic manto vanaj aꞌ.

19 Ayic ix ecꞌ ebꞌ israel dꞌa yol aꞌ Jordán chiꞌ, dꞌa val slajun̈il cꞌual yoch bꞌabꞌel uj, ix cꞌoch ebꞌ dꞌa Gilgal, dꞌa yichan̈cot Jericó dꞌa stojolal bꞌaj sjavi cꞌu. 20 Ataꞌ ix schec molbꞌajcan qꞌuen qꞌueen chiꞌ vin̈aj Josué, qꞌuen ix yicꞌqꞌueta ebꞌ dꞌa yol aꞌ Jordán chiꞌ. 21 Ix yalan vin̈ dꞌa ebꞌ icha tic: Tato ol scꞌanbꞌej ebꞌ eyuninal dꞌayex dꞌa bꞌaqꞌuin̈ tas syalelcꞌoch juntzan̈ qꞌuen qꞌueen tic, 22 tzeyalan dꞌa ebꞌ yuj tas ix aj quecꞌta dꞌa yol aꞌ Jordán tic, 23 yedꞌ tas ix aj spojan sbꞌa aꞌ, yujto a Jehová co Diosal ix alani to dꞌa taquin̈al ix aj quecꞌta, icha ix yutej spojan sbꞌa aꞌ Chacchac Mar yuuj ayic quecꞌnaccoti ayic quelnac dꞌa Egipto. 24 Icha chiꞌ ix yutej Jehová yic vachꞌ syojtaquejel masanil anima ay dꞌa yolyibꞌan̈qꞌuinal tic to nivan yelcꞌoch spoder, yic ay yelcꞌochpax Jehová co Diosal dꞌa yol co sat dꞌa masanil tiempo, xchi vin̈aj Josué chiꞌ.